Lukas 1
1
Um puuna
1Ama' Teofilus#1:1 U ngaran Teofilus ung kalakoana én ‘tou rumaraaté si Opo Empung’ kaapa ‘kalo ni Opo Empung’. Si Lukas i nimantik ung kenu ém woo ipapata'u wia si tou pahsigi'en makangaran Teofilus. pahsigi'engku, lakez sé tou nimahtututu'la i nimantik tumoro a nimamuali i si Yesus memali-malipé' karia ni kita. 2Am pinantik néra itii é masuat wo a méisirita wia ni kita, né tou sé rengané ing kataré-taré nimilek karia am weren néra a nimamuali itii wo mahtuzu' u Nuwu' ni Opo Empung. 3Pahpaano niitu, kumawusa péléng a nimamuali itii im pinahtata'ukula rengané witu ung kataré-taré nimamuali, a ni aku tumotozla in tumu'tul niitu witu um pinantik wo iwéhé wia si ama'. 4Karia in téntu toro totoz kata'uala ni ama' sa un ipahtuzu' wia si ama' én totoz ulit.
Tumoro ung kinatouan ni Yohanes Menanarani
5 #
1Taw. 24:10
I si Herodes nimaéndola kolano witi Yudea, wéwéhan si walian makangaran Zakharia si méikauntep wia sé sana réwok walian Abia. Si mahayona é makangaran Elisabet wo kasii suzu ni walian né tou Yahudi makangaran Harun. 6Sé sana séndé' kenu ung katou-touan néra é mahkiit ung kapaaz ni Opo Empung wo karia un ulit ni séra é mahkiit péléng am perénta wo an tinotoz ni Opo Empung. 7Ni séra zua én zéi'kan siapa koki' pahpaan si Elisabet ém pesel wo ni séra kasii én tu'amo.
8Makasamé, un oras né sana réwok walian Abia i maayang witi Walé ni Opo Empung, si Zakharia si maayang um paayangen im walian witu u sinaru ni Opo Empung. 9Pahpaan in toro niitu ni séra é simawut lot in tumotoz si walian mamaayang, tanu ung kinanaram néra. Wo si Zakharia si nimapéléng i muntep witu un Tampa Lenas #1:9 Un Tampa Lenas ém witi Walé ni Opo Empung, un tampa kenu é esaané im wana an tampa witu. Si Walian uman si toro muntep witu un Tampa Lenas itii. Um Walé ni Opo Empung ém witi Yerusalem uman. witu um Walé ni Opo Empung in tumunu ung kamania witu. 10In orasnamo in tumunu ung kamania a sia muntepa witi Tampa Lenas. Karegas sia i mahtunu ung kamania, péléng sé tou witi lésaz um walé ni Opo Empung é mahmengaléi. 11A si malaekat ni Opo Empung mapaileka un touna wia si Zakharia. Si malaekat itii é rimendai witu ung kakan um pahtunuan ang kamania.
12Kaiilekla si malaekat itii, si Zakharia é mengompo' wo totoz maindé'. 13Taan si malaekat itii éng kimuama wia ni sia, “Zakharia, tia'mo maindé'! Pahpaan um pengaléiennu én tinalingamoma ni Opo Empung. Si Elisabet mahayomu é makailek si lowai, wo si lowai itii é léwo'zéi' i ngaranannula Yohanes. 14Ni ko é mahpaa-paaz, wo lakez kasii sé tou totoz mahpaa-paaz pahpaan ni sia i nimatou. 15#Bil. 6:3 Pahpaan ni sia ém wangunen ni Opo Empung maéndo tou wangko'. Ni sia én zéi'kan mahelep anggor kaapa an eelepen walina a menewelen. Wo kasii ni sia im pahawa-awakempé', si Roh Lenas éng kimawasamo wia ni sia, 16wo lakez sé tou Israel maahkitenna i mawuri sumaup kumiit si Mahpiara, si Opo Empung néra. 17#Mal. 4:5-6 Si Opo Empung é nimatumé ni sia i mapuunamé wia si Mahpiara wo ni sia ém wéwéhan ung kaenté'an wo ung kawasa tanu si nabi Elia. Ni sia é mangun sé ama' mahlé'o-lé'osan karia né oki' néra, wo sé tou mahsaru si Opo Empung én iwurina witu u lalan kaulitan. Karia in téntu, ni sia é mimek sé tou wo séra wangun i sumungkul si Opo Empung.” 18A si Zakharia meligau wia si malaekat itii, “Kura wo toro kata'uangkula niitu i mamuali? Pahpaan ni aku wo si mahayoku én tu'amo.” 19#Dan. 8:16, 9:21 Ang kuan ni malaekat, “Ni aku kenu éng Gabriel, si sekezé ém witu u sinaru ni Opo Empung. Ni aku é méiatumé i mékumua u nuwu' lé'os kenu wia ni ko. 20U méikuakuma é mamuali witu un orasna. Taan pahpaan in zéi'kan pa'émanennu u méikuakuma, rengan in tarékan ni ko é mawowo' makaz witu un endo u méikuakuma kenu i mamuali.”
