ɛMacu 4
4
Kɛ Tɛɛrek ɛYɛso Ye
(ɛMar 1.12-13; ɛLuk 4.1-13)
1iKabyik ge ne bo ɛYɛso yegha iphɛ phɛ nɛ ndɔ ɛhay te ɛShɛtan bhɛ tɛɛrek ɛbhɛ. 2ɛYɛso gha ne bhɛ kuma ɛ hɔn nituk nzuwubɔ nwaas ne igbey ne nzuwubɔ nwaas ne ɛ te ikpyak. 3ɛShɛtan na ne ji yɛɛs ɛ yaak ɛYɛso yegha, “Wu ɛ so yɛ ɛNgɔn ɛTaanggbey ya, ne ɛ yɛk ngɛ ikpɛɛ yɛdaa wo teye ire.”
4ɛYɛso gha ne kyii nɛ ɛ yaak ɛShɛtan ne gha, “Kɛ ku haa ndɔ ne ɛWee ne iBol ɛTaanggbey yo i bo,
‘Sɔng ne ire de zɔng ne ɛnyi gha
i shɛɛ nɛ ɛken na nang.
ɛNyi gha yaa yang shɛɛ ɛken na daa ne gbik idɛ,
ibol de ne iphɛ kɛ wuru ɛlɔ ɛTaanggbey.’ ”
5ɛShɛtan na ne bo ɛYɛso yegha ɛ phɛ ne ɛbhɛ ne iYɛrushɛlɛm, ɛgarang ne kɛ tul kang, ɛbhɛ wara ne ɛYɛso gha dak ɛco ne iDeng nga. 6Ne ɛ ji yaak ɛYɛso yegha, “Wu ɛ soyɛ ɛNgɔn ɛTaanggbey ya, le ɛbɛ wo te ɛ taay ndɔ ne ivel, daa ɛli ne kɛ ku haa ndɔ ne ɛWee ne iBol ɛTaanggbey yo i bo,
‘ɛTaanggbey yaa yɛk nimalɛka ɛbhɛ nɛ nibhɛ hyep pɛ,
nibhɛ yaa say yɛ, kyap, ndɔ ne ibɔ nibhɛ,
ɛli ne sɔng aa mɔɔng icwa mo ne ikɛɛ nang.’ ”
7ɛYɛso gha ne kyii ɛbhɛ nɛ ɛ yɔngɔ, “Kɛ ta ku haa ndɔ ne ɛWee ne iBol ɛTaanggbey i bo,
‘Sɔng ɛ tɛrɛk ɛDaray ɛTaanggbey mo gha nang.’ ”
8ɛShɛtan na ne kyii ta bo ɛYɛso yegha ɛbhɛ wara nɛ dak ne igbaang ne ɛwarang, ne ɛ ji tɔɔl ɛbhɛ igbɔm ɛzay da gbik ne iryat tɛ. 9Ne ɛ ji yaak ɛYɛso yegha, “Naa nang ngɛ nikɔn nɛnaa wo gbik, wu ɛ kɛ te ne ɛkuum ɛ re me ntsong.”
10ɛYɛso gha ne kyii nɛ ɛ yaak ɛbhɛ, “Cwi gɔɔ ɛbɛ wo ɛShɛtan nɔɔy! Kɛ ku haa ndɔ ne ɛWee ne iBol ɛTaanggbey yo bo,
‘Re ɛDaray ɛTaanggbey mo gha ntsong,
ɛbhɛ zɔng ne aa re ɛbhɛ ntsong ngga.’ ”
11ɛShɛtan na ne ji tek ɛYɛso yegha, nimalɛka ne ji yɛɛs nibhɛ phyik ɛbhɛ.
ɛYɛso gha kɛ Tsa ɛTomɛ Ɛbhɛ gha ne iGalili
(ɛMar 1.14-15; ɛLuk 4.14-15)
12Kɛ ne sɛ ɛYɛso gha kɛ phok wu kɛ rop ɛYohana yegha ne ijwee ne nyang ngo, ne ɛ kyii ɛ phɛ ne iGalili. 13ɛYɛso gha kaa ne tek iNazarat de ɛ phɛ ɛgarang ne iKafanahum ne ɛ so cɛcɛk ne ɛling nga. ɛGarang ngɛghaa nggyɛ wo kaa ne soye ɛgyeng ne ivel ne iZɛbalun ne iNatali. 14Kaa mɔn ɛlɛ wo te ne shwaak ibol de ne ɛnɛbi ɛShaa gha ne kaa ku boote ɛ yɔngɔ:
15“iVel ne iZɛbalun ne
ivel iNatali ndɔ ne iGalili,
ne iphɛ so ne ɛnkiinɛ ɛling,
ne iWurudun gbik ne,
ikpang ne ihywel iYɛrushɛlɛm.
iGalili, ivel ninyi nɛ
nibhɛ sang so niYahodawa!
