KUMA 4
4
1Na Mose asũngĩa na amwĩa, Ĩndĩ, sisya, matikambĩtĩkĩla, kana kwĩthukĩĩsya wasya wakwa: nũndũ makasya, Yeova ndaakumĩlĩla. 2Na Yeova amũkũlya, Kĩla kĩ kw’okonĩ kwaku nĩ kyaũ? Na asũngĩa, Nĩ ndata. 3Na amwĩa, Mĩkye nthĩ. Na amĩkya nthĩ, na yatw’ĩka nzoka; na Mose amĩkĩa. 4Na Yeova amwĩa Mose, Tambũũkya kw’oko kwaku ũmĩkwate mwĩthe (na atambũũkya kw’oko amĩkwata, na yatw’ĩka ndata ĩ kw’okonĩ kwake); 5nĩ kana metĩkĩle atĩ Yeova, Ngaĩ wa aaĩthe moo, Ngai wa Avalaamu, na Ngai wa Isaka, na Ngai wa Yakovo, nũkumĩlĩle. #Kuma 3.6; 19.9. 6Na ĩngĩ Yeova amwĩa, Yu likya kw’oko kwaku kĩthũinĩ kyaku. Na alikya kw’oko kwake kĩthũinĩ kyake: na yĩla wakumisye, sisya, kw’oko kwake kweethĩwa na mangũ, kwĩ kweũ ta ĩa. #Mot 12.10; 2 Asu 5.27. 7Na amwĩa, Likya kw’oko kwaku kĩthũinĩ kyaku ĩngĩ. (Na alikya kw’oko kwake kĩthũinĩ kyake ĩngĩ; na yĩla wakumĩsye kĩthũinĩ kyake, sisya, kwaĩ kũalyũku ĩngĩ kũilyĩ mwĩĩ wake ũla ũngĩ.) #2 Asu 5.14. 8Na kũkeethĩwa, ethĩwa matikakwĩtĩkĩla, o na kwĩthukĩĩsya wasya wa kyama kya mbee, makeetĩkĩla wasya wa kyama kya kelĩ. 9Na kũkeethĩwa, ethĩwa matiketĩkĩla o na syama isu ilĩ, o na kwĩthukĩĩsya wasya waku, nĩvo wĩtava manzĩ ma ũsĩnĩ ũmatulũle nthĩ nyũmũ: na manzĩ ala wĩtava ũsĩnĩ makatw’ĩka nthakame ĩũlũ wa nthĩ nyũmũ. #Kuma 7.19.
10Na Mose amwĩa Yeova, Ame Mwĩaĩi, ndi mũneeni, kuma tene, o na yu waneena na mũthũkũmi waku; nũndũ nĩ mũndũ ũneenaa mbola, na ũĩmĩ wakwa nĩ mũito. #Kuma 6.12; Yel 1.6. 11Na Yeova amwĩa, Ũla wombie kanyw’a wa mũndũ nũũ? O na nũũ ũtumaa mũndũ ũtaneena, kana kwĩw’a, kana nũũ ũtumaa ona, kana kũlea kwona? Ti nyie, Yeova? 12Yu ĩndĩ, enda, nakwa ngeethĩwa nĩ vamwe na kanyw’a waku, na ngĩkũmanyĩsya ũndũ ũkaneena. #Isa 50.4; Yel 1.9; Mko 13.11; Lk 21.15. 13Na amwĩa, Ame Mwĩaĩi, nĩngũkũvoya, tũma na kanyw’a wa ũla wĩtũma. 14Na ũthatu wa Yeova wamwakanĩa Mose, na amwĩa, Mwana‐a‐mwenyu Alunĩ, Mũlivai, nde vo? Nĩnĩsĩ atĩ nũtonya kũneena nesa. Na ĩngĩ, sisya, nĩwũkĩte akũthaũe: na akwona, akeew’a mũyo ngoonĩ yake. 15Na ũkaneene nake, na kwĩkĩa i ndeto kanyw’anĩ wake: nakwa ngeethĩwa na kanyw’a waku, na kanyw’a wake, na ngĩmũmanyĩsya ũla mwaĩle kwĩka. #Kuma 4.12; 7.1,2; Mot 23.5; Kũt 18.18; 2 Sam 14.3; Isa 51.16. 16Nake akeethĩwa e mũneeni waku andũnĩ: na kũkeethĩwa, atĩ akeethĩwa ta kanyw’a kwaku, naku ũkeethĩwa ta Ngai kwake. #Kuma 18.19. 17Na ũkakue ndata ĩno kw’okonĩ kwaku ĩla wĩkaa syama isu nayo.
