MALIKO 1
1
Yoana Mũvatisi na ũtũmane wake
(MATHAYO 3.1–12; Luka 3.1–17; YOANA 1.19–28)
1Wambĩlĩlyo wa ũvoo mũseo wa Yesũ Klĩsto, Mwana wa Ngaĩ.
2 #
Mal 3.1; Mt 11.10; Yoa 3.28. O tondũ kũandĩkĩte ĩvukunĩ ya mwathani Isaia,
Sisya, nyie nĩngũtũma mũtũmwa wakwa mbee wa ũthyũ waku,
Ũla ũkaseũvya nzĩa yaku;
3 #
Isa 40.3. Wasya wa mũndũ akĩneena mũno weũnĩ,
Seũvyai nzĩa ya Mwĩaĩi,
Lũngalyai moendelo make;
4Yoana nĩwokie, akĩvatisa weũnĩ na akĩtavan’ya ũvatiso wa ũalyũlo wa ngoo ũetae ũekeo wa naĩ. 5Na nthĩ yonthe ya Yutia, na onthe ma Yelusaleme, mooka vala ũĩ; na mavatisĩwa nĩwe ũsĩnĩ wa Yolotanĩ, makyumbũla nai syoo. 6#2 Asu 1.8; Nzek 13.4.Na Yoana eekĩĩte ngũa ya w’ĩa wa ngamĩle, na aĩ na mũkwa kĩnyunyunĩ kyake, na aĩsaa ngie na ũkĩ wa nzũkĩ wa kĩthekanĩ. 7#Meko 13.25.Na atavan’ya, akyasya, Ĩtina wakwa kũkĩte ũla wĩ vinya kwĩ nyie, o na ndyĩanĩwe nĩ ũkunama nĩthasye tũmĩkwa twa iatũ syake. 8Nyie nĩnĩnamũvatĩsaa na manzĩ; ĩndĩ ũsu akamũvatisaa na Veva Mũtheu.
Ũvatiso wa Yesũ
(MATHAYO 3.13–17; Luka 3.21–22)
9 #
Lk 2.51. Na kweethĩwa matukũ asu, Yesũ ooka kuma Nasaleti ya Kalilii, na avatisĩwa nĩ Yoana ũsĩnĩ wa Yolotani. 10Na oyu akyuma manzĩnĩ, oona matu mavingũka, na Veva ailyĩ ta ĩvũĩ aimũtheeea: 11#Mko 9.7; Sav 2.7; Isa 42.1.na wasya wauma ĩtunĩ, We nue Mwana wakwa mwendwa, nendeew’e nue.
Kũtatwa kwa Yesũ weũnĩ
(MATHAYO 4.1–11; Luka 4.1–13)
12Na oyu Veva amũtwaa na vinya weũnĩ. 13#Sav 91.13; Yoa 1.51.Na aĩ ku weũnĩ matukũ mĩongo ĩna akĩtatwa nĩ Satani; na aĩ vamwe na nyamũ sya kĩthekanĩ; na alaĩka nĩmamũthũkũmaa.
Yesũ akyambĩlĩlya kũtavan’ya
(MATHAYO 4.17; Luka 4.14–15)
14Na ĩtina wa Yoana kwĩkĩwa kolokolonĩ, Yesũ aenda Kalilii akĩtavan’ya ũvoo mũseo wa Ngai, 15#Aka 4.4.akyasya, Ĩvinda nĩ ĩviku, na ũsumbĩ wa Ngai nũthengeee: alyũlai ngoo na mũkĩtĩkĩla ũvoo mũseo.
Yesũ aimeta amanyĩw’a Make ma mbee
(MATHAYO 4.18–22; Luka 5.1–11)
16Na akĩvĩtĩla ũtee wa ũkanga wa Kalilii, oona Simoni na Andalea mwana‐a‐inyia makĩkya kĩtei ũkanganĩ; nũndũ maĩ atei ma makũyũ. 17#Mt 13.47.Na Yesũ amea, Ngatĩĩai, nakwa ngamũtw’a atei ma andũ. 18Na oyu matia itei, na mamũatĩĩa. 19Na aendanga mbee vanini na oona Yakovo mwana wa Sevetii, na Yoana mwana‐a‐inyia, nao maĩ ngalawanĩ makĩseũvya itei syoo. 20Na oyu ameta: na matia ĩthe woo Sevetii ngalawanĩ vamwe na athũkũmi, na mamũatĩĩa.