21Karegas niitu sé tou lakez witi lésaz é ma'ento' si Zakharia i mondolé. Ni séra é mengusi-ngusingsing pahpaan si Zakharia én totoz uré im witi untep um Walé ni Opo Empung. 22Kaiondolnamé, ni sia én zéi'mo mata'u numuwu' wia ni séra. Taan ni sia é mahaya-ayat uman u lengenna im wéwéhan un ipahkukuana wia ni séra pahpaan si wowo'mo. Karia in téntu, kinata'uan nérala im wéwéhan u méipapaileké ni Opo Empung wia ni sia im witi Walé ni Opo Empung.
23I simampetomé un orasna nimaayangé witi Walé ni Opo Empung, a sia mawurima witi waléna. 24Tumondongla a nimamuali itii, si mahayona si Elisabet é mahawa-awako. Woo limana loloho'en si Elisabet é memiti-miti uman walé. 25Ang kuana, “Ung kenu un tumuzu'mé i si Opo Empung é lé'os wia ni aku. Wo pahpaano u lé'os-Na kenu, sé tou walina én zéi'mo mahséro' wia ni aku.”
U méipapata'u ni malaekat wia si Maria
26I loloho'eno kaenem si Elisabet i mahawa-awak, an iatumé ni Opo Empung si malaekat Gabriel i mangé witi Nazaret, witi tana' Galilea. 27#Mat. 1:18 Ni sia nimangé wia si raraha makangaran Maria. Ni sia én timantumo ing kumawéng karia ni Yusuf si suzu ni Daud. 28Si malaekat itii é niméyé wia si Maria ang kumua wia ni sia, “U sigi'ku wia ni ko si kinamang ni Opo Empung, ni Sia é menaté-natér ni ko.”
29Si Maria é mengompo' in timalingamé u méikuamé ni malaekat. Pegena-genangenna ung kalakoan u sigi' ni malaekat itii. 30Ang kuan kasii ni malaekat itii wia ni sia, “Maria, tia'mo ko maindé', pahpaan si Opo Empung én timambér ung kamang wia ni ko. 31#Mat. 1:21 Zéi'mo uré ni ko é mahawa-awako, wo makailek si lowai. Wo si lowai itii é léwo'zéi' ngaranannula, ‘Yesus’. 32Ni Sia é maéndo tou wangko', wo pahtawahen in Oki' ni Opo Empung si Totoz Rakék. Si Opo Empung é méhé wia ni Sia u rurumezan ni kolano Daud, si nimaopo-Na. 33#2Sam. 7:12-13, 16; Yes. 9:6 Ni Sia é maéndo Kolano né tou Israel, suzu ni Yakub. Ung Kakolanoan-Na é memia-mia makaz ing kauré-uré.”
34Ang kuan ni Maria wia si malaekat itii, “Kura niitu toro mamuali? Ni aku én zéi'kampé' siapa mahayo.”
