लूकाल 9

येसु तनाङ बळयिरिन सेवातुह्‌क लोहतह्‌तोग़

(मत्याल 10:9-15; मार्कल 6:7-13)

1उंद दिया येसु तनाङ बारा बळयिरिन केयिसि, मन्कलोरग्डाहि सबे देयह्‌किन पेसिह कीयलाहि, ओसो रोगमतोरिन सव्रे कीयलाहि, ओरिह्‌क लावु ओसो अदिकर ईतोग़. 2पया देवुळि मन्कलोरगा राजेम कीयनद पोल्‍लोतुन पोकुर कीयलाहि, ओसो रोगमतोरिन सव्रे कीयलाहि, ओरिन लोहतोग़. 3लोहतह्‌पा “मीट सेवाते दाकिर अस्के, मीवा कयदे डुडि, जोर्का, गाटो, कोताङ, जगाङ-गेंदेङ, इद्रम बाताङे ओयमाटु. 4बेद लोतगा मीट दाकिर, अदे लोतगा मन्ह्‌टु, अदे लोतग्डाह दुस्रा नाग़ अन्ह्‌टु. 5बेद नाटेनोर लोकुर मीक रोमलाह एवोर, अग्डाहि पेसना वेलाते, ओर देवुळता सिक्सातुह्‌क ओजिह्‌तोर इनजोर तोहतलाहि, मीवाङ काल्कना दुरातुन अगाने दुल्पिसि पेसाटु,”#9:5 यहुदि जातते बोराय दुस्रा नाटेनोर आयि, आयवेके दुस्रा देसेमतोर आयि, बेस गूनमते काळ्ङोर इतेके, अद नाटेनग्डाह आयि इलवेके अद देसेमतग्डाहि आयि, पेसनेके आपुना पापमता दुरातुन सायिसि अद नाटेनग्डाहि पेसिंदुर. अद्रम कीतेके तमा पापमतुन ओराय नाटेनगा सायिस ईतप लेह्‌का आंदु. इतोग़.#10:4-12 6अद्रमलेह्‌काने पया, ओर अग़ पोस सेवाते दायह्‌पा, बेसता कबुरतुन पोकुर कीसोरे, ओसो रोगमतोरिन सव्रे कीसोरे, सबे नाह्‌किह्‌क अतोर.

एरोद राजाल येसुनेनाह्‌क एक्बेक आस्तोग़

(मत्याल 14:1-2; मार्कल 6:14-16)

7-8पया येसु कीतव ओसो वेहतव पोल्‍लोन, गालिल पटटा राजाल, एरोद अंतिपस केंजिसि, एक्बेक आतोग़. बाराह्‌क इतेके उय्तुर, “देवुळता कबुरतोग़ एलिया मुय्तोग़ ओसोवने वातोग़,” इंदुर.#मलाकी 4:5 उय्तुर बार “आयो! वेल्‍लाय मुने बोर कबुरतोर मतोर, ओरग्डाहि जीवा अरतोग़ु, वेग़ ओर्वोग़ देवुळता कबुरतोग़ आंदोग़ बहे,” इंदुर. ओसो उय्तुर बार, “योहन डोलिस जीवा अरतोग़,” इनजोर इंदुर.#9:7-8 योहनना हामुर बह आता, इद पोल्‍लोतुन पुनदलाह मत्याल 14:1-12 ऊळाट. 9अस्के एरोद राजाल “योहनना तलातुन इतेके नना डाय वेहच मतन, मति इंजेके नना इद्रमताङ पोल्‍लोङ केंजलाह आतन, इतेके वेग़ बोग़ मनदनोग़?” इनजोर येसुन ऊळलाह विचर कीतोग़.

एयुङ अजर्क लोकुरिह्‌क येसु तीहतह्‌तोग़

(मत्याल 14:13-21; मार्कल 6:32-44; योहन 6:5-13)

10पया येसुनाङ बळयिर सेवाताहि मल्स वासि, तमा बाताल बाताल कीतोर, अव सबे कबस्किन येसुह्‌क वेहतोर. वेहतापया ओग़ ओरिन पोसि, बेत्‍सेदा नाटेनगा बोरिह्‌के एर्का आयवाह अतोग़.

