लूकाल 7
7
रोम सर्करता सीपय्कना दरोगाना विस्वस
(मत्याल 8:5-13)
1येसु लोकुरिन वेहतना मतव पूरा पोल्लोन वेहतापया, कापेर्नाग़ मल्स अतोग़. 2अद नाटेनगा ओर्वोग़ दुस्रा जाततोग़ सीपय्कना दरोगाल मतोग़. ओना साकुर केवाल ओर्वोग़ ओर्युलतोग़ मतोग़. वेग़ साय्बाल ओन पका जीवा कींदोग़. उंद दिया बाताल आता इतेके, ओग़ ओर्युलतोग़ दुक अर्सि, डोलनाह आस मतोग़. 3अस्के ओग़ साय्बाल येसुना लोप्पा केंजतोग़, केंजतस्के उय्तुर यहुदि पेदल्कना संगे, “येसु नावा लोन वासि, नावा ओर्युलतोन सव्रे कीयेग़,” इनजोर ओनगा कबुर लोहतोग़. 4ओर पेदल्क येसुनगा वासि, गोंडगोंड आसोर, इद्रम अर्जि कीतोर इतेके, “ओग़ दरोगान साय्ता कीम गूरु, ओग़ बेसतोग़ मन्कल आंदोग़. 5मावोर यहुदिरिन जीवा कीस्तोग़. ओग़े मावा जाततोरेनाह्क पार्तनाता लोन वने पंडटोग़. अदिनेनाह्क ओना ओर्युलतोन सव्रे कीसीम गूरु,” इनजोर इतोर.
6इतस्के येसु ओरा संगे दायलाह पेसतोग़. अनेक-अनेक ओना लोन एरे-एरे एवनेके, ओग़ साय्बाल तना गोततोरिन येसुनगा इद्रम कबुर लोहतोग़: “ए गूरु, निमा तिपल आयमा! निमा नावा लोनलोप्पा वायना इन्जि, नना लायक इलेन.#7:6 यहुदि लोकुर यहुदि आयवोना लोता लोप्पा ओळियोर आंदुर, अदिनेनाह्क ओग़ साय्बाल अह इतोग़ बहे. 7-8ओसो नना नियगा वायना, इचोन वने लायक इलेन. नना वने ओर्विना कय इळ्न मन्जि कबळ केवानन आंदन, नावा कय इळ्न वने उय्तुर सीपय्क मन्ह्तोर. नना बोनाय ‘अन!’ इनजोर वेहतेके ओग़ दास्तोग़, दुस्रोन ‘वाय!’ इनजोर केयतेके ओग़ वास्तोग़. अहे नावा साकुर केवानु ‘इद कीम, रा!’ इनजोर वेहतेके, अद कबळतुन ओग़ कीस्तोग़े. (अद्रमे इद रोगमता पोग़ोन वने नीवा अदिकर मन्ह्ता,) अदिनेनाह्क निमा मात्रम अग्डाहे उंद पोल्लो वळ्ह्कतिन इतेके, नावा ओर्युलतोग़ सव्रेम आयनोग़,” इनजोर कबुर लोहतोग़.
9इद पोल्लोतुन केंजिसि, येसु पकाय बामतोग़. अस्के पेग़्के मिळ्न्दिस तना पयाह वावालोर मुडुन इतोग़, “इके केंजाट, नना वेहतह्नन, इचोटा बेरा विस्वस नाकु मावोर इस्रयेलतोर यहुदि जाततोरगा, बोनगान बह दिसो!”#7:9 वेग़ सीपय्कना दरोगाल इस्रयेल देसेमतोग़ आयोग़, मति देवुळता सास्त्रम पुनवोग़ु दुस्रा देसेमतोग़ आंदोग़. वेग़ रोम सर्करता सेवातुह्कु इस्रयेलते वासि. इनजोर इतोग़.
10पया साय्बाना गोततोर लोन मल्स अतोर, अस्के ओग़ ओर्युलतोग़ पूराय सव्रेम आतदिन ऊळतोर.
