MALIKO 3
3
Kũvow’a kwa mũndũ waĩ na kw’oko kwau
(MATHAYO 12.9–14; Luka 6.6–11)
1Na alika ĩngĩ ĩsinakokenĩ; na kwaĩ mũndũ vo waĩ na kw’oko kwau. 2Na mamũsyaĩĩsya, kana nũnũũmũvosya mũthenya wa savato: nĩ kana mamũvinganĩsye. 3Na amwĩa ũla mũndũ waĩ na kw’oko kwau, Ũngama katĩ. 4Na amakũlya, Nĩkwosana na ĩla mĩao kwĩka nesa mũthenya wa savato, kana kwĩka ũthũku? Kũtangĩĩa thayũ kana kũaa? Indĩ mavindya. 5#Yoa 11.33.Na amasiangya na ũthatu, akĩw’a woo nũndũ wa wũmũ wa ngoo syoo, amwĩa ũla mũndũ, Tambũũkya kw’oko kwaku. Na atambũũkya; na kw’oko kwake kwavoa kwethĩwa kũima. 6#Mt 22.16.Na Avalisi maumaala, na oyu mambĩlĩlya kũsaman’ya vamwe na ala ma Elote ũndũ matonya kũmũaa.
Avow’a angĩ
7Na Yesũ eesomola vau, we na amanyĩw’a make, athi ũkanganĩ: na ĩkomano ĩnene kuma Kalilii yamũatĩĩa: o na kuma Yutia, 8#Mt 4.25.na kuma Yelusaleme, na kuma Itumea, na mbee was Yolotani, na ngalĩ sya Tile na Sitoni, ĩkomano ĩnene, ya ala meew’a maũndũ manene ala wĩkaa, mooka vala ũĩ. 9Na atavya amanyĩw’a make kana kakalawa kekale vakuvĩ nake nũndũ wa ĩkomano, yĩikese kũmũvivinya; 10nũndũ nũvoetye aingĩ; na onthe ala maĩ na mothĩn’yo mamũvivinyanĩa nĩ kana mamũkiite. 11#Lk 4.41.Na maveva mavuku, o yĩla mamwona, mavalũka nthĩ mbee wake, na kũneena na wasya mũnene, makyasya, We nue Mwana wa Ngai. 12#Mko 1.34.Na amakindĩlĩla mũno maikamumbũle.
Yesũ akĩnyuva amanyĩw’a ĩkũmi na elĩ
(MATHAYO 10.1–4; Luka 6.12–16)
13Na ambata kĩĩmanĩ, na ameta o ala wendete we mwene moke kwake; nao mooka vala ũĩ. 14Na anyuva ĩkũmi na elĩ kana methĩwae vamwe nake, na nĩ kana amatũme kũtavan’ya, 15na kwĩthĩwa na ũkũmũ wa kũvosya mowau na kumya ndaimoni; 16#Yoa 1.42.na amũtw’ĩĩa Simoni syĩtwa yĩngĩ, Vetelo; 17#Lk 9.54.na Yakovo mwana was Sevetii, na Yoana mwana‐a‐inyia wa Yakovo; namo amatw’ĩĩa syĩtwa yĩngĩ, Voaneliki, nayo nĩ, Ana ma kĩtundumo: 18na Andalea, na Vilivu, na Valitholomayo, na Mathayo, na Thoma, na Yakovo mwana wa Aluvaio, na Thatayo na Simoni Mũkanaani, 19na Yutasi Isikalioti, ũla wamũvũnyanĩe.
Yesũ akĩsũngĩa ala maisye kana mekonĩ make e na ũtethyo wa Satani
(MATHAYO 12.22–37; Luka 11.14–23; 12.10)
Na mathi nyũmbanĩ. 20Na yĩla ĩkomano yoombana ĩngĩ, ũndũ mo mataatonya ũndũ o na kũya lĩu. 21#Yoa 7.20; 8.48,52; 10.20.Na andũ ma kwoo meew’a ũu, maumaala mamũkwate: nũndũ masya, E na ndũũka. 22Na aandĩki ala matheeie kuma Yelusaleme masya, E na Veelisevuli, na eumya ndaimoni na vinya wa mũnene wa ndaimoni. 23Na ameta moke vala ũĩ, na amatavya na ngelekan’yo, Satani atonya ata kumya Satani? 24Na ethĩwa ũsumbĩ nĩwĩvathanĩtye, ũsumbĩ ũsu ndũtonya kũũngama. 25Na ethĩwa nyũmba nĩyĩvathanĩtye, nyũmba ĩsu ndĩtonya kũũngama. 26Na ethĩwa Satanĩ nũkwĩyũkita mwene, na kwĩvathan’ya, ndakaũngama, ĩndĩ e na mũminũkĩlyo. 27Ĩndĩ vai mũndũ ũtonya kũvota nyũmbanĩ ya ũla wĩ vinya, akamũvuta mĩio yake, atambĩte kũmwova ũla wĩ vinya; na ĩndĩ aitava ila syĩ nyũmbanĩ yake. 28Nĩ w’o nĩngũmwĩa, Naĩ syonthe ĩkaekewa ana ma andũ, na moumano moo ala maumanaa namo: 29ĩndĩ o ũla wĩmũuma Veva Mũtheu nde ĩndĩ ũkaekewa, ĩndĩ e na ĩvĩtyo ya tene na tene; 30#Mko 3.22.nũndũ masya, E na veva mũvuku.
Wana‐a‐ia wa w’o
(MATHAYO 12.46–50; Luka 8.19–21)
31Na inyia wake na ana‐a‐inyia make mooka; na maũngama nza, na mamũtũmana maimwĩta. 32Na ikomano yekala nthĩ yĩmũthyũlũlũkĩte; na mamwĩa, Sisya, mwenyu na ana‐a‐mwenyu me nza na nĩmeũkũmantha. 33Na amasũngĩa, na asya, Mwaitũ na ana‐a‐ia naaũ? 34Na amasiangya ala mekalĩte nthĩ mamũthyũlũlũkite, na asya, Sisyai, mwaitũ na ana‐a‐ia! 35Nĩkwĩthĩwa o ũla wĩkaa kwenda kwa Ngai, ũsu nĩwe mwana‐a‐ia, na mwĩĩtu‐a‐ia, na mwaitũ.
Currently Selected:
MALIKO 3: Mbivlia
Highlight
Copy
Compare
Share
Want to have your highlights saved across all your devices? Sign up or sign in
https://shop.biblesociety-kenya.org/
www.biblesociety-kenya.org
God's word open for all
©Bible Society of Kenya, 1956