Juan 9

Qapra runata Jesús kutikätsinqan

1Jerusalénchö Jesús puriykarmi yurinqanpita qapra runata rikarqan. 2Tsaymi discïpulunkuna tapuyarqan: <<Rabí, ¿imanirtan kay runa qapra yurishqa? ¿Kikinpa jutsanpitaku o mamanpa y papäninpa jutsanpitaku?>>

3Jesúsnam nirqan: <<Manam kikinpa ni mamanpa ni taytanpa jutsanpitatsu kay runa qapra yurishqa, sinöqa Dios Yaya kutikätsinqanta runakuna musyayänanpaqmi. 4Junaq kanqanyaq kachamaqnï munanqanta rurashun#9.4a Wakin griego copiakunachömi rurashaq niyan.. Paqaspaqa manam pipis aruyta puëdinnatsu.#9.4b Junaq kanqanyaq nirqa kay patsachö kanqäyaq nirqanmi. Paqaspaq parlarqa wañuyninpaqmi parlarqan. Tsaynöpam Jesucristo nirqan kay patsachö kanqanyaq Dios Yaya llapan munanqanta cumplinanpaq kanqanta. 5Kay patsachö kanqäyaqqa aktsim kä>>.#9.5 Aktsim kä nirqa runakunata salvaq kanqanta y Dios munanqannö kawananpaq tantiyatsikuq kanqantam Jesús nirqan.#Sal. 27.1; 119.105; Prov. 6.23; Isa. 49.6; Juan 8.12.

6Tsaynö nirmi toqayninwan qetäta ruraskir tsay qaprapa ñawinta Jesús shupaykurqan. 7Tsaypitanam nirqan: <<Siloé estanquiman aywar mayllakuy>>.

(Siloéqa kachamushqa ninanmi.)

Jesús ninqannö mayllakuskirmi ñawin kutikashqana kutirqan. 8Tsaymi vecïnunkuna y reqiqninkuna niyarqan: <<¿Kay runaqa manaku limushnata mañakuq qapra?>>

9Wakinmi niyarqan: <<Aw, paymi>>.

Wakin kaqnam niyarqan: <<Manam paytsu. Peru pay rikuqllam>>.

Tsaynö niyaptinmi kikin nirqan: <<Tsay qapra runaqa noqam kä>>.

10Tsaymi tapuyarqan: <<¿Imanötan ñawiki kutikashqa?>>

11Paynam nirqan: <<Jesús shutiyuq runam qetäta ruraskir ñawïta llushimushqa. Tsaypitanam Siloé estanquichö mayllanäpaq mandamashqa. Nimanqannö mayllaskirmi kananqa rikäna>>.

12Tsaymi tapuyarqan: <<¿Maychötan tsay kutikätsishuqniki runa kaykan?>>

Paynam nirqan: <<Manam musyätsu>>.

Kutikashqa runata fariseukuna tapuyanqan

13Tsaypitanam qapra kanqanpita kutikashqa runata fariseukunaman pushayarqan. 14Qetäta ruraskir Jesús kutikätsinqan junaqqa jamay junaqmi karqan. 15Tsaymi imanö kutikanqanta fariseukuna tapuyarqan. Tapuyaptinmi nirqan: <<Juk runam ñawïta qetäwan llushimushqa. Mayllakuskirmi kananqa rikäna>>.

16Tsaymi wakin fariseukuna niyarqan: <<Tsay runaqa manam Dios Yaya kachamunqantsu. Dios Yaya kachamunqan runa karqa jamay junaqta respitanmanmi>>.

Wakin kaq fariseukunanam niyarqan: <<Peru yarpäyanqaykinö jutsayuq karqa ¿imanötan kutikätsinman?>>

Tsaynö ninakurmi kikinkunapura piñanakuyarqan.

17Tsaymi kutikashqa runata yapay tapuyarqan: <<Tsay kutikätsishuqniki runa ¿pï kanqantatan yarpanki?>>

Paynam nirqan: <<Payqa profëtam>>.

18Tsaynö niptinmi Israel runakunapa autoridäninkuna tsay runa qapra kanqanta creyiyarqantsu. Tsaymi mamantawan taytanta qayaskatsimur 19tapuyarqan: <<¿Kay runa wamraykikunaku? ¿Rasunpaku qapra yurirqan? ¿Imanötan kutikashqa?>>

20Taytanwan mamannam niyarqan: <<Awmi, wamräkunam. Rasunpam yurinqanpita qapra kashqa. 21Peru manam musyayätsu imanö kutikanqanta ni pï kutikätsinqantapis. Payqa yashqa runam. Kikinta tapuyay>>.