11मति इद पोल्‍लो लोकुरिह्‌क एर्का आतस्के, ओर वने ओरा पयाह अतोर. अस्के येसु मुडुन गूनमते केयिसि, देवुळि मन्कलोरगा राजेम कीयनद पोल्‍लोतुन ओरिह्‌क वेहतोग़. केंजवालोरग्डाहि बोर रोगमतोरिह्‌क सव्रेम आयना मता, ओरिन सव्रे कीतोग़. 12पया पोळ्‍द दायलाह आस मता, अस्के बारा बळयिर येसुनगा वासि, इद्रम इनदलाह आतोर, “गूरु, माट नाटेनग्डाह वेल्‍लाय जेक मह्‌नल, अदिह्‌क लोकुरिन इग्डाह लोहचीम, वेर सबेटोर एरे-गूरेताङ नाह्‌कनगा अन्जि, तम्क उंजलाह जागा ओसो तिनदलाह तिंडि पर्ह्‌किर.” 13इतस्के येसु मर्ला ओरिने, “अले मीटे ओरिह्‌क तिंडटा बह कोट कीम्ह्‌टु रा!” इतोग़. इदिन केंजिस बळयिर “आं माटु! माट इचोन लोकुरिह्‌क गाटो असिस तच तीहनाह आतोमा? इंजेक मयगा इतेके सिरप एयुङ आरिङ, रेंड मीन्क, इवे मन्ह्‌ताङ, इविन विळ्सिसि इतेके बाताले इले,” इतोर. 14अगा (आस्किनु, पिलाङ-पेकोरिन विळ्सिसि,) कोय्तोरे जोक-जोक एयुङ अजर्क मतोर. (अच्वुर लोकुर मन्जाय मति,) “लोकुरिन पनास-पनासताङ गुमिङ कीसि, उदिह कीम्ह्‌टु,” इनजोर येसु ओरिन वेहतोग़. 15ओग़ वेहतप लेह्‌का, बळयिर कतमतोरिन अद्रमे उदिह कीतोर. 16पया येसु एयुङ आरिङ ओसो रेंड मीन्किन तेहतोग़, पया पोग़ोन ऊळिसि देवुळतुन जोहर कीतोग़. कीसि अविस्किन तुक्ळेङ कीतोग़, अह कीसि “लोकुरिह्‌क तूसिस ईम्ह्‌टु” इनजोर तनाङ कग़यवालोरिन वेहतोग़. 17तूसिस ईतस्के, कतमतोर लोकुर पोटामेंड तितोर. तितापया अव पिसतवु किळ्केङ, बारा डालाङ निंदतविन, ओर जमा कीतोर.

येसु बोग़ आंदोग़ इन्जि पत्रु पुन्ह्‌तोग़

(मत्याल 16:13-16; मार्कल 8:27-29)

18पया अद्रम आनेके, येसु उंद मल्का तना वग़ोग़े देवुळता संगे पार्तना कीयह्‌पा, ओनाङ कग़यवालोर वने ओना संगे मतोर. ओरिन येसु इद्रम ताल्ह्‌कतोग़, “नना बोनन आंदन इनजोर, लोकुर नाक इन्ह्‌तोर?” इनजोर इतोग़. 19इतस्के “उय्तुर बार नीक एग़ मीहवाल योहन इन्ह्‌तोर, उय्तुर बार देवुळता कबुरतोग़ एलियाल आंदोग़, उय्तुर बार वेल्‍लाय मुनेटोर देवुळता कबुरतोरग्डाहि, ओर्वोग़ मन्कल जीवा अरतोग़ बहे, इन्ह्‌तोर,” इनजोर तनाङ कग़यवालोर इतोर. 20इतापया येसु ओरिन, “अले पया मीट वेहाट, नाक बोग़ इनजोर मीट इह्‌निर?” इनजोर ताल्ह्‌कतोग़. ताल्ह्‌कतस्के “सामि, निमा इतेके देवुळ लोहतोग़ पिसिह केवाल किर्स्तुनिन आंदिन,” इनजोर पत्रु इतोग़.

येसु तना वायना हामुरतुन पुनाह कीस्तोग़

(मत्याल 16:20-28; मार्कल 8:30—9:1)

21पया पत्रुना पोल्‍लोतुन केंजिसि येसु, “नना किर्स्तुनन इनजोर, मीट बोने वेहमाट बहा,” इनजोर उकुम इतोग़. 22पया तनाङ कग़यवालोरिन इद्रम काग़्हता बोटटोग़, “मान्वना नडुम पुटटोन्कु, इतेके नाकु, पका तिपल आयनद मन्ह्‌ता. यहुदिराङ पेदल्कु, पेर्मालोरु, सास्त्रमगूरुर नाक पास्कनुर, हव्कनुर, ताना पया मूंड दियाने नना तेग़्ककन, इव करल अद्रम आयनुङे!” इनजोर वेहतोग़.

