EVASELIO A LUKA 17
17
Agahala, fakamolemole, tui
1Nee ui leva e Sesu ki ana tisipulo: E mole feala ke aua naa hoko ni fakahala; kae malaia ki ae e ina fakatupu te u fakahala! 2E lelei age kia ia ke nonoo he maka lomifulumeto ki tona kia, pea ke li ia ki te moana, i tana fakahalai he tahi i te u toe liliki aeni. 3Koutou tokaga kia koutou totonu. Kapau nee agahala tou tehina kia koe, fakatonutonu ia; pea kapau e fakahemala ia, fakamolemole kia ia. 4Pea kapau e agahala ia kia koe o tua fitu i he aho e tahi, pea e toe liliu tua fitu atu ia kia koe, o ui: E au fakahemala! E ke fakamolemole anai kia ia.
5Nee ui leva e te kau apositolo ki te Aliki: Fakatuputupu tamatou tui. 6Pea nee ui leva e te Aliki: Kapau e kotou mau he tui o hage ko te tegai sinapi, e kotou ui anai ki te sikomole* aeni: Mataaki ia koe, pea ke to ia koe i te tai; pea e fakalogo atu anai ia kia koutou.
Maua o te tagata faifekau
7Ko ai ae ia koutou, e ina mau hana tagata faifekau ae e fuli kele pe e fagai manu, e ina ui anai kia ia, i tana liliu mai te gaueaga: Fai mo vave o hau ki te laupapa o kai! 8Pe e mole ina ui anai kia ia: Teuteui mai kia au he meakai, tui ou kofu o takatuu mai kia au, ke au kai mo inu; hoki osi ia, pea hoki ke kai leva mo inu? 9Pe e maua ia ke fakafetai ki te tagata faifekau aena koteuhi nee ina fai te mea ae nee fakatotonu age kia ia? 10E feia pe mo koutou, ka kua kotou fai leva te u mea fuli ae nee fakatotonu atu kia koutou, kotou ui: Ko matou ko ni tagata faifekau hee aoga, nee matou fai te mea ae nee tonu ke matou fai.
Fakamauli o te u kilia e hogofulu
11Ko Sesu, i tana alu ki Selusalemi, nee fakalaka leva i te tuakoi o Samalia mo Kalilea. 12I tana hu ki he kolo, pea nee omai leva ni tagata kilia e toko hogofulu o fakafetaulaki mai kia ia. Nee natou tutuu leva mai mamao, pea nee natou kalaga leva, o ui: 13Sesu, Pule, ofa mai kia matou! 14I tana sio leva kia natou, nee ina ui leva kia natou: Koutou olo o fakaha koutou ki te kau tagata faisakilifisio. Pea i tanatou olo, nee hoko leva kua natou mauli i tonatou kilia. 15Ko he tahi o natou, i tana sio ake kua mauli i tona kilia, nee toe liliu leva ia, o fakakololia ki te Atua mo he leo lahi. 16Nee punou leva ia ki te kele ia vae o Sesu, o fakafetai kia ia. Ko he tagata Samalitana ia. 17Nee palalau leva ia Sesu, o ui: Pe nee mole mauli fuli te toko hogofulu? Pe kofea te toko hiva ake ae? 18Pe e gata pe ki te matapule aeni kua toe liliu mai o fakakololia ki te Atua? 19Pea nee ui leva e Sesu kia ia: Tuu ki oluga, alu; nee fakamauli koe e tau tui.
Puleaga o te Atua i te temi nei
20Nee fehui leva e te kau faliseo kia Sesu pe e hau anai afea te puleaga o te Atua. Nee ina tali leva kia natou: E mole hau te puleaga o te Atua ke feala te sio ki ai. 21E mole ui anai: E i heni ia, pe: E i hena ia. Koteuhi koeni, e nofo te puleaga o te Atua i te lotomalie o koutou.
Fakaha o tana toe liliu mai
22Pea nee ui leva e Sesu ki te kau tisipulo: E hoko mai anai ni aho ae e kotou holi ai ke kotou sisio ki he aho e tahi ia aho o te Foha o te tagata, kae e mole kotou sisio anai ki ai. E ui atu anai kia koutou: 23E i heni ia, e i hena ia. Aua naa kotou olo ki ai, pea aua naa kotou felelei i muli. 24Koteuhi, o hage ko te hila e tapa pea e huhulu mai te tahi potu lagi ki te tahi potu lagi, e fena anai te Foha o te tagata i tona aho. 25Kae e tonu mua ke mamahi lahi ia, pea ke siaki ia e te taitupu aeni.