22Autoridäkunapita mantsakurmi tsaynö niyarqan. Autoridäkunam willanakushqana kayarqan mayqanpis <<Jesúsqa Dios Yaya kachamunqan Cristum>> niq kaqtaqa sinagögapita qarquyänanpaq.#9.22 Sinagögapitam autoridäkuna pitapis qarquyaq imaypis manana kutinanpaq. Tsaymi kutiqnatsu Dios Yayata adorananpaq ni runakuna qorikäyaptin parlananpaq. 23Tsaypita mantsakurmi mamanwan taytan niyarqan: <<Payqa yashqa runam. Kikinta tapuyay>>.

24Tsaymi qapra kanqanpita kutikashqa runata autoridäkuna yapay qayaskatsir tapuyarqan: <<Dios Yayapa puntanchömi niyaq. Rasunpa kaqta willayämay. Musyayämi tsay kutikätsishuqniki runa jutsasapa kanqanta>>.

25Tsay runanam nirqan: <<Noqaqa manam musyätsu jutsasapa kanqanta o jutsannaq kanqantapis. Peru noqam musyä qapra kanqäpita allina rikanqäta>>.

26Tsaynö niptinmi yapay tapuyarqan: <<¿Imatatan rurashqa ñawiki kutikänanpaq?>>

27Tsaymi nirqan: <<Qamkunata willayashkaqnam. Willayaptiqpis manam creyiyämankitsu. ¿Imanirtan yapay yapay tapuyämanki? ¿Qamkunapis paypa discïpulun kaytaku munaykäyanki?>>

28Tsaynö niptinmi piñakur niyarqan: <<Qammi paypa discïpulunqa kanki. Noqakunaqa Moiséspa discïpulunkunam kayä. 29Musyayämi Moisésta Dios Yaya parlapanqanta. Tsay kutikätsishuqniki runapaqqa ni maypita shamunqantapis manam musyayätsu>>.

30Tsaynö niyaptinmi nirqan: <<Tsay runa ñawïta kutikaykätsiptinqa ¿imanirtan Dios Yayapita shamunqanta tantiyayankitsu? 31Musyantsikmi jutsasapakunataqa Dios Yaya mana cäsunqanta. Peru paypita mantsakur munanqannö kawakuqkunatam sïqa yanapan.#Prov. 15.29. 32Manam imaypis wiyashkantsiktsu yurinqanpita qaprata pipis kutikätsinqanta. 33Tsay runa Dios Yayapita mana shamushqa karqa manam ni ima milagrutapis ruranmantsu>>.

34Autoridäkunanam niyarqan: <<¡Qamqa alläpa jutsayuqmi yurishkanki! ¿Tsaynö kaykarku yachatsiyämayta munaykanki?>>

Tsaynö nirmi sinagögapita tsay runata qarquyarqan.

Jesúsman mana creyikur qapranö kayanqan

35Tsay kutikätsinqan runata sinagögapita qarquyanqantam Jesús musyaskirqan. Tsay runawan tinkuskirnam nirqan: <<¿Runapa Tsurinman#9.35 Wakin griego copiakunachömi Dios Yayapa Tsurinman niyan. creyinkiku?>>

36Niptinmi nirqan: <<Taytay, ¿pitan tsay runa? Payman creyikunäpaq willaykallämay>>.

37Jesúsnam nirqan: <<Rikashkankinam. Tsay runaqa noqam kä>>.

38Tsaynö niptinmi Jesústa adorar nirqan: <<Taytay, qammanmi creyikullä>>.

39Jesúsnam nirqan: <<Noqam kay patsaman runakunata juzganäpaq shamushkä. Juzgaptïmi qaprakuna rikäyanqa y rikaqkunana qaprayäyanqa#9.39 Tsaynö nirmi Jesús nirqan: Juzgaptïmi mana tantiyaqkuna tantiyakuyanqa y yachaqkunanam tantiyakuyanqanatsu.>>.#Isa. 6.10; 42.19; Mar. 4.12; Juan 12.40.

40Tsaynö ninqanta wiyaykurmi tsaychö kaykaq wakin fariseukuna niyarqan: <<Tsaypunqa ¿noqakunach qapra kayä?>>

41Jesúsnam nirqan: <<Qapra karqa manam jutsayuqtsu kayankiman. Peru <allim rikä> nirmi jutsayuq kaykäyanki>>.#9.41 Fariseukuna yachaq kaykarqa Jesústa Dios Yaya kachamunqantam tantiyayanman karqan. Peru mana tantiyarmi jutsayuq kayarqan. Tsaymi yachaq kaykarpis mana creyiyaptin qapra runaman Jesucristo iwalatsirqan.

Currently Selected:

Juan 9: qxn

Highlight

Copy