लूकाल 10
10
येसु 72 कग़यवालोरिन सेवातुह्क लोहतह्तोग़
1पया येसुसामि मूंड वीसाङ बारा (72) तनाङ कग़यवालोरिन आचतोग़, आचिसि तन्क दायना मतव सबे नाह्कने, ओरिन इर्वुर-इर्वुरिन कीसि, मुनेह लोहतोग़. 2लोहतह्पा इद्रम वेहतोग़, “वेर लोकुर पोलमते वेल्लाय पंडटद पंटालेह्का मन्ह्तोर, मति वेरिन देवुळतगा तवालोर बूतिनोर आलोर. अदिह्के पोलमता माल्काललेह्काडा देवुळि, लोकुरिन बेसता कबुर वेहचि तनगा तवालोर बूतिनोरिन लोहि इन्जि, मीटु तान अर्ज कीसोर मन्ह्टु.#मत्याल 9:37-38 3इह केंजाट! लोळ्ङानगा गोरेपिलान लोहतपु, नना मीक लोकुरगा लोहतह्नन, अन्ह्ट!#मत्याल 10:16; योहन 4:38; 17:18; 20:21 4अनेके मीवा संगे जोर्का आयि, गेंदेङ आयि, एल्पुस्क आयि, बेदिने पोस ओयमाटु. ओसो अग़दे बोग़ाय कलियतेके, जोहर वने केमाटु.#10:4 यहुदिरा जातते बेके तेला पय्नम अनेके, बोग़ाय पुतोग़ नडुम अग़दे कलियतेक अचोन, ओर्विह्क-ओर्वोग़ ऊक-ऊके सुकम-दुकमता लोप्पा ताल्ह्किंदुर. अदिनेनाह्क अह कीतेके, सेवातुह्क अनेके अगान उचुन वेला आयग़ा इनजोर, येसु ओरिन बोने जोहर केमाटु इनजोर वेहतोग़. 5बेदाय लोतगा अतेके सबेट्क मुने, ‘इद लोतोरिह्क सुकम दोर्कि,’ इनजोर बर्कत ईम्ह्टु. 6अद लोते मीक जागा-पग़्सा कीयलाह गिर्दातोग़ मन्कल मतेके, मीट ईतद बर्कत ओन्क दोर्कग़ा. मति ओग़ गिर्दा आयोग़ इतेके, मीट ईतद बर्कत ओन्क दोर्को आयग़ा. 7ओसो बेदाय नाग़ अतेक अचोन, लोह्क-लोह्क अनमाटु. बेदाय उंदिय लोतगा मन्जि, ओर बाताल ईस्तोर, आताल तिनजोर-उनजोर मन्ह्टु. मीट बोरगा देवुळता पोल्लो वेहतलाह दाय्ह्निर, ओर मीकु इव पूरा ईयनदे.#1 कुरिंततोर 9:14; 1 तिमोति 5:18 8मीट बेदाय उंद नाग़ अतस्के, अद नाटेनोर मीक बेस-नेह्ना केयिसि उदिह कीतेक अचोन, ओर मीकु बाताल तिनदलाह ईस्तोर, अदिने तिन्ह्टु. 9अद नाटेनाङ बेमरतोरिन सव्रे कीम्ह्टु, ओसो देवुळि मन्कलोरगा राजेम कीयनद कगो मियगा एवयलाह आता इनजोर वेहाटु. 10मति बेदाय नाग़ अतस्के, अद नाटेनोर मीक बेस-नेह्ना ऊळवेके, अद नाटेनाङ बजर्क-बजर्क अन्जि, इद्रम वेहाट इतेके, 11‘मावाङ काल्कनगा तुंडटद मियग्डा दुरातुन इगान दुल्पिह्नोम, (मीट देवुळता पोल्लोतुन केंजविर इनजोर, इद दुरा साक्सि मनदग़ा.)#मत्याल 10:14; मार्कल 6:11; लूकाल 9:5; बळयिर 13:51; 18:6 मति देवुळि इतेके मन्कलोरगा राजेम कीयनद कगो एवयलाह आता, इदिन सीतात तासाटु,’ इनजोर वेहाटु. 12ओसो नना मीक वेहतह्नन, सोदोम नाटेनोरिन देवुळि (ओराङ लाग्वाङ कबस्कनेनाह्क मुने सिक्सा ईसि) बूळे कीता.#पुटमुळि 19:24-25 तान्काय वीळिसि नेयमता आक्रि दियाते, अद नाटेनोर सिक्सा आयनुर,”#2 पत्रु 2:6 इनजोर येसु ओरिन वेहतोग़.#मत्याल 10:9-15; मार्कल 6:8-11; लूकाल 9:3-5
