Kuma 4
4
Ngai Ainenga Mwose Ũtonyi wa Kwĩka Syama
1Nĩvo ĩndĩ Mwose wamũkũlilye Mwĩai Ngai atĩĩ, “Andũ ma Ĩsilaeli makalea kũndĩkĩĩa na kwĩthukĩĩsya ũndũ ngũmatavya, na maimbĩa, ‘Mwĩai Ngai ndaneekumĩlĩĩla we,’ nĩka ta?”
2Mwĩai Ngai amũkũlya, “Nĩ kyaũ kĩu ũkwete?”
Mwose amũsũngĩa, “Nĩ ndata.”
3Mwĩai Ngai amwĩa, “Kwa mĩlekye nthĩ.” Yĩla Mwose wamĩlekilye nthĩ nĩyaalyũkile yatw'ĩka nzoka, nake asemba amĩkĩa. 4Nĩvo ĩndĩ Mwĩai Ngai wamwĩie atĩĩ, “Kumana na ũimĩkwatĩla kĩsithenĩ.” Kwoou Mwose nĩwakumanie na amĩkwata, nayo yatw'ĩka ndata ĩngĩ. 5Mwĩai Ngai nĩwamwĩie, “Wĩĩka ũu kũĩkĩĩthya andũ ma mbaĩ ya Ĩsilaeli kana Mwĩai Ngai, Ngai wa aaũmae moo, Ngai wa Avalaamu, Isaka na Yakovo, nũkumĩlĩĩile.”
6Mwĩai Ngai nĩwasyokie amwĩa Mwose, “Ĩkĩa kw'oko kwaku kĩthũinĩ ngũanĩ yaku ndaasa.” Kwoou Mwose eekĩa kw'oko ngũanĩ yake na yĩla wakumisye kweethĩwa na mangũ#4.6 Mangũ: Ndeto ya Kĩevelania ĩla ĩtũmĩĩtwe vaa no ĩeleeke ta mangũ kana ũwau ũngĩ mũthũku wa kĩkonde kwĩ kweũ ta ĩa. 7Nĩwamwĩie atĩĩ, “Ĩkĩa kw'oko kĩthũinĩ ĩngĩ.” Nĩwakwĩkĩie ĩngĩ kĩthũinĩ, na yĩla wakumisye kweethĩwa kwĩ kũseo o ta mwĩĩ ũla ũngĩ wake. 8Nĩvo ĩndĩ Mwĩai Ngai waisye atĩĩ, “Maema ũkũĩkĩĩa we, kana kũĩkĩĩthw'a nĩ kyama kya mbee, makaĩkĩĩthw'a nĩ kĩu kya kelĩ. 9Ethĩwa ĩtina wa syama isu makeethĩwa o mateũkũĩkĩĩa, na mailea vyũ kũkwĩthukĩĩsya, nĩwĩtava kĩw'ũ ũsĩnĩ wa Naeli na ũikĩta nthĩ mũthanganĩ. Kĩw'ũ kĩu kĩkaalyũka kĩtw'ĩke nthakame.”
10Ĩndĩ Mwose eea Mwĩai Ngai atĩĩ, “Aiee, Mwĩai wakwa, ndũkandũme. Ndyaaĩthĩwa nĩ mũneeni mũseo kuma tene, o na nyie mũthũkũmi waku ndinatw'ĩka mũneeni mũseo ĩtina wa waneena nakwa. Nĩneenaa kavola na nĩnĩthitaa.”
11Mwĩai Ngai asũngĩa Mwose, “Nũũ ũla ũtumaa mũndũ ethĩwa atonya kũneena, kana akethĩwa atatonya kũneena kana kwĩw'a? Nũũ ũla ũtonyethasye mũndũ kwona nthĩ kana akatuma ethĩwa kĩlalinda? Ninyie Mwĩai Ngai nĩkaa maũndũ asu. 12Yu ĩndĩ enda! Ngakũtonyethya kũneena na ngakũmanyĩsya ndeto ila waile kũneena.”
13Ĩndĩ Mwose amũsũngĩa atĩĩ, “Ame Mwĩai wakwa, nĩngũkwĩsũva ũtũme mũndũ ũngĩ.”
