Marko 9
9
1Yezo apa nga hɛ̃ la ya: “Mbi pa hɛ̃ ĩ ti beta tɛnɛ ya, uzu ya, ambanga azi so ndo mɛ akpili ko, ala na hũngɔ Nzapa lɛngɔ gbia tɛ lo na nguru.”
Tɛrɛ Yezo na bɔngɔ tɛ lo agbinyangbi
(Mat. 17.1-13; Luk. 9.28-36)
2Ĩ la so pɛni bi mana ko, Yezo amu Petro, na Zaki, na Yoanɛ, ala ma ka ndo hɔtɔ na kunɛ la. Ala ĩ si kai ko, tɛrɛ Yezo agbinyangbi so gbɛlɛ la. 3Bɔngɔ tɛ lo ati mbufuni pa pa pa, asũ nga sĩ, ko ta zo kɔi so lɛ sese alengbi ti kpongɔ bɔngɔ ya avuru nga so ma. 4So pɛni, ava lo ko ta ahũ Elia na Mɔizɛ mɛ ndo akpili, ala na Yezo so ndotɛnɛ tɛnɛ. 5La Petro apa hɛ̃ Yezo ya: “Wa hangɔ lo tɛ Nzapa, nzɔ̃ni la e ndo mɛ. E na wangɔ gofa ota, kɔi tɛ mɔ, kɔi tɛ Mɔizɛ, kɔi tɛ Elia.” 6Petro atɛnɛ ndo tɛnɛ ni ko na ndo li lo, ta sanga ma, mbɛtɔ agbɔ̃ ndo lo sĩ, agbɔ̃ nga ambanga ava Yezo mɛ ndɛ̃ sĩ. 7Na pɛ tɛnɛ tɛ Petro ko, da baba aga avĩ lɛ la, la gbede ati ndo la, ala ma nga legɔ̃ Nzapa so ndotɛnɛ tɛnɛ ka ya da baba ni ya: “Nyi mbi ti kpɔ̃ bɛ mbi lo mɛ, ĩ ma nyɔ lo!” 8Ava lo ĩ ma so ko, ala baba ndo so tɔ̃nda la kɛrɛrɛ, ko ta ala hũ zo mɛ ndɛ̃ ma, wenge bo Yezo ana la.
9Ngoi mɛ ala lo ka ndo hɔtɔ, so ndozu ko, Yezo ahɛ̃ la nyɔ ya: “Ye mɛ ĩ hũ ko, ta ĩ pa hɛ̃ zo kɔi ma, nga ka mbi Nyi Zo mbi so na pɛ kwa hĩ wadila.” 10Ala ma nyɔ Yezo, ko ala hũndangbi tɛrɛ la ya: “ ‘Songɔ na pɛ kwa’ alengbi na nɛ?” 11So pɛni, ala hũnda Yezo ya: “Nda mɛ awa hangɔ ndia ndopa ya, ale Elia la aga uzu, wa Mɛsia aga nɛ?” 12Yezo agbinya hɛ̃ la ya: “Ale Elia aga uzu, alɛkɛ ye zu na seni hĩ wadila.” Yezo ahũnda nga la ya: “Ko nda mɛ Buku tɛ Nzapa apa ya, ta azi ama gbanda nyɔ Nyi Zo ma, ala hɛ̃ gbanda lo pɛnɔ sĩ, so pɛni ala mumana lo nɛ? 13Kanda mbi pa hɛ̃ ĩ ya, Elia aga wɛ, ko azi agia lo nga ma se mɛ bɛ la aye. Se mɛ Buku tɛ Nzapa apa na ni na lo tɛ lo la.”