23ताना पया जमा आतोर सबेटोरिन इतोग़, “बोर नावाङ कग़यलाह वायना विचर कीस्तोर, ओरु दिनम तमा हव्कनागुटा कांजतप,#9:23 हव्कनागुटातगा हायनद हामुर इतेके, इद उंद वेल्‍लाय तिपलता हामुर आंदु. इद्रमता रिवज यहुदि जाततोरा आयो, मति रोमि लोकुर इद्रम कींदुर. नयेनाह्‌क वायनव तिपल्किन आपिर. ओसो तमाये गिर्दातुन पोहचि, नावा अग़दे ताकिर.#इब्रितोर 13:13 24बोर इद बूमते तमा कुदता जीवातुन पिसिह कीयलाह ऊळिह्‌तोर, ओर आक्रिते बूळेम आयनुर. मति बोर बार नयेनाह्‌कु सबे पोहतह्‌तोर, ओरिह्‌क देवुळि पूना जीवा ईयग़ा.#मत्याल 10:39; मार्कल 8:35; लूकाल 14:26; 17:33; योहन 12:25 25मन्कल इद दुनियाता सबे रीतिना सुकम दोर्किह कीसाय मति, तना कुदता जीवातुन अमेसातुह्‌क लेसिह कीतोग़ इतेके, ओन्क बाताल पाय्दा आयग़ा? 26बोग़ु नना येसुनाङ कग़यवानन इनदलाह पेग़्के-मुनेह आस्तोग़, ओनु नना मान्वना नडुम पुटटोनन वने जेक तासकन. ओसो बेद दिया नना नावा डीसाते, ओसो बाबाना डीसाते, ओसो नावा संगे मनदनव पवित्र देवतुल्कना डीसाते वायकन, अस्के अद्रमतोग़ मन्कन मावोग़ इनदलाहि पेग़्के-मुनेह आयकन. 27इह केंजाट, सेतेमते नना वेहतह्‌नन, मियग्डाहि उय्तुर नावा संगे मनवालोरिर, हायनामुनेन देवुळि तना राजेम निल्पिह कीयनदिन मीट ऊळकिर,” इनजोर वेहतोग़.

येसुना रूप मिळ्न्दिह्‌ता

(मत्याल 17:1-8; मार्कल 9:2-8)

28इव पोल्‍लोङ वेहच आट दियाना पया, पत्रु, योहन, याकुब, वेरिन येसु तना संगे पोसि, पार्तना कीयलाहि, उंद मेटापोग़ोन अतोग़. 29अगा ओग़ पार्तना कीयह्‌पा इद्रम आता इतेके, ओना मोकमता रूप मिळ्न्दता, ओनाङ गेंदेङ, कोंडाङ ऊळ पग़वाह तिर्मिळ्स्किंदुङ. 30-31अस्के अगा बह आता इतेके, मोसा मुय्तोग़ ओसो एलिया मुय्तोग़, वेर इर्वुर मुनेतोर देवुळता कबुरतोरु, येसुनगा डीसाते वातोर. वासि, येरुसलेमतगा येसु बेद हायना हामुरता कबळतुन मारिह कीयना मता, अदिना लोप्पा ओना संगे वळ्ह्‌कलाह आस मतोर. 32पत्रु ओसो ओना संगतोर उंजिस मतोर. पया ओर तेदतोर अस्के येसुना डीसातुन ऊळतोर. ओसो ओना संगे ओर इर्वुर नितदिन ऊळतोर. 33गळ्क मनेके मोसा मुय्तोग़ ओसो एलिया मुय्तोग़ येसुनग्डाह अनेके, पत्रु पया “सामि, माट इगा मह्‌नल इतेके बेस आता, माट इगा मूंड मंडाङ पंडकोम: उंदि नियेनाह्‌कु, उंदि मोसा मुय्तोनेनाह्‌कु, उंदि एलिया मुय्तोनेनाह्‌कु,” इतोग़. (इव पोल्‍लोङ पत्रु बाताल वळ्ह्‌किंदोग़, अद तना तन्के तेळियो.) 34ओग़ इव पोल्‍लोङ वळह्‌कनेके, ओरा पोग़ोन मोयुल वासि ओरिन मुचता, मुचतस्के वेर मुवुर कग़यवालोर पका रेयतोर. 35ओरिन मुचतद मोयुलताहि उंद इद्रमता लेङ केंज वाता, “वेग़ नावा मग़ि आंदोग़, वेन नना आचतन, वेनाङे मीट केंजसोर मन्ह्‌टु,” इता. 36अद लेङ केमेन आतापया, वेर मुवुरिह्‌क आसि, येसु वग़ोग़े अगा दिसतोग़. अदिह्‌क वेर केमेन आस मतोर, ओसो अगा ओर बाताल ऊळतोर, अदिन बोन्के बाताले बह वेहोर.

