नेवताळा ना काम 26

अगरीपा नी अगळ पोलुस नी बचाव नी वात

1अगरीपा राजा पोलुस ने केदो, “तने तारा बारा मे केवा नो हुकम से।” तत्‌यार पोलुस आह़फा ने बचाड़वा करीन हात उचो करीन केवा बाज ज्‌यो।

2“ए राजा अगरीपा, जे वात मे युहदी माणहु मार पोर घणो जादा गुनो लगाड़ला से। तीहयी वात मे आज तार अगळ जपाप आपवा मे खुद ने जुगाळो ह़मजु।” 3खास करीन आनीन करते के तु युहदी माणहु नी आखी रीती-भाती ने अने वात नी जखड़ी ने जाणे। एतरे मे तारी सी वीन्‌ती करु के तु गम खाय्‌न मारी ह़मळ।

4“जेम मारी चाल-चलण सुरु गेथी मारा भाय-बेटा अने यरुसलेम मे जेम हती, आहयु आखु युहदी जाणे। 5#नेवताळा ना काम 23:6; फीलीपीयो 3:5कदीम तीहया गवाय देवा हींडे ता दी सके, तीहया सुरु गेथा मने ओळखे, के मे फरीसी पंथवाळो हय्‌न मारा धरम ना आखा खरला पंथ नी अनसारे जीवाय जीवलो से। 6अने हाव तीहया वायदा नी आह ना कारण सी जे भगवान अमारा आड़ा-बुड़ा ह़ाते करलो से, अने तीहयात वायदा ना लेदे मारो नीयाव हयवा बाज र्‌यो। 7तीहयोत वायदो पुरो हयवा नी आह करीन, अमारी बारे कुळी रात-दाड़ो भगवान नी सेवा कर री। एतरे ए राजा! आहयी आह ना बारा मे युहदी मार पोर गुनो लगाड़ र्‌या। 8भगवान मर्‌या-ह़र्‌या माणहु ने पासा जीवता करे। आसम वात मे केम ता तमारीन्‌तां आहयी वात काहा भरहा ना लायक नी ह़मजे?”

9 # नेवताळा ना काम 8:3; 22:4,5 “मे बी ह़मजतो हतो के ईसु नासरी नाम ना वीरोद मे मने ढेरेत कंय करवा जोवे।” 10मे यरुसलेम मे बी वीरोद कर्‌यो; अने मंदीर ना डायला पुंजारान्‌तां जाय्‌न हक मांग लेदो अने ढेरेत चोखला माणहु ने जेल मे कुंड देदो। अने जत्‌यार बीजा तीमनो वीरोद करीन तीमने मार देत्‌ला ता मे बी तीमनी वात ने हुकारत्‌लो। 11अने मे तीहया आखा ने तीमना भक्‌ती ना घोर मे वेला पाड़त्‌लो अने तीमने जोर करीनेत केत्‌लो के तमु ईसु नो वाक काडो, अने मे तीमनी पोर एतरी जबर रीहवाय ज्‌यो के बीजा ह़ेर मे रेण्‌या ने बी वेला पाड़वा बाज ज्‌यो।

पोलुस आह़फा ना मन बदलाव ना बारा मे देखाड़े

12आहयीत धुंद मे, मे मंदीर ना डायला पुंजारा पांह हक अने हुकम नी चीट्‌ठी लीन दमीस्‌क जवा बाज र्‌यो हतो। 13ता ए राजा! तीहयी वाट्‌येत मे माथेक दाड़े वादळा मे दाहड़ु ना ह़ेक करते बी जादा एक वीजाळु, मारी अने मारी ह़ाते चालवा वाळा नी च्‌यारो-मेर भबळत्‌लु देख्‌यो। 14आमु आखा धरती पोर पड़ ज्‌या अने मने ईब्‌रानी बोली मे एक बोल ह़मळायो, ए साउल, ए साउल! तु मने काहा वेला पाड़े? तारी जुगु पेराणा पोर पाटु देवा घणु काठु से। 15अने मे केदो, “मालीक! तु कोय से?” मालीक केदो, “मे ईसु से” जीने तु वेला पाड़े। 16तु उबो हय जा, काहाके मे तने तु जे देखलो तीहयु आखु माणहु ने केवा करीन मारो पावर्‌यो अने गवा बणावीन ठेरावलो से अने अळी आव्‌वा वाळी वात देखाड़वा करीन तने देखाड़ही। 17अने मे तने तारा माणहु सी अने आड़जात्‌या माणहु सी बचाड़तो रेही, जीमनी पांह मे हाव तने आनीन करते मोकलु 18तु हीमना डोळा उगाड़जे के तीहया अंदारला भणी गेथा वीजाळा भणी चाले। अने भुतड़ा ना हक मे गेथा सोड़ावीन भगवान भणी फीरे; के पापु नी माफी हात करीन, अने तीहया माणहु नी ह़ाते जे मारी पोर भरहो करवा सी चोखा करला से, तीमनी ह़ाते पंगात मे भेसकाय।

