YOANO 3

1Kua kala omunu umue, u Fariseo, onduko yaye Nikodemo, haeye ukulu wa va Yudea. 2Ulume waco weya ku Yesu uteke kuenje wa popia laye hati, A Rambei, tu ci okuti vulongisi wa tunda ku Suku, momo lomue o tẽla oku linga ovilimbu o lingainga te Suku o kasi laye. 3Yesu wo kumbulula hati, Mopia love siti, Ocili, ocili, omunu ka tẽla oku mola usoma wa Suku, te wa citiwa evali. 4Nikodemo wa popia laye hati, Omunu o tẽla ndati oku citiwa nda ukulu ale? O tẽla nga oku iñila vali vimo lia inaye loku citiwa evali? 5Yesu wa kumbulula hati, Mopia love siti, Ocili, ocili, omunu ka tẽla oku iñila vusoma wa Suku, te o citiwa lovava kuenda Espiritu. 6Eci ca citiwa letimba, etimba, leci ca citiwa le Espiritu, espiritu. 7Ku ka komohe omo nda popia love siti, Co sesameli oku citiwa evali. 8Ofela yi sikila oko yi panga kuenje o yeva okuõla kuayo, puãi kua kũlĩhile oku yi tunda, pamue koku yenda. Haico ci kasi la vosi va citiwa le Espiritu. 9Nikodemo wo pula hati, Ovina evi vi lingiwa ndati? 10Yesu wo kumbulula hati, Ove, ove vulongisi wa Isareli, lopo haimo ovina evi ka via ku lombolokele? 11Mopia love siti, Ocili, ocili, tu vangula ovina tua kũlĩha, kuenje ovina tua mola ovio tu imbila uvangi, ene puãi ka vu tava kuvangi wetu. 12Nda ndo sapuili ovina viokilu lieve kuenje ka wa taveli, vu tava ndati nda ndu sapuili ovina viokilu? 13Lomue wa la londa kilu, te u wa loka kilu, okuti Mõlomanu. 14Kuenje ndeci Mose a tulika onyoha vekalasoko, haico Mõlomanu o tulikiwa, 15okuti wosi u kolela o mola omuenyo ko pui.

16Omo Suku a sola ndoco oluali, oco a ecela Omõlaye wongunga okuti wosi u kolela ka fi, puai o mola omuenyo ko pui. 17Momo Suku ka tumilile Omõla voluali oku pisa oluali, wo tumila okuti oluali lu popeliwa laye. 18U u kolela ka pisiwa, u ko kolela wa pia ale, momo ka kolelele onduko ya Mõla a Suku ongunga. 19Kuenje episo liaco lieli, ocinyi ceya voluali, puai lopo omanu va sole ca lua owelema, okuti ocinyi ci sule, momo ovilinga viavo vĩvi. 20Momo wosi o lingainga cĩvi o suvuka ocinyi, kuenje keya kocinyi, sanga ovilinga viaye vi situluka. 21Puãi, u o linga ocili, iya kocinyi, oco ovilinga viaye vi molehe okuti via lingiwila vu Suku.

22Eci a linga ovina evi, Yesu lolondonge viaye veya kofeka ya Yudea. Oko a kala kumue lavo kuenje haiko a papatisila. 23Yoano layevo wa kala loku papatisila vo ka Ainone, ocipepi la Salimi, momo oko kua kala ovava a lua, kuenje omanu veya yu va papatisiwa. 24Momo Yoano handi ka imbiwile vokayike.

25Peya oku lipatala ondaka yoku yelisua pokati kolondonge via Yoano la umue ukuavo u Yudea. 26Kuenje veya ku Yoano, yu va popia laye vati, A Rambei, una wa kala love kesinya lia Yordão, okuti ove muẽle wo wimbila uvangi, cilo yu, o papatisa, kuenje omanu vosi va kasi loku enda kokuaye. 27Yoano wa kumbulula hati, Omunu ka tambula cimue te eci ca wihiwa tunde kilu. 28Ene muẽle vulombangi viange okuti nda linga siti, Hameko Mesiya, puãi nda tumiwila oku pitila Mesiya kovaso. 29U o kasi londombua eye sandombua, haimo lumue, ekamba lia sandombua, una o tãilili oku u yevelela, layevo o yolela ca lua ondaka ya sandombua. Eyi oyo onjolela yange kuenje cilo ya suapo. 30Kaliye eye, caye oku amako, ame puãi, cange oku tepuluka.

31U o tunda kilu wa piala vosi. U o tunda kilu lieve, ukuailu lieve, lovina viokilu lieve ovio a vangula. U o tunda kilu eye wa piala vosi. 32Eci a mola leci a yeva oco a imbila uvangi, puãi lomue o tava kuvangi waye. 33U o tava kuvangi waye eye wa likuminya okuti Suku ukuacili. 34Momo u Suku a tuma o popia olondaka via Suku. Momo Suku ka eci Espiritu lonjongo. 35Isia o sole Mõla kuenje wa eca ovina viosi peka liaye. 36U o kolela Mõla o kuete omuenyo ko pui, puãi u ka kolela Mõla, eye ka moli omuenyo, puãi onyeño ya Suku yi kala ño-o laye.

Currently Selected:

YOANO 3: EMB63

Highlight

Copy