35A sia wingkotela ni malaekat itii, “Ni ko én éyéan ni Roh Lenas, wo ni ko éng kawasan ni Opo Empung si Totoz Rakék. Pahpaano niitu, i si Koki' itii matoumé é mapahkuan né tou i Lenas, si Oki' ni Opo Empung. 36Tumoro si katuarimu Elisabet én ikuakuma wia ni ko. Ni sia si pahkuan né tou im pesel wo tu'amo, in tarékan én enemna loloho'eno i mahawa-awak. 37#Kej. 18:14 Pahpaan im wia si Opo Empung én zéi'kan siapa an zéi'kan mamuali.”
38Ang kuan ni Maria wia si malaekat, “Ni aku kenu én ata ni Opo Empung. Mamualimomé wia ni aku péléng a méikuamumé ing kataré.” Kumawusa niitu, a sia itula'uma ni malaekat itii.
Si Maria nimahilekan wo si Elisabet
39Zéi'kan uré, si Maria nimangé witi wanua tua'na esa witi kakenturan Yehuda. 40Ni sia é nimangé witi walé ni Zakharia. I méikaayola wana, sia muntepa a sumigi'ma wia si Elisabet. 41I si Elisabet timalingamé u sigi' ni Maria, si koki' pahawa-awaken ni Elisabet é rengan nimogémé, wo si Elisabet éng kinawasa ni Roh Lenas. 42Ang kumérété si Elisabet, “Maria, ni ko éng kinamang ni Opo Empung lumousé ung kamang wia péléng sé wéwéné! Wo si Koki' matoumé wia ni ko éng kamangen. 43Séi kuaa ndéén ni aku taka-takazan si ina' ni Mahpiaraku é niméyé wia ni aku? 44Pahpaan ni aku in timalingamé u sigi'mu, si koki' pahawa-awakengku é nimogémé pahpaan i mahpaa-paaz. 45Mahpaa-paazla ni ko, pahpaan ma'éman a méikua ni Opo Empung i mamuali.”
Si Maria mahlooz si Opo Empung
46Ang kuan ni Maria,
“Ung genangku é lumooz wo sumigi' si Opo Empung,
47un atéku kangkasii é mahpaa-paaz,
pahpaan si Opo Empung si milot ni aku im witu un ukuman wana a singkéla'.
48 #
1Sam. 1:11
Pahpaan ni aku é nina'uan-Na,
i ni aku kenu én ata-Na kinanaram uman.
Un ulitna, rengan in tarékan péléng sé suzu
éng kumua ni aku kinamang,
49pahpaan si Opo Empung si Mahkawasa é nimangunomé am wangko' wia ni aku,
wo u ngaran-Na é lenas.
50U raraatéan-Na wia péléng sé tou sé maindé' wo mahsigi' ni Sia é
makaz im pinuyunan.
51Karia ung kawasa-Na, ni Sia é mahwangun an zéi'kan kakuaan.
Wo kasii kinayo'-Na sé tou loozan makaz ang ginenang néra én zéi'kan kinakiitan.
52 #
Ayb. 5:11, 12:19 Méitumpa-Namé kasii sé nimaéndo kolano im wana a rurumezan néra,
wo sé tou roros uman ém winénét-Na.
53Winéhan-Namé péléng am wangun wia sé tou maharem makaz ni séra nimawesuh,
wo sé tou wa'ilan é méipapawuri-Na
zéi'kan siapa pinahalima.
54Pahpaan u raraatéan-Na a Sia sumawangé sé tou Israel sé ata-Na.
55 #
Kej. 17:7; 1Sam. 2:1-10 Niitu u méitaaz-Na wia sé nimaopota, wia si Abraham wo sé suzuna makaz ing kauré-uré.”
56Si Maria i nimahento'mé karia ni Elisabet ém woo teluna loloho'en. Kumawusa niitu a sia mawurima sumaup witi waléna.
Si Yohanes Menanarani i nimatou
57I méikaayomola un oras ni Elisabet i makailek si koki', a matoumé si lowai. 58Ing kinatalingaala né karété wo né katuarina i si Opo Empung nimapailek u raraatéan-Na um wangko' wia si Elisabet akaz in toro nimakaoki'mé, a séra mahpaa-paaz kariana.
