EVASELIO A LUKA 21
21
Molaga a te finetaka
1Nee hiki ake leva e Sesu ona mata, pea nee sio leva ia ki te tuku e te kau maukoloa anatou molaga ki te puha o te u molaga. 2Pea nee sio foki ia ki he finetaka masiva, ae nee ina tuku ki ai ni kii foi piesi e lua. 3Pea nee ina ui leva: E au tala mooni atu kia koutou, nee foaki e te finetaka masiva aeni o lahi age ia natou fuli ake ae; 4koteuhi nee tuku e natou fuli ake ae ki te puha molaga mai te toe o onatou koloa; kae kia ia, mai tona masiva, nee ina tuku te mea nee ina mau, tona mauliaga katoa.
Akonaki i te mouga o Oliveto
5Nee palalau leva ihi o uhiga mo te fale tapu, ki te tauleleka o ona maka, pea mo te u molaga. Kae nee ui leva e Sesu: 6I te u mea ae e kotou sisio ki ai, e hoko mai anai te u aho ae e mole toe hili anai he foi maka i oluga o he tahi foi maka; koteuhi e laku fuli anai natou ki lalo.
Fehui e lua a te u tisipulo
7Nee natou fehui leva kia ia: Pule, ko afea e hoko ai anai te mea aena, pea kotea te fakailoga e iloi ai anai ka amanaki hoko te u mea aena?
Tali a Sesu: Ko te u temi fakamuli
8Nee tali leva e Sesu: koutou tokaga naa fakahe koutou. Koteuhi e hau anai te tokolahi i toku huafa, o ui: E ko au, pea kua ovi mai te temi. Aua naa kotou mulimuli ia natou. 9Ka kotou logo anai e palalau ki ni tau mo ni maveuveu, aua naa kotou mataku, koteuhi e tonu ke hoko te u mea aena i mua. Kae e mole ko te fakaosi anai aia. 10Pea nee ina ui leva kia natou: E malaga ake anai he puleaga o fakafehagai ki he tahi puleaga, pea mo he puleaga fakahau o fakafehagai ki te tahi puleaga fakahau; 11e i ai anai he u mafuike lalahi, pea, ia potu kehekehe mo he u taimahaki lalahi, mo te u hoge; pea e i ai anai i te lagi he u mea fakamatakutaku pea mo he u fakailoga lalahi.
Mamahi o te kau tui
12Kae, i mua o te u mea fuli aia, e puke nima anai koutou, pea e fakatagai anai koutou; e ave anai koutou ki te u sinakoka, e laku anai koutou ki te u pilisoni, e taki anai koutou kia mua o te u hau mo te u kovana, o tupu ko toku huafa. 13E hoko anai te mea aena kia koutou o tupu ke kotou liliu ko he fakamooni. 14Koia, koutou ai ki okotou loto, ke aua naa kotou teuteu fakatomua takotou haofaki; 15koteuhi e au foaki atu anai kia koutou he gutu mo he poto ae e mole lavai anai e natou e fakafehagai kia koutou tona tatali mo tona taui. 16E fakatau anai koutou e okotou matua totonu, mo okotou tehina, mo okotou famili, mo okotou kaumea; pea e natou tamatei anai he kaugamalie o koutou. 17E fehia anai kia koutou te tagata fuli, uhipe ko toku huafa. 18Kae e mole puli anai he fului ulu o tokotou foi ulu. 19I takotou kataki fualoa, pea e kotou haofaki anai okotou laumalie.
Maumaui o Selusalemi
20Ka kotou sio anai kua takatakai ia Selusalemi e te u fua solia, pea e kotou iloi leva kua hokosia mai tona maumaui. 21Koia, ko natou e nonofo anai i Sutea ke natou feholaki ki te u mouga, pea ko natou e nonofo anai i Selusalemi ke natou mavae i ai, pea ko natou e nonofo anai i te u gaueaga ke aua naa natou toe ulu ki te kolo. 22Koteuhi ko te u aho anai aena o te lagavaka, o tupu ke fakahoko ai te u mea fuli nee tohi. 23Malaia ki te u fafine ae e faitatama anai pea mo natou ae e fakahuhu toe anai i te u aho aena! Koteuhi e i ai anai he toe mamahi fakamataku i te fenua, pea mo he hauhau ki te hahai aeni. 24E tamatei anai natou aki te heleta, pea e ave anai natou o fakapopulai i te u puleaga fuli, pea e malamalaki anai ia Selusalemi e te u puleaga pagani, o kaku ki te katoa o te temi o te u puleaga.
Fakailoga o te Foha o te tagata
25E i ai anai ni fakailoga i te laa, mo te mahina, pea mo te u fetuu. I te kele, e i ai anai te manavahe i te atu puleaga ae e mole kei natou iloi he mea ke fai, o tupu ko te uulu mo te hou o te moana. 26Pea e pogia anai te hahai i te mataku lahi osi i te talitali ki te mea ka hoko anai ki te kele; koteuhi e lului anai te u malohi o te lagi. 27Pea e natou sisio anai ki te Foha o te tagata e haele mai i he ao mo he mafimafi pea mo he kololia lahi. 28Ka kamata hoko mai anai te u mea aena, kotou tutuu fakahagatonu, pea kotou lagai ki oluga okotou mata, koteuhi kua ovi mai tokotou haofaki.
Fakailoga o te fiki
29Pea nee ina fai leva kia natou he fakatata: Kotou sisio ki te fiki, pea mo te u akau fuli. 30Ka natou kamata hohomo, pea e kotou iloi e koutou totonu, kua ovi mai te temi vevela. 31Pea e fena foki, moka kotou sisio anai ki te u mea aena kua hoko mai, ke kotou iloi kua ovi mai te puleaga o te Atua. 32E au ui mooni atu kia koutou, e hoko te u mea fuli aena, kae e heeki puli anai te taitupu aeni. 33E puli anai te lagi mo te kele, kae e mole pe puli anai aku folafola.
Ke alaala
34Koutou tokaga kia koutou totonu, ke aua naa mafasia okotou loto i te kai fakavale, mo te inu fakavale, pea mo te u fakahoha o te mauli, pea ke aua naa hau fakapunamauli te aho aena kia koutou. 35Koteuhi e hau anai ia o hage ko he kupega, kia natou fuli e nonofo i te fuga o te kele katoa. 36Koia kotou alaala ai, pea kotou faikole i te temi fuli, o tupu ke kotou mau te malohi o feholaki mai a mea fuli aena ka hoko mai anai, pea ke kotou tutuu ia mua o te Foha o te tagata.
37I te aho nee akonaki Sesu i te fale tapu; kae i te pouli nee alu ia o nofo i te mouga nee higoa ko Oliveto. 38Pea i te pogipogi uhu nee olo age te hahai katoa kia ia i te fale tapu, o fakalogo kia ia.
Currently Selected:
EVASELIO A LUKA 21: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
