Luka 8
8
Aka ala mamũtethasya Yesũ
1 #
Lk 4.43. Na kweethĩwa ĩvinda ĩnini yathela, athi angangĩla ndũanĩ na mĩsyĩ, akĩtavan’ya na kũnyaĩĩkya ũvoo mũseo wa ũsumbĩ wa Ngai, na ala ĩkũmi na elĩ maĩ vamwe nake, 2#Mko 15.40,41; 16.9.na aka amwe ala mavoiw’e maveva mathũkũ na mowau: ũmwe nĩ Meli ũla wetwa Makatalene, ũla waumiw’e ndaimoni mũonza, 3na Yoena, mũka wa Kusi, mũsyaĩĩsya wa syĩndũ sya Elote, na Susana, na angĩ aingĩ ala mamũtetheasya na isamũ syoo.
Ngelekan’yo ya mũvuĩi
(MATHAYO 13.1–9; MALIKO 4.1–9)
4Na yĩla ĩkomano ĩnene yoombanie, na andũ ma kĩla ndũa mooka vala ũĩ, aneena na ngelekan’yo: 5Mũvuĩi nĩwaendie kũvuĩa mbeũ syake: na akĩvuĩa, imwe syavalũka ũtee wa nzĩa; na syakinyangwa, ikĩĩwa nĩ nyũnyi sya yayaya. 6Ingĩ syavalũka ĩvianĩ; na syamea na syooma, nũndũ vatyaĩ kĩmeu. 7Na ingĩ syavalũka mĩw’anĩ; na mĩw’a yameanĩsya vamwe nasyo, na yainyita. 8Na ingĩ syavalũka mũthanganĩ mũseo, na syamea, na syasyaa imwe ĩana. Amina kũneena ũu, aneena na wasya mũnene, Ũla wĩ matũ ma kwĩw’a, nĩew’e.
Ũelesyo wa ngelekan’yo ya mũvuĩi
(MATHAYO 13.10–23; MALIKO 4.10–20)
9Na amanyĩw’a make mamũkũlya, Ngelekan’yo ĩno nĩ myaũ? 10#Isa 6.9,10.Nake asya, Inyw’ĩ mũnengetwe kũmanya nzama sya ũsumbĩ wa Ngai: ĩndĩ ala angĩ mamanyĩaw’a na ngelekan’yo; nĩ kana makyona matikone, na makĩw’a maikamanye. 11#1 Vet 1.23.Na ngelekan’yo nĩyo ĩno: Mbeũ nĩ ndeto ya Ngai. 12#Ako 1.21.Ala me ũtee wa nzĩa nĩmo ala mew’aa; na ĩndĩ ndevili akyũka, akyumya ndeto ngoonĩ syoo, maikese kwĩtĩkĩla matangĩĩwe. 13Ala me ĩvianĩ nĩmo ala mew’aa, makĩkwata ndeto na ũtanu; ĩndĩ mati na mĩi, na nĩmo mekwĩtĩkĩla kavinda kanini, ĩndĩ ĩvinda ya kũtatwa nĩmeũtia. 14Na ila syavalũkile mĩw’anĩ, nĩmo ala mew’aa, na maithi mainyitwa nĩ mawĩmakĩo na ũthwii na motanu ma thayũ ũũ, nao matisyaa ũsyao ũkavika. 15#Meko 16.14; Aevl 10.36; Ũvu 3.10.Ĩndĩ ila syĩ mũthanganĩ mũseo, nĩ ala mew’aa ndeto na ngoo nzeo na ya w’o, mailũmya, na maisyaa ũsyao, me na wũmĩĩsyo.
Ũmanyĩsyo kuma taanĩ
(MALIKO 4.21–25)
16 #
Mt 5.15. Vai mũndũ ũkwatasya taa na akokunĩkĩlya kĩndũ, kana kwia ungu wa ũkomo; ĩndĩ nũnũkwia vala vatũlu, nĩ kana ala meũvota mone kyeni. 17#Mt 10.26.Nũndũ vai ũndũ ũvithe, ũla ũtakavuanw’a, kana kĩmbithĩ, kĩtakamanyĩka na kumbũka ũtheinĩ. 18#Lk 19.26.Ĩsũvĩei ĩndĩ ũndũ mũkwĩw’a; nũndũ ũla wĩ na kĩndũ, ũsu akanengwa; na ũla ũtaĩ, akavenwa kĩla ũkwasya e nakyo.
