EVASELIO A LUKA 22
22
Fakatuutuu a Sutasi ke tamatei ia Sesu
1Kua ovi te aho o te u pane hala fakatupu, nee higoa ko te Pasikate. 2Nee kumi e te kau pule faisakilifisio mo te kau sekelipa ni puleaki ke tamatei ia Sesu; koteuhi nee natou mataku ki te hahai.
3Kae, nee ulu leva ia Satana kia Sutasi, nee fakahigoa ko Isekaliote, ae nee kau ki te toko hogofulu ma lua. 4Pea nee alu leva ia Sutasi o felogoi mo te kau pule faisakilifisio pea mo te kau pule ofisa, pe e feafeai te tuku o Sesu kia natou. 5Nee natou fiafia osi, pea nee natou tuku leva ke foaki kia ia he paaga. 6I tana tali te mea aia, pea nee ina kumi leva he faigamalie ke ina fakatau ai Sesu kia natou i te puli a te hahai.
Kai o te Pasikate
7Nee hoko leva te aho o te u pane hala fakatupu, ae e tonu ke tamatei ai te akeno o te Pasikate. 8Pea nee fekaui leva e Sesu ia Petelo mo Soane, o ui: Kolua olo o teuteui mai kia tatou te Pasikate ke tou kai ia. 9Nee na ui age leva kia ia: Ko te kogamea fea e ke loto ke ma teuteui ai te Pasikate? 10Pea nee ina tali leva kia naua: Koeni, i takolua hu ki te kolo, e kolua felavei anai mo he tagata e ina amo he foi hina vai; kolua mulii ia ki te fale ae e ulu anai ia ki ai, 11pea kolua ui leva ki te pule o te fale: E ui mai e te pule kia koe: Kofea te kogafale e au kai ai anai te Pasikate mo aku tisipulo? 12Pea e ina fakaha atu anai kia kolua he kogafale lahi i fata kua teuteui; ko te kogamea aena e kolua teuteui ai anai te Pasikate. 13Nee na olo leva, pea nee na mau leva te u mea o hage ko tona fakaha age kia naua e Sesu; pea nee na teuteui leva te Pasikate.
Pasikate fakaosi
14I te hoko mai o te hola, nee heka leva ia ki te laupapa kai, pea mo te kau tisipulo o fakatahi mo ia. 15Nee ina ui leva kia natou: nee au holi lahi ke au kai te Pasikate aeni mo koutou, i mua o taku mamahi! 16Koteuhi, e au fakaha atu kia koutou, e mole au toe kai anai ia o kaku ki tona fakahoko katoa i te puleaga o te Atua. 17Nee ina too leva he ipu, pea nee fakafetai leva ia, o ui: Kotou too te ipu aeni, pea kotou vaevae ia ia koutou; 18koteuhi e au fakaha kia koutou, e mole au toe inu anai ki te fua o te vite, o kaku ki te hau o te puleaga o te Atua.
Te kai fakamanatu
19Pea nee ina too leva mo he pane, pea i te osi o tana fakafetai, nee ina tofitofi leva ia, pea nee ina foaki age ia kia natou, o ui: Ko te mea aeni ko toku sino ia, ae nee foaki o uhi ko koutou; koutou fai te mea aeni o fakamanatu kia te au. 20I te osi o te kai, nee ina toe too foki te ipu, o foaki age kia natou, o ui: Ko te ipu aeni o te hai foou i toku toto, ae nee liligi o uhi ko koutou.
Fakaha e Sesu ia ia ae e fakatagai ia ia
21Pea koeni, e fakatahi mo au i te laupapa te nima o ia ae e ina fakatau anai au! 22E alu te Foha o te tagata o mulimuli ki te mea ae nee fakatuutuu kia ia. Kae malaia ki te tagata ae e ina fakatau anai ia. 23Pea nee natou kamata feuiaki leva pe ko ai ae ia natou e ina fai anai te mea aia.
Ko ae e lahi osi
24Nee mafuta leva i te kau apositolo he fihi pe ko ai e lahi age ia natou: 25Nee ui leva e Sesu kia natou: Ko te u hau o te u puleaga e lagiaki fakamalohi kia natou, pea ko natou ae e mau tuulaga i te u puleaga e fakahigoa natou ko te u tagata manavaofa. 26Kae e mole fena anai ia koutou. Ko ae e lahi age ia koutou ke hage ia ko ae e veliveli osi, pea ko ae e pule ke hage ia ko ae e faifekau. 27Koteuhi ko ai ae e lahi age, pe ko ia ae e heka i te laupapa, pe ko ia ae ae faifekau? Pe e mole ko ia ae e heka i te laupapa? Pea ko au, e au nofo i te lotomalie o koutou o hage ko ia ae e faifekau!