26Ko te mea ae nee hoko i te temi o Noe, e toe hoko anai ia ia aho o te Foha o te tagata. 27Nee kai mo inu te u tagata, mo ohoana pea mo fakaohoana anatou fanau, o kaku ki te aho ae nee ulu ai ia Noe ki te aleka; pea nee to leva te lomaki, o ina fakamamate fuli natou. 28Ko te mea ae nee hoko i te temi o Lote, e toe hoko anai. Nee kakai te u tagata, mo iinu, mo faifakatau, mo faikoloa, mo to tau, mo laga fale; 29kae i te aho nee mavae ai ia Lote mai Sotoma, nee to leva he ua afi mo he ua sulifa* mai te lagi o tamatei fuli natou. 30E feia anai mo te aho ae e fakaha ai anai te Foha o te tagata.
31I te aho aia, ko ia ae e nofo anai i te tuapatu o tona fale, kae tuku ana mea i te loto fale, ke aua naa hifo ia o too natou; pea ko ia ae e nofo anai i te gaueaga, ke aua naa toe liliu ia ki muli. 32Koutou manatui te ohoana o Lote. 33Ko ae e faiga ke ina haofaki tona mauli e ina pulihi anai ia, pea ko ae e ina pulihi anai ia e ina toe mau anai ia. 34E au fakaha atu kia koutou, i te pouli aia, i he foi toko lua ae e momoe anai i he palepale, e too anai te tahi kae e tuku anai te tahi. 35I ni fafine e toko lua e na fakamalu te fulumeto, e too anai te tahi kae e tuku anai te tahi. 36I ni tagata e toko lua ae e nonofo i he gaueaga, e too anai te tahi kae e tuku anai te tahi.
37Nee fehui leva e te kau tisipulo kia ia: Aliki, e hoko anai i fea te u mea aena? Pea nee tali leva e Sesu: I te kogamea ae e i ai anai te sino mate, e fakapupu anai ki ai te u votu*.
Currently Selected:
EVASELIO A LUKA 17: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
EVASELIO A LUKA 17
17
Agahala, fakamolemole, tui
1Nee ui leva e Sesu ki ana tisipulo: E mole feala ke aua naa hoko ni fakahala; kae malaia ki ae e ina fakatupu te u fakahala! 2E lelei age kia ia ke nonoo he maka lomifulumeto ki tona kia, pea ke li ia ki te moana, i tana fakahalai he tahi i te u toe liliki aeni. 3Koutou tokaga kia koutou totonu. Kapau nee agahala tou tehina kia koe, fakatonutonu ia; pea kapau e fakahemala ia, fakamolemole kia ia. 4Pea kapau e agahala ia kia koe o tua fitu i he aho e tahi, pea e toe liliu tua fitu atu ia kia koe, o ui: E au fakahemala! E ke fakamolemole anai kia ia.
5Nee ui leva e te kau apositolo ki te Aliki: Fakatuputupu tamatou tui. 6Pea nee ui leva e te Aliki: Kapau e kotou mau he tui o hage ko te tegai sinapi, e kotou ui anai ki te sikomole* aeni: Mataaki ia koe, pea ke to ia koe i te tai; pea e fakalogo atu anai ia kia koutou.
Maua o te tagata faifekau
7Ko ai ae ia koutou, e ina mau hana tagata faifekau ae e fuli kele pe e fagai manu, e ina ui anai kia ia, i tana liliu mai te gaueaga: Fai mo vave o hau ki te laupapa o kai! 8Pe e mole ina ui anai kia ia: Teuteui mai kia au he meakai, tui ou kofu o takatuu mai kia au, ke au kai mo inu; hoki osi ia, pea hoki ke kai leva mo inu? 9Pe e maua ia ke fakafetai ki te tagata faifekau aena koteuhi nee ina fai te mea ae nee fakatotonu age kia ia? 10E feia pe mo koutou, ka kua kotou fai leva te u mea fuli ae nee fakatotonu atu kia koutou, kotou ui: Ko matou ko ni tagata faifekau hee aoga, nee matou fai te mea ae nee tonu ke matou fai.