डोलतोग़ पेकानु येसु तेग़्किह कीस्तोग़
11पया येसु नायिन इनदनद नाग़ अतोग़. ओना संगे ओनाङ कग़यवालोर ओसो वेल्लाटोरे लोकुर वने अतोर. 12येसु अद नाटेनगा ओळियनद अग़दगा एरे एव्स मतोग़. अचोटेने ओर्वोग़ हातोना सेत्तातुन गति कीयलाह, नाटेनोर कांजिस ओसोर मतोर. वेग़ हातोग़ लेयोग़ मन्कना तलोग़ रांडे आंचाह्कु, वेग़ वग़ोग़े मग़ि मतोग़. नाटेनोर वेल्लाटोर ताना संगे अनजोर मतोर. 13अद आंचान ऊळिसि, येसुसामिह्क पका मान वसता. अदिनेनाह्क तानु, “निमा अळमा बायि!” इनजोर इतोग़. 14इतापया, अन्जि सेत्ताता डोह्लातुन बोयतोग़, बोयतस्के कांजिस ओयवालोर अगान रोमतोर.#7:14 मोसानाङ अडोङ वेहतपु, बोग़ाय सेत्तातुन बोयतेके कळ्वोग़ आस्तोग़, देवुळतुन मोळ्कलाह पोलो. मति येसु अदिन सीता केवा, गूनम तोहतोग़. अस्के येसु हातोन इतोग़, “पेका! तेदा!” 15इतस्के ओग़ हातोग़ मन्कल जीवा अर्सि, वळ्ह्क बोटटोग़. पया येसु ओग़ मन्कन तलिनगा ओस ईतोग़. 16अस्के अगा ऊळतोर सबेटोर पका रेयतोर. रेयिस इद्रम इतोर, “देवुळि तना मन्कलोरिन तोळ ईयलाहि वाता रा! तना कबुरतोग़ पका बेरोग़ मन्कन मयगा लोहता,” इनजोर देवुळतुन जोहर कीतोर. 17पया येसुना इद पोल्लो पूरा यहुदिरा बूमते, ओसो ताना सर्ने मनदनव नाह्कने, आबुर आता.
योहन तनाङ कग़यवालोरिन येसुनगा लोहतह्तोग़
(मत्याल 11:2-6)
18-19आबुर आतस्के, एग़ मीहवाल योहननाङ कग़यवालोर इव पूरा केंजतव पोल्लोन, जेलतगा अन्जि योहनिह्क वेहतोर. वेहतस्के ओग़ इर्वुर कग़यवालोरिन केयिसि, ओरिन येसुसामिनगा इद्रम ताल्ह्कलाह लोहतोग़ इतेके, “बोग़ देवुळ लोहवाल पिसिह केवाल राजाल वावाल मतोग़, ओग़ बह निमानेया? बार माटु दुस्रोना अग़ ऊळकोमा?” इनजोर येसुनगा लोहतोग़. 20वेर कग़यवालोर येसुनगा वासि इद्रम इतोर, “गूरु, देवुळता पेदिरते एग़ मीहवाल योहन, ‘बोग़ देवुळ लोहवाल पिसिह केवाल राजाल वावाल मतोग़, ओग़ बह निमानेया? बार माटु दुस्रोना अग़ ऊळकोमा?’ इनजोर, माक नियगा ताल्ह्कलाह लोहतोग़,” इनजोर इतोर.
21इतस्के येसु अगा मतोर वेल्लाटोर दुकतोरिन सव्रे कीतोग़, मुर्तिय तेद पुनवोरिन, देयह्क पोस मतोरिन, सव्रे कीतोग़; ओसो वेल्लाटोर तोववोरिन तोवनाह कीतोग़. 22अह कीसि ओरिन इतोग़, “इंजेके मीट बाताङ केंजतिर, ऊळतिर, अविस्किन मल्स अन्जि योहनिह्क वेहाट: नाक देवुळ ईतद लावते, गुडिर तोवयलाह आतोर,#यशायाह 35:5-6 कूटालोर ताकलाह आतोर, मोंडरोगमतोर सव्रेम आस्तोर, एव्डालोर वेनदलाह आतोर, हातोर बार तेग़्किह्तोर, गरिबतोरिह्क बेसता कबुर केंजलाह दोर्किह्ता.#यशायाह 61:1; लूकाल 4:18-19 23इव सबेटविन ऊळिसि, नना देवुळ लोहतोग़ पिसिह केवानन आंदन इन्जि, बोर उन्क-मन्क आयोर, ओर देय्वातोरु,” इनजोर वेहतोग़.
