MWAMBĨLĨLYO 42
42
Ana‐a‐ĩthe ma Yosevu mayũka kũthooa lĩu Misili
1Na Yakovo oona kana kwĩ lĩu wa mbaa ngetha Misili, na Yakovo amea ana make, Nũndũ wa kĩ mũũsian’ya? #Meko 7.12. 2Na amea, Sisya, nĩnĩw’ĩte kana kwĩ lĩu wa mbaa ngetha Misili: theeai kw’o, mũkatũthooee kuma kũu; nĩ kana twĩkale thayũ, tũtikakw’e. #Mwa 43.8; Sav 33.18,19. 3Na ana‐a‐ĩthe ĩkũmi ma Yosevu matheea mathooe lĩu Mĩsili. 4Ĩndĩ Mbenyamini, mwana‐a‐ĩthe wa Yosevu, Yakovo ndaamũtũmanĩsya vamwe na ana‐a‐ĩthe; nũndũ aisye, Ndakese ũkwatwa nĩ ũndũ ũthũku. #Mwa 35.18; 42.38. 5Na ana ma Isilaeli mooka kũthooa vamwe na ala mookie: nũndũ yũa yaĩ nthĩ ya Kanaani. 6Na Yosevu aĩ ngavana ĩũlũ wa nthĩ; nĩwe ũla wathooesye andũ onthe ma nthĩ. Na ana‐a‐ĩthe ma Yosevu mooka, na mamwĩkunamĩsya mothyũ moo melekele nthĩ. #Mwa 37.7,9; 41.41. 7Na Yosevu oona ana‐a‐ĩthe, na amamanya, ĩndĩ eeyĩkalya ta mũeni kwoo, na aneena nao na vinya; na amakũlya, Mwauma va? Na masũngĩa, Twauma nthĩ ya Kanaani nĩ kana tũthooe lĩu. 8Na Yosevu amanya ana‐a‐ĩthe, ĩndĩ mo maiaamũmanya. 9Na Yosevu alilikana ndoto ila waotie ũndũ woo, na amea, Mwĩ athiani inyw’ĩ; nĩmwooka kũsisya ũthei wa nthĩ. #Mwa 37.5,9. 10Nao masũngĩa, Aiee, mwĩaĩi wakwa, ĩndĩ ithyĩ athũkũmi maku twoka kũthooa lĩu. 11Ithyonthe twĩ ana ma mũndũ ũmwe; ithyĩ twĩ andũ ma w’o, athũkũmi maku ti athianĩ. 12Na amea, Aiee, ĩndĩ nĩmwooka kũsisya ũthei wa nthĩ. 13Nao masya, Ithyĩ athũkũmi maku twĩ ana‐a‐asa ĩkũmi na elĩ, ana ma mũndũ ũmwe nthĩ ya Kanaani; na, sisya, mũnthĩ ũũ ĩlumaita yĩ vamwe na asa waitũ, na ũmwe ti vo ũĩ. #Mwa 37.30. 14Na Yosevu amea, Ũu nĩw’o naneena nenyu, ngĩmwĩa, Mwĩ athiani: 15nĩmũũtatwa na ũndũ ũũ: kwa thayũ wa Valao inyw’ĩ mũikauma kũũ, ate o ĩlumaita yenyu yooka kũũ. 16Tũmai ũmwe wenyu, na alatye mwana‐a‐ĩthe wenyu, nenyu mũkoovwa, nĩ kana ndeto syenyu itatwe, ethĩwa w’o nĩ vo ũĩ kwenyu: kana ethĩwa tĩ w’o, kwa thayũ wa Valao nĩw’o mwĩthĩwa athiani. 17Na amekĩa onthe vamwe ũsũvĩonĩ matukũ atatũ.