येसुना पोल्लोतुन केंजवोराङ नाह्कु
(मत्याल 11:21-23)
13पया ओसोवने वेहतोग़, “ए कोराजिन नाटेनोरिर! बेत्सेदा नाटेनोरिर! देवुळि मीक सिक्सा ईयग़ा. बाराह्क इतेके, मियगा बेव बामिह कीयनाङ कबस्क कीतन, अव सोर, सिदोन, इव लाग्वाङ नाह्कने कीस मतेके, अग्डोर अस्केन बेस्कोटे केंजिसि, पोता-गेंदेङ उहचि, तलातगा नेग़ वाटिस, तमा पापमताहि मिळ्न्दिस मनेर, (मति मीट मीवा पापमताहि मिळ्न्दविर.)#10:13 यहुदि लोकुर बेदाय दुकम पुटटेके, इलवेके बोग़ाय डोलतेके, इद्रम पोता-गेंदेङ उहचि, तलातगा नेग़ वाटिसि, देवुळतुन केयिन्दुर. 14बाताले आयि, सोर, सिदोन, इव नाह्िकह्काय वीळिसि, नेयमता आक्रि दियाते देवुळि मीक सिक्सा ईयग़ा. 15ए कापेर्नाटेनोरिर! मीट देवुळदीपतगा पोग़ोन एवयकोम इह्निरा? आयो, देवुळि मीक इळ्ने हानादीपतगा पोहचीयग़ा!
16“मीट कग़यवालोराङ पोल्लोङ बोर केंजिह्तोर, ओर नावाङ पोल्लोङ केंजिह्तोर, ओसो बोर मीवाङ पोल्लोङ केंजोर, ओर नावाङ पोल्लोङ केंजोर. अद्रमे बोर नावाङ केंजोर, ओर नाक लोहवानाङ वने केंजोर,#योहन 5:22-23 ” इनजोर येसु वेहतोग़.#मत्याल 10:40; मार्कल 9:37; लूकाल 9:48; योहन 13:20
येसुनाङ कग़यवालोर पका गिर्दा आस्तोर
17पया येसु लोहतोर मूंड वीसाङ बारा (72) मन्कलोर पका गिर्दाते मल्स वातोर. वासि येसुन इद्रम इतोर, “सामि, (माट नीवा पेदिरते देयह्किन वने पूंडटोम,) अव देयह्क मावा पोल्लोतुन केंजताङ वने,” इतोर. 18इतस्के येसु इतोग़, “देयह्कना मुक्याल आरेम आसि, किस-उळ्मलेह्का पोग़ोटाह इळ्न अरतदिन नना ऊळतन.#तोहचीतव पोल्लोङ 12:9 19केंजाट! तरस्किन, मिचोन ओय्ह्कलाहि, ओसो देयह्कना पूरा लावतुन गेल्सलाहि, नना मीक अदिकर ईतन. मीकु बेदे बाताले नुस्कन केवोङ आयनुङ. 20मति देयह्क मीवा पोल्लोतुन केंजिह्ताङ इनजोर, इचोन गिर्दा आयमाटु! मति मीवाङ पेदिर्किन, देवुळ तना पिसमुळता पुस्तकते रासिस तासता,#पिलिपितोर 4:3; इब्रितोर 12:23; तोहचीतव पोल्लोङ 3:5 तानेनाह्के पका गिर्दा आम्ह्टु,” इनजोर इतोग़.