येसु योहनना लोप्पा लोकुरिन वेहतह्तोग़
(मत्याल 11:7-19)
24पया योहननाङ कग़यवालोर अग्डाहि पेसिस अतोर. अस्के येसु मुडोरा संगे योहनना लोप्पा वेहता बोटटोग़, “पेळ्ह्कल बूमते मीटु योहननाङ केंजलाह अतिर, अस्के बेद्रमता मन्कन ऊळलाह अन्जि? वळ्यते विग़्कु-वग़्कु आयनद काग़रोंडालेह्का तना पोल्लोतुन मिळ्हच-मिळ्हच वेहवान ऊळलाह अन्जिया? 25बार रेसेम गेंदेङ उहतोग़ मन्कन ऊळलाह अन्जिया? केंजाटु, रेसेम गेंदेङ उहतोर मन्कलोर, सबे रीतिना मालसोम मनवालोर, पेळ्ह्कल बूमतगा मनोर, ओर राजमिदेनगा मन्ह्तोर. 26मति मीट बाताल ऊळलाह अन्ज मतिर, वेहाट? देवुळता कबुरतोन ऊळलाह, आयोया? मीक नना वेहतह्नन, मुनेतोर देवुळता कबुरतोरा सेवातुह्क वीळिस, योहनना सेवा मता, अद्रमतोने मीट ऊळलाह अन्जि. 27ओनाय लोप्पा देवुळि मुने तना लोहवाल पिसिह केवान वेहच मता,
‘ऊळा, नना नावा बळयिन नीवा मुने लोहतह्नन,
निमा लोकुरा जीवातगा वायना इन्जि, नीवा अग़दुन ओग़ तीर्ह्कनोग़.’ #
पेसमुळि 23:20; मलाकी 3:1
इनजोर देवुळता सास्त्रमते रासतद मन्ह्ता. (ओग़ बळयि इतेके योहनिये.) 28इह केंजाट, नना मीकु वेहतह्नन, देवुळताङ पाळ्नाङ अडोने ताकवालोरगा, देवुळता पेदिरते एग़ मीहवाल योहनिह्काय वीळिस, बोग़े बेरोग़ पुटोग़ आसि. मतिंगा बोरगा देवुळ राजेम कीस्ता, ओरग्डाहि सबेटोरिह्क उड्लोग़ वने योहनिह्काय बेरोग़!” इनजोर वेहतोग़. 29(अगा मतोर वेल्लाटोर येसु वेहतद पोल्लोतुन केंजतोर. केंजिसि देवुळता अग़दुन सेतेमता अग़ि इतोर, लोकुर कोंटे केवालोरु सिद्वा एनवालोर इंका अहे इतोर. वेर सबेटोरिन योहन मुनेन देवुळता पेदिरते एग़ मीहच मतोग़. 30मति परुसिर ओसो सास्त्रमगूरुर बार, योहन देवुळता पेदिरते एग़ मीहतह्पा मीवालेवा, देवुळि तम्क तोहतद अग़दे ताकोर.)
31-32ओसोवन येसु इद्रम इतोग़, “(मीट योहननाङ केंजवोरिर, नावाङ इंका केंजवोरिर,) मीट बातोरिर इनदना, इके केंजाट. मीट बजरतगा कग़्सलाह उदवालोर पेकोरा लेह्काडोरिर! ओर पेकोर तमाङ गोतयालोरिन केयसोर इन्ह्तोर,
‘मीक इनजोर माट हामुर रेगाताङ पाटाङ ओतोम,
तेला मति मीट अलो देवन इनजोरे, अळसोरे अर्युल पायविर.
पया माटु तुर्स्कने रेला पाटाता रेगा ऊरतोम
तेला मति मीट एंदविर.’
33“अद्रमलेह्काने एग़ मीहवाल योहन पापेन तिंदोग़, अंगुर जोमा उनोग़,#मत्याल 3:4; मार्कल 1:6 अदिह्क इसि, ‘ओनगा देयम मन्ह्ता,’ इद्रम मीट ओन इह्निर. 34मति माने-मन्कना नडुम पुटटोनन बेस तिनजोर-उनजोर वाताह्क इसि, ‘ओन ऊळाट, ओग़ उळ्बे, ओचे, सिद्वा एनवालोरा, पाप्यहलोरा गोतयाल!’ इद्रम मीट नाक इह्निर. (बजरते मनवालोर वेर गळ्स पेकोरा लेह्काने, योहन अह मताह्कु वने मीक अरवोये, नना इह मताह्क वने मीक अरवोये.) 35मति बोर देवुळता बुदते ताकिह्तोर, ओराङ कबस्क सेतेम दिसनुङ,” इनजोर इतोग़.
