नेवताळा ना काम 19
19
ईफीसुस मे पोलुस
1जे टेमे अपुल्लोस कुरीन्थुस मे हतो, तीहयी टेमे पोलुस उपर ना परगणा मे फीरतो जाय्न ईफीसुस मे आयो। ता तीने थोड़ाक चेला भेट्या। 2तीहया चेला ने पोलुस पुछ्यो, “जत्यार तमु ईसु पोर भरहो करला ता चोखली आत्मा हात करला ह़ु?”
तीहया चेला केदा, “आमु ते चोखली आत्मा ना बारा मे ह़मळ्या लग नी।”
3एतरे पोलुस तीमने पुछ्यो, “ता तमु कोयनो बपतीस्मा लेदला से?” तीहया जपाप आप्या, “युहन्ना नो बपतीस्मा लेदला से।”
4 #
मत्ती 3:11; मरकुस 1:4,7,8; लुका 3:4,16; युहन्ना 1:26,27 ता पोलुस केदो, “युहन्ना नो बपतीस्मा ते पाप भणी गेथो मन फीरवीन भगवान वगे वळवा नो हतो। युहन्नो माणहु ने केतो हतो के जे मसी मार गेथो अळतेण आवहे, तीहयात मसी पोर भरहो करजो। अने तीहयो मसी नासरत वाळो ईसु से।”
5आहयु ह़मळीन तीहया मालीक ईसु ना नामे बपतीस्मा लेदा। 6जत्यार पोलुस तीमनी पोर हात मेकीन तीमनी जुगु भगवान ह़ाते वीन्ती कर्यो, ता चोखली आत्मा तीमनी पोर उतरीन तीमनी मे भराय जी, अने तीहया भात-भातीन बोली बोलवा बाज ज्या। अने भगवान वगे गेथी वात केवा बाज ज्या। 7तीहया आखा मेळीन बारे जणा हता।
8पोलुस तीन मयना लग युहदी माणहु ना भक्ती ना घोर मे जाय्न बीह्या वगर भगवान ना राज ना बारा मे युहदी माणहु ह़ाते वात मे जखड़ी पड़्या करतो हतो अने ह़मजाड़्या करतो हतो। 9बाखीन तीमनी मे थोड़ाक माणहु पीटड़ा हता अने पोलुस नी वात ह़मळीन ईसु पोर भरहो नी कर्या, अने बीजा माणहु अगळ आहया ईसु ना पंथ ना बारा मे वाक काडवा बाज ज्या। एतरे पोलुस तीमनी गेथो आंग्ये हय ज्यो अने आह़फा ना चेला ने लीन तां गेथो जत र्यो। अने तीहयो दाड़ीत तुरनुस ना भणावण्या घोर मे भगवान ना राज ना बारा मे वात कीन तीमनी ह़ाते जखड़ी पड़तो हतो। 10बे साल लग तीहयो आसम भगवान ना राज ना बारा मे केतो र्यो। अने तीनी वात ह़मळीन आसीया परगणा मे रेण्या युहदी माणहु अने आड़जात्या माणहु मालीक ईसु ना बारा मे बोलु ह़मळीन भरहो कर्या।
सीकवा ना सोरा
11भगवान पोलुस ना लारे जुदा-काम देखाड़तो र्यो। 12जत्यार माणहु पोलुस ना डीले रुमाल अने फटकु छीमाड़ीन मांदला ह़ाते ली जत्ला, ता तीमनी मंदवाड़ सेटी हय जत्ली अने भुत तीमनी मे गेथा नीकळी जत्ला। 13थोड़ाक युहदी माणहु, माणहु मे गेथा भुत नीकाळ्या करता हता। एक दाड़े वीच्यार कर्या के आमु ईसु ना नाम सी भुत नीकाळहु। अने अळतेण तीहया एक माणेह मे गेथो भुत नीकाळवा नी टेमे केदा, “जे ईसु ना नाम सी पोलुस हक सी परच्यार करे, तीहया ईसुन नामे मे तने हुकम आपु के तु आनी मे गेथो नीकळ।” 14अने सीकवा नाम नो एक युहदी डायला पुंजारा ना ह़ात सोरा हता। तीहया बी आसमेत करता हता।
15पण भुत तीमने जपाप आप्यो, “मे ईसु ने बी जाणु अने पोलुस ने बी जाणु, पण तमु कोय से?”
