MWAMBĨLĨLYO 30
30
1Na Lakeli oona kana ndaamũsyaĩa Yakovo syana, Lakeli amwĩw’ĩa mwĩĩtu‐a‐inyia kĩwĩu; na amwĩa Yakovo, Nenga syana, ethĩwa ti ũu ngakw’a nyie. #Mwa 29.31. 2Na Yakovo amũthatĩa Lakeli: na akũlya, Nyie nĩ vandũ va Ngai, ũla ũkũvatĩte ũsyao wa ĩvu? #Mwa 16.2; 1 Sam 1.5. 3Nake asya, Sisya, Mbila, mũthũkũmi wakwa mwĩĩtu, lika kwake; nĩ kana asyaĩe maunĩ makwa, nose syana nũndũ wake. #Mwa 16.2; 29.29; 50.23; Yovu 3.12. 4Na amũnenga Mbila mũthũkũmi wake mwĩĩtu, ethĩwe mũka wake: na Yakovo alika kwake. 5Na Mbila aya ĩvu, na amũsyaĩa Yakovo mwana. 6Na Lakeli asya, Ngai nĩwanzilĩla katĩ, na ĩngĩ nĩwew’a wasya wakwa, na anenga mwana: kwondũ wa ũu anwĩta syĩtwa yake Ndani. #Mwa 49.16. 7Na Mbila mũthũkũmi wa Lakeli, mwĩĩtu, aya ĩvu ĩngĩ, na amũsyaĩa Yakovo mwana wa kelĩ. 8Na Lakeli asya, Nakĩlan’ya na mwĩĩtu‐a‐ia na mokĩlan’yo manene, nakwa nakĩlya: na amwĩta syĩtwa yake Navitali.
9Nake Lea oona kana nũekete ũsyaa, oosa Nziliva mũthũkũmi wake, mwĩĩtu, anenga Yakovo ethĩwe mũka wake. #Mwa 29.24. 10Na Nziliva mũthũkũmi wa Lea, mwĩĩtu, amũsyaĩa Yakovo mwana. 11Na Lea asya, Nĩ ĩvuso yakwa! Na amwĩta syĩtwa yake Ngati. 12Na Nziliva mũthũkũmi wa Lea, mwĩĩtu, amũsyaĩa Yakovo mwana wa kelĩ. 13Na Lea asya, Nĩ mũtanu nyie! Nũndũ eĩtu makambĩta mũtanu: na amwĩta syĩtwa yake Aseli.
14Na mĩthenya ya ũketha nganũ, Leuveni athi oona mũũndanĩ mosyao ma kwendana, na amũetee Lea inyia wake. Nĩvo Lakeli wamwĩie Lea, Ame, nenga ala mosyao ma kwendana ma mwana waku. #Wa 7.13. 15Nake amwĩa, Nĩ ũndũ ũnini we kũmbena mũũme wakwa? Na ĩngĩ nũkwenda kwosa mosyao ma kwendana ma mwana wakwa namo? Na Lakeli asũngĩa, Kwa ũu akakoma naku ũtukũ ũũ nũndũ wa mosyao ma kwendana ma mwana waku. 16Na wĩoo Yakovo ooka aumĩte mũũndanĩ, na Lea athi kũmũthaũa, na amwĩa, Mũvaka ũlike kwakwa: nũndũ nĩ w’o nĩkumĩsye ĩtuvi ya mosyao ma kwendana ma mwana wakwa. Na akoma nake ũtukũ ũsu. 17Na Ngai amwĩthukĩĩsya Lea, nake aya ĩvu, na amũsyaĩa Yakovo mwana wa katano. 18Na Lea asya, Ngai nĩwanenga ĩtuvi yakwa, nĩkwĩthĩwa nĩnĩmũnengete mũemewa mũthũkũmi wakwa, mwĩĩtu: na amwĩta syĩtwa yake Isakali. 19Na Lea aya ĩvu ĩngĩ, na amũsyaĩa Yakovo mwana wa thanthatũ. 20Na Lea asya, Ngai nĩwanenga mũthĩnzĩo mũseo; yu mũemewa akekalaa nakwa, nũndũ nĩnĩmũsyaĩe ana thanthatũ: na amwĩta syĩtwa yake Nzevuluni. 21Na ĩtina asyaa mwĩĩtu, na amwĩta syĩtwa yake Ndina. 22Na Ngai amũlilikana Lakeli, na Ngai amwĩthukĩĩsya, na amũnenga kũsyaa. #Mwa 8.1; 29.31. 23Nake aya ĩvu, na asyaa mwana: na asya, Ngai nũmbetee nthoni syakwa: #Isa 4.1; Lk 1.25. 24na amwĩta syĩtwa yake Yosevu, akyasya, Yeova nambongele mwana ũngĩ. #Mwa 35.17.