Yezo asara nyingambi mɛ na siɔ tɔrɔ ya tɛrɛ lo
(Mat. 17.14-21; Luk. 9.37-43a)
14Ala ĩ ga ngbĩi ĩ doli na ambanga ava Yezo mɛ ndɛ̃ ko, ala hũ azi butu butu aka la kɛrɛrɛ. Ala hũ nga awa hangɔ ndia na ava Yezo ni ko so ndobimbi tɛnɛ. 15Bo na ngoi mɛ azi ĩ hũ Yezo so ndoga ko, ala bema, ala kpɛlɛ anɔ so balangɔ lo. 16Lo hũnda ava lo ya: “Ye mɛ ĩ na azi ko ĩ ndobimbi tɛnɛ na lo ni nɛ?” 17La zo kɔli kɔi na popo tɛ la agbinya hɛ̃ Yezo ya: “Wa hangɔ lo tɛ Nzapa, mbi ga fɛrɛ na nyi mbi ti kɔli ge tɛ mɔ. Lo buburu, na lo ti siɔ tɔrɔ mɛ asa tɛrɛ lo. 18Ndo kwɛ mɛ lo ndoɔ da, se siɔ tɔrɔ ni asa tɛrɛ lo ko, akinda lo, fulu so ndosi na yanga lo wage wage! Ko lo so ndotɛrɛkɛ gu tɛ̃ lo kɔrrr kɔrrr, so pɛni akpengba na lo ka ka ka! Mbi hũnda fɛrɛ ava mɔ ya, ala toma siɔ tɔrɔ ni ko asi, ko ala ha lo gba.” 19Yezo apa hɛ̃ la ya: “Ee! Ĩ du azi mɛ ta ĩ ye lo tɛ Nzapa ma. Mbi ngba gbanda ngoi zu ndoni kɔi na ĩ, nga na gbengɔ bɛ mbi na lo tɛ ĩ? Ĩ ga na nyingambi ni hɛ̃ mbi!” 20La ala mu nyingambi ko, aga na lo hɛ̃ Yezo.
Nyingambi ko ĩ hũ bo Yezo ko, siɔ tɔrɔ mɛ na ya tɛrɛ lo ayingi lo kpu kpu kpu. Lo ti tise, lo bilingi kpukutu kpukutu, fulu asi yanga lo wage wage. 21Yezo ahũnda to nyingambi ya: “Siɔ tɔrɔ mɛ asa tɛrɛ nyi mɔ aɔ buru kɛ̃?” Lo gbinya hɛ̃ Yezo ya: “Ka ndo la lo dɛ nyingambi. 22Fani sĩni la siɔ tɔrɔ olo ndokinda lo na ya wa, nga na ya ngu ya, ni ho lo. Kanda se mɔ lengbi ti lingɔ ye ko, ma vundu tɛ e, wa mɔ za e!” 23Yezo apa hɛ̃ lo ya: “Mɔ nɛ ya, se mbi lengbi? Zo ko la aye lo tɛ Nzapa biani ko, lo lengbi ti lingɔ ye kwɛ zu.” 24Bo na ngoi ni ko la to nyingambi ko ade kɔngɔ ya: “Mbi ye lo tɛ Nzapa. Za mbi, wa mbi ye lo tɛ lo na bɛ mbi kɔi.”
25Yezo ĩ hũ ya, azi ndokpɛlɛ aga pɛko ni ko, lo gbo ndo siɔ tɔrɔ ya: “Mɔ siɔ tɔrɔ mɛ mɔ gbinyangbi nyingambi olo ati buburu, mbi hɛ̃ mɔ nyɔ ya, mɔ si na ya tɛrɛ lo hiɔ, ko ta mɔ diri mɔ li kai fani mɛ ndɛ̃ ma.” 26Siɔ tɔrɔ ĩ ma so ko, ayingi nyingambi ko na nguru kpu kpu kpu, asi na kɔngɔ nyɔ lo. Nyingambi ko akpi ndo nyingɔ lo. Azi gba ĩ hũ so ko, ala nɛ ya: “Lo kpi biani.” 27La Yezo agbɔ̃ ti lo, aya lo ndozu. Nyingambi ko adɔ alo.
28Yezo ĩ diri ka ya da, lo na ava lo ĩ ngba na kunɛ la ko, ala hũnda lo ya: “Nda mɛ fɛrɛ e ha tomangɔ siɔ tɔrɔ ko gba nɛ?” 29La Yezo agbinya hɛ̃ la ya: “Bo na lege ti sambela la ĩ lengbi ti tomangɔ gi tɛrɛ siɔ tɔrɔ ko.”