देवुळतुन येसु जोहर कीस्तोग़
(मत्याल 11:25-27; 13:16,17)
21अचोटेने देवुळता पवित्र जीवाते येसु गिर्दा आतोग़. आसि इद्रम इतोग़, “ए बाबा! इळ्ता, पोग़ोटा बूमता सामिनिन! नना नीक जोहर कीय्ह्नन बाबा, बाराह्क इतेके निमा इव सेतेम पोल्लोन ‘बुदतोरोम, पका तेळियतोरोम’ इनवालोरिह्क तोहवालेवा, ‘उड्लोरोम, बुदलेवोरोम’ इनवालोरिह्क तोहतिन. निटमे बाबा, नीवा विचर इद्रमे कीयनद मता,” इतोग़.
22ओसो “नावा बाबाल नाकु सबे पुनदलाह ईतोग़.#10:22 नावा बाबाल नाकु सबे पुनदलाह ईतोग़. मोदुल कागिदते “नावा बाबाल नावा कयदे कतमे ईतोग़.” #मत्याल 11:27; 28:18; योहन 3:35; 13:3; 17:1-2; इपिसुसतोर 1:20-23 नावा देवुळबाबान विळ्सिसि, देवुळता मग़ि बोग़ आंदोग़ इनजोर बोग़े बह पुनोग़. अहे देवुळता मग़िन विळ्सिसि, देवुळबाबाल बोग़ आंदोग़ इनजोर बोग़े पुनोग़. अद्रमे नना बाबान तोहतलाह बोन-बोन आचिह्नन, ओरु बाबान पुनदनुर.” 23ओसो कग़यवालोरिन अलग ओसि, ओरिन इतोग़, “नना कीयनाङ कबस्किन ऊळिह्निर इतेके, मीट बेचोन देय्वातोरिर! 24बाराह्क इतेके नना मीक वेहतह्नन, नावा मुने मतोर वेल्लाटोर देवुळता कबुरतोरु ओसो राजालोरु, मीट ऊळनव कबस्किन ऊळकोम इंदुर, मति ऊळ पग़वोर. मीट केंजिह्निर अव पोल्लोन केंजकोम इंदुर, मति ओरिह्क केंजलाह दोर्को,” इनजोर इतोग़.
सास्त्रमगूरु येसुना पट ऊळिह्तोग़
(मत्याल 22:34-40; मार्कल 12:28-31)
25अचोटेने ओर्वोग़ सास्त्रमगूरु वासि, येसुना पट ऊळलाहि ओन इद्रम ताल्ह्कतोग़, “गूरु! अमेसाता पिसमुळ दोर्किह कीयलाहि, नना बाताल कीकन?” इतोग़. 26इतस्के येसु इतोग़, “मोसानाङ अडोना सास्त्रमतगा बाताल रासतद मन्ह्ता? अगा निमा बाताल अर्विह्निन?” इनजोर ताल्ह्कतोग़. 27ताल्ह्कतस्के ओग़ इतोग़, “देवुळि नीवा सामि इनजोर तान नीवा पूरा बुदताहि, पूरा जीवाताहि, पूरा लावताहि, पूरा विचरताहि जीवा कीमु.#व्यवस्थाविवरण 6:5 ओसो निमा कुदतुन जीवा कीतपु, नीवा एरे-गूरेतोरिन वने जीवा कीमु.#लैव्यव्यवस्था 19:18” इनजोर इतोग़. 28इतस्के येसु इतोग़, “निमा बराबर वेहतिन! अद्रमे निमा वने कीमु, अस्के अमेसाता पिसमुळ नीक दोर्कग़ा.”#लैव्यव्यवस्था 18:5; रोम सहरतोर 7:10 29इद्रम इतस्के, ओग़ गूरु नना तपलेवोनन इनजोर तोहतलाहि, “नावा एरे-गूरेतोर इतेके बोर आंदुर गूरु?” इनजोर येसुन ताल्ह्कतोग़.
सामरि जाततोग़ मन्कना पीटो
30ताल्ह्कतस्के येसु इतोग़, “केंजा! ओर्वोग़ यहुदि मन्कल येरुसलेम सहरताहि यरिग़ो नाग़#10:30 येरुसलेम सहरताहि यरिग़ो नाग़ जोक-जोक पंद्रा कोस्क मता. अनजोर मतोग़, अस्के नडुम अग़दे ओन कलेर पोयतोर. पोसि ओना सबे सामनतुन ऊंदिसि, ओनाङ आङिङ-गेंदेङ कुय्ह कीतोर, कीसि ओन कुस्क मेग़्यनाह पका नल्हचि, विळ्सिस अतोर.