Fakapale o te kau apositolo i te puleaga
28Ko koutou, e ko koutou ae nee kotou faa kataki mo au i oku ahiahii; 29koia e au tuku ai te puleaga kia koutou, o hage ko tona tuku mai ia e taku Tamai kia au, 30o tupu ke koutou kai mo inu i toku laupapa i toku puleaga, pea ke koutou heka i ni hekaaga fakahau, o fakamaaui te u faahiga e hogofulu ma lua o Iselaele.
Fakaha e Sesu te fakafisi a Petelo
31Nee ui leva e te Aliki: Simone, Simone, nee kole koutou e Satana, ke ina lui koutou o hage ko te lui o te fulumeto. 32Kae nee au hufaki koe, ke aua naa higa tau tui; pea ko koe, ka ke toe liliu mai anai, fakamalohii ou tehina. 33Nee ui leva e Petelo kia ia: Aliki, kua au teuteu ke au alu mo koe ki te pilisoni pea mo te mate. 34Pea nee ui leva e Sesu: Petelo, e au fakaha atu kia koe, e heeki uua anai te moa tagata i te aho nei kae kua ke fakafisi tua tolu anai e mole ke iloi au.
Aluaga foou o te u tisipulo
35Pea nee toe ui leva e Sesu kia natou: I taku fekaui koutou hala paaga, mo hala taga, pea mo hala sulie, pe nee puli he mea kia koutou? Nee natou tali leva: Kailoa! 36Pea nee ina ui leva kia natou: Kae i te aho nei, ko ae e ina mau hana paaga ke ina too ia, pea ko ae e ina mau hana taga ke ina too ia, pea ko ae e hala heleta ke ina fakatau tona kofu o totogi ai he heleta. 37Koteuhi, e au fakaha atu kia koutou, e tonu ke fakahoko ia au te folafola aeni nee tohi: Nee lau ia o fakatahi mo te kau agakovi. Pea ko te mea nee tohi kia au kua vave hoko pe. 38Pea nee natou ui leva: Aliki, koeni te u heleta e lua. Pea nee ina ui leva kia natou: kua feauga i ai.
Kole a Sesu i te mouga o Oliveto
39Nee ulu leva ia Sesu ki fafo, o alu ki te mouga ko Oliveto, o hage ko tana fai mahani. Nee mulimuli leva ana tisipulo ia te ia.
40I tana kaku ki te kogamea aena, nee ina ui leva kia natou: Koutou faikole o tupu ke aua naa kotou higa ki te fakahala. 41Pea nee fakamamao leva ia maia natou, i he vaha o he foi maka nee li. Pea nee tuutuli ifo leva ia o faikole, 42o ui: Tamai, kapau e ke finegalo ki ai, ke fakalaka mamao te ipu aeni maia te au! Kae, ke aua naa fai toku finegalo, kae ko tou finegalo.
43Pea nee ha mai leva kia ia he aselo mai lagi, o fakamalohii ia. 44I tana tugaki, nee asili faikole ia, pea nee liliu leva tona kakava o hage ko ni mosii toto, ae nee hahali ki te kele. 45I te osi o tana faikole, nee tuu leva ia ki oluga, o hau ki ana tisipulo, o ina mau mai leva natou kua momoe i te lotomamahi, 46pea nee ina ui leva kia natou: Kotea e kotou momoe ai? Koutou tutuu o faikole o tupu ke aua naa kotou higa ki te fakahala.
Puke o Sesu
47I te lolotoga o tana palalau, koeni, nee kaku mai leva he hahai; pea ko ae nee higoa ko Sutasi, ko he tahi o te toko hogofulu ma lua, nee haele ia mua o natou. Nee fakaovi age leva ia kia Sesu, o uma kia ia. 48Pea nee ui leva e Sesu kia ia: Sutasi, pe e ke fakatau te Foha o te tagata aki he uma?