Wana‐a‐ia wa w’o
(MATHAYO 12.46–50; MALIKO 3.31–35)
19Na ĩndĩ inyia na ana‐a‐inyia make mooka vala ũĩ, na maaĩwa nĩ mwanya ũmũthengeea ũndũ wa ĩkomano. 20Nake atavw’a, Mwenyu na ana‐a‐mwenyu maũngeme nza, nao nĩmekwenda ũkwona. 21Ĩndĩ asũngĩa na amea, Mwaitũ na ana‐a‐ia makwa nĩ ala mew’aa na kwĩkaa ndeto ya Ngai.
Yesũ aiuĩthya kĩseve kĩnene
(MATHAYO 8.23–27; MALIKO 4.35–41)
22Na kweethĩwa mũthenya ũmwe wa matukũ asu, alika ngalawanĩ, we na amanyĩw’a make; na amea, Tũingei mũingo ũya wa ĩia; na makũsya. 23Na makĩthi na ngalawa akoma: na kĩuutani kĩnene kyatheea ĩianĩ; na manzĩ mavota ngalawanĩ, nao meethĩwa na mũisyo. 24Na mathi vala ũĩ, mamũamũkya, maimwĩa, Mwĩaĩi, Mwĩaĩi, nĩtũũkw’a. Nake aamũka, na akan’ya kĩseve na itulumo; nasyo syausya, na kwaya ũuu. 25Nake amakũlya, Mũĩkĩĩo wenyu ũĩva? Nao makĩa na maseng’a, makĩneenan’ya, Ũũ nũũ ĩndĩ, nũndũ nũnũkwĩaĩa o na iseve na manzĩ, na ikamwĩw’a?
Kũvow’a kwa mũndũ Mũkelasene
(MATHAYO 8.28–34; MALIKO 5.1–20)
26Na mavika nthĩ ya Akelasene, ĩla yelekanĩle na Kalilii. 27Na yĩla waumie akinya nthĩ, akomana na mũndũ ũmwe aumĩte ndũanĩ ĩsu, ũla waĩ na ndaimoni; na ĩvinda ĩasa ndeevw’ĩkaa ngũa, kana kwĩkalaa nyũmbanĩ, ĩndĩ ekalaa mbũanĩ. 28Nake amwona Yesũ, akaya, na avalũka nthĩ mbee wake, na aneena na wasya mũnene, akyasya, Nĩ ũndũ naku wa kĩ we, Yesũ, Mwana wa Ngai Ũla Wĩ Ĩũlũ wa Onthe? Nĩngũkwĩsũva ndũkanyamasye. 29Nũndũ nĩwawĩaĩe veva mũvuku wume mũndũnĩ ũsu. Nĩkwĩthĩwa mavinda maingĩ nĩwakwatawa nĩw’o: nake avingĩawa, na kwovwa na mĩnyololo na mbĩngũ; na aitusanga syonthe, alũngĩlĩlaw’a weũnĩ nĩ ndaimoni. 30Na Yesũ amũkũlya, Syĩtwa yaku nue ata? Nake amũsũngĩa, Ninyie Nguthu, nĩkwĩthĩwa nĩwalikĩtwe nĩ ndaimoni nyingĩ. 31Na ila ndaimoni syamwĩsũva mũno ndakasyĩe ithi ĩimanĩ yĩte kĩtulu. 32Na vo vaĩ ĩĩthya ya ngũlũe nyingĩ ikĩya kĩĩmanĩ: na ndaimoni syamwĩsũva inengwe ũthei wa kwilika syo. Nake ainenga ũthei. 33Na ndaimoni syauma mũndũnĩ, na syavota ngũlũenĩ: na ĩĩthya yatheea kĩvaũũkonĩ yĩsembete, yalika ĩianĩ, na yakw’ĩa vo. 34Na ala maĩthasya ngũlũe moona ũndũ ũsu ũla weekĩka, makĩa, na matavan’ya ndũanĩ o na ndee. 35Na andũ maumaala mathi ũsisya ũndũ ũla wĩkĩkie; na mathi vala ve Yesũ, na mamwona mũndũ ũla ũnaumiw’e ndaimoni, ailyĩ nthĩ maũũnĩ ma Yesũ, evw’ĩkĩte ngũa, e na kĩlĩko: na meew’a w’ĩa mũno. 36Na ala moonie ũndũ ũsu mamatavya ũndũ ũnavoiw’e ũla waĩ na ndaimoni. 37Na andũ onthe ma nthĩ ya Akelasene ngalĩ syonthe mamwĩsũva aume kwoo; nũndũ makwatiwe nĩ w’ĩa mwingĩ; nake alika ngalawanĩ, na asyoka. 38Ĩndĩ ũla mũndũ ũnaumiw’e ndaimoni amwĩsũva ekalan’ye nake: ĩndĩ amũeka athi, aimwĩa, 39Syoka nyũmba kwaku, ũkatavan’ye maũndũ ũndũ manenevete ala Ngai ũkwĩkie. Na athi, atavan’ya ndũanĩ yonthe maũndũ ũndũ manenevete ala Yesũ ũnamwĩkie.