59 #
Im. 12:3
I si koki' itii waluna endomo, ni sia sinunat tanu ung kinanaram né Yahudi, sé karété wo sé katuari néra é niméyé witu. Si koki' itii ém pahngangaranan néra Zakharia tanu u ngaran ni ama'na. 60Taan kuan ni ina'na, “Tia'! Ni sia é léwo'zéi' i ngaranan Yohanes tanu u méikua ni malaekat.”
61Ang kuan néra, “Zéi'kan siapa maan in esa im wia sé katuarimu si makangaran un téntu.” 62A séra mayata u lengen wia si ama'na i lumigau un ingaran wia si oki'na.
63A si Zakharia mayata u lengen i mahaléi papantikan wo papantik, an ipantiknama, “U ngaranna é Yohanes.” Péléng sé tou witu é mengusi-ngusingsing.
64In toro niitukan, si Zakharia én toromo mahnuwu', a sia mahlooz si Opo Empung. 65Péléng sé karété néra é maindé'. Péléng a nimamuali itii é méikawoka'ma makaz witi ataran kakenturan Yudea. 66Péléng sé timalingama é megena-genang niitu, “Mamuali apa si koki' itii sa matu'amomé?” Pahpaan si Opo Empung é memali-mali kariana.
Si Zakharia meloo-looz si Opo Empung
67Kumawusa niitu, si Zakharia si ama' ni Yohanes éng kinawasa ni Roh Lenas. An ikuala ni Zakharia u méikua ni Opo Empung wia ni sia,
68“Loozenola si Mahpiara, si Opo Empung né tou Israel!
Pahpaan ni Sia niméyémo i métumulung sé tou-Na
wo milot ni séra.
69Ni kita ém winéhan-Namomé si wéwéhan ung kawasa i miloté ni kita im witu un ukuman wana a singkéla'. Ni Sia é suzu ni Daud ata-Na.
70Tanu u mémoikua-Na rengané im puuna,
wia sé nabi linenas-Na,
71i mahpipilot ni kita im wia sé kakoro'ta,
wo im witu ung kawasa péléng né tou mazi'zis ni kita,
72i mapailek u raraatéan-Na
wia sé nimaopota wo gimenang un taaz-Na lenas.
73Un taaz itii é méikua ni Opo Empung
wia si Abraham nimaopota, i ni Sia én tumambér wia ni kita ung kamang,
74wo ni kita ikapiloté im wia sé kakoro'ta.
Karia in téntu, ni kita én zéi'kan maindé' i mahragés wia ni Sia,
75witu ung kalenasan wo ung kaulitan witu u sinaru-Na kauré ni kita i menou-nou.
76 #
Mal. 3:1
Wo ni ko, oki'ku
é mapahkuan nabi ni Opo Empung si Totoz Rakék.
Pahpaan ni ko é méiatu i mapuunamé
im wia si Mahpiara i mémimek u lalan lampangan-Na,
77i mapata'u wia sé tou-Na,
i ni séra én ipilot im witu un ukuman wana a singkéla' néra,
sa si Opo Empung niméhémo un ampungan wana a singkéla' néra,
78pahpaan u raraatéan wo u lé'os ni Opo Empungta.
Niitumo, ni Sia é niméyé i milot ni kita im witu un ukuman wana a singkéla'ta masuat wo si endo i mondolé im woondo,
79 #
Yes. 9:2
i mésumena' wia sé tou sé menou-nou witu ung karimbengbengan,
wo sé tou kinaindé'an.
Ni Sia é mahkit ni kita, wo ni kita menou-nou karia ung kaluasan witu un até.”
80Si Yohanes é makatarétumoumomé wo um pa'émanenna wia si Opo Empung éng kaenté'namo. Ni sia é mahento' witi kapelasan makaz witu un endo i ni sia mapailek un touna wia sé tou Israel i maayang am papaayangenna.