16Ninyi nɛ nibhɛ so ndɔ igbyik,
nibhɛ kɛ yaang ɛgbaang ɛwɛwɛy.
Gbik ɛli nɛ nibhɛ so ne ivel da
ne izazurum ne iku de
kɛ te gyɔɔ wo,
ɛwɛwɛy kɛ ne jung wuru
ɛbhɛ tol nibhɛ.”
17Ne lenɛ nten nɛdee nggyɛ wo ne ɛYɛso gha ne tsa sanga ibol ɛbhɛ de ɛ bo, “San ɛn ɛbɔk, daa ɛli ne igbɔm ɛdaa ne irywa da yek cɛcɛk.”
ɛYɛso gha kɛ Yel-le Ninɔn ne iCwam Ɛbhɛ ninaa ɛYisɛ Yɛ
(ɛMar 1.16-20; ɛLuk 5.1-11)
18Kaa ne sɛ ɛYɛso gha i hyel ɛmbambang ne ɛLing ne iGalili gha, ne ɛ yaang nidɛng nigwaa na ifaa, ɛSimɔn ne i ta bok ɛbhɛ ɛBiturus, ne ɛgwaa ɛbhɛ ɛNdarawus. Nibhɛ kaa ne i cwaasek ne ɛkara ndɔ ɛling nga daa ɛli nɛ nibhɛ so ninaa ne lok izing. 19ɛYɛso gha ne yaak nibhɛ, “Kungus ɛn mɛɛn, naa yɛk nyini ne ɛtomɛ ne hɔ me ninyi.” 20Nibhɛ ne shii tek ikpara nibhɛ da, nibhɛ kungus ɛYɛso yegha.
21ɛYɛso gha ne hyeete, ne ɛ a yaang nidɛng nigwaa na ifaa, ɛYakub pa ne ɛ so ɛngɔn ɛZɛbɛdi ne ɛgwaa ɛbhɛ ɛYohana, nibhɛ so ndɔ ne ɛkparak, gbik ne ɛkyɛɛ nibhɛ ɛZɛbɛdi gha, nibhɛ ryɔng ikpara nibhɛ. ɛYɛso gha ne yel-le nibhɛ, 22nibhɛ ne shii tek ɛkparak ko gbik ne ɛkyɛɛ nibhɛ gha, nibhɛ kungus ɛYɛso yegha.
ɛYɛso gha kɛ Phyik Ninyi Gbom
(ɛLuk 6.17-19)
23ɛYɛso gha ne kaan ne ivel ne iGalili da gbik, ɛ mɛmɛ ninyi na nɛ ndɔ ne idee ne itsɔɔy niYahodawa na, ɛ tɔng nibhɛ ibol iyɛnɛng ne igbɔm ɛTaanggbey da, ɛ ta tes nishwa nɛ ninaa ne irɔ niken. 24Ngka ɛYɛso de ne bhɛ hɔn ndɔ ne ivel ne iSiriya da gbik, ninyi na ne yɛɛset ɛbhɛ nɛ ninaa ne ishwa na ihywee-ihywee, ninaa ne rɔ nilɔ niken, nɛ ninaa ne ikpabyik niphoo, nɛ ninaa ne cwi ne ikpayaa, nɛ nilɔɔm, ɛYɛso gha ne tes nibhɛ niken gbik. 25iDira ninyi de kaa ne les ne iGalili, nɛ ɛlɔ gha ne i bok ɛbhɛ nigarang ɛnduwubɔ#4.25 nigarang ɛnduwubɔ: ɛNting ne ibol lɛdee wo so iDikapɔli., ne iYɛrushɛlɛm, ne iYahudiya, gbik nɛ ɛbyin nigarang nga nɛ nibhɛ sos ikpang ne iWurudun no, nibhɛ ne i kungus ɛYɛso yegha.
Currently Selected:
ɛMacu 4: etxNT
Highlight
Share
Copy
Want to have your highlights saved across all your devices? Sign up or sign in
© Wycliffe Bible Translators, Inc. and
© the Nigeria Bible Translation Trust 2018
in cooperation with
iTen Language and Bible Translation Project