Mwĩĩtu wa Yailu, na mũndũ mũka waumawa nĩ nthakame
(MATHAYO 9.18–26; MALIKO 5.21–43)
40Na Yesũ asyoka, ĩkomano yamũthaũa na ũtanu; nũndũ onthe nĩmamweteele. 41Na sisya, kwooka mũndũ wetawa Yailu, ũla waĩ mũnene wa ĩsinakoke: nake avalũka maũũnĩ ma Yesũ, na amwĩsũva athi kwake; 42#Lk 7.12.nũndũ aĩ na mwĩĩtu wake o ũmwe, wa myaka ĩkũmi na ĩlĩ, nake aĩ vakuvĩ na kũkw’a. Na aendete avivinyw’a nĩ ĩkomano ya andũ.
43Na mũndũ mũka ũla waumawa nĩ nthakame myaka ĩkũmi na ĩlĩ, na nĩwanangĩe ũthwii wake w’onthe kwa aiiti, na ndaaona ũmwe wa ũmũvosya, 44athi ĩtina wake, akiita ũtiivo wa ngũa yake; na o ĩmwe nthakame yatuma. 45Na Yesũ akũlya, Nũũ ũla wangiita? Na onthe makaĩa, na Vetelo na ala maĩ nake mamwĩa, Mwĩaĩi, andũ nĩmeũkũtindĩka na kũkũvivinya. 46Ĩndĩ Yesũ asya, No nakiitwa; nũndũ nĩngwĩw’a vinya wauma kwakwa. 47Na mũndũ mũka oona kana ndevithĩte, ooka aitetema, na avalũka mbee wake, na atavan’ya onthe makĩw’a ũndũ ũla ũtumie amũkiita, na ũndũ wavoa kavinda kau. 48#Lk 7.50.Nake amwĩa, Mwĩĩtu, mũĩkĩĩo waku nĩwakũvosya; enda na mũuo.
49Atanamba ũmina ũneena, mũndũ ooka auma nyũmba ya mũnene wa ĩsinakoke, akyasya, Mwĩĩtu waku nĩwakw’a; manya kũnyamasya Mũmanyĩsya. 50Ĩndĩ Yesũ eew’a ũu, amũsũngĩa, Ndũkakĩe: ĩkĩĩa, tũ, nake nũnũũvow’a. 51Avika nyũmba, ndaaĩtĩkĩla mũndũ alike nake, ate o Vetelo, na Yoana, na Yakovo, na ĩthe na inyia wa kelĩtu. 52#Lk 7.13.Na onthe meethĩwa makĩĩa na kũkũnanga ithũi: ĩndĩ nake amea, Ekai kũĩa; nũndũ ti kakw’ũ, ĩndĩ nĩkakomete. 53Nao mamũthekeea mũno, nũndũ nĩmeesĩ nĩ kakw’ũ. 54Nake, akwata kw’oko kwako, aketa, akyasya, Kelĩtu, ũkila. 55Na veva wako wasyoka, na kookĩla oyu: na eeaa kanengwe kya ũya. 56#Mko 7.36; Lk 5.14.Na asyai mako maseng’a mũno: ĩndĩ amea matikatavye mũndũ ũla weekĩka.
Currently Selected:
Luka 8: Mbivlia
Highlight
Share
Copy
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