Currently Selected:
Lukas 1: LAITOM
Highlight
Share
Copy
Want to have your highlights saved across all your devices? Sign up or sign in
Lukas 1
1
Um puuna
1Ama' Teofilus#1:1 U ngaran Teofilus ung kalakoana én ‘tou rumaraaté si Opo Empung’ kaapa ‘kalo ni Opo Empung’. Si Lukas i nimantik ung kenu ém woo ipapata'u wia si tou pahsigi'en makangaran Teofilus. pahsigi'engku, lakez sé tou nimahtututu'la i nimantik tumoro a nimamuali i si Yesus memali-malipé' karia ni kita. 2Am pinantik néra itii é masuat wo a méisirita wia ni kita, né tou sé rengané ing kataré-taré nimilek karia am weren néra a nimamuali itii wo mahtuzu' u Nuwu' ni Opo Empung. 3Pahpaano niitu, kumawusa péléng a nimamuali itii im pinahtata'ukula rengané witu ung kataré-taré nimamuali, a ni aku tumotozla in tumu'tul niitu witu um pinantik wo iwéhé wia si ama'. 4Karia in téntu toro totoz kata'uala ni ama' sa un ipahtuzu' wia si ama' én totoz ulit.
Tumoro ung kinatouan ni Yohanes Menanarani
5 #
1Taw. 24:10
I si Herodes nimaéndola kolano witi Yudea, wéwéhan si walian makangaran Zakharia si méikauntep wia sé sana réwok walian Abia. Si mahayona é makangaran Elisabet wo kasii suzu ni walian né tou Yahudi makangaran Harun. 6Sé sana séndé' kenu ung katou-touan néra é mahkiit ung kapaaz ni Opo Empung wo karia un ulit ni séra é mahkiit péléng am perénta wo an tinotoz ni Opo Empung. 7Ni séra zua én zéi'kan siapa koki' pahpaan si Elisabet ém pesel wo ni séra kasii én tu'amo.
8Makasamé, un oras né sana réwok walian Abia i maayang witi Walé ni Opo Empung, si Zakharia si maayang um paayangen im walian witu u sinaru ni Opo Empung. 9Pahpaan in toro niitu ni séra é simawut lot in tumotoz si walian mamaayang, tanu ung kinanaram néra. Wo si Zakharia si nimapéléng i muntep witu un Tampa Lenas #1:9 Un Tampa Lenas ém witi Walé ni Opo Empung, un tampa kenu é esaané im wana an tampa witu. Si Walian uman si toro muntep witu un Tampa Lenas itii. Um Walé ni Opo Empung ém witi Yerusalem uman. witu um Walé ni Opo Empung in tumunu ung kamania witu. 10In orasnamo in tumunu ung kamania a sia muntepa witi Tampa Lenas. Karegas sia i mahtunu ung kamania, péléng sé tou witi lésaz um walé ni Opo Empung é mahmengaléi. 11A si malaekat ni Opo Empung mapaileka un touna wia si Zakharia. Si malaekat itii é rimendai witu ung kakan um pahtunuan ang kamania.
12Kaiilekla si malaekat itii, si Zakharia é mengompo' wo totoz maindé'. 13Taan si malaekat itii éng kimuama wia ni sia, “Zakharia, tia'mo maindé'! Pahpaan um pengaléiennu én tinalingamoma ni Opo Empung. Si Elisabet mahayomu é makailek si lowai, wo si lowai itii é léwo'zéi' i ngaranannula Yohanes. 14Ni ko é mahpaa-paaz, wo lakez kasii sé tou totoz mahpaa-paaz pahpaan ni sia i nimatou. 15#Bil. 6:3 Pahpaan ni sia ém wangunen ni Opo Empung maéndo tou wangko'. Ni sia én zéi'kan mahelep anggor kaapa an eelepen walina a menewelen. Wo kasii ni sia im pahawa-awakempé', si Roh Lenas éng kimawasamo wia ni sia, 16wo lakez sé tou Israel maahkitenna i mawuri sumaup kumiit si Mahpiara, si Opo Empung néra. 17#Mal. 4:5-6 Si Opo Empung é nimatumé ni sia i mapuunamé wia si Mahpiara wo ni sia ém wéwéhan ung kaenté'an wo ung kawasa tanu si nabi Elia. Ni sia é mangun sé ama' mahlé'o-lé'osan karia né oki' néra, wo sé tou mahsaru si Opo Empung én iwurina witu u lalan kaulitan. Karia in téntu, ni sia é mimek sé tou wo séra wangun i sumungkul si Opo Empung.” 18A si Zakharia meligau wia si malaekat itii, “Kura wo toro kata'uangkula niitu i mamuali? Pahpaan ni aku wo si mahayoku én tu'amo.” 19#Dan. 8:16, 9:21 Ang kuan ni malaekat, “Ni aku kenu éng Gabriel, si sekezé ém witu u sinaru ni Opo Empung. Ni aku é méiatumé i mékumua u nuwu' lé'os kenu wia ni ko. 20U méikuakuma é mamuali witu un orasna. Taan pahpaan in zéi'kan pa'émanennu u méikuakuma, rengan in tarékan ni ko é mawowo' makaz witu un endo u méikuakuma kenu i mamuali.”