Yakovo na Lavani makĩw’ana ũndũnĩ wa indo
25Na kweethĩwa, Lakeli asyaa Yosevu, Yakovo amwĩa Lavani, Eka nĩthĩ, nĩ kana nĩende vandũ vakwa mwene, na nthĩ yakwa. 26Nenga aka makwa na syana syakwa ila nakũthũkũmĩe, noindeka nĩthi: nũndũ nĩwĩsĩ ũthũkũmi wakwa ũla nakũthũkũmie. #Mwa 29.20,30. 27Na Lavani amwĩa, Ethĩwa ĩndĩ nĩnonete ũseo methonĩ maku, ĩkala: nũndũ nĩnamanyie kana Yeova nũngathimĩte kwondũ waku. #Mwa 39.3,5. 28Na asya, Weta ĩtuvi yaku, nakwa nĩngumya. #Mwa 29.15. 29Nake amwĩa, Nĩwĩsĩ ũndũ nakũthũkũmie, na ũndũ indo syaku syekalile nĩ nasyo. #Mwa 31.6,38–40. 30Nũndũ mbee wa ndanoka waĩ na nini, nasyo syongeleka syeethĩwa nyingĩ; na Yeova nũkũathimĩte o kũla naendie nyie: na yu ĩndĩ ngamombanĩsya ĩndĩĩ asu ma nyũmba yakwa mwene nao? 31Nake akũlya, Ngũnenge kyaũ? Na Yakovo asũngĩa, Ndũkanenge kĩndũ: ethĩwa ũkambĩka ũndũ ũũ, ngaĩthya ndĩthya yaku ya mbũi na malondu. 32Ũmũnthĩ ngavĩtĩla ndĩthyanĩ yaku yonthe, ngyumya vo kĩla ĩmwe yĩ kĩtathe na yĩ maa, na kĩla yĩmwe yiũ malondunĩ, na ila syĩ maa na ila syĩ kĩtathe mbũinĩ: nĩsyo ikeethĩwa ĩtuvi yakwa. #Mwa 31.8. 33O ta ũu ũlũngalu wakwa ũkangũsĩĩa ĩtina, yĩla wĩũka kwondũ wa ĩtuvi yakwa yĩla yĩ mbee waku: kĩla ĩmwe ĩte kĩtathe kana maa mbũinĩ, kana yĩte yiũ malondunĩ, ĩkyoneka kwakwa, ĩsu ĩkatalwa nĩyoyiwe. 34Na Lavani asũngĩa, Sisya, nenda kwĩthĩwe o ta ndeto yaku. 35Na mũthenya ũsu aumya nthenge ila syaĩ matw’ana na maa, na mbũi nga syonthe ila syaĩ kĩtathe na maa, o kĩla ĩmwe yaĩ na weũ, o na maiũ onthe malondunĩ, ainengane mokonĩ ma ana make: 36nake ataanĩsya na Yakovo mũendo wa matukũ atatũ: na Yakovo aĩthya ndĩthya sya mbũi na malondu sya Lavani ila syatialile.
37Na Yakovo oosa ndata sya mĩtĩ ya mĩlivina mĩũ, na ya mĩlosi na ya mĩalamoni; na aisyũlya nzoa nzaũ, na atuma weũ ũla waĩ ndatanĩ woneka. 38Na aia ndata ila wasyũlĩtye tũmĩtalũnĩ mĩvalatĩnĩ kwelekela ndĩthya sya mbũi na malondu, vala ndĩthya syokaa kũnyw’a; na syaya mavu yĩla syookaa kũnyw’a. #Kuma 2.16. 39Na i ndĩthya syaya mavu syĩ o mbee wa ila ndata, na i ndĩthya syasyaa tũtena twĩ matw’ana, na kĩtathe, na maa. 40Na Yakovo avathan’ya tũtena twa malondu, na ekalya mothyũ ma ndĩthya melekele ila syaĩ matw’ana na ila nziũ syonthe sya ndĩthya ya Lavani: nake avathan’ya maĩthya make mwene, o na ndaavulan’ya na ndĩthya ya Lavani. 41Na kweethĩwa, ila sya ndĩthya ila syaĩ na vinya mbee syaya mavu, Yakovo aia ila ndata mbee wa metho ma ndĩthya tũmĩtalũnĩ, nĩ kana iye mavu syĩ katĩ wa ila ndata; 42ĩndĩ yĩla ĩĩthya yĩtaĩ na vinya, ndaayiĩa: na ĩndĩ ila itaĩ na vinya syeethĩwa sya Yakovo. 43Na mũndũ ũsu ongeleka mũno, na aĩ na ndĩthya nene sya mbũi na malondu, na athũkũmi eĩtu na aũme, na ngamĩle na mang’oi. #Mwa 24.35; 26.13,14.
Currently Selected:
MWAMBĨLĨLYO 30: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
