MWAMBĨLĨLYO 22
22
Avalaamu ayĩaĩwa kũthemba Isaka
1Na kweethĩwa ĩtina wa maũndũ asu, Ngai atata Avalaamu, na amwĩa, Avalaamu; nake asũngĩa, Ninyioo. #Aevl 11.17–19; Yak 1.12. 2Na amwĩa, Osa yu mwana waku, mwana waku e ũmwe, ũla wendete, o Isaka, ũende nthĩ ya Molia; na ũkamũthembee vo ethĩwe nthembo ya kũvĩvw’a ĩũlũ wa kĩĩma kĩmwe kĩla ngakũtavya. #2 Mav 3.1. 3Na Avalaamu ookĩla kĩoko tene, na atandĩka ĩng’oi yake, na oosa anake elĩ make mathi nake, na Isaka mwana wake; na aalya ngũ sya nthembo ya kũvĩvw’a, na ookila, na aenda vandũ vala Ngai ũmũtavisye. 4Mũthenya wa katatũ Avalaamu ookĩlya metho make, oona vala vandũ ve kũasa. 5Na Avalaamu amea anake make, Inyw’ĩ ĩkalai vaa na ĩng’oi, nakwa na mwana nĩtũũthi kũya; na tũkathaitha, na kũmũsyokea ĩngĩ. 6Na Avalaamu oosa ngũ sya nthembo ya kũvĩvw’a, amwaĩkya Isaka mwana wake; na akua kw’okonĩ kwake mwaki na kavyũ; na maendan’ya me elĩ. #Yoa 19.17. 7Na Isaka aneena na Avalaamu ithe wake, na amwĩa, Nau: nake asũngĩa, Ninyioo, mwana wakwa. Na asya, Sisya, mwaki na ngũ: ĩndĩ kaĩva katena ka ĩlondu ka nthembo ya kũvĩvw’a? 8Na Avalaamu asũngĩa, Ngai akeemanthĩa katena ka ĩlondu ka nthembo ya kũvĩvw’a, mwana wakwa: na ĩndĩ maendan’ya me elĩ. #Yoa 1.29,36; 1 Vet 1.19.
9Na mavika vandũ vala Ngai wamũtavĩtye; na Avalaamu aaka kĩthembeo vo, na aĩĩa ngũ, na amwova Isaka mwana wake, na amwia kĩthembeonĩ, ĩũlũ wa ngũ. #Yak 2.21. 10Na Avalaamu atambũũkya kw’oko kwake, oosa kavyũ oae mwana wake. 11Na mũlaĩka wa Yeova amwĩta kuma ĩtunĩ, na amwĩa, Avalaamu, Avalaamu: nake asũngĩa, Ninyioo. 12Na amwĩa, Ndũkailĩĩle mwana kw’oko kwaku, o na ndũkamwĩke ũndũ; nũndũ yu nĩnĩsĩ kana nũmũkĩĩte Ngai, nũndũ ndũnambata mwana waku, mwana waku e ũmwe. #Mwa 26.5; 1 Sam 15.22; Mika 6.7,8. 13Na Avalaamu ookĩlya metho, oona, na, sisya, ĩtina wake ndũũme ĩkwetwe mbya syayo nĩ kĩkuthu: na Avalaamu aenda na oosa ndũũme, na amĩthemba nthembo ya kũvĩvw’a vandũ va mwana wake. 14Na Avalaamu eeta vandũ vau syĩtwa yavo Yeova‐yile: o tondũ kwaaw’a kũvika mũnthĩ ũũ, Kĩĩmanĩ kya Yeova kĩkooneka. 15Na mũlaĩka wa Yeova amwĩta Avalaamu ya kelĩ e ĩtunĩ, 16na amwĩa, Nyie mwene nĩneevĩta, Yeova easya ũu, nũndũ nĩweeka ũndũ ũũ, na ndũnambata mwana waku, mwana waku e ũmwe, #Sav 105.9; Lk 1.73; Aevl 6.13. 17kana kũathima ngakũathima, na kwingĩvya ngaingĩvya ũsyao waku ta ndata sya matunĩ, na ta kĩthangathĩ kĩ ũtee wa ũkanga; na ũsyao waku ũkatiĩwa mbingĩlo ya amaitha maw’o; #Mwa 13.16; 15.5; 24.60; Yel 33.22; Aevl 6.14. 18na ũsyaonĩ waku mbaĩ syonthe sya nthĩ ikaathimwa; nũndũ nĩweew’a wasya wakwa. #Mwa 12.3; 22.3; 26.5; Aka 3.8. 19Na ĩndĩ Avalaamu amasyokea anake make, na mookĩla maendan’ya kũvika Mbeeli‐sieva; na Avalaamu atũa Mbeeli‐sieva.
Mosyaanĩo ma Naoli
20Na kweethĩwa ĩtina wa maũndũ asu, Avalaamu atavw’a, kũineenwa, Sisya, Milika, nake nũsyaĩe mwana‐a‐mwenyu Naoli syana: #Mwa 11.29. 21Usi ĩkithathi yake, na Mbusi mwana‐a‐inyia, na Kemueli ĩthe wa Alamu, 22na Keseti, na Aso, na Vilitasi, na Yitilavu, na Mbethueli. 23Na Mbethueli asyaa Leveka: asu nyanya Milika asyaĩa Naoli, mwana‐a‐inyia wa Avalaamu. #Mwa 24.15. 24Na mũka wake ngombo, syĩtwa yake Leuma, nake asyaa Teva, na Ngaamu, na Taasi, na Maaka.
Currently Selected:
MWAMBĨLĨLYO 22: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