Fakamauli o te u kilia e hogofulu
11Ko Sesu, i tana alu ki Selusalemi, nee fakalaka leva i te tuakoi o Samalia mo Kalilea. 12I tana hu ki he kolo, pea nee omai leva ni tagata kilia e toko hogofulu o fakafetaulaki mai kia ia. Nee natou tutuu leva mai mamao, pea nee natou kalaga leva, o ui: 13Sesu, Pule, ofa mai kia matou! 14I tana sio leva kia natou, nee ina ui leva kia natou: Koutou olo o fakaha koutou ki te kau tagata faisakilifisio. Pea i tanatou olo, nee hoko leva kua natou mauli i tonatou kilia. 15Ko he tahi o natou, i tana sio ake kua mauli i tona kilia, nee toe liliu leva ia, o fakakololia ki te Atua mo he leo lahi. 16Nee punou leva ia ki te kele ia vae o Sesu, o fakafetai kia ia. Ko he tagata Samalitana ia. 17Nee palalau leva ia Sesu, o ui: Pe nee mole mauli fuli te toko hogofulu? Pe kofea te toko hiva ake ae? 18Pe e gata pe ki te matapule aeni kua toe liliu mai o fakakololia ki te Atua? 19Pea nee ui leva e Sesu kia ia: Tuu ki oluga, alu; nee fakamauli koe e tau tui.
Puleaga o te Atua i te temi nei
20Nee fehui leva e te kau faliseo kia Sesu pe e hau anai afea te puleaga o te Atua. Nee ina tali leva kia natou: E mole hau te puleaga o te Atua ke feala te sio ki ai. 21E mole ui anai: E i heni ia, pe: E i hena ia. Koteuhi koeni, e nofo te puleaga o te Atua i te lotomalie o koutou.
Fakaha o tana toe liliu mai
22Pea nee ui leva e Sesu ki te kau tisipulo: E hoko mai anai ni aho ae e kotou holi ai ke kotou sisio ki he aho e tahi ia aho o te Foha o te tagata, kae e mole kotou sisio anai ki ai. E ui atu anai kia koutou: 23E i heni ia, e i hena ia. Aua naa kotou olo ki ai, pea aua naa kotou felelei i muli. 24Koteuhi, o hage ko te hila e tapa pea e huhulu mai te tahi potu lagi ki te tahi potu lagi, e fena anai te Foha o te tagata i tona aho. 25Kae e tonu mua ke mamahi lahi ia, pea ke siaki ia e te taitupu aeni.
26Ko te mea ae nee hoko i te temi o Noe, e toe hoko anai ia ia aho o te Foha o te tagata. 27Nee kai mo inu te u tagata, mo ohoana pea mo fakaohoana anatou fanau, o kaku ki te aho ae nee ulu ai ia Noe ki te aleka; pea nee to leva te lomaki, o ina fakamamate fuli natou. 28Ko te mea ae nee hoko i te temi o Lote, e toe hoko anai. Nee kakai te u tagata, mo iinu, mo faifakatau, mo faikoloa, mo to tau, mo laga fale; 29kae i te aho nee mavae ai ia Lote mai Sotoma, nee to leva he ua afi mo he ua sulifa* mai te lagi o tamatei fuli natou. 30E feia anai mo te aho ae e fakaha ai anai te Foha o te tagata.
31I te aho aia, ko ia ae e nofo anai i te tuapatu o tona fale, kae tuku ana mea i te loto fale, ke aua naa hifo ia o too natou; pea ko ia ae e nofo anai i te gaueaga, ke aua naa toe liliu ia ki muli. 32Koutou manatui te ohoana o Lote. 33Ko ae e faiga ke ina haofaki tona mauli e ina pulihi anai ia, pea ko ae e ina pulihi anai ia e ina toe mau anai ia. 34E au fakaha atu kia koutou, i te pouli aia, i he foi toko lua ae e momoe anai i he palepale, e too anai te tahi kae e tuku anai te tahi. 35I ni fafine e toko lua e na fakamalu te fulumeto, e too anai te tahi kae e tuku anai te tahi. 36I ni tagata e toko lua ae e nonofo i he gaueaga, e too anai te tahi kae e tuku anai te tahi.
37Nee fehui leva e te kau tisipulo kia ia: Aliki, e hoko anai i fea te u mea aena? Pea nee tali leva e Sesu: I te kogamea ae e i ai anai te sino mate, e fakapupu anai ki ai te u votu*.
Currently Selected:
:
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland