ଲୁକ୍ 8
8
ଜିସୁନେ ପ୍ଲା ୱେଡିଙ୍ଗ୍କ୍ନେ ସେଲାମ୍ବୁଏଇଂ
1ଇଡ଼ିଙ୍ଗ୍ ଜିସୁ ଇନି ଇନି ଅଲେଙ୍ଗ୍ଚେ ଇସ୍ପର୍ ରାଜିନେ ନିମାଣ୍ତା ବ୍ନାଲିର୍ ବାସଙ୍ଗ୍କେ ବାରି ଗମ୍ବାର୍ ସିସ୍ଇଂ ମେଁନେ ଏତେ ଲେଃଗେ 2#ମାତିଉ ୨୭:୫୫,୫୬; ମାର୍କ ୧୫:୪୦,୪୧; ଲୁକ୍ ୨୩:୪୯.ଆରି ମୁଡ଼ି ସେଲାମ୍ବୁଏଃଇଂ ବାନ୍ ଦଦ୍ୟା ଆତ୍ମା ଆନ୍ତାର୍ ବିଃବକେ ମେଇଂ ଡିଗ୍ ମେଁଇଂନେ ଏତେ ଲେଃକେ । ଆରି ଆଣ୍ତିନେ ସେଲାମ୍ବୁଏଇଂ ରଗ୍ବାନ୍ ନିମାଣ୍ଡା ଡିଙ୍ଗ୍ଲେ ଆର୍କେ ମେଇଂ ଡିଗ୍ ମେଇଂ ଏତେ ଲେଃଆର୍କେ, ମରିୟମ୍ ଜାଣ୍ତେନେ ମ୍ନି ମଗ୍ଦଲୀନି ମରିୟମ୍ ଡାଗ୍ମ୍ୟାଃକେ ଜାଣ୍ଡେ ବାନ୍ ତ୍ମାକ୍ଲିଗ୍ ଗଲିଆ ଆନ୍ତାର୍ ବିଃବକେ । 3ହେରୋଦନେ ଗୁମୁସ୍ତା ଖୂଜାନେ କୁନେଣ୍ଡେ ଯୋହାନା, ଶୋଶନ୍ନା ଆରି ଉଡ଼ି ସେଲାମ୍ବୁଏଇଂ ମେଇଂ ଏତେ ଲେଃଚେ ନିଜେ ନିଜେନେ ଦନ୍ ବିଚେ ମେଁଇଂନେ ସେବା ଡିଙ୍ଗ୍ଆର୍କେ ।
4ଗୁଲୁଏ ରେମୁଆଁ ପାଙ୍ଗ୍ଚେ ରିସିଙ୍ଗ୍ ଆର୍କେ ଆରି ସାପା ଇନିନେ ରେମୁଆଁ ଜିସୁନ୍ନିଆ ପାଙ୍ଗ୍କେ ଜିସୁ ଆମେଇଂକେ ଏନ୍ ଉସ୍ରା ବାସଙ୍ଗ୍କେ ।
ଚ୍ମୁଜା ବିଗ୍ନେ ଉଃସ୍ରା
(ମାତିଉ ୧୩:୧-୯; ମାର୍କ ୪:୧-୯)
5ମୁଇଂ ରେମୁଆଁ ବିଗ୍ଣ୍ଡ୍ରେ ନିଜେନେ ଚ୍ମୁଜା ବିଗ୍ନେ ତାର୍କେ । ମେଁ ଲିଜନ୍ନିଆ ଚୁମୁଜା ବିଗ୍ନେ ବେଲା ଉଡ଼ି ଚୁମୁଜା ଗାଲିନ୍ନିଆ ଲଃକେ ଆରି ଞ୍ଚବୁନ୍ଦେ ମୁଲିୱେଗେ ବାରି ଆଡ଼ାତ୍ରାନେ ପ୍ଲିଗ୍ଇଂ ଆତେନ୍ ଚ୍ମୁଜାକେ ଚଙ୍ଗ୍ବିଗେ । 6ଆରି ଉଡ଼ିକ୍ଲିଗ୍ ବ୍ରି ଆଡ଼ାତ୍ରା ଲଃକେ ବାରି ପଡ଼୍ୟାଚେ ଣ୍ଡିଆଃ ଆବାକେସାଃ ନ୍ସୁଆର୍ ୱେଗେ । 7ଆରି ଉଡ଼ିକ୍ଲିଗ୍ ଗ୍ରେଃ ସ୍ଲାଃଇଂନେ ମଜେ ଲଃକେ ବାରି, ଗ୍ରେଃ ସ୍ଲାଃଇଂ ତଡ଼ିଆଚେ ଜିଆ ଜିଆ ମ୍ନା ଡିଂଚେ ଆତେନ୍ଇଂକେ ଚାପେ ବିଃକେ । 8ଆରି ଉଡ଼ି ନିମାଣ୍ଡା ତୁବନ୍ନିଆ ଲଃକେ ବାରି ମ୍ନାଚେ ମାଲ୍କୁଡ଼ି ଚୁଏ । ଜିସୁ ଏନ୍ ସାମୁଆଁ ବାସଙ୍ଗ୍କେ “ଜାଣ୍ତେନେ ଦ୍ରିଗ୍ ନ୍ସା ନ୍ଲୁଗ୍ ଲେଃକେ ମେଁ ଦ୍ରିଗ୍ପା ।”
ଚ୍ମୁଜା ବିଗ୍ନେ ଉଃସ୍ରା
(ମାତିଉ ୧୩:୧୦-୧୭; ମାର୍କ ୪:୧୦-୧୨)
