Елшіл. істері 4

Екі елші Жоғарғы кеңестің алдында

1Петір мен Жохан жиналған жұртқа әлі де сөйлеп тұрған кезде оларға діни қызметкерлер, ғибадатхана сақшыларының басшысы және өзге саддукейлер#4:1 Яки: садықшылдар (5:17; Түсіндірмені де қараңыз). де келді. 2Олар екеуінің халыққа тәлім беріп, «Иса өлімнен қайта тірілді»#4:2 Демек, өлгендердің бәрі қиямет күні қайта тіріледі (23:6-8). деп жариялап жүргендеріне наразы болды. 3Содан олар Петір мен Жоханды тұтқындап, келесі күнгі таңертеңге дейін түрмеде ұстады. Себебі мезгіл кеш болып қалған еді. 4Петірдің уағызын тыңдағандардың көбі сенімді қабылдап, қауымдағы ер адамдардың саны бес мың шамасында болды.#4:4 2:41,47.

5Келесі күні таңертең яһудилердің басшылары, рубасылары және дін мұғалімдері Иерусалимде жиналды. 6Бас діни қызметкер Ханас әрі Қаяфа, Жохан, Ескендір және басты діни қызметкер әулетінің тағы басқа кісілері де түгел сол жерде болды. 7Олар екі елшіні ортаға шығарып:

— Сендер мұны қандай күшпен, кімнің атынан істедіңдер? — деген сұрақ қойды. 8Киелі Рухқа ерекше кенелген Петір оларға былай жауап берді:

— Халықты басқарушылар мен рубасылары! 9Біз бүгін: «Ол кім арқылы сауықты?» деп, ауруға жасаған жақсылығымыз үшін тергелмек болып жатырмыз. 10Ендеше бәріңіз де біліп алыңыздар, бүкіл Исраил халқына да мәлім болсын: сіздер айқышқа шегелетіп өлтірткен, ал Құдай өлімнен қайта тірілткен назареттік Иса Мәсіхтің атынан#4:10 Яки: Мәсіхтің құдіретімен. мына кісі сауығып, қарсы алдарыңызда тұр.

11Иса — құрылысшылар, яғни сіздер, менсінбей бас тартқан Тас.#4:11 Яки: керегі жоқ деп бас тартқан Тас (Жыр 117:22; Лұқ 20:17-19). Ол «енді үйдің басты іргетасына айналды!»

12Исадан басқа ешкім де бізді (Құдайдың қаһарынан) құтқара алмайды! Аспан астында бізді құтқаратын басқа ешкімнің есімі адамдарға бұйырылмаған!#4:12 Яки: Құдай адамдарға құтқарылулары үшін аспан астындағы басқа ешкімнің атын белгілемеген (10:42-43; Мат 1:21; 16:15-16; Жох 14:6; Тит 2:5-6).

13Кеңес мүшелері Петір мен Жоханның батылдығын көріп, олардың арнайы діни даярлықтан өтпеген қарапайым адамдар екенін байқағанда таңғалды. Сондай-ақ, олар екеуінің Исаның шәкірті болғанын білді. 14Алайда қастарында тұрған сауыққан кісіні көріп, қарсы ештеңе айта алмады. 15Оларға: «Жоғарғы кеңестен шығыңдар!» — деп бұйырды да, өзара ақылдасып: 16«Мына кісілерге не істесек екен? Олар арқылы бір кереметтің жасалғаны анық, бұл Иерусалимде тұрып жатқандардың бәріне белгілі, онымен таласа алмаймыз. 17Дегенмен бұл іс халыққа одан бетер тарап кетпес үшін, бұдан былай сол Есімді атап ешкімге сөйлемеңдер, олай етпеген күнде жазаға тартамыз деп қатаң тыйым салайық», — десті. 18Әлгілерді шақырып алып, оларға:

— Исаның атымен ешқандай уағыз айтпаңдар да, тәлім бермеңдер де! — деп тыйым салды. 19Бірақ Петір мен Жохан оларға:

— Құдайды емес, сіздерді тыңдау Оның алдында жөн болар ма екен? Мұны өздеріңіз ойлап көріңіздерші! 20Ал біз көріп-естігендеріміз туралы үнсіз қала алмаймыз, — деп жауап берді.