14Nĩvo ĩndĩ Mwĩai Ngai wathatiw'e nĩ Mwose na amũkũlya atĩĩ, “Mwana-a-inyia waku Alũni ũla Mũlivai nde o vo? Nĩnĩsĩ ũsu nũtonya kũneena ateũthitathita. Yu nĩwũkĩte akũthaũĩte na nũkwĩw'a mũyo mũno mwakomana. 15Ũkaneenaa nake na kũmũtavya ndeto ila waĩlĩte kũneena. Mwĩ elĩ ngamũtonyethya kũneena, na kũmũmanyĩsya maũndũ ala mwaĩlĩtwe nĩ kwĩka. 16Alũni akaneena na andũ vandũ vaku, na akeethĩawa nĩ ta we kanyw'a waku, naku ũyĩthĩwa ta ue nyie, Ngai, ũimũtavya ndeto syakwa ila waĩlĩte kũneena. 17Kua ndata ĩno ũthi nayo nĩkwĩthĩwa nĩyo wĩtũmĩaa kwĩka syama.”
Mwose Aisyoka Misili
18Mwose nĩwasyokie kũla kwĩ Yethilo, mũthoni wake na amwĩa atĩĩ, “Nĩngũkwĩsũva ũndeke nĩsyoka kwa andũ ma mbaitũ kũya Misili ngamanye kana me o thayũ.” Yethilo nĩweetĩkĩlile na atianĩa ũvoo nake.
19Mwose o aendee na kwĩkala Mitiani, Mwĩai Ngai nĩwamwĩie, “Syoka Misili nũndũ andũ onthe ala mendaa ũkũaa nĩmakwie.” 20Kwoou Mwose nĩwoosie mũka na syana syake, amatũlya ĩng'oinĩ na ambĩĩa kyalo vamwe namo kya kũthi Misili, e na ĩla ndata weeiwe nĩ Ngai akue.
21O ĩngĩ Mwĩai Ngai nĩweeie Mwose atĩĩ, “Yĩla wĩsyoka Misili, ndũkatĩe kũthi vala ve mũsumbĩ na kwĩka syama syonthe ila nĩnakũnengie ũtonyi wa kwĩka. Ĩndĩ ngatuma mũsumbĩ omya ngoo yake na kũlea kũlekya andũ makwa mathi. 22Nĩvo ĩndĩ wĩmũtavya kana nyie, Mwĩai Ngai, nĩasya atĩĩ, ‘Ĩsilaeli nĩ ĩkithathi yakwa ya mũndũ-ũme. 23#Kuma 12.29 Nĩnĩkũtavĩtye ũlekye mwana wakwa athi nĩ kana akanthaithe, ĩndĩ we nũleete. Yu nĩngũaa ĩkithathi yaku ya mũndũ-ũme.’ ”
24Ũtukũ ũmwe me vandũ makomele me kyalonĩ kya kũthi Misili, Mwĩai Ngai nĩwakomanie na Mwose na enda kũmũaa. 25Nĩvo ĩndĩ Nzivola mũka wake woosie ĩvia yũĩ, na aĩka mwanae, na oosa kĩkonde kĩla watilile akĩtinithya maũũnĩ ma Mwose na amwĩa atĩĩ, “Kwa w'o we wĩ mũemewa kĩ-nthakame.” 26Kwoou nake Mwĩai Ngai aekana na Mwose ĩvindanĩ yĩu Nzivola waasya, “Mũemewa kĩ-nthakame,” aiweta kĩthĩo kya nzaĩko.
27Ĩvindanĩ o yĩu Mwĩai Ngai nĩwamwĩie Alũni atĩĩ, “Enda weũnĩ ũkakomane na Mwose.” Kwoou Alũni nĩwaendie na akomanĩa na Mwose kĩĩmanĩ kya Ngai, na yĩla makomanie amũkethya na ngethi ya wendo. 28Mwose nĩwamũtavisye Alũni maũndũ onthe ala Mwĩai Ngai wamũtũmĩte akaneene, o ta ũu nĩwamũtavisye ĩũlũ wa syama ila wamwĩĩte akeke. 29Nĩvo ĩndĩ Mwose na Alũni maendie Misili na meeta atongoi onthe ma andũ ma andũ ma Ĩsilaeli moombana vamwe. 30Alũni nĩwamatavisye maũndũ onthe ala Mwĩai Ngai watavĩtye Mwose, na ĩndĩ Mwose eeka ila syama syonthe vau mbee wa andũ. 31Andũ asu nĩmaĩkĩĩie, na yĩla meewie kana Mwĩai Ngai nũminĩte kũka amatethye, na kana nĩwonete ũndũ mathĩnĩtw'e mũno wĩana, nĩmakumanisye mĩtwe mathaitha.