Mose akĩsyoka Misili
18Na Mose athi asyokea mũthoni Yethilo, na amwĩa, Nĩngũkwĩsũva, nenga ũthei nĩthi, nĩsyokee ana‐a‐ia makwa ala me Misili, nĩmanye ethĩwa me o thaũ. Na Yethilo amwĩa Mose, Enda na mũuo. 19Na Yeova amwĩĩa Mose ku Mitiani, Thi, ũsyoke Misili; nũndũ andũ onthe ala mamanthaa thayũ waku nĩ akw’ũ. #Kuma 2.15,23; Mt 2.20. 20Na Mose oosa mũka na ana make, na amatũlya ĩng’oinĩ, na asyoka nthĩ ya Misili: na Mose akua ndata ya Ngai kw’okonĩ kwake. #Kuma 4.2,17; 18.2–4; Mot 20.8,9. 21Na Yeova amwĩa Mose, Yĩla wĩsyoka Misili, ndũkatĩe kwĩka syama syonthe ila neekĩa kw’okonĩ kwaku, Valao ene: ĩndĩ ngoomya ngoo yake, na ndakalekya andũ mathĩ. #Kuma 7.3; 9.12; 10.1,20; 11.10; 14.4; Kũt 2.30; Yos 11.20; Isa 63.17; Yoa 12.40; Alo 9.17,18. 22Naku ũkamwĩe Valao, Ũũ nĩw’o Yeova ũnũkwasya, Isilaeli nĩ mwana wakwa, ĩkithathi yakwa: #Yel 31.9; Osea 11.1; Alo 9.4. 23na nĩkũtavĩtye, Lekya mwana wakwa athi, anthũkũme; na nũleete kũmũlekya athi: sisya, ngooaa mwana waku, ĩkithathi yaku. #Kuma 11.5; 12.29. 24Na kweethĩwa, me nzĩanĩ vandũ va ũkoma, Yeova akomana nake, akyenda kũmũaa. #Mwa 17.14; Mot 22.22. 25Nĩvo ĩndĩ Nzivola wosie ĩvia yũmũ yũĩ, na atila kĩkonde kya mbinũ ya mwana wake, na ekya maũũnĩ ma Mose; na amwĩa, Nĩ w’o, wĩ mũtwaani wa nthakame kwakwa. #Yos 5.2,3. 26Na kwondũ wa ũu Ngai amũeka. Nĩvo ĩndĩ Nzivola wamwĩie, Wĩ mũtwaani wa nthakame we, nũndũ wa nzaĩko.
27Na Yeova amwĩa Aluni, Enda weũnĩ ũmũthaũe Mose. Na athi, na amũthaũĩa kĩĩmanĩ kya Ngai, na amũmumunya. #Kuma 3.1. 28Na Mose atavya Alunĩ ndeto syonthe sya Yeova ila ũnamũtũmie nasyo, na syama syonthe ila ũnamwĩaĩe. #Kuma 4.2–9,15,16. 29Na Mose na Aluni maenda na mamomban’ya atumĩa onthe ma ana ma Isilaeli: #Kuma 3.16. 30na Aluni aneena ndeto syonthe ila Yeova ũnamũtavisye Mose, na eeka syama andũ mene. 31Na andũ meetĩkĩla: na yĩla meewie kana Yeova nĩwũkĩte kũsisya ana ma Isilaeli, na kana nĩwonete monyamao moo, nĩvo ĩndĩ makunamisye mĩtwe yoo na mathaitha. #Kuma 3.7,16,18; 12.27; 1 Mav 29.20.
Currently Selected:
KUMA 4: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
