EFETIKILO 8
8
1Suku yu wa ivaluka Noha loviendalomuenyo viosi lovinyama viovimbo viosi via kala laye vocimbaluku, kuenje Suku wa sikisa ofela kilu lieve; ovava a pupuluka. 2Olono viokalunga via livembika kuenda apangu okilu a lisitika; ombela yokilu ya ca; 3oco ovava a pupuluka kilu lieve naito naito, toke kefulilo liocita lakui atãlo koloneke kuenje ovava a tepuluka. 4Ocimbaluku ca saka kolomunda via Ararate kosãi yepanduvali keteke liekui lepanduvali kosãi. 5Kuenje ovava a enda loku tepuluka toke osãi yekui kuenje kosãi yekui keteke liatete kosãi, oloñoño violomunda via mõlẽha.
6Kefulilo liakui akuãla koloneke oco Noha wa yulula onjanela a tungilile vocimbaluku. 7Yu wa tundisa ocikuamanga kuenje ca tunda, ca ñuala ñuala toke ovava a takata kilu lieve. 8Oco wa tundisa opomba oku limbuka nda ovava a puako kilu lieve. 9Opomba ka ya sangele apa yi liatela olongonjo viayo kuenje ya tiukila ki Noha kocimbaluku; momo ovava a kasi kilu lieve liosi. Noha wa tundisa eka liaye, wa yi kuata, wa yiñisa vocimbaluku. 10Yu wa imbisapo vali oloneke epanduvali, oco wa tundisa vali opomba vocimbaluku. 11Opomba ya tiuka kokuaye koñolosi, kuenje kuliungu wayo kua kala emẽla li talala lioliveira; oco Noha wa limbuka okuti ovava a tepuluka kilu lieve. 12Yu wamisapo vali oloneke epanduvali, oco wa tundisa opomba kuenje ka ya tiukile vali kokuaye.
13Oco kunyamo wovita epandu la mosi, kosãi yatete, keteke liatete kosãi, oco ovava a takata kilu lieve. Noha yu wa tuvula onuviko yocimbaluku oku vanja, kuenje kilu lieve kua kamuha. 14Kosãi yavali keteke liakui avali lepanduvali kosãi oco osi ya kukuta. 15Suku ya wa popia la Noha hati, 16Tundamo vocimbaluku, ove, lukãi wove, lomãla vove, lakãi vomãla vove; 17loviendalomuenyo viosi okuti ovinyama viosi vi kasi love, lolonjila, lovinyama viovimbo, lovipuka viosi vi likoka posi, tundila lavio kumue; vi licitile kilu lieve, vi linge ombuto loku siata kilu lieve. 18Noha yu wa tundamo kumue lomãla vaye, lukãi waye, lakãi vomãla vaye. 19Ovinyama viosi lovipuka viosi lolonjila viosi, cosi ci ñuala ñuala kilu lieve, via tunda vocimbaluku ndapata avio.
20Noha yu wa tunga utala wa Yehova, kuenje wa nola kovinyama viosi via yela lokolonjila viosi via yela, ha lumbi ovilumba vioku pia elisi kutala. 21Eci Yehova a yeva elemba li pepa oco Yehova wa litana lutima hati, Si siñala vali osi oku yi siñalela omunu, momo ovisimĩlo viutima womunu vi kasi ño civi tunde kutila waye; loviendalomuenyo viosi si vi yambula vali ndeci nda linga. 22Osimbu yosi oluali lu kasi ka ku pumbi oku kũla loku ungula, lombambi lowuya, londombo lokuenye, lutanya luteke.
Currently Selected:
EFETIKILO 8: EMB63
Highlight
Share
Copy
Want to have your highlights saved across all your devices? Sign up or sign in
Umbundu Bible © United Bible Societies, 1963.
