Ts'etta 11
11
Mizyar Baabilee geed qıxha
1Bıkırne dyunyel sa miziy sa yuşe vuxha. 2İnsanar şargılqa qööng'ə, Şinarne ölkee manbışik'le q'adaal g'acu, maayib avxuynbı. 3Sana-sang'uk'le: «Qudoora karpıç hı'ı yugda qecesva» uvhu. Manbışe g'ayeyne cigee karpıç, battağne cigeeyid g'ır alyaat'u. 4Qiyğad «Şas, sa şahariy q'om xəybışeeqa hiviyxharna gulle alyav'u, do qığahas, deşxhee mançeb ehevkasınbıva» uvhu.
5İnsanaaşe alyav'una şahariy gulle g'avces Rəbb avqa geç'e. 6Rəbbee uvhuyn: «Haane, manbışin gırgınbı sa milletinbı sa mizelenbı vob. Mançil-allad manbışe inəxübna iş haa'a gibğıl. Həşde manbışde yik'es hucooyiy ıkkan ha'as əxə. 7Qudoora geepç'ı manbışin mizyar alikka'as. Sang'vee uvhuyn mansanbışik'le mats'axhxhecen».
8İnəxüb Rəbbe manbı ç'iyeyne aq'valqa ehevkaa'anbı, şahar alyav'uyid ulyoyzaran. 9Rəbbee insanaaşin mizyar alikkı'il-alla mane cigayk'le Baabil (alikkı'iy) eyhe. Ç'iyeyne aq'vayne yoq'ne suralqab mançe ehevkaa'a.
Nühüna cule qiyğiyna nasıl
10Nühüne dixen Samın nasılın taarix inəxüd vod: q'ıfrımıka qadıyne xhinele q'ölle senna qiyğa, Samıqa vəş (100) sennang'a, mang'una dix Arpakşad yedike eyxhe. 11Arpakşad ıxhayle qiyğa, Sam xhod vəş (500) senna axva. Mang'us mebın dixbıyiy yişbıb vooxhenbı.
12Arpakşadıqa xhebts'ale xholle (35) sennang'a, mang'us dix Şelax eyxhe. 13Şelax ıxhayle qiyğa Arpakşadee yoq'ud vəşşe xhebılle (403) sen ha'a. Mang'us mebın dixbıyiy yişbıb vooxhenbı.
14Şelaxıqa xhebts'al (30) sennang'a, mang'us dix Ever eyxhe. 15Ever ıxhayle qiyğa Şelaxee yoq'ud vəşşe xhebılle (403) sen ha'a. Mang'us mebın dixbıyiy yişbıb vooxhenbı.
16Everıqa xhebts'ale yoq'ulle (34) sennang'a, mang'us dix Peleg eyxhe. 17Peleg ıxhayle qiyğa, Everee yoq'ud vəşşe xhebts'al (430) sen ha'a. Mang'us mebın dixbıyiy yişbıb vooxhenbı.
18Pelegıqa xhebts'al (30) sennang'a, mang'us dix Reu eyxhe. 19Reu ıxhayle qiyğa Pelegee q'öd vəşşe yüç'ülle (209) sen ha'a. Mang'us mebın dixbıyiy yişbıb vooxhenbı.
20Reuqa xhebts'ale q'ölle (32) sennang'a, mang'us dix Serug eyxhe. 21Serug ıxhayle qiyğa Reu'ee q'öd vəşşe yighılle (207) sen ha'a. Mang'us mebın dixbıyiy yişbıb vooxhenbı.
22Seruguqa xhebts'al (30) sennang'a, mang'us dix Naxor eyxhe. 23Naxor ıxhayle qiyğa Serugee q'öd vəş (200) sen ha'a. Mang'us mebın dixbıyiy yişbıb vooxhenbı.
24Naxoruqa g'aye yüç'əd (29) sennang'a, mang'us dix Terax eyxhe. 25Terax ıxhayle qiyğa Naxoree vəşşe yits'ıyüç'əd (119) sen ha'a. Mang'us mebın dixbıyiy yişbıb vooxhenbı.
26Teraxıs yights'al (70) sen qalesse, mang'uqa in dixbıniy vob: İbram, Naxor, Haran.
İbram şavunbışdayiy eyxhe
27Teraxıke g'abıynbışin taarix inəxüd vod: Terax İbramna, Naxorna, Haranna dek ıxha. Haranıqa Lut donana sa dix ıxha. 28Haran, vuc ıxhayne ölkee – Xaldeyaaşine Ur şaharee qik'uyng'a, mang'una dek üç'ürraniy vor. 29İbrameyid Naxoreyid davatbı hı'ı. İbramne xhunaşşeyn do Saray, Naxorned xhunaşşeyn do Milka ıxha (Milkayiy İska Haranın yişbı vuxha). 30Sarays uşaxar vooxhe deşdiy.
31Teraxee dix İbram, Haranna dix eyxhena neva Lut, İbramna xhunaşşe yeexhena sos Saray cuka alyabat'a. Kana'anne ölkeeqa vüqqəva, manbı sanab Xaldeyaaşine Ur şahareençe avayk'ananbı. Manbı Xaraneeqa qabı, maayib aaxvanbı. 32Q'öd vəşşe xholle (205) sennang'a, Xaranee Terax qek'ana.
Currently Selected:
Ts'etta 11: YIQSUM
Highlight
Share
Copy
Want to have your highlights saved across all your devices? Sign up or sign in
