Lucas 16
16
Sabïdu mayoralman Jesús iwalatsinqan
1Mastam discïpulunkunata Jesús nirqan: <<Juk rïcupash mayoralnin kanaq. Tsay mayoralpaqshi rïcu runata willayänaq imaykanta ushanqanta. 2Tsayta musyaskirshi mayoralninta qayaskir ninaq: <Imaykätapis ushanqaykitam runakuna willayämashqa. Kananpitaqa mananam mayoralnïnatsu kanki. Llapan cuentata entregamänaykipaq previnikuy>.
3<<Mayoralnash yarpachakur ninaq: <Patronnï qarqamaptinqa ¡imataraq rurashaq! Chakrachö aruyta manam puëdïtsu y limushna mañakuytaqa penqakümi. 4¡A yä, kanan imata ruranäpaqpis musyänam! ¡Patronnï qarqamaptin runakuna wajinkunaman chaskiyämänanpaqmi kaynö rurashaq!>
5<<Tsaynö yarpachakuskirshi patronninpa dëbiqninkunata juk juklla qayaskatsir punta kaqta tapunaq: <Patronnïta ¿aykatatan dëbinki?>
6<<Tsay runanash ninaq: <Ishkay pachak (200) läta aceitinmi dëbï>. Mayoralnash ninaq: <Pachak (100) lätallatana päganaykipaq kay recïbuchö firmay>.
7<<Jukaq dëbiqtanash tapunaq: <Qamqa ¿aykatatan dëbinki?> Tsay runanash ninaq: <Chusku pachak (400) säcu trïgunmi dëbï>. Mayoralnash ninaq: <Kimsa pachak (300) säcullatana päganaykipaq kay recïbuchö firmay>.
8<<Tsaynö sabïdu kanqanta musyaykurshi patronnin aläbanaq. Tsay mayoral sabïdu kanqannömi Dios Yayaman mana creyikuq runakunapis amistäta rurayänanpaq creyikuqkunapita mas sabïdu kayan. 9Noqam niyaq: Qamkunapis kay patsachö qellaynikikunawan y imaykaykikunawanpis waktsakunata yanapar amistäta ashiyay. Tsaynöpam wañukuptikipis gloriachö mana ushakaq wajiman chaskiyäshunki.
10<<Pipis ichikllachö honrädu karqa mas atskachöpis honrädum kanqa. Peru ichikllachöpis honrädu mana karqa atskachöpis manam honrädutsu kanqa. 11Kay patsachö riquëzaykikunawan runa majikikunata mana yanapayaptikiqa ¡imanöraq Dios Yaya gloriachö riquëzakunata entregayäshunkiman! 12Jukpa imaykankunawanpis mana honrädu kaykäyaptikiqa Dios Yaya ¿confiakuyäshunkimantsuraq töcayäshunqayki kaqta entregayäshunaykipaq?#16.12 Jukpa imaykankunaqa kay patsachö kaqkunam kaykan. Töcamanqantsik kaqqa gloriachö riquëzata chaskinapaqmi.
13<<Manam ni pipis ishkay patronta servintsu. Ishkay patronta servirqa jukaqta chikirmi jukaqta kuyan. Jukninta cäsukurmi jukaqtaqa cäsuntsu. Tsaynöllam rïcu kayllapaq yarpachakurqa Dios Yayata serviyta puëdiyankitsu>>.
14Tsaynö yachatsikunqanta wiyarmi fariseukuna qellaypaq alläpa ayrajashqa kar Jesústa burlakur asipäyarqan. 15Tsaynam Jesús nirqan: <<Qamkunaqa runakunapa puntallanchömi alli tukuyanki, peru Dios Yayam musyan shonquykikuna imanö kanqanta. Tsaymi runakuna respitayäshuptikipis Dios Yayaqa melanäyäshunki.
Dios Yayapa palabranta cumplinanpaq Jesús ninqan
16<<Dios Yayapa leyninkuna y profëtakuna qellqanqankunaqa Bautizaq Juan willakunqanyaqmi karqan. Kananqa Dios Yayapa mandakuynin chämunqantanam willakuykä. Tsaymi tsay mandakuyninman atskaq runakuna imaykanöpapis yaykuyta munayan. 17Peru ciëluwan kay patsa ushakaptinpis leyninkunachö ninqankunataqa Dios Yaya llapantam cumplinqa.
Casarashqakuna mana rakikäyänanpaq Jesús yachatsikunqan
Mateo 5.31-32; 19.9; Marcos 10.11-12
18<<Mayqan runapis warminpita rakikaskir juk warmiwan täkurqa adulteriu jutsatam ruraykan. Tsaynöllam ollqunpita rakikashqa warmiwan täkurqa adulteriu jutsata ruraykan>>.
Lázarupaq y rïcu runapaq Jesús willakunqan
19<<Juk rïcu runash alläpa chaniyuq llatapata shukukuq. Waran waranshi fiestata rurar banquëtillachö kakuq. 20Tsay rïcu runapa punkunchöshi waktsa runa Lázaro shutiyuq jamaräkuq. Paypa entëru cuerpunshi jankat qeri ushashqa kanaq. 21Alläpa mallaqarshi rïcu runapa mësanpita mikuy shikwaqllatapis munapänaq. Tsaychöshi allqukunapis qerinta laqwayänaq. 22Lázaro wañuskiptinnash Abrahampa lädunman angelkuna apayänaq. Rïcu runa wañuskiptinnash pampayänaq.
23<<Hadeschö alläpa ñakaykarshi rïcu runa karupita rikaskinaq Abrahampa lädunchö Lázaro kaykaqta. 24Tsaynash qayaraykachar ninaq: <Tayta Abraham, llakipaykallämay. Lázaruta mandaykallämuy dëdunta yakuman tullpurkur shimilläta qajarpatsimunanpaq. Kay lunyaykaq ninachömi alläpa ñakaykä>.
25<<Peru Abrahamnash ninaq: <Hïju, yarpay manaraq wañur kushikuyllachö kawanqaykita. Peru Lázarum sïqa kawayninchö waktsa kar alläpa ñakarqan. Tsaymi kananqa kaychö kushishqa kaykan y qamnam tsaychö ñakaykanki. 26Tsaynöllam alläpa jatun zanja rakimantsik. Tsaymi ni pipis tsimpamuyta puëdintsu ni qampis kayman tsimpamuyta puëdinkitsu>.
27<<Tsaynash rïcu runa ninaq: <Tayta Abraham, tsaypunqa taytäpa wajinman Lázaruta mandaykullay. 28Tsaychömi pitsqaraq wawqïkuna kayan. Kay ñakayman mana shayämunanpaq paykunata willaykutsun>.
29<<Abrahamnash ninaq: <Moisés y profëtakuna qellqayanqankunatam musyayan. Tsaykunata cäsuyätsun>.
30<<Rïcu runanash ninaq: <Tayta Abraham, manam cäsuyanqatsu. Peru juk runa wañunqanpita kawaskamur willakuptinmi sïqa jutsankunapita arrepentikuyanqa>.
31<<Abrahamnash ninaq: <Moisés y profëtakuna qellqayanqankunata mana cäsuykarqa wañunqanpita kawaskamur willakuptinpis manam cäsuyanqatsu> >>.
Currently Selected:
Lucas 16: qxn
Highlight
Share
Copy
Want to have your highlights saved across all your devices? Sign up or sign in
© 2011, Wycliffe Bible Translators, Inc. All rights reserved.
