Ioane 4

1Ina Pai‐dubu umo naibaha oiti Parisea oubio naibaha orovidioumo Iesuro kitomudio mere godogodo idodiai wia babatiso naibaha iwaidiotuti ina Ioanero godo imowaidio biahai. 2Ata Iesuro nei babatiso iwaidio biahai, na’u nou himia kitomudio mereo iwaidioumo. 3Nouri nouro Iudea naibaha emeheai wia nou Galileaito naibaha o’u. 4Wia nou Samariaiha ohodai. 5Ina na’u oopo Samaria mabuwa, paina Saika nou noito naibaha o’u, oopo nouri nou tariwai batinu Iakobo nou himia mereido, paina Iosepa, tau emaai. 6Wia Iakobo boboo nouowa emidio; Iesu boboo mabuwa naibaha emi mabu nouri nou daari emahebidio nave tuturi, wia hiwio guriwa otoi. 7Na’u Samaria o’bo naibaha o’u, obo iai. Iesu nouido naiba iaowa: Tanowoharo moro umidio. 8Nouri nou himia kitomudio mere oopoito o’umo, kihona imemoi. 9Ina Samaria o’bo nouido naiba iaowa, Rovia Iudaia duburi, movia Samaria o’bori, teiri ro mo obonu idioi teiri roro waroro; mabu nouri Iudaia oubi Samaria oubimu orowabatutimo biahai. 10Iesuro naibaha omowameai, nouido naiba iaowa, Ina ro umoro Iehova kemaai na’i wia nouri dubu roido nou raro, Tanowoharo moro umidio, rovia nouido aiwatodoi wia nouro roido kiiro obo aiwamaai. 11O’bo nouido naiba iaowa: Auwo dubu, ro obo emiai na tatori wia boboo nou tuturi, tobatiudo waweai nouri kiiro obo’i. 12Ro auwora imo abea Iakobo aibora? Nouvia nouri boboo imoido tau nimaai, ina nou wia nou merera bulamakaura neiio obo naibaha idiotutiumo. 13Iesu naibaha omowameai nouido naiba iaowa: Dubu ata nouri obo naibaha idio do’o hiwio ata obo ata niro nouro aiwamahebidioi. 14Wia dubu ata moro emaai obo’i ina nouro idiowa, ina nou obo ata niro emahebidio raihe wia nouri moro emaai obo’i nou boboo oboi nou turiwa waai, kiiro karaiiaito naibaha wairioruriotuti. 15O’boi nouido naiba iaowa, Auwo dubu e, obo nouri moido tanemaairo ina mo obo idio niro biahai wia nou mabuito o’u raihe obo iai. 16Iesu nouido naiba iaowa: Ta’u ro uramu tatua wia noito ta’udo. 17O’boro naibaha omowameai nouido naiba iaowa: Mo uramu biahai. Iesu nouido naiba iaowa: Ro naiheha wade tau raro, mo uramu tatori. 18Mabu nouri rovia 5 uramioo tau ememidioumo wia ro kememidio dubui nou ro uramio biahai, nouri ro wade naihehari. 19O’boi nouido naiba iaowa: Auwo dubu e, maineauri ro peroveta duburi; 20imo abeamio nouri akabuwa Iehovaido naibaha oroboriatutitutiumo wia rio naibaha airiaodumo, Oubi naiheha koroboria bati nou Ierusalemawari. 21Iesu nouido naiba iaowa, O’bo! ro moido tarovidio, hiwio aiwauro’ui ina rioo Iehovaido oroboriatutimo raihe nouri akabuwa naiba Ierusalemawa. 22Nouri nanaito rio naibaha roroboriatutidumo rio umo biahai; nouri nanaido imoo naibaha noroboriatutidumo imo umo noitutidumo, mabu nouri kiitouti nana Iudea oubi mabudo naibaha o’uro. 23Wia hiwio naibaha airo’u, doihabuo nou tau o’u ina naiheha koroboriatuti oubi neiio Iehovaido aiwaimo oroboriatutimoi Urio imini ramu wia naiheha kidia ramu. Mabu nouri, koroboriatuti oubi nou aibo Abearo naibaha rimohouti. 24Iehova nou Uriori wia nou koroboriatuti oubi neiio nouihaido koroboriatutiha moroboriatutimo, urio imini ramu wia naiheha kidia ramu. 25O’bo nouido naiba iaowa, Mo umo Messaia paina idodo Keriso, naibaha wauro’ui, ina nou ta’uwa nouro aiwauro’ui nana auwoha imoido nouro aiwai iaoi. 26Iesu nouido naiba iaowa, Mo riaa romu nou niaodudo, mo nouri.