Yezo ati pa lo ti kwa nga na lo ti songɔ tɛ lo
(Mat. 17.22-23; Luk. 9.43b-45)
30Yezo na ava lo alo so ndo ko aɔ, ala fangbi ti lɛ sese ti Galilea. Ta Yezo aye ya, azi ahĩnga ndo mɛ ni da ma, 31na lo mɛ ya, lo ndoha ava lo na lo ya: “Awa kɛ̃ngɔ mbi na kangɔ mbi Nyi Zo hɛ̃ azi mɛ ndɛ̃, ala na hongɔ mbi, ko mbi na songɔ na pɛ bi ta.” 32Ta ava lo ahĩnga nda tɛnɛ mɛ lo pa hɛ̃ la ma. Mbɛtɔ ti hũndangɔ lo na ndo agbɔ̃ la.
Zo mɛ aɔ afɔ̃ lo zu
(Mat. 18.1-5; Luk. 9.46-48)
33Ala si ka kɔdɔrɔ mɛ ili ni la Kapɛrnaumɛ. Yezo ĩ Ii ka ya da ko, lo hũnda ava lo ya: “Nda tɛnɛ mɛ fɛrɛ ĩ ndobimbi na popo tɛ ĩ ka lege nɛ?” 34Ala ĩ ma so ko, ala zu akai ti ti ti, ta sanga ma, ala bimbi fɛrɛ tɛnɛ na popo tɛ la ka lege, ya ani hĩnga zo mɛ aɔ afɔ̃ lo zu. 35Yezo ĩ hũnda la wɛ ko, lo du tise. Lo ili ava lo sui kɔi ndoni se, lo pa hɛ̃ la ya: “Zo ko aye dungɔ zo ti li ni na popo tɛ afɔ̃ lo zu ko, ale lo du wa nda ni, lo li nga kwa hɛ̃ la.” 36La Yezo amu nyingambi kɔi, alonzi lo so gbɛlɛ ava lo, abɔmbɔ lo, apa hɛ̃ la ya: 37“Zo ko la ayamba nyingambi kɔi na popo tɛ ayangambi olo na lo tɛ mbi ko, afa ya lo yamba nga mbi nvɛni. Zo ko nga la ayamba mbi ko, afa ya, ta lo yamba bo mbi ma, lo yamba nga wa tongɔ mbi.”
Wa yengɔ e la zo mɛ ta akɛ e ma
(Luk. 9.49-50)
38Yoanɛ apa hɛ̃ Yezo ya: “Wa hangɔ lo tɛ Nzapa, e hũ kɔli kɔi atoma asiɔ tɔrɔ na ya tɛrɛ azi na ili mɔ, ko e ye gbanzingɔ lo, ta sanga ma, ta lo na li nɔ tɛ e ma.” 39Ko Yezo agbinya hɛ̃ la ya: “Ta ĩ gbanzi lo ma, ta sanga ma, ta zo alengbi ti lingɔ ye ti kpɛnɛ na ili mbi, ko bo so pɛni hiɔ ko, lo ti tɛnɛ siɔ tɛnɛ na ili mbi ma, 40na lo mɛ ya, zo ko ta bɛ lo akɛ̃ e ma ko, wa yengɔ e la. 41Wa zo ko ahɛ̃ ĩ ngu ĩ nyɔ, na lo mɛ ya, ĩ du azi tɛ mbi Mɛsia ko, mbi pa hɛ̃ ĩ ti bɛta tɛnɛ ya, biani, lo lua gbanda mbana gɛrɛ lo na lo ti nzɔ̃ ye ko la lo li tɛrɛ ĩ.”
