GENESE 9
9
Nowe le bara ba hae.
1Yaba Modimo a hlohonolofatsa Nowe le bara ba hae, wa re ho bona: Atang, le ngatafale, le tlale lefatsheng. 2Diphoofolo tsohle tsa lefatshe, le dinonyana tsohle, le ntho tsohle tse hahabang lefatsheng le dihlapi tsohle tsa lewatle di le tshabe, di tshohe ke lona; di beilwe matsohong a lona. 3Dintho tsohle tse tsamayang, tse phelang, e tla ba dijo tsa lona; ke le neile tsona tsohle, jwalokaha ke le neile dimela tse tala. 4Empa le se ke la ja nama e nang le bophelo ba yona, ke ho re, madi a yona. 5Kannete ke tla batla madi a lona, e leng bophelo ba lona, ke tla a batla ho tsohle tse phelang; ke tla batla bophelo ba motho ho motho, le ho ngwanabo motho. 6Ya tshollang madi a motho, le madi a hae a tla tshollwa ke motho; hobane Modimo o entse motho ka setshwantsho sa wona. 7Lona, atang, le ngatafale, le tlale haholo lefatsheng, mme le ngatafale teng.
8Modimo wa bolella Nowe le bara ba hae bao a nang le bona, wa re: 9Bonang, nna ke tiisa selekane sa ka le lona, le ditloholo tsa lona tse le hlahlamang, 10le dintho tsohle tse utlwang tseo le nang le tsona, leha e le dinonyana, leha e le makgomo, le diphoofolo tsohle tsa lefatshe tseo le nang le tsona, ho qala ka tse tswileng arekeng ho isa ho tsohle tse utlwang lefatsheng. 11Ke tiisa selekane sa ka le lona, mme nama yohle ha e sa tla boela e fediswe ka metsi a morwallo; mme ho ke ke ha hlola ho eba le morwallo o senyang lefatshe. 12Modimo wa re: Pontsho eo ke le fang yona ya selekane sa ka le lona, le dintho tsohle tse utlwang tseo le nang le tsona, ho isa masikeng le masikeng, ke yona ena: 13Ke bea mookodi wa ka marung, mme e tla ba pontsho ya selekane sa ka le lefatshe. 14Etlare ha ke kwahetse lefatshe ka maru, mookodi o tla bonahala marung, 15mme ke tla elellwa selekane sa ka se mahareng a ka le lona, le dintho tsohle tse utlwang tsa nama yohle, mme metsi a ke ke a boela a etsa morwallo, ho fedisa nama yohle. 16Mookodi o tla bonahala marung, mme ke tla o tadima, ke elellwe selekane sa ka mehla se emeng mahareng a Modimo le dintho tsohle tse utlwang tsa nama yohle tse lefatsheng. 17Modimo wa re ho Nowe: Ke yona pontsho ya selekane seo ke se beileng mahareng a ka le nama yohle e lefatsheng.
18Bara ba Nowe ba tswileng arekeng ke Sema, le Kama, le Jafeta. Kama ke ntata Kanana. 19Ke bona bara ba bararo ba Nowe bao lefatshe le tletseng batho ka bona.
20Yaba Nowe o qala ho lema mobu, a hloma merara. 21A nwa veine, a tahwa, mme a ikapola ka tenteng ya hae. 22Kama, ntata Kanana, a bona bofeela ba ntatae, mme a ya bolella banababo ba babedi kantle. 23Sema le Jafeta ba nka kobo, mme ba e bea mahetleng a bona ba babedi, mme ba tsamaya kasanthao, ba apesa bofeela ba ntata bona, difahleho tsa bona die furaletse, mme ba se ke ba bona bofeela ba ntata bona. 24Nowe ha a hlaphohelwa ke veine ya hae, a tseba seo mora hae e monyenyane a mo entseng sona. 25A re: Ho rohakwe Kanana; e tla ba mohlanka wa bahlanka ba banababo. 26A re: Ho bokwe Jehova, Modimo wa Sema, mme Kanana e be mohlanka wa hae. 27Modimo o atolose Jafeta, a dule ditenteng tsa Sema, mme Kanana e be mohlanka wa hae.
28Nowe a phela kamorao ho morwallo dilemo tse makgolo a mararo a mashome a mahlano. 29Dilemo tsohle tsa Nowe tsa eba makgolo a robileng mono o le mong a mashome a mahlano; mme a shwa.
Currently Selected:
GENESE 9: SSO61-SO
Highlight
Share
Copy
Want to have your highlights saved across all your devices? Sign up or sign in
© Bible Society of South Africa 1961. Used with permission. All rights reserved.
