Juan 20

Jesús kawamunqan

Mateo 28.1-10; Marcos 16.1-8; Lucas 24.1-12

1Semäna qallanan alliqnam#20.1 Tsay junaqqa domingum karqan. María Magdalena tsaka tsakallana Jesústa pampayanqan sepultüraman aywarqan. Chaykurmi sepultüra tsaparaq rumi wititsishqata tarirqan. 2Tsayta rikaykurmi cörrilla kutirqan Simón Pedruta y Jesús kuyanqan discïpuluta willananpaq. Chaykurmi willarqan: <<¡Jesúspa ayantam apayashqa! ¡Manam musyayätsu mayman apayanqanta!>>

3Tsaynam Jesús kuyanqan kaq discïpuluwan Pedro Jesústa pampayanqan kaqman aywayarqan. 4Cörrilla aywarmi jukaq discïpulun Pedruta llalliskir puntata charqan. 5Sepultüra punkullapita qawaykurmi säbanasllana qoturaykaqta rikarqan. 6Qepanta Simón Pedro chaykurnam ruriman yaykuskir säbanasllatana paypis tarirqan. 7Jesúspa umanta watäyanqan tëlatapis shumaq doblashqa uman kanqan läduchö churaraykaqtam tarirqan. 8Tsaypitaraqmi punta chaq discïpulunpis ruriman yaykurqan. Paypis tsaykunata rikaykurmi creyirqan. 9Tsaynö kaykaptinpis manam tantiyayarqanraqtsu kawamunanpaq Dios Yayapa palabran ninqanta. 10Tsaypitanam kaykäyanqan wajiman kutikuyarqan.

María Magdalenata Jesús yuripunqan

Marcos 16.9-11

11Maríanam pamparanqan kaqman kutiykur punkuchö waqar quëdarqan. Waqaykanqanchö sepultüraman qawaykurmi 12rikarqan ishkay angelkuna yuraq llatapashqa kaykäyaqta. Jukaqmi Jesúspa uman kanqan kaqchö jamaykarqan y jukaqnam chakin kanqan kaqlächö jamaykarqan. 13Tsay angelkunam Maríata tapuyarqan: <<¿Imanirtan waqaykanki?>>

Tsaymi nirqan: <<Señornïpa ayantam apayashqa. Manam musyätsu mayman churayanqantapis>>.

14Tsaynö nikar tumaykurmi Jesústa rikaykurqan. Peru pay kanqanta manam tantiyarqantsu. 15Jesúsnam tapurqan: <<¿Imanirtan waqaykanki? ¿Pitatan ashiykanki?>>

Tsaynö tapuptinmi huertachö aruq runa kanqanta yarpar María nirqan: <<Taytay, maymanpis Jesúspa ayanta apashqa karqa qorikamunäpaq willaykallämay>>.

16Jesúsnam nirqan: <<¡María!>>

Tsaynö niptinmi María tumaykur nirqan: <<¡Raboni!>>

Hebreo idiömachömi raboni ninanqa yachatsikuq ninan.

17Jesúsnam nirqan: <<Ama achkumaytsu. Taytä kaqman manaraqmi aywashkäraqtsu. Kanan aywar discïpulükunata willay Taytä kaqman kutikunäpaqna kanqanta. Noqapa Taytämi qamkunapapis Taytaykikuna y Diosnïmi qamkunapapis Diosnikikuna>>.

18Tsaynö niptinmi María Magdalena sas aywarqan Jesús yuripunqanta y imata ninqankunatapis discïpulunkunata willananpaq.

Discïpulunkunata Jesús yuripunqan

Mateo 28.16-20; Marcos 16.14-18; Lucas 24.36-49

19Tsay paqasmi discïpulunkuna juk wajichö qorikashqa kaykäyarqan. Israel runakunapa autoridäninkunapita mantsakurmi punkuta trancapukushqa kaykäyarqan. Tsaynö kaykäyaptinmi Jesús yuriskir nirqan: <<Alli kawakuy qamkunachö kaykullätsun>>.

20Tsaynö nirmi makinta y costädunta rikätsirqan. Jesústa rikaykurmi discïpulunkuna alläpa kushikuyarqan. 21Jesúsnam yapay nirqan: <<Alli kawakuy qamkunachö kaykullätsun. Taytä kachamanqannöllam noqapis qamkunata kachayaq>>.

22Tsaynö nirmi paykuna kaqman pükaykur nirqan: <<Espíritu Santuta chaskiyay. 23Pitapis jutsankunapita perdonayaptikim Dios Yaya perdonanqa. Peru mana perdonayaptikiqa Dios Yayapis manam perdonanqatsu>>.#20.23 Kay versïculuchömi nin: Qamkuna poderyuqmi kayanki creyimaqkunata Dios Yaya perdonanqanta willayänaykipaq y mana creyimaqkunata Dios Yaya mana perdonanqanta willayänaykipaq.#Mat. 16.19; 18.18.

Jesúswan Tomás tinkunqan

24Discïpulunkuna qorikashqa kaykaqman Jesús chänanpaq Millïshu niyanqan Tomás manam karqantsu. Paymi Jesúspa apostolnin karqan. 25Tomáswan tinkuskirnam discïpulu majinkuna willayarqan: <<¡Señor Jesucristum yuripayämashqa!>>

Tomásnam nirqan: <<Clävu uchkunqan makinta manaraq rikarqa, tsayman dëdüta manaraq jatir y tuksiyanqan costädunman makïta manaraq jatirqa manam creyishaqtsu>>.

26Tsaypita juk semänatanam discïpulunkuna yapay juk wajiman qorikäyarqan. Tsaychömi Tomáspis kaykarqan. Punkuta trancapukushqa kaykäyaptinmi Jesús puntankunaman illaqpita yuriskir saludarninkuna nirqan: <<¡Alli kawakuy qamkunachö kaykullätsun!>>

27Tomástanam nirqan: <<Tomás, makïta rikay. Clävus uchkunqanman dëduykita jatiy. Tuksiyämanqan costädüman makikita jatiy. ¿Imanirtan creyinkitsu?>>

28Tomásnam nirqan: <<¡Señorllä y Diosllä!>>

29Jesúsnam nirqan: <<¿Rikämarraqku creyinki? ¡Mana rikämarpis creyiqkunam kushishqa kayanqa!>>

Kay libruta imapaq qellqanqan

30Discïpulunkuna rikaykäyaptinmi atska milagrukunata Jesús rurarqan. Tsaykuna manam llapantsu kay libruchö qellqashqa kaykan. 31Kay libruchö qellqashqa kaykaqkunam Jesús salvamaqnintsik Cristo kanqanta y Diospa Tsurin kanqanta creyiyänaykipaq y creyir mana ushakaq kawayta tariyänaykipaq.

Currently Selected:

Juan 20: qxn

Highlight

Copy