18Na mũthenya wa katatũ Yosevu amea, Ĩkai ũũ, na mũkĩkala thayũ; nĩkwĩthĩwa nyie nĩngũkĩa Ngai: #Ali 25.43; Nee 5.15. 19ethĩwa mwĩ andũ ma w’o, ũmwe wa ana‐a‐ĩthe menyu nĩovwe nyũmbanĩ yenyu vala mwovewe: ĩndĩ endaĩ, mũkue lĩu kwondũ wa yũa ya nyũmba syenyu: 20na mũindetee ĩlumaita yenyu; na ĩndĩ ndeto syenyu ikamanyĩka kana nĩ sya w’o, nenyu mũikakw’a. Nao meeka ũu. 21Na maneenan’ya ene kwa ene, Nĩ w’o twĩ avitan’ya ũndũ wa mwana‐a‐asa waitũ, nĩkwĩthĩwa nĩtwoonie thĩna wa ngoo yake, yĩla watwĩsũvie, o na tũtyaaĩthukĩĩsya; kwondũ wa ũu thĩna ũũ nĩwatũkwata. #Mwa 37.23–28; Yovu 36.8,9. 22Na Leuveni amasũngĩa, akyasya, Ndyaaneena nenyu, ngĩmwĩa, Mũikamwĩke mwana naĩ: o na mũtyaaĩthukĩĩsya? Na ĩngĩ, kwondũ wa ũu, sisya, nthakame yake nĩnĩkũandũwa. #Mwa 9.5; 37.21,22; 2 Mav 24.22; Sav 9.12; Lk 11.50,51. 23Na maiaamanya kana Yosevu nĩwamew’a; nũndũ mũalyũli aĩ katĩ woo. 24Na eethyũũa auma vala maĩ, na aĩa; na amasyokea, na aneena nao, na oosa Simeoni amumya katĩ woo, na amwova mene. 25Na ĩndĩ Yosevu eeaa mĩio yoo yusũwe lĩu, na kĩla mũndũ natũngĩwe mbesa syake ĩkunianĩ yake, na kũnengwa kya ũya kya nzĩanĩ: na nĩw’o meekiwe. #Alo 12.17,20.
Ana‐a‐ĩthe ma Yosevu makĩsyoka Kanaani
26Na maĩkya mang’oi moo mĩio yoo ya lĩu, na mauma kũu. 27Na ũmwe woo akĩthasya ĩkunia yake anenge ĩng’oi yake lĩu vandũ vala maee, asyona mbesa syake; na, sisya, syaĩ kanyw’anĩ wa ĩkunia yake. 28Na amea ana‐a‐ĩthe, Mbesa syakwa nĩnatũngĩwa; na, sisya, syĩ vo o ĩkunianĩ yakwa: na ngoo syoo syakw’a, na masian’ya na kũtetema, makyasya, Ũndũ ũũ nĩ ata Ngai ũtwĩkie? 29Na mooka kwa Yakovo ĩthe woo nthĩ ya Kanaani, na mamũtavya ũvoo w’onthe ũla wamakĩtĩkĩe, makĩmwĩa, 30Mũndũ ũsu, mwĩaĩi wa nthĩ ĩsu, aneenie naitũ na vinya, atwona twĩ athiani ma ĩ nthĩ. #Mwa 42.7,9. 31Naitũ twamwĩa, Twĩ andũ ma w’o; tũi athiani: 32twĩ ana‐a‐asa ĩkũmi na elĩ, ana ma asa waitũ; ũmwe ti vo ũĩ, na mũnthĩ ũũ ĩlumaita yĩ vamwe na asa waitũ nthĩ ya Kanaani. 33Na ũla mũndũ, mwĩaĩi wa nthĩ ĩsu, atwĩa, Ngamanya kana mwĩ andũ ma w’o na nzĩa ĩno: tiai ũmwe wa ana‐a‐ĩthe menyu nakwa, na kuai lĩu kwondũ wa yũa ya nyũmba syenyu, na mũithi; #Mwa 42.15,19,20. 34na mwĩndetee ĩlumaita yenyu: nĩvo nĩmanya kana mũi athiani, ĩndĩ mwĩ andũ ma w’o: na ĩndĩ ngamũnenga mwana‐a‐ĩthe wenyu, nenyu mũkatandĩthĩsya ĩ nthĩ. #Mwa 34.10.
35Na kweethĩwa makĩtulũla makunia moo, sisya, kyove kya mbesa kya kĩla mũndũ kyaĩ nthĩnĩ wa ĩkunia yake: nao na ĩthe woo, yĩla moonie syove syoo sya mbesa, makĩa. #Mwa 42.27. 36Na Yakovo ĩthe woo amea, Nĩnakw’ĩĩwe nĩ syana syakwa nũndũ wenyu: Yosevu nde vo, o na Simeoni nde vo, na Mbenyamini mũkamũtwaa: maũndũ aa onthe nĩmeũmbũkĩa. 37Na Leuveni aneena na ĩthe, akĩmwĩa, Ũaa ana makwa elĩ ethĩwa ndimũete kwaku: nenga we kw’okonĩ kwakwa, nakwa ngamũete kwaku ĩngĩ. #Mwa 46.9. 38Nake amea, Mwana wakwa ndakatheea nenyu; nũndũ mwana‐a‐inyia nĩ mũkw’ũ, nake atiele e weka: ethĩwa we akakwatwa nĩ ũndũ ũthũku nzĩanĩ ĩla mwĩendela, nĩvo mwĩtheesya mbũĩ syakwa na woo Seoli. #Mwa 37.33,35; 42.4.
Currently Selected:
MWAMBĨLĨLYO 42: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