उंद आंचाना पापमतुन येसु मापि कीस्तोग़
36पया उंद दिया सिमोन इनवाल परुसि मन्कल, येसुन तना लोन जावा उनडलाह केयतोग़. अस्के येसु ओना लोन अन्जि, जावा उनडलाह उदतोग़. 37अचोटेने बह आता इतेके, अद नाटे ओर्वोग़ परुसिना लोतगा येसु जावा उनडलाह वातोग़ इनजोर, उंद सिंड्रि आंचाह्क एर्का आता. अस्के अदु उंद बंडा-तीसाते अतर्नेय पोस अगा वाता. 38वासि येसुना पेग़्के ओनाङ काल्कनगा उदिसि, अळसोरे तनाङ कनिर्कने येसुनाङ काल्किन नाहता.#7:38 यहुदिरा जावा उनडना रीति इद्रम मता इतेके, ओर जावा उनडह्पा पेग़्के काल्क अहचि मेजातके रोयिस तिंदुर. अदिनेनाह्क अद सिंड्रि आंचाळ पेग़्केडेनाह येसुनगा वासि, ओनाङ काल्कनगा नेय ओकलाह, तान्क अग़ दोर्कता. अद बेद्रम इतेके बोर बोर केयवालेवा वने, जावा उनडलाह वांदुर. नाहचि तनाङ केल्कने ओनाङ काल्किन उम्चिंदु. पया ओनाङ काल्किन लोंडसोरे, अद अतर्नेयदुन ओनाङ काल्कनगा वळन्दु. 39येसुन केयिस मतोग़ परुसि, अद आंचाळ अद्रम कीतदिन ऊळिसि, तनतनाय इद्रम विचर कीतोग़, “इद इतेके सिंड्रि आंचाळि! वेग़ मन्कल निटम देवुळता कबुरतोग़ मतेके, तन्क बोयनद आंचाळ बेद्रमता इनजोर पुनेग़, पुन्जि इद्रम कळ्वोग़ आयोग़ आवेग़,” इद्रम विचर कीतोग़.
40अस्के येसु ओना पोटालोप्पाडा विचरतुन पुन्जि ओन इतोग़, “ए सिमोन, नीक उंद पोल्लो ताल्ह्किह्नन,” इतस्के ओग़ इतोग़, “बाताल पोल्लो गूरु?” 41अस्के येसु इद पीटो वेहतोग़: “ओर्वोग़ साव्करनग्डाहि इर्वुर मन्कलोर करा तेंडिस मतोर. ओर्वोग़ एयुङ नूह्क वेंडटाङ बंडिङ, ओसो दुस्रोग़ बार पनस वेंडटाङ बंडिङ.#7:41 इव रोम सर्करताङ वेंडटाङ बंडिङ आंदुङ, अस्के उंद बंडि उंद दियाता कूलि मंदु. 42मति ओर इर्वुर आसि कोताङ मल्हच ईया पग़वोर, पग़वाह्कु वेग़ मन्कल ओर इर्वुरास करातुन मापि कीसीतोग़. अले! इंजेके ओर इर्वुरग्डाहि, बोग़ मन्कल करा ईस मतोन पका जीवा कीयनोग़, वेहा?” इनजोर ताल्ह्कतोग़. 43अस्के सिमोन इतोग़, “बोना वेल्ला करा मापि आता, ओग़े पका जीवा कीयनोग़ बहे,” इतोग़. इतस्के येसु ओन “निमा बराबर वेहतिन,” इतोग़.
44ओसो येसु अद आंचानके मिळ्न्दिसि, सिमोनिन इतोग़. “सिमोन! इद आंचान ऊळा. नीवाय लोन नना तिनदलाह वातन, मति नावाङ काल्क नोग़यलाह एग़ तता वेहविन,#7:44 यहुदि जाततोरगा बह कींदुर इतेके, बोराय लोन वातेक अचोन, ओराङ काल्क नोग़यलाह तमा ओर्युलतोरिन वेहन्दुर. ओरिन लोंडिस जोहर कींदुर. इद बार तनाङ कनिर्कने नावाङ काल्किन नाहचि, केल्कने उम्चता. 45निमा इतेक नाक लोंडिस मन्जि जोहर केविन, इद बार नना लोप्पा ओळियतस्केडाह नावाङ काल्किन लोंडसोर मन्ह्ता. 46नावा तलातगा नेय ओकिस नाक मान एविन, इद बार नावाङ काल्कनगा वेल्ला दाराता अतर्नेय ओकता. 47अदिनेनाह्क नना नीक वेहतह्नन, इद आंचाना वेल्ला पापमता मापि आताह्कु, इद पका जीवा कीस्ता. मति बोना उचुने पापमता मापि आस्ता, ओग़ उचुने जीवा कीस्तोग़,” इनजोर वेहतोग़.
48पया येसु तान इतोग़, “नीवा पापि कबस्कना मापि कीसीतन.” 49इतस्के ओना संगे जावा उनडलाह उदिस मतोरु, “वेग़ बेद्रमतोग़ मन्कल, देवुळतन इतपे पापमतुन मापि कीस्तोग़!” इनजोर बोनाङ ओग़े विचर कींदुर. 50पया येसु अद आंचान इतोग़, “नाक विस्वस कीताह्के, देवुळि नीक पापमताहि पिसिह कीता, गिर्दाते अन,” इतोग़.
Currently Selected:
लूकाल 7: माडियाबाय्बल
Highlight
Share
Copy
Want to have your highlights saved across all your devices? Sign up or sign in
© 2021, Wycliffe Bible Translators, Inc. All rights reserved.