21Karegas niitu sé tou lakez witi lésaz é ma'ento' si Zakharia i mondolé. Ni séra é mengusi-ngusingsing pahpaan si Zakharia én totoz uré im witi untep um Walé ni Opo Empung. 22Kaiondolnamé, ni sia én zéi'mo mata'u numuwu' wia ni séra. Taan ni sia é mahaya-ayat uman u lengenna im wéwéhan un ipahkukuana wia ni séra pahpaan si wowo'mo. Karia in téntu, kinata'uan nérala im wéwéhan u méipapaileké ni Opo Empung wia ni sia im witi Walé ni Opo Empung.
23I simampetomé un orasna nimaayangé witi Walé ni Opo Empung, a sia mawurima witi waléna. 24Tumondongla a nimamuali itii, si mahayona si Elisabet é mahawa-awako. Woo limana loloho'en si Elisabet é memiti-miti uman walé. 25Ang kuana, “Ung kenu un tumuzu'mé i si Opo Empung é lé'os wia ni aku. Wo pahpaano u lé'os-Na kenu, sé tou walina én zéi'mo mahséro' wia ni aku.”
U méipapata'u ni malaekat wia si Maria
26I loloho'eno kaenem si Elisabet i mahawa-awak, an iatumé ni Opo Empung si malaekat Gabriel i mangé witi Nazaret, witi tana' Galilea. 27#Mat. 1:18 Ni sia nimangé wia si raraha makangaran Maria. Ni sia én timantumo ing kumawéng karia ni Yusuf si suzu ni Daud. 28Si malaekat itii é niméyé wia si Maria ang kumua wia ni sia, “U sigi'ku wia ni ko si kinamang ni Opo Empung, ni Sia é menaté-natér ni ko.”
29Si Maria é mengompo' in timalingamé u méikuamé ni malaekat. Pegena-genangenna ung kalakoan u sigi' ni malaekat itii. 30Ang kuan kasii ni malaekat itii wia ni sia, “Maria, tia'mo ko maindé', pahpaan si Opo Empung én timambér ung kamang wia ni ko. 31#Mat. 1:21 Zéi'mo uré ni ko é mahawa-awako, wo makailek si lowai. Wo si lowai itii é léwo'zéi' ngaranannula, ‘Yesus’. 32Ni Sia é maéndo tou wangko', wo pahtawahen in Oki' ni Opo Empung si Totoz Rakék. Si Opo Empung é méhé wia ni Sia u rurumezan ni kolano Daud, si nimaopo-Na. 33#2Sam. 7:12-13, 16; Yes. 9:6 Ni Sia é maéndo Kolano né tou Israel, suzu ni Yakub. Ung Kakolanoan-Na é memia-mia makaz ing kauré-uré.”
34Ang kuan ni Maria wia si malaekat itii, “Kura niitu toro mamuali? Ni aku én zéi'kampé' siapa mahayo.”
