MATHAYO 14
14
Kĩkw’ũ kya Yoana Mũvatisi
(MALIKO 6.14–29; Luka 9.7–9)
1 #
Lk 3.19,20. Ĩvĩnda yĩu mũsumbĩ Elote eew’a ũvoo wa Yesũ, 2na amea athũkũmi make, Ũsu nĩwe Yoana ũla Mũvatisi; nũthayũũkĩte kuma akw’ũnĩ; na kwondũ wa ũu mavinya aa metethya wĩa nthĩnĩ wake. 3#Mt 11.2.Nũndũ Elote aĩ anamũkwata Yoana, akamwova, na akamwĩkĩa kolokolonĩ kwondũ wa Elotia, mũka wa Vilivu mwana‐a‐inyia. 4#Ali 18.16; 20.21.Nĩkwĩthĩwa Yoana amũtavisye, Kũtyosana na mĩao we kwĩthĩwa nake. 5#Mt 21.26.Na akyenda kũmũaa, akĩa nguthu ya andũ, nũndũ mamwonaa e mwathani 6Ĩndĩ yĩla mũthenya wa kũsyawa kwa Elote wavikie, mwĩĩtu wa Elotia asũngĩa katĩ woo, na amwendeesya Elote. 7Na ĩndĩ amwatha na wĩvĩto kũmũnenga kĩla wĩmwĩtya o na kĩva. 8Nake, asilw’a nĩ nyinyia, asya, Nenga mũtwe wa Mũvatisi Yoana vaa ĩsaaninĩ. 9#Mt 17.12.Na ũla mũsumbĩ eew’a woo; ĩndĩ kwondũ wa mawĩvĩto make, na kwondũ wa ala mailyĩ lĩunĩ vamwe nake, eeaa anengwe; 10na atũma mũndũ amũtila Yoana mũtwe e kolokolonĩ. 11Na mũtwe wake waetwe wĩ ĩsaaninĩ, wanengwa ũla mwĩĩtu: nake amũtwaĩa nyinyia. 12Na amanyĩw’a make mooka, moosa kimba, makĩthika; na mathi mamũtavya Yesũ.
Kũvũnĩthw’a kwa andũ ngili itano
(MALIKO 6.30–44; Luka 9.10–17; YOANA 6.1–13)
13Na Yesũ eew’a ũvoo ũsu, auma vau na ngalawa, athi e weka vandũ vate andũ: na makomano meew’a, mamũatĩĩa na nyaĩĩ kuma ndũanĩ syoo. 14#Mt 9.36.Na aumĩla, na oona ĩkomano ĩnene ya andũ, na amew’ĩa tei, na avosya awau moo. 15Na kwavika wĩoo, amanyĩw’a mathi vala ũĩ, makyasya, Vaa tũĩ nĩ weũnĩ, na ĩngĩ o na yu ĩvinda nĩ ĩthelu; ĩmbũũkya, makomano mathi mĩsyĩ, makethooee lĩu. 16Ĩndĩ Yesũ amea, Mati na vata wa kuma kũũ mathi; manengei lĩu e inyw’ĩ. 17Nao mamwĩa, Vaa tũi na kĩndũ ate o imũtũ itano na makũyũ elĩ. 18Na amea, Ndeteei isu vaa. 19Na ameaĩa makomano mekale nthĩ nyekinĩ; na oosa ila imũtũ itano na ala makũyũ elĩ, na ang’elela ĩtunĩ, aiathima, na aĩtilanga, na anenga amanyĩw’a make ila imũtũ, na amanyĩw’a manenga makomano. 20#2 Asu 4.44.Na onthe maya, mavũna: na moosa ũtialo wa ilungu isu ndile, ikavũ ĩkũmi na ilĩ syausũa. 21Na ala maĩe maĩ andũ ta ngili itano, eka aka na syana.
Yesũ akinyĩle ũkanganĩ ĩũlũ
(MALIKO 6.45–52; YOANA 6.16–21)
22Na oyu amathing’ĩĩsya amanyĩw’a make malike ngalawanĩ, mathi mbee wake kũvika mũingo ũngĩ, mũvaka we amombũũkya makomano. 23#Lk 6.12; 9.18.Na amombũũkya makomano, ambata kĩĩmanĩ e weka kũvoya: na kwavika wĩoo, e o vo e weka. 24Ĩvĩnda yĩu ĩla ngalawa yaĩ ũkanganĩ katĩ, ĩkyũkĩlangw’a nĩ itulumo; nũndũ kĩseve nĩkyamathaũĩtye. 25Na ũsyaĩĩsyo wa kana wa ũtukũ athi vala maĩ akinyĩle ũkanganĩ ĩũlũ. 26#Lk 24.37.Na amanyĩw’a mamwona akinyĩle ũkanganĩ ĩũlũ, maũũya, makyasya, Nĩ ĩimũ; na makaya nĩ w’ĩa. 27Ĩndĩ oyu Yesũ aneena nao, akyasya, Ĩthĩwai na ũnyiau; ninyie; mũikakĩe. 28Na Vetelo amũsũngĩa, asya, Mwĩaĩi, ethĩwa nue, mbĩa nũke vala ũĩ, nginyĩle manzĩnĩ ĩũlũ. 29Na amwĩa, Ũka. Na Vetelo auma ngalawanĩ, na akinyĩla manzĩnĩ ĩũlũ, nĩ kana aende vala ve Yesũ. 30Ĩndĩ oona kĩseve kingĩ, aya w’ĩa; na akyambĩlĩlya ũlika manzĩnĩ, akaya, akyasya, Mwĩaĩi, ndangĩĩa. 31#Mt 8.26.Na kavinda kau Yesũ atambũũkya kw’oko kwake, amũkwata, na amwĩa, We wa mũĩkĩĩo mũnini, nũndũ wa kĩ waya nzika? 32Na mambata ngalawanĩ, kĩseve kyakilya. 33Na ala maĩ ngalawanĩ mamũthaitha, makyasya, Nĩ w’o, we wĩ Mwana wa Ngai.
Awau maivow’a Kenesaleti
(MALIKO 6.53–56)
34Na mainga, mavika nthĩ ya Kenesaleti. 35Na aũme ma vandũ vau mamũmanya, matũma andũ nthĩ ĩsu yonthe, mamũetee onthe ala maĩ awau; 36#Mt 9.21; Lk 6.19.mamwĩsũva makiite o na ethĩwa no ũtiivo wa ngũa yake: na onthe ala makiitie mavow’a vyũ.
Currently Selected:
MATHAYO 14: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956