Lingɔ siɔ ye adu siɔni buai
(Mat. 18.6-9; Luk. 17.1-2)
42Yezo apa ya: “Zo ko afa siɔ le lo na nyingambi kɔi na popo tɛ ayangambi olo mɛ aye lo tɛ mbi, ko nyingambi ni ali siɔ ye ko, nzɔ̃ni ale agbe kota tɛnɛ na gɔ̃ zo ni ko, abi lo ya kota ngu. 43Se adu na lo ti ti mɔ la mɔ ndoli siɔ ye ko, fa ni mɔ zi. Lingɔ mɔ na mbage ti mɔ kɔi ka yayu mɛ adu ndo ti bɛta du, adu nzɔ̃ni aɔ omɛ se mɔ bata ti mɔ zu sɛ, ko abi mɔ na ni ka lifɛlo, ka ya wá mɛ ta ndomingɔ bɛ gbɔ ma. [ 44Kai ko, ‘angusũ ndotɛ tɛrɛ azi, ko ta angusũ ni ndokpili ma, ta wá mɛ kai ndomingɔ nga bɛ fani kɔi ma.’] 45Se adu na lo ti gɛrɛ mɔ la mɔ ndoli siɔ ye ko, fa ni mɔ zi. Lingɔ mɔ ka yayu na mbage gɛrɛ mɔ kɔi, adu nzɔ̃ni aɔ omɛ se mɔ bata gɛrɛ mɔ zu sɛ, ko abi mɔ na ni ka lifɛlo. [ 46Kai ko, ‘angusũ ndotɛ tɛrɛ azi, ko ta angusũ ni ndokpili ma, ta wá mɛ kai ndomingɔ nga bɛ fani kɔi ma.’] 47Se adu na lo ti mbage lɛ mɔ la mɔ ndoli siɔ ye ko, hã ni mɔ zi. Lingɔ mɔ ka Kɔdɔrɔ Gbia tɛ Nzapa na mbage lɛ mɔ kɔi, adu nzɔ̃ni aɔ omɛ se mɔ bata lɛ mɔ zu sɛ, ko abi mɔ na ni ka lifɛlo. 48Kai ko, ‘angusũ ndotɛ tɛrɛ azi, ko ta angusũ ni ndokpili ma, ta wá mɛ kai ndomingɔ nga bɛ fani kɔi ma.’ 49Ta sanga ma, Nzapa na sarangɔ azi zu na lege ti wá, nga ma se mɛ hĩngɔ ndogbɔ̃ na tɛ.
50“Hĩngɔ adu nzɔ̃ ye, kanda se sɔngɔ ni awe ko, ta kɔdɛ mɛ ya, mɔ ti li wa hĩngɔ ni ati asɔ da ma. Ale ĩ du nga ma se ti hĩngɔ na popo tɛ ĩ, ko ĩ du nga na mangbingɔ.”
Currently Selected:
Marko 9: NGB87
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.
Marko 9
9
1Yezo apa nga hɛ̃ la ya: “Mbi pa hɛ̃ ĩ ti beta tɛnɛ ya, uzu ya, ambanga azi so ndo mɛ akpili ko, ala na hũngɔ Nzapa lɛngɔ gbia tɛ lo na nguru.”
Tɛrɛ Yezo na bɔngɔ tɛ lo agbinyangbi
(Mat. 17.1-13; Luk. 9.28-36)
2Ĩ la so pɛni bi mana ko, Yezo amu Petro, na Zaki, na Yoanɛ, ala ma ka ndo hɔtɔ na kunɛ la. Ala ĩ si kai ko, tɛrɛ Yezo agbinyangbi so gbɛlɛ la. 3Bɔngɔ tɛ lo ati mbufuni pa pa pa, asũ nga sĩ, ko ta zo kɔi so lɛ sese alengbi ti kpongɔ bɔngɔ ya avuru nga so ma. 4So pɛni, ava lo ko ta ahũ Elia na Mɔizɛ mɛ ndo akpili, ala na Yezo so ndotɛnɛ tɛnɛ. 5La Petro apa hɛ̃ Yezo ya: “Wa hangɔ lo tɛ Nzapa, nzɔ̃ni la e ndo mɛ. E na wangɔ gofa ota, kɔi tɛ mɔ, kɔi tɛ Mɔizɛ, kɔi tɛ Elia.” 6Petro atɛnɛ ndo tɛnɛ ni ko na ndo li lo, ta sanga ma, mbɛtɔ agbɔ̃ ndo lo sĩ, agbɔ̃ nga ambanga ava Yezo mɛ ndɛ̃ sĩ. 7Na pɛ tɛnɛ tɛ Petro ko, da baba aga avĩ lɛ la, la gbede ati ndo la, ala ma nga legɔ̃ Nzapa so ndotɛnɛ tɛnɛ ka ya da baba ni ya: “Nyi mbi ti kpɔ̃ bɛ mbi lo mɛ, ĩ ma nyɔ lo!” 8Ava lo ĩ ma so ko, ala baba ndo so tɔ̃nda la kɛrɛrɛ, ko ta ala hũ zo mɛ ndɛ̃ ma, wenge bo Yezo ana la.