Yesũ aivosya mũndũ waĩ na ndaimoni Kavelinaumi
(Luka 4.31–37)
21 #
Mt 4.13. Na mathi Kavelinaumi; na oyu mũthenya wa savato avota ĩsinakokenĩ na amanyĩsya. 22#Mt 7.28,29.Na maseng’w’a nĩ ũmanyĩsyo wake: nĩkwĩthĩwa amamanyĩsya ta ũla wĩ na ũkũmũ, o na ti ta aandĩki. 23Na oyu ĩsinakokenĩ yoo kwaĩ mũndũ ũla wakwetwe nĩ veva mũvũku; na aneena na wasya mũnene, 24#Mko 5.7; Sav 16.10.akyasya, Twĩ ũndũ naku wa kyaũ, we Yesũ Mũnasaleti? Nĩwooka kũtwananga? Nĩngwĩsĩ we, wĩ ũla Mũtheũ wa Ngai. 25Na Yesũ ookan’ya, akyasya, Tumya kanyw’a, noimuma. 26#Mko 9.26.Na ũla veva mũvuku, ũkĩmũthingithangya na kũkaya na wasya mũnene, wamuma. 27Na onthe maseng’a, mũvaka makũlan’ya ene kwa ene, makyasya, Ũndũ ũũ nata? Ũmanyĩsyo mweũ! Nũkwĩaĩa na ũkũmũ o na maveva mavuku, na nĩmeũmwĩw’a. 28Na oyu nguma yake yanyaĩĩka nthĩ yonthe ya Kalĩlii na ndee syayo.
Yesũ aivosya inyia wa mũka wa Simoni na angĩ aingĩ
(MATHAYO 8.14–17; Luka 4.38–41)
29Na oyu, mauma ĩsinakokenĩ, mavota nyũmbanĩ ya Simoni na Andalea, vamwe na Yakovo na Yoana. 30Na ĩndĩ inyia wa mũka wa Simoni akomete awaĩte ndetema; na oyu mamũtavya ũvoo wake: 31nake ooka na amũkwata kw’oko, amũkĩlya; na ndetema yamũtia, nake amathũkũma.
32Na wĩoo, syũa yĩkĩthũa, mamũetee onthe ala maĩ awau, na ala makwetwe nĩ ndaimoni. 33Na andũ ma ndũa yonthe moombana vamwe mũomonĩ. 34#Meko 16.17,18.Na avosya aingĩ ala mawaĩte mowau ma mĩthemba mingĩ, na aumya ndaimoni nyingĩ; na ndaaĩtĩkĩla ndaimoni ineene, nĩkwĩthĩwa nĩsyamwĩsĩ.
Yesũ ayĩvatha athi kũvoya, na kuma Kavelinaumi
(Luka 4.42–44)
35Na kĩoko tene, w’oa ũtanatema, ookĩla, aumaala, na athi vandũ vate andũ, na avoyea vo. 36Na Simoni na ala maĩ nake mamũvikĩla; 37na mamwona mamwĩa, Andũ onthe nĩmeũkũmantha. 38Nake amea, Tũendei kũngĩ, kũvika tũtũla tũla twĩ mbee, nĩtavan’ye ku nakw’o; nũndũ nyie naetiwe nĩ ũu. 39Na atavan’ya masinakokenĩ moo Kalilii kw’onthe, na aumya ndaimoni.
Kũvow’a kwa mũndũ ũwaĩte mangũ
(MATHAYO 8.1–4; Luka 5.12–16)
40Na mũndũ ũwaĩte mangũ athi vala ũĩ, akĩmwĩsũva na kũmũtulĩlya ndu, na kũmwĩa, Ethĩwa nũkwenda, nũtonya kũnthesya. 41Na Yesũ ũndũ wa kũmwĩw’ia ĩnee, atambũũkya kw’oko kwake, amũkiita, na amwĩa, Nĩngwenda; ĩthĩwa mũtheu. 42Na oyu mangũ mavoa, na athea 43#Mko 3.12; 7.36.Na amwĩaĩa na vinya, na amumaalya oyu, akĩmwĩa, 44#Ali 13.49; 14.2–32.Sisya ndũkatavye mũndũ o na wĩva; ĩndĩ thi ũkeyonan’ye kwa mũthembi, nokyũmya nthembo ila Mose weaie kwondũ wa kũthew’a kwaku, syĩthĩwe ũkũsĩ kwoo. 45Ĩndĩ aumaala, na ambĩlĩya kũtavan’ya mũno na kũnyaĩĩkya ũvoo ũsu, na kwondũ wa ũu Yesũ ndaatonya ĩngĩ kũvota ndũanĩ eyonanĩtye, ĩndĩ ekala ũtee kũndũ kũte andũ: na andũ mooka vala ũĩ kuma kĩla vandũ.
Currently Selected:
MALIKO 1: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956