49I te sisio a natou ae nee nonofo mo Sesu ki te mea kua hoko, nee natou ui leva kia ia: Aliki, pe e tonu ke matou ta aki amatou heleta? 50Pea nee taai leva e te tahi o natou te tagata faifekau a te pule faisakilifisio, o motu ai tona taliga matau. 51Kae nee ui leva e Sesu kia natou: Kua feauga, taofi! Pea nee fafa leva ia ki te taliga o te tagata aena, o fakapipiki ia.
52Pea nee ina ui leva ki te kau pule faisakilifisio, mo te kau pule ofisa o te fale tapu, pea mo te kau matua ae nee omai o fakafehagai kia ia: Kua kotou omai mo ni heleta pea mo ni akau, o hage ki he tagata kaihaa. 53I te aho fuli nee au fakatahi mo koutou i te fale tapu, pea nee mole pe kotou kapa kia au. Kae ko te hola aeni o koutou, pea mo te pule a te kau fakapouli.
Fakafisi a Petelo
54I te osi o tanatou puke Sesu, nee natou taki leva ia ki te fale o te pule faisakilifisio. Nee mulimuli ia Petelo mai mamao ia te ia.
55Nee natou tafu leva he afi i loto o te malae, pea nee natou nonofo leva ki lalo ia tafa o te afi. Nee nofo leva ia Petelo mo natou. 56Ko he fafine faifekau, ae nee sio leva kia ia e nofo i mua o te afi, nee sio fakamamau leva ona mata kia ia, o ui: Nee nofo foki te tagata aeni mo ia. 57Kae nee fakafisi leva Petelo kia ia, o ui: Fafine, e mole au iloi ia: 58Pea nee mole fualoa, nee sio age he tahi kia ia, o ui: E ke kau foki mo koe kia natou! Pea nee tali leva e Petelo: Tagata, e mole au kau mo natou. 59Pea lagi hili ape ki ai he hola katoa, nee kinau age leva he tahi, o ui: E mooni, nee fakatahi te tagata aeni mo ia, koteuhi e Kalilea ia. 60Nee tali leva e Petelo: Tagata, e mole au iloi te mea e ke palalau ki ai. Pea nee fokifa leva, kae kei palalau ia ia, nee uua leva te moa tagata. 61Nee maliu leva te Aliki ki muli, o sio kia Petelo. Pea nee manatui leva e Petelo te folafola ae nee fai e te Aliki kia ia: Ia mua o te uua o te moa tagata i te aho nei, kua ke fakafisi tua tolu kia te au. 62Pea nee ulu leva ia ki fafo, o tagi mamahi.
Fakafehui o Sesu
63Ko te u tagata ae nee natou puke ia Sesu nee natou nukinuki kia ia pea mo haha ia. 64Nee natou hai leva ona mata, kae natou fehui kia ia, o ui: Mate! Pe ko ai ae nee ina haha ia koe? 65Pea nee lahi osi te laukovi kehekehe nee natou fai kia ia.
Sesu ia mua o te fono lahi
66I te aho ake leva, nee fakatahi leva te kau matua o te hahai, mo te kau pule faisakilifisio, mo te kau sekelipa, pea nee natou fakatotonu leva ke ave Sesu ki te fono lahi. 67Pea nee natou ui leva: Kapau ko koe ko te Kilisito, pea fakaha mai ia kia matou. Nee tali leva e Sesu kia natou: Kapau e au fakaha atu ia kia koutou, pea e mole kotou tui anai ki ai; 68pea kapau e au fai kia koutou he fehui, pea e mole kotou tali mai anai kia au. 69Kae kamata atu i te aho nei, e nofo anai te Foha o te tagata i te toomatau o te mafimafi o te Atua. 70Nee natou ui fuli leva: Kapau koia, pe ko koe ae ko te Alo o te Atua? Pea nee ina tali leva kia natou: Kua kotou tala ia, e ko au totonu. 71Pea nee natou ui leva: Pe e kei aoga mai kia tatou he fakamooni? Kua tou logo totonu ki ai mai tona gutu.
Currently Selected:
EVASELIO A LUKA 22: WB2011
Highlight
Share
Copy
Want to have your highlights saved across all your devices? Sign up or sign in
© 2011, Eglise évangélique, chez Lotoato Logote Hihifo, Vaitupu, Wallis
- Les droits sont administrés par Midi Bible, une branche de la Société Biblique de Genève
- Rights are administrated by Midi Bible, a branch of Société Biblique de Genève, 1032 Romanel-Sur-Lausanne, Switzerland