31“ताना पया गळ्क मनेके, अदे अग़दुह्क ओर्वोग़ बूमयाल अनजोर मतोग़. अनेके एरे एव्सि, ओग़ नेल अरतोग़ मन्कन ऊळिस एग़िस अतोग़. 32अद्रमे पया ओर्वोग़ देवुळवडे अदे अग़दुह्क वातोग़. वासि ओग़ वने ओन ऊळिसि एग़िस अतोग़. 33ताना पया बाताल आता इतेके, अदे अग़दुह्क ओर्वोग़ सामरि जाततोग़ वानेके,#10:33 सामरि जाततोर कळ्वोग़ आतोर इनजोर, यहुदिर वेरिन विटळ तासिंदुर. नेल अर्स मतोग़ मन्कनगा एवतोग़. एवतस्के ओन ऊळिसि, वेन्क पका जीवा नोता. 34पया ओग़ ओनगा एरे वासि, ओनाङ नोमुर्कनगा नेयु ओसो पूला अंगुर जोमा ओकिसि, पटि दोहचीतोग़.#10:34 इस्रयेल लोकुर इद पूला अंगुर जोमातुन मत इनजोर नोमुर्कनगा ओकलाह काळ्ङिंदुर. दोहचि तना गाळ्दता पोग़ोन ओन वाटिस, रोमनद गोटुदगा ओसि, ओना बेस सेवा कीतोग़. 35पया इमा दिया, गोटुदोग़ मन्कह्क रेंड वेंडटाङ कोताङ ईसि, इद्रम इतोग़, ‘वेन बेस-नेह्ना ऊळा, वेनेनाह्क निमा एक्वा कोताङ कर्सा कीतेक अचोन, नना मलतस्के अव कोताङ नीक ईकन’ इतोग़,” इनजोर येसु पीटो वेहतोग़.
36वेहचि येसु ओन इतोग़, “अले! कलेर नल्हच मतोर, ओग़ मन्कन मुवुर मन्कलोर कलियतोर, वेरग्डाहि बोग़ ओना एरे-गूरेतोग़ आतोग़? अले! नीवा विचरते बोग़ आंदोग़?” इतोग़. 37इतस्के, ओग़ इतोग़, “ओना पोग़ोन दया कीतोग़े.” इतस्के येसु इतोग़, “अन! ओग़ कीतप लेह्का, निमा वने कीम,” इतोग़.
येसुना पोल्लो केंजनदे मोदुल कबळ
38अद्रमे पया येसुना संगे ओनाङ कग़यवालोर येरुसलेम अनेके, उंद नाटेनगा एवतोर. अगा उंद मार्ता पेदिरता आंचाळ मता. अदु येसुन तना लोन केयिसि, बेस-नेह्ना उदिह कीता. 39तान्क उंदि मरिया पेदिरता एलाळ मता. अद येसुनाङ काल्कना एरे नेल उदिसि, ओग़ वेहतनाङ पोल्लोन बेस-नेह्ना केंजसोर मता. 40मति मार्ताह्क अलग-अलग रीतताङ वेल्लाङे गाटोङ-पुलाङ अटना विचर मताह्कु, अद पूरा मोता तानाय पोग़ोन अरतप आता. अदिनेनाह्क अद येसुनगा वासि, “ए गूरु, नावा एलाळि पूरा कबळतुन नावाय पोग़ोन दोबिस ईता, इदिन ऊळविना? तान नावा तोळ आयलाह वेहा,” इनजोर इता. 41अस्के येसु तान इतोग़, “मार्ता, निमा वेल्लाङे पोल्लोना आल्सुळ कीसि, गाबर आय्ह्निन. 42मति इद उंदिय पोल्लो गर्जता मन्ह्ता, इतेके मरियाल तनेनाह्क बेसता तूसतुन आचता. अदिनेनाह्क तानग्डाहि अद तूसतुन बोग़े ऊन्द पग़वोग़,” इनजोर येसु इतोग़.
Currently Selected:
लूकाल 10: माडियाबाय्बल
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