Currently Selected:
Kuma 4: KAMBA
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011
Kuma 4
4
Ngai Ainenga Mwose Ũtonyi wa Kwĩka Syama
1Nĩvo ĩndĩ Mwose wamũkũlilye Mwĩai Ngai atĩĩ, “Andũ ma Ĩsilaeli makalea kũndĩkĩĩa na kwĩthukĩĩsya ũndũ ngũmatavya, na maimbĩa, ‘Mwĩai Ngai ndaneekumĩlĩĩla we,’ nĩka ta?”
2Mwĩai Ngai amũkũlya, “Nĩ kyaũ kĩu ũkwete?”
Mwose amũsũngĩa, “Nĩ ndata.”
3Mwĩai Ngai amwĩa, “Kwa mĩlekye nthĩ.” Yĩla Mwose wamĩlekilye nthĩ nĩyaalyũkile yatw'ĩka nzoka, nake asemba amĩkĩa. 4Nĩvo ĩndĩ Mwĩai Ngai wamwĩie atĩĩ, “Kumana na ũimĩkwatĩla kĩsithenĩ.” Kwoou Mwose nĩwakumanie na amĩkwata, nayo yatw'ĩka ndata ĩngĩ. 5Mwĩai Ngai nĩwamwĩie, “Wĩĩka ũu kũĩkĩĩthya andũ ma mbaĩ ya Ĩsilaeli kana Mwĩai Ngai, Ngai wa aaũmae moo, Ngai wa Avalaamu, Isaka na Yakovo, nũkumĩlĩĩile.”
6Mwĩai Ngai nĩwasyokie amwĩa Mwose, “Ĩkĩa kw'oko kwaku kĩthũinĩ ngũanĩ yaku ndaasa.” Kwoou Mwose eekĩa kw'oko ngũanĩ yake na yĩla wakumisye kweethĩwa na mangũ#4.6 Mangũ: Ndeto ya Kĩevelania ĩla ĩtũmĩĩtwe vaa no ĩeleeke ta mangũ kana ũwau ũngĩ mũthũku wa kĩkonde kwĩ kweũ ta ĩa. 7Nĩwamwĩie atĩĩ, “Ĩkĩa kw'oko kĩthũinĩ ĩngĩ.” Nĩwakwĩkĩie ĩngĩ kĩthũinĩ, na yĩla wakumisye kweethĩwa kwĩ kũseo o ta mwĩĩ ũla ũngĩ wake. 8Nĩvo ĩndĩ Mwĩai Ngai waisye atĩĩ, “Maema ũkũĩkĩĩa we, kana kũĩkĩĩthw'a nĩ kyama kya mbee, makaĩkĩĩthw'a nĩ kĩu kya kelĩ. 9Ethĩwa ĩtina wa syama isu makeethĩwa o mateũkũĩkĩĩa, na mailea vyũ kũkwĩthukĩĩsya, nĩwĩtava kĩw'ũ ũsĩnĩ wa Naeli na ũikĩta nthĩ mũthanganĩ. Kĩw'ũ kĩu kĩkaalyũka kĩtw'ĩke nthakame.”
10Ĩndĩ Mwose eea Mwĩai Ngai atĩĩ, “Aiee, Mwĩai wakwa, ndũkandũme. Ndyaaĩthĩwa nĩ mũneeni mũseo kuma tene, o na nyie mũthũkũmi waku ndinatw'ĩka mũneeni mũseo ĩtina wa waneena nakwa. Nĩneenaa kavola na nĩnĩthitaa.”
11Mwĩai Ngai asũngĩa Mwose, “Nũũ ũla ũtumaa mũndũ ethĩwa atonya kũneena, kana akethĩwa atatonya kũneena kana kwĩw'a? Nũũ ũla ũtonyethasye mũndũ kwona nthĩ kana akatuma ethĩwa kĩlalinda? Ninyie Mwĩai Ngai nĩkaa maũndũ asu. 12Yu ĩndĩ enda! Ngakũtonyethya kũneena na ngakũmanyĩsya ndeto ila waile kũneena.”
13Ĩndĩ Mwose amũsũngĩa atĩĩ, “Ame Mwĩai wakwa, nĩngũkwĩsũva ũtũme mũndũ ũngĩ.”