35A sia wingkotela ni malaekat itii, “Ni ko én éyéan ni Roh Lenas, wo ni ko éng kawasan ni Opo Empung si Totoz Rakék. Pahpaano niitu, i si Koki' itii matoumé é mapahkuan né tou i Lenas, si Oki' ni Opo Empung. 36Tumoro si katuarimu Elisabet én ikuakuma wia ni ko. Ni sia si pahkuan né tou im pesel wo tu'amo, in tarékan én enemna loloho'eno i mahawa-awak. 37#Kej. 18:14 Pahpaan im wia si Opo Empung én zéi'kan siapa an zéi'kan mamuali.”
38Ang kuan ni Maria wia si malaekat, “Ni aku kenu én ata ni Opo Empung. Mamualimomé wia ni aku péléng a méikuamumé ing kataré.” Kumawusa niitu, a sia itula'uma ni malaekat itii.
Si Maria nimahilekan wo si Elisabet
39Zéi'kan uré, si Maria nimangé witi wanua tua'na esa witi kakenturan Yehuda. 40Ni sia é nimangé witi walé ni Zakharia. I méikaayola wana, sia muntepa a sumigi'ma wia si Elisabet. 41I si Elisabet timalingamé u sigi' ni Maria, si koki' pahawa-awaken ni Elisabet é rengan nimogémé, wo si Elisabet éng kinawasa ni Roh Lenas. 42Ang kumérété si Elisabet, “Maria, ni ko éng kinamang ni Opo Empung lumousé ung kamang wia péléng sé wéwéné! Wo si Koki' matoumé wia ni ko éng kamangen. 43Séi kuaa ndéén ni aku taka-takazan si ina' ni Mahpiaraku é niméyé wia ni aku? 44Pahpaan ni aku in timalingamé u sigi'mu, si koki' pahawa-awakengku é nimogémé pahpaan i mahpaa-paaz. 45Mahpaa-paazla ni ko, pahpaan ma'éman a méikua ni Opo Empung i mamuali.”
Si Maria mahlooz si Opo Empung
46Ang kuan ni Maria,
“Ung genangku é lumooz wo sumigi' si Opo Empung,
47un atéku kangkasii é mahpaa-paaz,
pahpaan si Opo Empung si milot ni aku im witu un ukuman wana a singkéla'.
48 #
1Sam. 1:11
Pahpaan ni aku é nina'uan-Na,
i ni aku kenu én ata-Na kinanaram uman.
Un ulitna, rengan in tarékan péléng sé suzu
éng kumua ni aku kinamang,
49pahpaan si Opo Empung si Mahkawasa é nimangunomé am wangko' wia ni aku,
wo u ngaran-Na é lenas.
50U raraatéan-Na wia péléng sé tou sé maindé' wo mahsigi' ni Sia é
makaz im pinuyunan.
51Karia ung kawasa-Na, ni Sia é mahwangun an zéi'kan kakuaan.
Wo kasii kinayo'-Na sé tou loozan makaz ang ginenang néra én zéi'kan kinakiitan.
52 #
Ayb. 5:11, 12:19 Méitumpa-Namé kasii sé nimaéndo kolano im wana a rurumezan néra,
wo sé tou roros uman ém winénét-Na.
53Winéhan-Namé péléng am wangun wia sé tou maharem makaz ni séra nimawesuh,
wo sé tou wa'ilan é méipapawuri-Na
zéi'kan siapa pinahalima.
54Pahpaan u raraatéan-Na a Sia sumawangé sé tou Israel sé ata-Na.
55 #
Kej. 17:7; 1Sam. 2:1-10 Niitu u méitaaz-Na wia sé nimaopota, wia si Abraham wo sé suzuna makaz ing kauré-uré.”
56Si Maria i nimahento'mé karia ni Elisabet ém woo teluna loloho'en. Kumawusa niitu a sia mawurima sumaup witi waléna.
Si Yohanes Menanarani i nimatou
57I méikaayomola un oras ni Elisabet i makailek si koki', a matoumé si lowai. 58Ing kinatalingaala né karété wo né katuarina i si Opo Empung nimapailek u raraatéan-Na um wangko' wia si Elisabet akaz in toro nimakaoki'mé, a séra mahpaa-paaz kariana.