21Жоғарғы кеңес болған оқиғаға бола Құдайды дәріптеп жүрген халықты ескеріп, екі елшіні жазалаудың ретін таппай, оларды қорқыта түсіп, жөндеріне жіберді. 22Себебі көп жылғы ауруынан сауығып, кереметті басынан кешірген кісінің жасы қырықтан асып кеткен еді.#4:22 3:2.

Сенушілердің Құдайдан батылдық сұрап сиынуы

23Өздерін босатқаннан кейін Петір мен Жохан қауымдастарына барып, басты діни қызметкерлер мен рубасыларының өздеріне айтқандарын түгел баяндап берді. 24Сенушілер осыны естігенде ниеттес көңілмен Құдайға сиынып, дауыстап былай деді:

— Уа, Әлемнің Әміршісі, көк пен жерді, теңізді және олардағы нәрселердің бәрін жаратқан Сенсің! 25Өзіңнің қызметшің — арғы атамыз Дәуіттің аузымен Киелі Рух арқылы былай дедің:

«Неге халықтар жатыр ашуланып,#4:25 Яки: жатыр паңдана бас көтеріп.

Ұлттар іске аспайтын жоспарлар құрып?

26Жаратқан мен Оның қойған Патшасына#4:26 Яки: Оның тағайындаған Құтқарушы Патшасы — Мәсіхке (Мат 1:1).

Әлемнің патшалары қарсы тұрып,

Әкімдер кеңесіп жатыр бірігіп».#4:26 Жыр 2:1-2.

27Рас, осы қалада Ирод пен Понти Пилат#4:27 Яғни (аймақ әкімі) Ирод (Антипас) пен (әмірші) Понти Пилат (Лұқ 23:1,7,11-12). Өзіңе бағынбаған ұлттармен және Исраилдің руларымен бірігіп, Өзің Патша етіп тағайындаған қасиетті Қызметшің#4:27 Яки: қасиетті (рухани) Ұлың (3:13; 4:30). Исаға қарсы одақтасты. 28Алайда олардың іске асырғаны — Сенің құдіретті еркің алдын ала белгілеген жоспарың ғана.

29Ал енді, уа, Иеміз, олардың қоқан-лоқысын көріп, құлдарыңа Сенің сөзіңді зор батылдықпен уағыздайтын күш бере гөр! 30Қолыңды созып ауруларды сауықтыра гөр, қасиетті Қызметшің Исаның атынан кереметтер мен ғажап істер жасап құдіретіңді көрсете гөр!#4:30 11:21; Езр 7:8,28.

31Олар сиынып болғаннан кейін өздері жиналып отырған жер қозғалып кетті. Бәрі Киелі Рухқа кенеліп,#4:31 2:2,4. Құдай сөзін батылдықпен уағыздады.

Сенушілердің өзара тату болып, бір-біріне жәрдемдесуі

32Сенушілердің қауымы ой-ниеттері бірдей шын жүректен ынтымақтас болды.#4:32 Яки: өзара ниеттес, ынтымақты болды. Ешкім қолындағы мал-мүлкін өз меншігім демей, олар барлығымен бөлісті.#4:32 2:44-45; 4:34-37; Лұқ 6:30,35-36. 33Елшілер Иеміз Исаның қайта тірілгендігі туралы зор жігермен куәлік берді. Осылайша олардың бәріне Құдайдың мол рақымы жауды.

34Араларында жоқшылық көрген ешкім болған жоқ. Себебі жері немесе үйлері барлар керек болғанда меншіктерін сатып, ақша түсіріп, 35оны елшілердің алдына әкеліп қойып отырды. Осыдан әркімге керегінше берілді. 36Мысалы, Леуі руынан шыққан кипрлік Жүсіп есімді адам болды. Елшілер оған Барнаба#4:36 9:27; 11:22; 13:1-7; 15:2,12,39. — аударғанда Жігерлендіруші деген қосымша ат берген еді. 37Барнаба өзінің меншікті егістік жерін сатып, түскен ақшаны алып келіп, елшілердің алдына қойды.

Currently Selected:

Елшіл. істері 4: КК 2010

Highlight

Copy