14Nĩvo ĩndĩ Mwĩai Ngai wathatiw'e nĩ Mwose na amũkũlya atĩĩ, “Mwana-a-inyia waku Alũni ũla Mũlivai nde o vo? Nĩnĩsĩ ũsu nũtonya kũneena ateũthitathita. Yu nĩwũkĩte akũthaũĩte na nũkwĩw'a mũyo mũno mwakomana. 15Ũkaneenaa nake na kũmũtavya ndeto ila waĩlĩte kũneena. Mwĩ elĩ ngamũtonyethya kũneena, na kũmũmanyĩsya maũndũ ala mwaĩlĩtwe nĩ kwĩka. 16Alũni akaneena na andũ vandũ vaku, na akeethĩawa nĩ ta we kanyw'a waku, naku ũyĩthĩwa ta ue nyie, Ngai, ũimũtavya ndeto syakwa ila waĩlĩte kũneena. 17Kua ndata ĩno ũthi nayo nĩkwĩthĩwa nĩyo wĩtũmĩaa kwĩka syama.”
Mwose Aisyoka Misili
18Mwose nĩwasyokie kũla kwĩ Yethilo, mũthoni wake na amwĩa atĩĩ, “Nĩngũkwĩsũva ũndeke nĩsyoka kwa andũ ma mbaitũ kũya Misili ngamanye kana me o thayũ.” Yethilo nĩweetĩkĩlile na atianĩa ũvoo nake.
19Mwose o aendee na kwĩkala Mitiani, Mwĩai Ngai nĩwamwĩie, “Syoka Misili nũndũ andũ onthe ala mendaa ũkũaa nĩmakwie.” 20Kwoou Mwose nĩwoosie mũka na syana syake, amatũlya ĩng'oinĩ na ambĩĩa kyalo vamwe namo kya kũthi Misili, e na ĩla ndata weeiwe nĩ Ngai akue.
21O ĩngĩ Mwĩai Ngai nĩweeie Mwose atĩĩ, “Yĩla wĩsyoka Misili, ndũkatĩe kũthi vala ve mũsumbĩ na kwĩka syama syonthe ila nĩnakũnengie ũtonyi wa kwĩka. Ĩndĩ ngatuma mũsumbĩ omya ngoo yake na kũlea kũlekya andũ makwa mathi. 22Nĩvo ĩndĩ wĩmũtavya kana nyie, Mwĩai Ngai, nĩasya atĩĩ, ‘Ĩsilaeli nĩ ĩkithathi yakwa ya mũndũ-ũme. 23#Kuma 12.29 Nĩnĩkũtavĩtye ũlekye mwana wakwa athi nĩ kana akanthaithe, ĩndĩ we nũleete. Yu nĩngũaa ĩkithathi yaku ya mũndũ-ũme.’ ”
24Ũtukũ ũmwe me vandũ makomele me kyalonĩ kya kũthi Misili, Mwĩai Ngai nĩwakomanie na Mwose na enda kũmũaa. 25Nĩvo ĩndĩ Nzivola mũka wake woosie ĩvia yũĩ, na aĩka mwanae, na oosa kĩkonde kĩla watilile akĩtinithya maũũnĩ ma Mwose na amwĩa atĩĩ, “Kwa w'o we wĩ mũemewa kĩ-nthakame.” 26Kwoou nake Mwĩai Ngai aekana na Mwose ĩvindanĩ yĩu Nzivola waasya, “Mũemewa kĩ-nthakame,” aiweta kĩthĩo kya nzaĩko.
27Ĩvindanĩ o yĩu Mwĩai Ngai nĩwamwĩie Alũni atĩĩ, “Enda weũnĩ ũkakomane na Mwose.” Kwoou Alũni nĩwaendie na akomanĩa na Mwose kĩĩmanĩ kya Ngai, na yĩla makomanie amũkethya na ngethi ya wendo. 28Mwose nĩwamũtavisye Alũni maũndũ onthe ala Mwĩai Ngai wamũtũmĩte akaneene, o ta ũu nĩwamũtavisye ĩũlũ wa syama ila wamwĩĩte akeke. 29Nĩvo ĩndĩ Mwose na Alũni maendie Misili na meeta atongoi onthe ma andũ ma andũ ma Ĩsilaeli moombana vamwe. 30Alũni nĩwamatavisye maũndũ onthe ala Mwĩai Ngai watavĩtye Mwose, na ĩndĩ Mwose eeka ila syama syonthe vau mbee wa andũ. 31Andũ asu nĩmaĩkĩĩie, na yĩla meewie kana Mwĩai Ngai nũminĩte kũka amatethye, na kana nĩwonete ũndũ mathĩnĩtw'e mũno wĩana, nĩmakumanisye mĩtwe mathaitha.
Currently Selected:
:
Highlight
Share
Compare
Copy
Want to have your highlights saved across all your devices? Sign up or sign in
BIBLE SOCIETY OF KENYA © 2011