Matius 15
15
Am perénta ni Opo Empung wo ang kinanaram né tou Yahudi
(Mrk. 7:1-13)
1A sé woopira im wia sé sana réwok tou Farisi wo sé tou tulap un Torat sé witi Yerusalem a méyé, mangé wia si Yesus ang kumuama, 2“Kaa sé pahtuzu'en-Nu zéi'kan mahkiit ang kinanaram né nimaopota? Ni séra én zéi'kan zimano ang kuman.”
3Taan si Yesus nimingkotla, “Kaa kamu kangkasii én zéi'kan mahkiit am perénta ni Opo Empung akaz uman i mahkiit ang kinanaram né nimaopo niou? 4#Kel. 20:12, 17; Im. 20:9; Ul. 5:16; Mrk. 7:10 Pahpaan si Opo Empung éng kimua, ‘Pahsigi'ela si ama'mu wo si ina'mu.’ Wo kasii, ‘Séi si mahtiwa' si ama'na kaapa si ina'na, ni sia é léwo'zéi' in ukumen i maté.’ 5Taan ni kamu é mahtuzu': Séi uman si mahkua wia si ama'na kaapa wia si ina'na in téntii, ‘Péléng a sasawang a léwo'zéi' in iwéhéku wia si ama' wo si ina' é mémoiragéskula wia si Opo Empung,’ 6si tou itii én zéi'mo totoz sumigi' si ama'na kaapa si ina'na. Karia in téntu, u Nuwu' ni Opo Empung é zinéi' niouola karia ang kinanaram niou itii. 7É kamu in tou mahgau-gau lé'os! Ulito u méikua ni Opo Empung tumoro ni kamu mengiité si nabi Yesaya in téntii,
8 #
Yes. 29:13
‘Sé tahsasana wanua kenu é mahlooz ni Aku karia a sumah néra,
taan an até néra én zou' im wia ni Aku.
9Zéi'kan siapa torona séra i mahragés wia ni Aku,
pahpaan an tutuzu' ipahtuzu' néra ém perénta ni tou.’ ”
U mahwangun si tou makati'tiren
(Mrk. 7:14-23)
10An tawahené ni Yesus sé tou lakez ang kumuama wia ni séra, 11“Talingana wo wéhanla genang: zéi'kan a mahuntepa witu u sumah a mahwangun si tou makati'tiren, taan a mondolé im witu u sumah, niitumo u mahwangun si tou makati'tiren.”
12A sé pahtuzu'en-Na rumétéla wia si Yesus ang kumuala, “Zéi'kan kata'uan-Nu wé sa un até né sana réwok tou Farisi é rumara pahpaan u méikua-Muma itii?”
13A si Yesus mingkotla, “An tinanem zéi'kan méitanem ni Ama'-Ku si witi kasendukan ém pakasawuten makaz wana an ahmutna. 14#Luk. 6:39 Iwayamola sé sana réwok tou Farisi itii. Ni séra é masuat wo si tou letok mengahkit si tou letok. Sa si tou letok mengahkit si tou letok, ni séra zua én ikatahu' witu um woso.”
15Ang kuan ni Petrus wia si Yesus, “Ikuamé wia ni kai ung kalakoan un aandéan itii.”
16A si Yesus mingkotla, “Apa maan ni kamu kangkasii én zéi'kampé' makatulap niitu? 17Zéi'kan kata'uan niou wé sa péléng a muntepa witu u sumah é meméhé-méhéma umana witu um poot wo tumondongla niitu é maitia' witi muri? 18#Mat. 12:34 Taan u mondolé witu u sumah ém witu un até a méyé, wo niitumo u mahwangun si tou makati'tiren. 19Pahpaan witu un até mahondolé péléng ang genang léwo', u mahwunu' tou, u mahmuali a sinéro' im pahmualin né zéi'kampé' kimawéng, u mahsamek, u mahremu', u mahkua an zéi'kan ulit tumoro a niilek wo an tinalingana, wo kasii u mahtawuruk. 20Nianamo a nimangun si tou makati'tiren. Taan mahkan karia u lengen zéi'kan zimano én zéi'kan mahwangun si tou makati'tiren.”
Um pa'émanen ni wéwéné tou Kanaan
(Mrk. 7:24-30)
21Si Yesus tumula'umé un tampa itii a mangé witi tana' Tirus wo Sidon. 22A méyé si wéwéné tou Kanaan si witi tana' itii, mah- aléi wia si Yesus karia i mahkéréta, “O Tuang, Suzu ni Daud, iraraaté ndootuumé ni aku! Si kooki'ku é sinelazan ni sétang wo totozo in zézéha.”
23Taan si Yesus é nimenes umanla. A sé pahtuzu'en-Na méyé i mahaléi wia ni Sia, “Iatumoma si wéwéné itii i mangé, pahpaan ni sia é mengii-ngiit ni kita karia i mengéré-ngérét.”
24A si Yesus mingkotla, “Ni Aku i méiatumé ni Opo Empung én akaz uman mésumawang sé tou Israel sé mémoikalulu, tanu sé domba mémoikalulu.”
25Taan si wéwéné itii é rimétéla si Yesus ang kumuruzla wo mahsigi' wia ni Sia kuana, “Tuang, tulungen ndootuumé ni aku.”
26Taan si Yesus nimingkotla, “Zéi'kan wangun i méndomé u roti un iwéhé wia sé koki' wo ilombo'ma wia sé asu.”
27A mingkotla si wéwéné itii wia si Yesus, “Ulit Tuang, taan sé asu witu u lalem u méja kangkasii é mahkan a mahragosé im witu u méja pahkanan ni makaasu.”
28Ang kuan ni Yesus wia ni sia, “É ina', um pa'émanennu én totoz wangko', niitumo in tarékan é mamualimoma tanu un ikapaazmu.” In toro niitukan, si kooki' ni wéwéné itii é nimalé'osoma.
Sé tou saki liné'os ni Yesus
29In timula'umomé un tana' itii, si Yesus mahkiité un tembir u louz Galilea a sumosoza witu ung kimeleng a marumumez witu. 30A sé tou lakez mahto-tondongané i niméyé wia ni Sia, nimahwalimé sé lailai, sé letok, sé kénto', sé wowo' wo lakezpé' kasii sé walina, a séra izeta' nérala witu u sinaru un a'é ni Yesus a séra péléng lé'osen-Nama. 31Sé tou lakez itii é mengusi-ngusingsing i nimileka sé wowo' én toromo mahnuwu', sé kénto' é lé'oso, sé lailai é mahlampango, sé letok é mahileko, a séra mahsigi' wo mahlooz si Opo Empung né Israel.
Si Yesus niméhé ung kakanen wia sé epatna riwu tou
(Mrk. 8:1-10)
32A si Yesus tumawahmé sé pahtuzu'en-Na ang kumuama “Un até-Ku é rumaraaté sé tou lakez kenu. Teluna endomo séra i mengii-ngiit ni Aku wo ni séra én zéi'mo siapa kanen. Ni séra zéi'kan ipekiwuri-Ku karia i maharem, én taa séra ikawesahla witi lalan.”
33Ang kuan né pahtuzu'en-Na wia ni Sia, “Kura im wia un tampa zou'mé im wana am wanua kenu wo kita toro makailek roti ung kanen né tou sé téntumokala ung kalakez wo séra mawesuh?”
34Kuan ni Yesus wia ni séra, “Pira u roti wia ni kamu?”
A séra mingkotla, “Ni kai ém wéwéhan u roti pitu wo seza' rintek woopira.”
35An iatula ni Yesus sé tou lakez itii i rumumezla witu un tana'. 36Tumondong niitu an éndon-Namé u roti pitu wo sé seza' itii, ang kumuama u makasé wia si Opo Empung, am pemété-météngen-Nama an iwéhé-Nama wia sé pahtuzu'en-Na, an isekez nérama wia sé tou lakez itii. 37Ni séra péléng éng kiman makaz nimawesuh. Kumawusa niitu, a réwokené né tou a roti nimateza. A roti nimateza ém pituna lo'lo' kumuwu-kuwu. 38Ung kalakez né tou kiman in toro niitu én epatna riwu tuama, zéi'kampé' méikarékén sé wéwéné wo sé koki'. 39A sé tou lakez itii ipekiwurima ni Yesus. Ni Sia sumakéma londéi a mangé witi tana' Magadan.
Currently Selected:
Matius 15: LAITOM
Highlight
Share
Copy
Want to have your highlights saved across all your devices? Sign up or sign in
Matius 15
15
Am perénta ni Opo Empung wo ang kinanaram né tou Yahudi
(Mrk. 7:1-13)
1A sé woopira im wia sé sana réwok tou Farisi wo sé tou tulap un Torat sé witi Yerusalem a méyé, mangé wia si Yesus ang kumuama, 2“Kaa sé pahtuzu'en-Nu zéi'kan mahkiit ang kinanaram né nimaopota? Ni séra én zéi'kan zimano ang kuman.”
3Taan si Yesus nimingkotla, “Kaa kamu kangkasii én zéi'kan mahkiit am perénta ni Opo Empung akaz uman i mahkiit ang kinanaram né nimaopo niou? 4#Kel. 20:12, 17; Im. 20:9; Ul. 5:16; Mrk. 7:10 Pahpaan si Opo Empung éng kimua, ‘Pahsigi'ela si ama'mu wo si ina'mu.’ Wo kasii, ‘Séi si mahtiwa' si ama'na kaapa si ina'na, ni sia é léwo'zéi' in ukumen i maté.’ 5Taan ni kamu é mahtuzu': Séi uman si mahkua wia si ama'na kaapa wia si ina'na in téntii, ‘Péléng a sasawang a léwo'zéi' in iwéhéku wia si ama' wo si ina' é mémoiragéskula wia si Opo Empung,’ 6si tou itii én zéi'mo totoz sumigi' si ama'na kaapa si ina'na. Karia in téntu, u Nuwu' ni Opo Empung é zinéi' niouola karia ang kinanaram niou itii. 7É kamu in tou mahgau-gau lé'os! Ulito u méikua ni Opo Empung tumoro ni kamu mengiité si nabi Yesaya in téntii,
8 #
Yes. 29:13
‘Sé tahsasana wanua kenu é mahlooz ni Aku karia a sumah néra,
taan an até néra én zou' im wia ni Aku.
9Zéi'kan siapa torona séra i mahragés wia ni Aku,
pahpaan an tutuzu' ipahtuzu' néra ém perénta ni tou.’ ”
U mahwangun si tou makati'tiren
(Mrk. 7:14-23)
10An tawahené ni Yesus sé tou lakez ang kumuama wia ni séra, 11“Talingana wo wéhanla genang: zéi'kan a mahuntepa witu u sumah a mahwangun si tou makati'tiren, taan a mondolé im witu u sumah, niitumo u mahwangun si tou makati'tiren.”
12A sé pahtuzu'en-Na rumétéla wia si Yesus ang kumuala, “Zéi'kan kata'uan-Nu wé sa un até né sana réwok tou Farisi é rumara pahpaan u méikua-Muma itii?”
13A si Yesus mingkotla, “An tinanem zéi'kan méitanem ni Ama'-Ku si witi kasendukan ém pakasawuten makaz wana an ahmutna. 14#Luk. 6:39 Iwayamola sé sana réwok tou Farisi itii. Ni séra é masuat wo si tou letok mengahkit si tou letok. Sa si tou letok mengahkit si tou letok, ni séra zua én ikatahu' witu um woso.”
15Ang kuan ni Petrus wia si Yesus, “Ikuamé wia ni kai ung kalakoan un aandéan itii.”
16A si Yesus mingkotla, “Apa maan ni kamu kangkasii én zéi'kampé' makatulap niitu? 17Zéi'kan kata'uan niou wé sa péléng a muntepa witu u sumah é meméhé-méhéma umana witu um poot wo tumondongla niitu é maitia' witi muri? 18#Mat. 12:34 Taan u mondolé witu u sumah ém witu un até a méyé, wo niitumo u mahwangun si tou makati'tiren. 19Pahpaan witu un até mahondolé péléng ang genang léwo', u mahwunu' tou, u mahmuali a sinéro' im pahmualin né zéi'kampé' kimawéng, u mahsamek, u mahremu', u mahkua an zéi'kan ulit tumoro a niilek wo an tinalingana, wo kasii u mahtawuruk. 20Nianamo a nimangun si tou makati'tiren. Taan mahkan karia u lengen zéi'kan zimano én zéi'kan mahwangun si tou makati'tiren.”
Um pa'émanen ni wéwéné tou Kanaan
(Mrk. 7:24-30)
21Si Yesus tumula'umé un tampa itii a mangé witi tana' Tirus wo Sidon. 22A méyé si wéwéné tou Kanaan si witi tana' itii, mah- aléi wia si Yesus karia i mahkéréta, “O Tuang, Suzu ni Daud, iraraaté ndootuumé ni aku! Si kooki'ku é sinelazan ni sétang wo totozo in zézéha.”
23Taan si Yesus é nimenes umanla. A sé pahtuzu'en-Na méyé i mahaléi wia ni Sia, “Iatumoma si wéwéné itii i mangé, pahpaan ni sia é mengii-ngiit ni kita karia i mengéré-ngérét.”
24A si Yesus mingkotla, “Ni Aku i méiatumé ni Opo Empung én akaz uman mésumawang sé tou Israel sé mémoikalulu, tanu sé domba mémoikalulu.”
25Taan si wéwéné itii é rimétéla si Yesus ang kumuruzla wo mahsigi' wia ni Sia kuana, “Tuang, tulungen ndootuumé ni aku.”
26Taan si Yesus nimingkotla, “Zéi'kan wangun i méndomé u roti un iwéhé wia sé koki' wo ilombo'ma wia sé asu.”
27A mingkotla si wéwéné itii wia si Yesus, “Ulit Tuang, taan sé asu witu u lalem u méja kangkasii é mahkan a mahragosé im witu u méja pahkanan ni makaasu.”
28Ang kuan ni Yesus wia ni sia, “É ina', um pa'émanennu én totoz wangko', niitumo in tarékan é mamualimoma tanu un ikapaazmu.” In toro niitukan, si kooki' ni wéwéné itii é nimalé'osoma.
Sé tou saki liné'os ni Yesus
29In timula'umomé un tana' itii, si Yesus mahkiité un tembir u louz Galilea a sumosoza witu ung kimeleng a marumumez witu. 30A sé tou lakez mahto-tondongané i niméyé wia ni Sia, nimahwalimé sé lailai, sé letok, sé kénto', sé wowo' wo lakezpé' kasii sé walina, a séra izeta' nérala witu u sinaru un a'é ni Yesus a séra péléng lé'osen-Nama. 31Sé tou lakez itii é mengusi-ngusingsing i nimileka sé wowo' én toromo mahnuwu', sé kénto' é lé'oso, sé lailai é mahlampango, sé letok é mahileko, a séra mahsigi' wo mahlooz si Opo Empung né Israel.
Si Yesus niméhé ung kakanen wia sé epatna riwu tou
(Mrk. 8:1-10)
32A si Yesus tumawahmé sé pahtuzu'en-Na ang kumuama “Un até-Ku é rumaraaté sé tou lakez kenu. Teluna endomo séra i mengii-ngiit ni Aku wo ni séra én zéi'mo siapa kanen. Ni séra zéi'kan ipekiwuri-Ku karia i maharem, én taa séra ikawesahla witi lalan.”
33Ang kuan né pahtuzu'en-Na wia ni Sia, “Kura im wia un tampa zou'mé im wana am wanua kenu wo kita toro makailek roti ung kanen né tou sé téntumokala ung kalakez wo séra mawesuh?”
34Kuan ni Yesus wia ni séra, “Pira u roti wia ni kamu?”
A séra mingkotla, “Ni kai ém wéwéhan u roti pitu wo seza' rintek woopira.”
35An iatula ni Yesus sé tou lakez itii i rumumezla witu un tana'. 36Tumondong niitu an éndon-Namé u roti pitu wo sé seza' itii, ang kumuama u makasé wia si Opo Empung, am pemété-météngen-Nama an iwéhé-Nama wia sé pahtuzu'en-Na, an isekez nérama wia sé tou lakez itii. 37Ni séra péléng éng kiman makaz nimawesuh. Kumawusa niitu, a réwokené né tou a roti nimateza. A roti nimateza ém pituna lo'lo' kumuwu-kuwu. 38Ung kalakez né tou kiman in toro niitu én epatna riwu tuama, zéi'kampé' méikarékén sé wéwéné wo sé koki'. 39A sé tou lakez itii ipekiwurima ni Yesus. Ni Sia sumakéma londéi a mangé witi tana' Magadan.
Currently Selected:
:
Highlight
Share
Copy
Want to have your highlights saved across all your devices? Sign up or sign in