KUMA 6
6
1Na Yeova amwĩa Mose, Yu ũkoona ũndũ nĩmwĩka Valao: nũndũ akamalekya mathi kwondũ wa kw’oko kwĩ vinya, na akamalũngya nthĩ yake na kw’oko kwĩ vinya. #Kuma 3.19; 11.1.
Kwĩtwa kwa Mose kũitũngĩlĩĩlwa
2Na Ngai aneena na Mose, na amwĩa, Ninyie Yeova: 3nakwa namũmĩlĩle Avalaamu, na Isaka, na Yakovo, nĩ Ngai Mwene Vinya W’onthe; ĩndĩ na syĩtwa yakwa Yeova ndyaamanyĩka kwoo. #Mwa 17.1; 35.11; Kuma 3.14. 4Na ĩngĩ nĩnĩlũlũmĩlye ũtianĩo wakwa namo, nĩmanenge nthĩ ya Kanaani, ĩla nthĩ ya kwĩkala ũeni kwoo, ĩla mekalile me ũeninĩ. #Mwa 15.18; 17.4,7,8; 28.4. 5Na ĩngĩ nĩnĩw’ĩte kũluma kwa ana ma Isilaeli, ala Amisili mekalasya ũkombonĩ; na nĩnĩlilikanĩte ũtianĩo wakwa. #Kuma 2.24. 6Kwondũ wa ũu matavye ana ma Isilaeli, Ninyĩe Yeova, na ngamumya mume mĩionĩ ya Amisili, na ngatuma muma ũkombonĩ woo, nakwa ngamwovosya na kw’oko kũtambũũkĩtwe, na mosilĩlo manene: #Kuma 3.17; 7.4; 15.13; Kũt 7.8; 26.8; 2 Asu 17.36; Sav 136.11,12. 7na ngamwosa mwĩthĩwe andũ makwa, na ngeethĩwa nĩ Ngai wenyu; na mũkamanya ninyie Yeova Ngai wenyu; ũla ũnũũmumya mĩionĩ ya Amisili. #Mwa 17.7,8; Kuma 29.45,46; Ali 22.33; Kũt 7.6; 29.13; 2 Sam 7.24; Ũvu 21.7. 8Na ngamũete nthĩ ĩla neevĩtĩe kũmanenga Avalaamu, na Isaka, na Yakovo; na ngamũnenga ĩthĩwe ũtiĩwa wenyu: ninyie Yeova. #Mwa 15.18; 26.3; Kuma 32.13; Esek 20.5,6,42. 9Na Mose atavya ana ma Isilaeli ũu: ĩndĩ matyaamwĩthukĩĩsya Mose ũndũ wa woo mũnene wa veva, na ũndũ wa ũkombo mwai. #Kuma 5.21.
10Na Yeova aneena na Mose, akĩmwĩa, 11Lika, ũmwĩe Valao mũsumbĩ wa Misili, alekye ana ma Isilaeli maume nthĩ yake. 12Na Mose aneena vala ve Yeova, akĩmwĩa, Sisya, ana ma Isilaeli matinaambĩtukĩĩsya; Valao akambĩw’a ata ĩndĩ, nyie ũla nĩ na ilomo ite mbaĩke? #Kuma 4.10. 13Na Yeova aneena na Mose na Aluni, na amea meaĩe ana ma Isilaeli, o na Valao mũsumbĩ wa Misili, mamaumye ana ma Isilaeli nthĩ ya Misili.
Mosyaanĩo ma Mose na Aluni
14Aa nĩo atongoi ma nyũmba sya aaĩthe moo. Ana ma Leuveni, ĩkithathi ya Isilaeli, nĩ Anoki, na Valu, na Esiloni, na Kalimi; asu nĩo mĩvĩa ya Leuveni. #Mwa 46.9; 1 Mav 5.3. 15Na ana ma Simeoni: Yemueli, na Yamini, na Oati, na Yakini, na Nzooali, na Sauli, mwana wa mũndũ mũka Mũkanaani: asu nĩo mĩvĩa ya Simeoni. #Mwa 46.10; 1 Mav 4.24. 16Na aa nĩ masyĩtwa ma ana ma Livai kũatĩĩa nzyawa syoo: Ngelisoni, na Koathi, na Melali: na myaka ya thayũ wa Livai yaĩ myaka ĩana na mĩongo ĩtatũ na mũonza. #Mwa 46.11; Mot 3.17; 1 Mav 6.1,16. 17Ana ma Ngelisoni: Livini, na Simei, kũatĩĩa mĩvĩa yoo. #Mot 3.18; 1 Mav 6.17. 18Na ana ma Koathi: Amilamu, na Isali, na Eviloni, na Usieli; na myaka ya thayũ wa Koathi yaĩ myaka ĩana na mĩongo ĩtatũ na ĩtatũ. #Mot 3.19; 1 Mav 6.2,18. 19Na ana ma Melali: Mali na Musi. Aa nĩo mĩvĩa ya Alivai kũatĩĩa nzyawa syoo. #Mot 3.20; 1 Mav 6.19. 20Na Amilamu atwaa Yokeveti, mwendw’a‐ĩthe wake, atw’ĩke mũka; na amũsyaĩa Aluni na Mose: na myaka ya thayũ wa Amilamu yaĩ myaka ĩana na mĩongo ĩtatũ na mũonza. #Kuma 2.1; 1 Mav 23.13,14. 21Na ana ma Isali: Kola, na Neveki, na Nzikili. #Mot 16.1; 1 Mav 6.37,38. 22Na ana ma Usieli: Misaeli, na Elisavani, na Sithili. #Ali 10.4; Mot 3.30. 23Na Aluni atwaa Elesieva, mwĩĩtu wa Aminatavu, mwĩĩtu‐a‐inyia wa Nasoni, atw’ĩke mũka; nake amũsyaĩa Natavu, na Aviu, na Eleasali, na Ithamali. #Ali 10.1; Mot 3.2; Lu 4.19,20; 1 Mav 2.10; 6.3; Mt 1.4; Lk 3.32,33. 24Na ana ma Kola: Asili, na Elikana, na Aviasavu; asu nĩo mĩvĩa ya Akola. #1 Mav 6.22,23,37. 25Na Eleasali, mwana wa Aluni, atwaa ũmwe wa eĩtu ma Vutieli atw’ike mũka; nake amũsyaĩa Vineasi. Asu nĩo atongoi ma nyũmba sya aaĩthe ma Alivai kũatĩĩa mĩvĩa yoo. #Mot 25.7. 26Asu, Mose na Aluni, nĩo ala Yeova watavisye atĩĩ, Umyai ana ma Isilaeli nthĩ ya Misili kwĩanana na nguthu syoo. #Kuma 6.13; 7.4; 12.17; Mot 33.1. 27Asu nĩo ala maneenie na Valao mũsumbĩ wa Misili, nĩ kana maumye ana ma Isilaeli Misili: asu nĩ ala Mose na Aluni.
Yeova ayĩyĩaĩa Mose na Aluni
28Na kweethĩwa mũthenya ũla Yeova waneenie na Mose nthĩ ya Misili, 29Yeova aneena na Mose, akĩmwĩa, Ninyie Yeova: neena na Valao mũsumbĩ wa Misili maũndũ onthe ala ngũkũtavya. #Kuma 6.2,11. 30Na Mose aneena vala ve Yeova, Sisya, nĩ na ilomo ite mbaĩke, na Valao akambĩthukĩĩsya ata? #Kuma 6.12.
Currently Selected:
KUMA 6: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