देयम पोयतोन येसु सव्रे कीस्तोग़

(मत्याल 17:14-18,22-23; मार्कल 9:14-27,30-32)

37इमा दिया बाताल आता इतेके, ओर मेटाताहि रेगतोर, अस्के लोकुरा बेरा गोह्‌डि, येसुन कलियलाह मेटाकचुल वातोर. 38अस्के लोकुरा नडुम ओर्वोग़ मन्कल पका जोरते केयिसि इतोग़, “गूरु! नना नीवाङ काल्क अरयह्‌नन, जीवा लोपिस नावा मग़नेके ऊळा, वेग़ नावा वग़ोग़े मग़ि आंदोग़. 39वेन तोप-तोप देयम अह्‌चिह्‌ता, अस्के वेग़ पका केयिह्‌तोग़. ओसो तोडटाहि बोमुल पेसनाह, वेन पका तेल्हतह्‌ता, अद वेन बेस्केन विळ्सो, तिपल कीसोरेन मन्ह्‌ता. 40इद देयमतुन पेहतलाह नना नीवाङ कग़यवालोरिन अर्जि कीतन, मति ओरा संगे आया पग़वो,” इनजोर वेहतोग़. 41अस्के येसु इतोग़, “ए विस्वसलेवोरिर, गलत विचर केवालोरिर, मीवा संगे बेचानाह नना मनदकन! मियेनाह्‌क नाक कयर वास्ता! अले नीवा मग़िन इगा तय,” इतोग़. 42पया ओग़ पेकान येसुनगा तनेकेन, देयम ओन नेल अर्हचि पका तेल्हता. अस्के येसु अद देयमतुन दगा ईतोग़, ईतापया ओग़ पेकान सव्रे कीसि, ओना तपेनगा ईतोग़. 43अस्के इद देवुळता डीसातुन ऊळिसि, सबेटोर लोकुर बामतोर.

येसु कीयनद कबळतुन लोकुर ऊळिसि बामिंदुर, अस्के येसु तनाङ कग़यवालोरिन इद्रम इतोग़, 44“नना मीक बेव पोल्‍लोङ वेहतलाह आतन, अविस्किन बेस-नेह्‌ना केंजाटु. माने-मन्कना नडुम पुटटोनन, नाकु कोंटेतोरा कयदे पोस ईयना मन्ह्‌ता,” इनजोर वेहतोग़. 45मति येसु वेहतद पोल्‍लो, ओरिह्‌क मुर्तिय तेळियो. अद पोल्‍लो ओरग्डाह मकिस मता. अदिह्‌क अदिन ओर पुनदा पग़वोर. ओसो अद पोल्‍लोतेनाह्‌क ओन ताल्ह्‌कलाह वने, ओर रेयिंदुर.

देवुळता राजेमते बेरोग़ बोग़?

(मत्याल 18:1-5; मार्कल 9:33-40)

46पया माट बारा मन्कलोरग्डाहि सबेटोरिह्‌क बेरोग़ बोग़ इनजोर, तमा बळयिरा नडुमिये कट्ला पुटटा.#22:24 47अस्के ओरा विचर बाताल मन्ह्‌ता इनजोर येसु पुतोग़. पुन्जि ओर्वोग़ उड्लोग़ पेकान केयिसि, तनगा निल्पिह कीतोग़. 48कीसि “बोग़ु वेग़ उड्लोग़ पेकान नावा पेदिरते एरे कीस्तोग़, ओग़ नाक एरे कीतपे.#9:48 उड्लोर पेकोर बेदे कबळतुह्‌क ओजोर इनजोर, यहुदि लोकुरा विचर मंदु. अदिह्‌क येसु उड्लोग़ पेकान, ओरा मुनेह निल्पिह कीसि अद्रम इतोग़. ओसो बोग़ु नाक एरे कीस्तोग़, ओग़ नाक लोहतोन वने एरे कीस्तोग़.#मत्याल 10:40; लूकाल 10:16; योहन 13:20 अदिनेनाह्‌क बोग़ मियग्डाह सबेटोरिह्‌क उड्लोग़ मन्ह्‌तोग़, ओग़े सबेटोरिह्‌क बेरोग़ आंदोग़,” इतोग़.