9Ngoi mɛ ala lo ka ndo hɔtɔ, so ndozu ko, Yezo ahɛ̃ la nyɔ ya: “Ye mɛ ĩ hũ ko, ta ĩ pa hɛ̃ zo kɔi ma, nga ka mbi Nyi Zo mbi so na pɛ kwa hĩ wadila.” 10Ala ma nyɔ Yezo, ko ala hũndangbi tɛrɛ la ya: “ ‘Songɔ na pɛ kwa’ alengbi na nɛ?” 11So pɛni, ala hũnda Yezo ya: “Nda mɛ awa hangɔ ndia ndopa ya, ale Elia la aga uzu, wa Mɛsia aga nɛ?” 12Yezo agbinya hɛ̃ la ya: “Ale Elia aga uzu, alɛkɛ ye zu na seni hĩ wadila.” Yezo ahũnda nga la ya: “Ko nda mɛ Buku tɛ Nzapa apa ya, ta azi ama gbanda nyɔ Nyi Zo ma, ala hɛ̃ gbanda lo pɛnɔ sĩ, so pɛni ala mumana lo nɛ? 13Kanda mbi pa hɛ̃ ĩ ya, Elia aga wɛ, ko azi agia lo nga ma se mɛ bɛ la aye. Se mɛ Buku tɛ Nzapa apa na ni na lo tɛ lo la.”
Yezo asara nyingambi mɛ na siɔ tɔrɔ ya tɛrɛ lo
(Mat. 17.14-21; Luk. 9.37-43a)
14Ala ĩ ga ngbĩi ĩ doli na ambanga ava Yezo mɛ ndɛ̃ ko, ala hũ azi butu butu aka la kɛrɛrɛ. Ala hũ nga awa hangɔ ndia na ava Yezo ni ko so ndobimbi tɛnɛ. 15Bo na ngoi mɛ azi ĩ hũ Yezo so ndoga ko, ala bema, ala kpɛlɛ anɔ so balangɔ lo. 16Lo hũnda ava lo ya: “Ye mɛ ĩ na azi ko ĩ ndobimbi tɛnɛ na lo ni nɛ?” 17La zo kɔli kɔi na popo tɛ la agbinya hɛ̃ Yezo ya: “Wa hangɔ lo tɛ Nzapa, mbi ga fɛrɛ na nyi mbi ti kɔli ge tɛ mɔ. Lo buburu, na lo ti siɔ tɔrɔ mɛ asa tɛrɛ lo. 18Ndo kwɛ mɛ lo ndoɔ da, se siɔ tɔrɔ ni asa tɛrɛ lo ko, akinda lo, fulu so ndosi na yanga lo wage wage! Ko lo so ndotɛrɛkɛ gu tɛ̃ lo kɔrrr kɔrrr, so pɛni akpengba na lo ka ka ka! Mbi hũnda fɛrɛ ava mɔ ya, ala toma siɔ tɔrɔ ni ko asi, ko ala ha lo gba.” 19Yezo apa hɛ̃ la ya: “Ee! Ĩ du azi mɛ ta ĩ ye lo tɛ Nzapa ma. Mbi ngba gbanda ngoi zu ndoni kɔi na ĩ, nga na gbengɔ bɛ mbi na lo tɛ ĩ? Ĩ ga na nyingambi ni hɛ̃ mbi!” 20La ala mu nyingambi ko, aga na lo hɛ̃ Yezo.
Nyingambi ko ĩ hũ bo Yezo ko, siɔ tɔrɔ mɛ na ya tɛrɛ lo ayingi lo kpu kpu kpu. Lo ti tise, lo bilingi kpukutu kpukutu, fulu asi yanga lo wage wage. 21Yezo ahũnda to nyingambi ya: “Siɔ tɔrɔ mɛ asa tɛrɛ nyi mɔ aɔ buru kɛ̃?” Lo gbinya hɛ̃ Yezo ya: “Ka ndo la lo dɛ nyingambi. 22Fani sĩni la siɔ tɔrɔ olo ndokinda lo na ya wa, nga na ya ngu ya, ni ho lo. Kanda se mɔ lengbi ti lingɔ ye ko, ma vundu tɛ e, wa mɔ za e!” 23Yezo apa hɛ̃ lo ya: “Mɔ nɛ ya, se mbi lengbi? Zo ko la aye lo tɛ Nzapa biani ko, lo lengbi ti lingɔ ye kwɛ zu.” 24Bo na ngoi ni ko la to nyingambi ko ade kɔngɔ ya: “Mbi ye lo tɛ Nzapa. Za mbi, wa mbi ye lo tɛ lo na bɛ mbi kɔi.”
