KUMA 1
1
Kũthinw’a kwa Aisilaeli me Misili
1Na masyĩtwa ma ana ma Isilaeli ala malikile Misili nĩmo aa (o kĩla mũndũ na andũ ma nyũmba yake mookie na Yakovo): #Mwa 35.23–26. 2Leuveni, na Sĩmeoni, na Livai, na Yuta, 3na Isakali, na Nzevuluni, na Mbenyamini, 4na Ndani, na Navitali, na Ngati, na Aseli. 5Na andũ onthe ala maumie kĩnyunyunĩ kya Yakovo maĩ andũ mĩongo mũonza: nake Yosevu aĩ o ku Misili. #Mwa 46.27; Kũt 10.22. 6Na Yosevu akw’a, na ana‐a‐ĩthe make onthe, na nzyawa ĩsu yonthe. #Mwa 50.26; Meko 7.15. 7Na ana ma Isilaeli masyaanie, na maingĩva mũno, na kwongelela, na maendeea na kũya vinya mũno; na nthĩ yausũwa nĩo. #Mwa 46.3; Kũt 26.5; Meko 7.17.
8Na ĩndĩ kwookĩla mũsumbĩ ũngĩ Misili, ũla ũtamwĩsĩ Yosevu. #Meko 7.18. 9Na amea andũ make, Sisyai, andũ ma ana ma Isilaeli nĩ aingĩ na me na vinya kwĩ ithyĩ: #Sav 105.24. 10yuyu ĩndĩ tũmekei na ũĩ, matikese kwingĩva, na kũkeethĩwa, yĩla kaũ o na wĩva ũkokĩla, nao makeevulan’ya na amaitha maitũ, na kũkita naitũ, na makyuma nthĩ ĩno. #Sav 83.3,4; 105.25; Meko 7.19. 11Kwondũ wa ũu mamaiĩa aũngamĩi nĩ kana mamathĩn’ye na mĩio yoo. Nao mamwakĩa Valao ndũa sya kwia mĩio, Vithomu na Lamesesi. #Mwa 15.13; 47.11; Kuma 2.11; 5.4,5; 6.6,7; Kũt 26.6; Sav 81.6. 12Ĩndĩ makĩendeea na kũmathĩn’ya, namo maendeea kwingĩva na kusũa nthĩ. Na maĩ na woo kwondũ wa ana ma Isilaeli. #Mot 22.3. 13Na Amĩsili mamathũkũmĩthya ana ma Isilaeli na vinya mũno: 14na meekĩa ũũ mathayũnĩ moo kwondũ wa ũthũkũmi wi vinya, wa ndaka, na wa mavali, na wĩa w’onthe wa mĩũndanĩ, ũthũkũmi woo w’onthe ũla mamathũkũmĩthisye na vinya mũno. #Kuma 2.23; 6.9; Mot 20.15; Meko 7.19.
15Na mũsumbĩ wa Misili aneena na esikya Aevelania, syĩtwa ya ũmwe eetawa Sivila, na syĩtwa ya ũngĩ eetawa Vua: 16na amea, Yĩla mũkwĩsikya aka ma Aevelania, na kũmona makĩsyaa; ethĩwa nĩ kavĩsĩ, koaei ĩndĩ; ethĩwa nĩ kelĩtu, nĩkaekwe kekale thayũ. 17Ĩndĩ esikya mamũkĩa Ngai, na maiaaĩka tondũ mũsumbĩ wa Misili wameaĩe, ĩndĩ maeka twana twa tũvĩsĩ twĩ thayũ. #Nth 16.6; Nda 6.13; Meko 5.29. 18Na mũsumbĩ wa Misili eeta esikya, na amakũlya, Mwĩkĩte ũndũ ũũ nĩki, mũkĩeka twana twa tũvĩsĩ twĩ thayũ? 19Na esikya mamwĩa Valao, Nĩkwĩthĩwa aka ma Aevelania matiilyĩ aka ma Amisili; nũndũ nĩ athangaau, na nĩmasyaaa mwĩsikya atanavika. 20Na Ngai ameka esikya nesa: na andũ maingĩva, na maya vinya mũnene. #Mũta 8.12; Isa 3.10. 21Na kweethĩwa, nũndũ esikya mamũkĩaa Ngaĩ, amanenga ũsyao. #1 Sam 2.35; 2 Sam 7.11,27; 1 Asu 2.24; 11.38. 22Na Valao ameaĩa andũ make onthe, akĩmea, Kĩla kana ka kavĩsĩ kasyawa kekasyei ũsĩnĩ, na kĩla kana ka kelĩtu kaekaei kekale thayũ. #Meko 7.19.
Currently Selected:
KUMA 1: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