59 #
Im. 12:3
I si koki' itii waluna endomo, ni sia sinunat tanu ung kinanaram né Yahudi, sé karété wo sé katuari néra é niméyé witu. Si koki' itii ém pahngangaranan néra Zakharia tanu u ngaran ni ama'na. 60Taan kuan ni ina'na, “Tia'! Ni sia é léwo'zéi' i ngaranan Yohanes tanu u méikua ni malaekat.”
61Ang kuan néra, “Zéi'kan siapa maan in esa im wia sé katuarimu si makangaran un téntu.” 62A séra mayata u lengen wia si ama'na i lumigau un ingaran wia si oki'na.
63A si Zakharia mayata u lengen i mahaléi papantikan wo papantik, an ipantiknama, “U ngaranna é Yohanes.” Péléng sé tou witu é mengusi-ngusingsing.
64In toro niitukan, si Zakharia én toromo mahnuwu', a sia mahlooz si Opo Empung. 65Péléng sé karété néra é maindé'. Péléng a nimamuali itii é méikawoka'ma makaz witi ataran kakenturan Yudea. 66Péléng sé timalingama é megena-genang niitu, “Mamuali apa si koki' itii sa matu'amomé?” Pahpaan si Opo Empung é memali-mali kariana.
Si Zakharia meloo-looz si Opo Empung
67Kumawusa niitu, si Zakharia si ama' ni Yohanes éng kinawasa ni Roh Lenas. An ikuala ni Zakharia u méikua ni Opo Empung wia ni sia,
68“Loozenola si Mahpiara, si Opo Empung né tou Israel!
Pahpaan ni Sia niméyémo i métumulung sé tou-Na
wo milot ni séra.
69Ni kita ém winéhan-Namomé si wéwéhan ung kawasa i miloté ni kita im witu un ukuman wana a singkéla'. Ni Sia é suzu ni Daud ata-Na.
70Tanu u mémoikua-Na rengané im puuna,
wia sé nabi linenas-Na,
71i mahpipilot ni kita im wia sé kakoro'ta,
wo im witu ung kawasa péléng né tou mazi'zis ni kita,
72i mapailek u raraatéan-Na
wia sé nimaopota wo gimenang un taaz-Na lenas.
73Un taaz itii é méikua ni Opo Empung
wia si Abraham nimaopota, i ni Sia én tumambér wia ni kita ung kamang,
74wo ni kita ikapiloté im wia sé kakoro'ta.
Karia in téntu, ni kita én zéi'kan maindé' i mahragés wia ni Sia,
75witu ung kalenasan wo ung kaulitan witu u sinaru-Na kauré ni kita i menou-nou.
76 #
Mal. 3:1
Wo ni ko, oki'ku
é mapahkuan nabi ni Opo Empung si Totoz Rakék.
Pahpaan ni ko é méiatu i mapuunamé
im wia si Mahpiara i mémimek u lalan lampangan-Na,
77i mapata'u wia sé tou-Na,
i ni séra én ipilot im witu un ukuman wana a singkéla' néra,
sa si Opo Empung niméhémo un ampungan wana a singkéla' néra,
78pahpaan u raraatéan wo u lé'os ni Opo Empungta.
Niitumo, ni Sia é niméyé i milot ni kita im witu un ukuman wana a singkéla'ta masuat wo si endo i mondolé im woondo,
79 #
Yes. 9:2
i mésumena' wia sé tou sé menou-nou witu ung karimbengbengan,
wo sé tou kinaindé'an.
Ni Sia é mahkit ni kita, wo ni kita menou-nou karia ung kaluasan witu un até.”
80Si Yohanes é makatarétumoumomé wo um pa'émanenna wia si Opo Empung éng kaenté'namo. Ni sia é mahento' witi kapelasan makaz witu un endo i ni sia mapailek un touna wia sé tou Israel i maayang am papaayangenna.
Currently Selected:
:
Highlight
Share
Copy
Want to have your highlights saved across all your devices? Sign up or sign in