25Yezo ĩ hũ ya, azi ndokpɛlɛ aga pɛko ni ko, lo gbo ndo siɔ tɔrɔ ya: “Mɔ siɔ tɔrɔ mɛ mɔ gbinyangbi nyingambi olo ati buburu, mbi hɛ̃ mɔ nyɔ ya, mɔ si na ya tɛrɛ lo hiɔ, ko ta mɔ diri mɔ li kai fani mɛ ndɛ̃ ma.” 26Siɔ tɔrɔ ĩ ma so ko, ayingi nyingambi ko na nguru kpu kpu kpu, asi na kɔngɔ nyɔ lo. Nyingambi ko akpi ndo nyingɔ lo. Azi gba ĩ hũ so ko, ala nɛ ya: “Lo kpi biani.” 27La Yezo agbɔ̃ ti lo, aya lo ndozu. Nyingambi ko adɔ alo.
28Yezo ĩ diri ka ya da, lo na ava lo ĩ ngba na kunɛ la ko, ala hũnda lo ya: “Nda mɛ fɛrɛ e ha tomangɔ siɔ tɔrɔ ko gba nɛ?” 29La Yezo agbinya hɛ̃ la ya: “Bo na lege ti sambela la ĩ lengbi ti tomangɔ gi tɛrɛ siɔ tɔrɔ ko.”
Yezo ati pa lo ti kwa nga na lo ti songɔ tɛ lo
(Mat. 17.22-23; Luk. 9.43b-45)
30Yezo na ava lo alo so ndo ko aɔ, ala fangbi ti lɛ sese ti Galilea. Ta Yezo aye ya, azi ahĩnga ndo mɛ ni da ma, 31na lo mɛ ya, lo ndoha ava lo na lo ya: “Awa kɛ̃ngɔ mbi na kangɔ mbi Nyi Zo hɛ̃ azi mɛ ndɛ̃, ala na hongɔ mbi, ko mbi na songɔ na pɛ bi ta.” 32Ta ava lo ahĩnga nda tɛnɛ mɛ lo pa hɛ̃ la ma. Mbɛtɔ ti hũndangɔ lo na ndo agbɔ̃ la.
Zo mɛ aɔ afɔ̃ lo zu
(Mat. 18.1-5; Luk. 9.46-48)
33Ala si ka kɔdɔrɔ mɛ ili ni la Kapɛrnaumɛ. Yezo ĩ Ii ka ya da ko, lo hũnda ava lo ya: “Nda tɛnɛ mɛ fɛrɛ ĩ ndobimbi na popo tɛ ĩ ka lege nɛ?” 34Ala ĩ ma so ko, ala zu akai ti ti ti, ta sanga ma, ala bimbi fɛrɛ tɛnɛ na popo tɛ la ka lege, ya ani hĩnga zo mɛ aɔ afɔ̃ lo zu. 35Yezo ĩ hũnda la wɛ ko, lo du tise. Lo ili ava lo sui kɔi ndoni se, lo pa hɛ̃ la ya: “Zo ko aye dungɔ zo ti li ni na popo tɛ afɔ̃ lo zu ko, ale lo du wa nda ni, lo li nga kwa hɛ̃ la.” 36La Yezo amu nyingambi kɔi, alonzi lo so gbɛlɛ ava lo, abɔmbɔ lo, apa hɛ̃ la ya: 37“Zo ko la ayamba nyingambi kɔi na popo tɛ ayangambi olo na lo tɛ mbi ko, afa ya lo yamba nga mbi nvɛni. Zo ko nga la ayamba mbi ko, afa ya, ta lo yamba bo mbi ma, lo yamba nga wa tongɔ mbi.”