पोलुस आह़फा ना काम ना बारा मे देखाड़े

19“एतरे ए राजा अगरीपा! मे तीहयी ह़रग मे गेथी देखाड़ली वात कदी नी टाळ्‌यो। 20#नेवताळा ना काम 9:20,28,29पण मे पेले दमीस्‌क वाळा ने, अळतेण यरुसलेम ह़ेर मे रेवा वाळा ने, अळतेण आखा युहद्‌या परगणा मे रेवा वाळा आड़जात्‌या माणहु ने आहयु ह़मजाड़तो र्‌यो, के तमु पाप करवा सोड़ीन भगवान भणी वळो अने भगवान ने गमे तेवु काम करो। 21आहयी वात नी करते युहदी माणहु मने मंदीर मे धर लेदा, अने मारीन नाख देवा नी कोसीत कर्‌या। 22पण मे भगवान नी मदत सी आज लग मर्‌यो नी अने नान्‌ला-मोट्‌ला अगळ ईसु नी गवाय देतो र्‌यो। अने तीहयीत वात केतो र्‌यो जे वात भगवान वगे गेथा केण्‌या माणहु अने मुसो बी केदो के हयवा वाळी से। 23#1 कुरन्‌थी 15:20के ईसु मसी ने दुख झेलवा पड़हे अने तीहयोत पेल्‌ना मरला मे गेथो जीवतो हय्‌न अमारा माणहु ने अने आड़जात्‌या माणहु ने जीवाय ना वीजाळा नी खुस-खबर ह़मळावहे।”

24जत्‌यार पोलुस आहयी रीती सी जपाप आपतो हतो, ता फेस्‌तुस ज्‌योरेत आड़ीन केदो, पोलुस “तु सणकाय जेलो से! अने तु जादा भणीण गंडवाय जेलो से।”

25पोलुस केदो, ए आबरु वाळा फेस्‌तुस, “मे सणकायलो नी हय, पण जे वात मे की र्‌यो तीहयी वात ह़ाचली से अने अक्‌कल नी बी से। 26अने जे वात मे बीह्‌या वगर राजा अगळ केवा बाज र्‌यो, तीहयी वात ने राजा जाणे अने मे भरहो करु के आहयी वातु मे नी कानी बी वात ह़तायली नी हय, काहाके तीहयी घटना खुणा मे नी हयी। 27ए राजा अगरीपा, भगवान वगे गेथी वात केण्‌या माणहु नी केदली वात पोर भरहो करे ह़ु? होव, मने मालम से के तु भरहो करे।”

28आहयी वात ह़मळीन राजा अगरीपा पोलुस ने केदो, “ह़ु तु थोड़ुक ह़मजाड़वा सी मने ईसु मसी वाळो बणाव्‌वा हींड र्‌यो ह़ु?”

29पोलुस जपाप आप्‌यो, “भगवान पांह मारी वीन्‌ती आहयी से के ह़ु थोड़ीक, अने ह़ु जादा, तु एतरोत नी पण जेतरा बी मारी वात ह़मळी र्‌या, तीहया आखा बंदण सी छुटीन मारीन तेवा बण जवा जोवे।”

30आहयी वात ह़मळीन राजा अगरीपा अने बीरनीके अने तीनी ह़ाते बह रेला आखा उबा हय ज्‌या। 31अने बारा जता-जता आंबा-सांबा केवा बाज ज्‌या, “आहयो माणेह जेल मे कुंडे एवो अने मोत नो डंड जड़े एवो कंय बी गुनो नी कर्‌यो।” 32राजा अगरीपा फेस्‌तुस ने केदो, “कदीम आहयो आसम नी केतो के ‘केसर राजा अगळ मारो नीयाव हयवा जोवे’ ता आहया हीने जेल मे गेथा बरी कर देता।”

Currently Selected:

नेवताळा ना काम 26: PPt2025

Highlight

Copy

Compare