16अळतेण जे माणेह मे भुत भरायलो हतो, तीहयो माणेह आदड़ी-आदड़ीन तीमने आखा ने ढबळाय देदो, अने तीमना आखा लुगड़ा फाड़ीन तीमने नांगरा कर देदो, अने घायल कर देदो अने तीहया नांगरला अने घायलेत घोर मे गेथा नीकळीन नाह ज्या। 17आहयु जे हयु तीनी खबर ईफीसुस ह़ेर मे रेण्या युहदी माणहु मे अने आड़जात्या माणहु मे जत री। अने तीहया आखा माणहु बीहीन तीमने घण-जबर धाक भराय जी। अने आहयी रीते मालीक ईसु नी ईज्जत अळी जादा हयवा बाज जी। 18अने जे बी आहयी वात ह़मळ्या तीमनी मे ढेरेत जणा गलत कामु ने करला मान लेदा, अने ईसु पोर भरहो कर्या, अने आहयी वात मान लेदा। 19अने तीहया बड़वाय करन्या आपणा-आपणा बड़वाय करवा ना पोती ना कीताप्या तीमनीन्तां लावीन भेळा कर देदा अने आखा अगळ तीहया कीताप्या ने धपाड़ देदा। जत्यार माणहु ते कीताप्या नी कीमत नो हीसाब लगाड़्या ता ते कीताप्या नी कीमत चांदी ना पचाह हजार टका हती। 20आहयी रीते मालीक ना बोलु ताखत भेळ फेलता ज्या, अने मजबुत हयता ज्या।
ईफीसुस मे झगड़ो
21आहयु हय ज्यु अने अळतेण पोलुस ना जीव मे आहयो वीच्यार कर्यो के मे मकीदुनीया अने अखाया माय्न यरुसलेम जही, तां “जाय्न अळतेण रोम बी देखवा जही।” 22एतरे पोलुस आह़फा ना सेवा करन्या ह़ाती तीमुथीयुस ने अने ईरास्तुस ने मकीदुनीया मोकली देदो अने आह़फो आसीया मे थोड़ाक दाड़ा अळी र्यो।
23तीहयी टेमे तीहया पंथ ना बारा मे मोट्लो दंगो हयो। 24तां एक देमेत्रीयुस नाम नो एक ह़ोनार हतो तीहयो अरतीमीस नाम ना एक देव नो मंदीर चांदी सी बणाय मांगत्लो अने आसम करीन तीहयो तीमने काम-धंदो आपत्लो। 25तीहयो काम-धंदो करन्या ने भेळा कर्यो अने तीमने केदो, “ए माणहु, तमने मालम से के आपणु ने आहया काम-धंदा सी घण-जबर फायदो हये। 26पण तमु देखो, अने ह़मळो, के तीहयो पोलुस ईफीसुस आखा आसीया परगणा मे माणहु ने आहयु कीन ह़मजाड़े अने मुर्ती लेवा वचकाड़े के हात सी बणावला मुरत्या देवता नी हय। 27पोलुस आसमेत माणहु ने ह़जाड़्या करहे ता आहयी बीक से के आपणो मुर्ती बणावीन वेचवा नो काम-धंदो बंद हय जहे अने मोट्ली देवी अरतीमीस ना मंदीर नु अबरु बी जत रेहे। अने जे देवीन पुजा-पाट आखु आसीया परगणु अने आखी कळ करे, तीनी ईज्जत बी कम हय जहे।”