49इतस्के योहन इतोग़, “गूरु, नीवा पेदिरते ओर्वोग़ मन्कल, देयह्‌किन पेसिह कीतदिन, माटु ऊळतोम. ओग़ मावा तोळतोग़ आयवाह्‌कु, माट ओन रोमिह कीतोम,” इतोग़. 50इतस्के “बोग़ मीवा विरुदतोग़ आयोग़, ओग़ मीवोग़े आंदोग़, मीट ओन रोमिह केमाटु,” इनजोर येसु योहनिन वेहतोग़.

सामरि जाततोर येसुह्‌क बेस कदर एवोर

51येसुह्‌क देवुळदीपतगा दायनद दिया एरे एवसोर मता. अदिनेनाह्‌क ओग़ येरुसलेम दायलाह अट कीस पेसतोग़. 52येसु तना पेसनामुनेन, उय्तुरिन कबुर लोहचीतोग़. ओर ओन्क जागा तयर कीयलाह, सामरि जाततोर लोकुरा उंद नाग़ एवतोर. 53मति येसु येरुसलेम दायलाह पेसतोग़ इन्जि, सामरि जाततोर लोकुर येसुन ओसो ओनाङ कग़यवालोरिन अगा रोमलाह एवोर.#9:53 यहुदि लोकुर सामरि जाततोरिन विटळ तासिंदुर. ओसो सामरि जाततोर बार गेरजिम मेटातगा मोळ्किंदुर, यहुदि जाततोर बार येरुसलेमता मंदिरतगा मोळ्किंदुर. अदिनेनाह्‌क सामरि जाततोर वेरिन अगा रोमलाह एवोर. 54ओरिन रोमलाह एवाह्‌कु, येसुनाङ कग़यवालोरु याकुब ओसो योहन, वेर इद्रम इतोर, “गूरु! इद नाटेनोरिन बूळे कीयलाह, पोग़ोटा बूमताहि किस अरयि इनजोर#2 राजा 1:9-12; तोहचीतव पोल्‍लोङ 11:5; 13:13 माट उकुम ईकोम, इद्रम नीवा विचर मन्ह्‌ताया?” इतोर. 55अस्के येसु ओरेके मिळ्न्दिस, ओरिन तेर्हतोग़. 56पया ओर अग्डाह दुस्रा नाग़ अतोर.

येसुनाङ कग़यवालोराङ अड्सन्कु

(मत्याल 8:19-22)

57पया अग़दे ताकसोर अनेके, बोग़ो ओर्वोग़ मन्कल येसुनगा वासि, “गूरु, निमा बेक अतेकाय, अकेन नना नीवा संगे वायकन,” इतोग़. 58इतस्के, येसु ओन इतोग़, “कोय्लेस्किह्‌क मनदलाह बार गळ्‍दाङ, पिटेह्‌क मनदलाह बार गूडाङ मन्ह्‌ताङ. मति नना माने-मन्कना नडुम पुटिसाय मति, नाक तला रोयिह कीयलाह वने जागा इले. (निमा वने अद्रम मनदलाह तयर मह्‌निना?)” इतोग़.

59पया येसु दुस्रोन ओर्विन “नावा पयाह पयाह वासि नावाङ कग़या,” इनजोर वेहतोग़. मति ओग़ मन्कल इतोग़, “गूरु, (नना नीवा संगे वायकन, निटमे. मति) मुने नाकु बाबाना लोन दायलाह ईमु. बाबाल हायनोग़ अस्के, नना ओन पोहचि नियके वायकन,” इतोग़. 60इतस्के येसु इतोग़, “देवुळता जीवालेवोरु हातपे मन्ह्‌तोर, ओरे तमाङ हातोरिन पोहिर! निमा मात्रम देवुळता राजेमता कबुरतुन वेहा,” इनजोर इतोग़.

61ओसो ओर्वोग़ मन्कल येसुन इतोग़, “नना नीवा पयाह वासि कग़यकन गूरु! मति मुने नना लोन अन्जि, नावा लोतोरिन वेहच वाय्ह्‌नन,” इतोग़. 62इतस्के येसु इतोग़, “नांगिल पोसि पेग़्के ऊळसोर पूहवाल मन्कल, देवुळता राजेमता सेवातुह्‌क लायकतोग़ आयोग़,”#पिलिपितोर 3:13 इतोग़.

Currently Selected:

लूकाल 9: माडियाबाय्बल

Highlight

Copy