27Nou ta’uwa nou himia kitomudio mere naibaha o’umo wia nei naibaha aiemaeawaumo nouri nou o’bomu wade karotoii; ina dubu ataro atodoi biahai, Touna niroi ro, e teiri ro noumu riaodudo. 28Ina o’bo nou obo uro naibaha emeheai wia oopoito naibaha araiwai wia oubido naiba iaowa: 29Ta’umo, dubu ata eaurimoi, mo kidodiai nana auwoha nouro moido ainomobodutiwa. Nouvia Kerisora? 30Nou ta’uwa nei oopoudo naibaha ihuodutiwaumo nouido naibaha o’umo. 31Ina nou himia kitomudio mere nouido hobo atorowaumo: Auwo dubu e, kihona taihio. 32Wia nou neido naiba iaowa: Mo kihona tau nivia ata rio umo biahai. 33Nouri nou kitomudio mere nei himia himia naibaha iaowaumo: Ina dubu ataro kihona aromowouro nouro ihoi? 34Iesu neido naiba iaowa: Nouri mo kihonari, mo nouro notiodoiro nou himia nirona idodiai wia nou kowaati opoiioi. 35Rioo araramomo aue, Neewa neewa bara oboiwa ina naiha ta’uwa aiwauro’ui. Rio idomai ohuito taivioidioumo wia bati mabuwa taiaurimo nei naiha na’i nou ramu tau iapee. 36Duburo nou riahio, wiha na’i nou airoweadai wia iopu nouri kiiro karaiiaito nou naibaha ridabuaidai; ina nouri, mate kibo dubura, iopu kiwohaudio dubura, neiti na’u aibo geii geiiha rimahebidiodudo. 37Wia nouri kiao wade nou naihehari, Na’u dubu mate naibaha ribo wia dubu ataro naibaha riahio. 38Nouri nana rioo ibo biahai naiba iaurimo biahai moro rio itiodoi niaii iahiomoi; oubi amidao kiwaatiri wia nei kidodiai nana’i rioo tau iviaumo.

39Wia Samaria oubi godo nouido naibaha araromodiowaumo nouri o’bo’i kiao wadei, nou naiba raro: Mo kidodiai nana auwoha nouro moido ainomobodutiwa. 40Nouri nou ta’uwa Samaria oubi nouido ida’umo nei nouido hobo atorowaumo nou neimu emidioi wia hiwio neewa nou neimu naibaha emidio. 41Wia oubi amida godogodoo nouido araromodiowaumo mabu nou himia kiao wadei. 42Wia o’boido nei naibaha iaowaumo: Doihabuo imo nouido ainararomodiodumo ro kiao wade biahai, na’u imo himia nouido tau norovidiodumo wia umo naibaha ainoitidumo, nouri nou Kerisori, batibati kiitouti dubu.

43Wia dooudo hiwio neewa daropoiio noudo nou naibaha emeheai wia Galileaito naibaha o’uwa. 44Mabu nouri nou himia naibaha iaowa; Peroveta dubu nou pai biahai nou himia oopo oopowa. 45Ina nou ta’uwa nou Galilaito da’o, Galilaia oubi nouido naibaha araubuaumo nouri nana auwoha nouro nou idodiaiwa horiomoo hiwio’i nouowa Ierusalemawa neiio aieauriwaumo nouri nei naibari horiomoido orohoumo.

46Wia Iesuro Kana, Galilaia mabuwa noito, naibaha araiwairo, batii nouowa nouro obo wine aibo owaevia; wia pai‐dubu na’u nouowa emidio nou himia mere temetemeri Kapenaumowa. 47Ina nouro naibaha orovidio Iesu Iudaiaudo Galilaiaito tau o’uro nou nouido naibaha o’u wia hobo atodoi nou oruoi nou himia mere mea owai, mabu nouri nou koihiai tariwai. 48Wia Iesu nouido naiba iaowa: Ina rio eaurimo tato modobo na’i wia tiaha kidodiai na’i rioo iraromodioumo raihe. 49Pai dubu nouido naiba iaowa: Auwo dubu e, taruoro hagohagoha, mo mere ohiai tore. 50Iesu nouido naiba iaowa: Ro navewa ta’u, ro himia mere nou kiirori. Ina nouri kiao wade Iesu nouido naiba iaowa dubui nouri naibaha irovidio, nou navewa naibaha o’uwa. 51Ina nou ta’uwa nou daruowa nou himia hiwaa oubi nou omotoiwaumo wia nouido naiba iaowaumo; Ro mere kiirori. 52Ina nouro neido naibaha iatodoi: Tou ta’uwa roroitorai? Nouri nei nouido naiba iaowaumo, Doto, hiwio guriwa, kaupiro nouowa emeheai. 53Wia abea umodaiti nouri nou ta’uwa Iesuro nouowa aro: Ro mere kiirori, wia nouro naibaha iraromodio, naiba nou himia oubi auwohamu. 54Nouri ata tiaha kidodiai na neewa’i nouro naibaha idodiaimama nou ta’uwa Iudaiaudo Galilaiaito nou naibaha o’u.

Currently Selected:

Ioane 4: KXW1941

Highlight

Copy