28भीड़ ना माणहु आहयी वात ह़मळीन रीहवाय पड़्या अने आड़ी-आड़ीन केदा, “ईफीसीयो ह़ेर मे रेण्यान अरतीमीस देवी घण मोटी से।” 29ह़ेर ना बीजा माणहु बी माणहु ने आड़त्ला ह़मळीन तीमनी मे भेसकाय ज्या अने मकीदुनीया वाळा गयुस अने अरीस्तरखुस ने धर लेदा, जे पोलुस ह़ाते हींडत्ला। आखान-आखा एक-मन्या हय्न उपरी वाळा मोकळा घोर मे दवड़ी पड़्या। 30पोलुस तीहया माणहुन तां जवा हींडतो हतो, पण चेला तीने तां जवा नी देदा। 31आसीया परगणा ना थोड़ाक हकदार्या पोलुस ना दोस्तीदार हता। तीहया हकदार्या आहयी खबर ली मोकल्या के तु उपरी वाळा मोकळा घोर मे जाय्न दुख ना झेले। 32तीहयी टेमे गड़दी मे गेथा काना कंखरेत आड़ी र्या हता अने काना कंखरेत आड़ी र्या हता; काहाके घणा ढेरका माणहु ने आहयु मालम नी हतु के तीहया काहा भेळा हयला से। 33तीहयी गड़दी मे सीकंदर नाम नो एक माणेह हतो। तीने युहदी माणहु तीमनी गेथा टाळला हता। तीहया तीने ह़मजाड़ीन गड़दी मे वाळा माणहु अगळ उबो कर देदा। सीकंदर हात पालवी-पालवीन अनसारो करीन आह़फा ने बचाड़वा हींडतो हतो। 34पण जत्यार तीमने मालम हयु के तीहयो एक युहदी माणेह से, ता तीहया आखान-आखा एक रंगा बे घंटा लग आड़ी-आड़ीन केदा, “ईफीसीयो ह़ेर मे रेण्यान देवी अरतीमीस घण मोटी से।”
35ह़ेर नो लीखापुड़ी करवा वाळो गड़दी ने होगी राखीन केदो, “ए ईफीसीयो मे रेण्या माणहु! आखी कळी मे कोय एवो माणेह से के आहयु नी जाणतु हय, के ईफीसुस ह़ेर नी मोट्ली देवी अरतीमीस देवीन मंदीर ना अने ह़रग मे रेण्या गयुस देवता वगे गेथी पड़ली मुर्ती ना रखवाळ्या से। 36एतरे आहयी वात ने कोय काटी नी सके, एतरे आहयु तालेत से के तमु होगा रेवो; अने वीच्यार काड्या वगर कंय ना करो। 37काहाके तमु जे माणहु ने लावला से, तीहया नी ते मंदीर मे लुटण्या हय अने नी ते आपणी देवी नो वाक काडण्या हय। 38कदी माय्न देमेत्रीयुस ने अने तीना ह़ाते काम-धंदो करन्या नो कानी बी वात मे वाक हय ता नीयाव जुगु कोरट-कचवरी चालु से, अने तां नीयाव करन्यान परगणा नो धणी बी से; तां जाय्न एक-बीजा नो वाक काड्या करो। 39पण तमु कंय पुछवा हींडे तां आहयी वात ना बारा मे जाणवा करीन ह़ेर नी बठक हये तां आवजो तां आहयी वात नो वीच्यार काडहु। 40काहाके आज जे बी हुहड़ो हयलो से, तीहयो अमारा माथे पड़हे, एतरे आञे आना बारा मे वीच्यार काडवा ताले नी हय काहाके आहयी टेमे आहयी गड़दी मे वाळा माणहु ने अमारी भणी गेथो कंय बी जपाप नी अपाये।” 41अने आहयु कीदीन तीहयो ह़ेर नो लीखापुड़ी करवा वाळो पंचु ने वळाय देदो।
Currently Selected:
नेवताळा ना काम 19: PPt2025
Highlight
Copy
Compare
Share
Want to have your highlights saved across all your devices? Sign up or sign in
The Paliya Bible © The Word for the World International and Yisu Por Bherho Karanya Paliya Mandli, Rajpur, Barwani, MP, 2025