Wa yengɔ e la zo mɛ ta akɛ e ma
(Luk. 9.49-50)
38Yoanɛ apa hɛ̃ Yezo ya: “Wa hangɔ lo tɛ Nzapa, e hũ kɔli kɔi atoma asiɔ tɔrɔ na ya tɛrɛ azi na ili mɔ, ko e ye gbanzingɔ lo, ta sanga ma, ta lo na li nɔ tɛ e ma.” 39Ko Yezo agbinya hɛ̃ la ya: “Ta ĩ gbanzi lo ma, ta sanga ma, ta zo alengbi ti lingɔ ye ti kpɛnɛ na ili mbi, ko bo so pɛni hiɔ ko, lo ti tɛnɛ siɔ tɛnɛ na ili mbi ma, 40na lo mɛ ya, zo ko ta bɛ lo akɛ̃ e ma ko, wa yengɔ e la. 41Wa zo ko ahɛ̃ ĩ ngu ĩ nyɔ, na lo mɛ ya, ĩ du azi tɛ mbi Mɛsia ko, mbi pa hɛ̃ ĩ ti bɛta tɛnɛ ya, biani, lo lua gbanda mbana gɛrɛ lo na lo ti nzɔ̃ ye ko la lo li tɛrɛ ĩ.”
Lingɔ siɔ ye adu siɔni buai
(Mat. 18.6-9; Luk. 17.1-2)
42Yezo apa ya: “Zo ko afa siɔ le lo na nyingambi kɔi na popo tɛ ayangambi olo mɛ aye lo tɛ mbi, ko nyingambi ni ali siɔ ye ko, nzɔ̃ni ale agbe kota tɛnɛ na gɔ̃ zo ni ko, abi lo ya kota ngu. 43Se adu na lo ti ti mɔ la mɔ ndoli siɔ ye ko, fa ni mɔ zi. Lingɔ mɔ na mbage ti mɔ kɔi ka yayu mɛ adu ndo ti bɛta du, adu nzɔ̃ni aɔ omɛ se mɔ bata ti mɔ zu sɛ, ko abi mɔ na ni ka lifɛlo, ka ya wá mɛ ta ndomingɔ bɛ gbɔ ma. [ 44Kai ko, ‘angusũ ndotɛ tɛrɛ azi, ko ta angusũ ni ndokpili ma, ta wá mɛ kai ndomingɔ nga bɛ fani kɔi ma.’] 45Se adu na lo ti gɛrɛ mɔ la mɔ ndoli siɔ ye ko, fa ni mɔ zi. Lingɔ mɔ ka yayu na mbage gɛrɛ mɔ kɔi, adu nzɔ̃ni aɔ omɛ se mɔ bata gɛrɛ mɔ zu sɛ, ko abi mɔ na ni ka lifɛlo. [ 46Kai ko, ‘angusũ ndotɛ tɛrɛ azi, ko ta angusũ ni ndokpili ma, ta wá mɛ kai ndomingɔ nga bɛ fani kɔi ma.’] 47Se adu na lo ti mbage lɛ mɔ la mɔ ndoli siɔ ye ko, hã ni mɔ zi. Lingɔ mɔ ka Kɔdɔrɔ Gbia tɛ Nzapa na mbage lɛ mɔ kɔi, adu nzɔ̃ni aɔ omɛ se mɔ bata lɛ mɔ zu sɛ, ko abi mɔ na ni ka lifɛlo. 48Kai ko, ‘angusũ ndotɛ tɛrɛ azi, ko ta angusũ ni ndokpili ma, ta wá mɛ kai ndomingɔ nga bɛ fani kɔi ma.’ 49Ta sanga ma, Nzapa na sarangɔ azi zu na lege ti wá, nga ma se mɛ hĩngɔ ndogbɔ̃ na tɛ.
50“Hĩngɔ adu nzɔ̃ ye, kanda se sɔngɔ ni awe ko, ta kɔdɛ mɛ ya, mɔ ti li wa hĩngɔ ni ati asɔ da ma. Ale ĩ du nga ma se ti hĩngɔ na popo tɛ ĩ, ko ĩ du nga na mangbingɔ.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ngbandi New Testament © United Bible Societies, 1987.