9ମେଁନେ ସିସ୍ଇଂ ଜିସୁକେ ଉଃସ୍ରାନେ ଅର୍ତ ମେଁନେ ଡାଗ୍ଚେ ସାଲିଆକୁ ଆର୍କେ । 10ମେଁ ଉତର୍ ବିକେ “ଇସ୍ପର୍ନେ ରାଜିନେ ଗୁନ୍ ବୁଜେନ୍ସା ଆପେକେ ବପୁ ବିଃବକେ, ମାତର୍ ବିନ୍ନେ ସାପାରେ ନ୍ସା ଆତାନ୍ ମାତର୍ ଉଦାଅରନ୍ ଡିଙ୍ଗ୍ଚେ ଲେଃୱେଏ । ଇଡ଼ିଙ୍ଗ୍ ମେଇଂ କିକେ ଲେଃଆର୍ଏ ମାତର୍ କିକେ ଆୟା ଆର୍ ଣ୍ତୁ ଅଁଚେ ବୁଜେ ଆୟା ଆର୍ ଣ୍ତୁ ।”
ଜିସୁ ଚ୍ମୁଜା ବିଗ୍ନେ ଆଃବୁଜେକେ
(ମାତିଉ ୧୩:୧୮-୨୩; ମାର୍କ ୪:୧୩-୨୦)
11ଏନ୍ ଉସ୍ରା ଡାଗ୍ଲା ଚ୍ମୁଜା, ଇସ୍ପର୍ନେ ସାମୁଆଁ । 12ଆରି ଗାଲିବ ବିଗ୍କ୍ନେ ଚ୍ମୁଜା ରକମ୍ ଦେକ୍ ରକମ୍ ରେମୁଆଁଇଂକେ ବୁଜେଏ ଆକ୍ମେଇଂ ସାମୁଆଁ ଅଁ ଆର୍ଏ, ଇଡ଼ିଙ୍ଗ୍ ସଏତାନ୍ ପାଙ୍ଗ୍ଚେ ଡିରକମ୍ ମେଇଂ ବିସ୍ବାସ୍ ଡିଙ୍ଗ୍ଚେ ରକ୍ୟା ଆବାଆର୍ ଣ୍ତୁ, ଆକେନ୍ସା ମେଇଂ ମନେବାନ୍ ସାମୁଆଁ ଡୁଙ୍ଗ୍ଡଏ । 13ବାରି ନିମାଣ୍ଡାଃ ତୁବଃନ୍ନିଆ ବିଗ୍କ୍ନେ ଚ୍ମୁଜା ରକମ୍ ଆକ୍ମେଇଂ ସାମୁଆଁ ଅଁ ଆର୍ଏ ସାର୍ଦାରେ ସାଃଆର୍ଏ ଡାଗ୍ଲା ମେଁଇଂନେ ଚେର୍ ବିତ୍ରେ ଜାକ ୱେ ଆଲେଃଲା ମେଇଂ ଇକୁଡ଼ା ବେଲା ଜାକ ବିସ୍ବାସ୍ ଡିଙ୍ଗ୍ ଆରେ ବାରି ପରିକ୍ୟା ପାଙ୍ଗ୍ଲା ମେଇଂ ବିସ୍ବାସ୍ ଆନ୍ତାର୍ ବିଆର୍ଏ । 14ଗ୍ରେ ସ୍ଲା ଆଣ୍ଡେଙ୍ଗ୍ ଅରିଆ ଲଃଲେଃକ୍ନେ ଚ୍ମୁ ଦେକ୍ ରକମ୍ ରେମୁଆଁଇଂକେ ବୁଜେଏ ଜାଣ୍ଡେଇଂ ସାମୁଆଁ ଅଁ ଆରେ ମାତର୍ ସଂସାର୍ନେ ଚିନ୍ତା ଦନ୍ ଆରି ସୁକ୍ରେ ଲେଃଚେ ଜିବନ୍ କାଟେ କାଟେ ମିଗ୍ ୱେଆର୍ଏ ବାରି ନିମାଣ୍ତା ଚୁଚୁ ଆବାଆର୍ ଣ୍ତୁ । 15ଆଣ୍ଡିନେ ଲିଜ ନିମାଣ୍ଡାନେ ତୁବନ୍ନିଆ ଲଃକେ ଆରି ନିମାଣ୍ଡା ତୁବନିଆ ଉଡ଼ି ଲଃକେ ଦେକ୍ରକମ୍ ରେମୁଆଁଇଂ ବୁଜେଏ ଜାଣ୍ଡେଇଂ ପର୍ମେସର୍ନେ ସାମୁଆଁ ପର୍ଚଲ୍ ଆରି ପବିତ୍ର ମନ୍ ବିତ୍ରେ ଅଁ ଆର୍ଏ କାମ୍ ପଡ଼େଲା ପାଲେଆର୍ଏ ଆରି ତ୍ମିନେ ଚୁଏ ।
ସୁର୍କା ଆଲ କୁପିସ
(ମାର୍କ ୪:୨୧-୨୫)
16 #
ମାତିଉ ୫:୧୫; ଲୁକ୍ ୧୧:୩୩. ଜା କୁପିସ ଆଃଡୁଆଚେ ଆମେକେ ମୁତା ଆଲ ଡିଡାଚେ ଆବ ଣ୍ଡୁ ଣ୍ଡୁଲା କଟ୍ ଆଲ ଆବ ଣ୍ଡୁ ମାତର୍ ମେଁ ଆତେନ୍କେ କୁପିସ ବନେ ନ୍ତୁଗ୍ ଆଡ଼ାତ୍ରା ବଆର୍ଏ ଡେତ୍ଲା ଡୁଆ ବିତ୍ରେ ଗାଣ୍ଡ୍ରେ ତାର୍କିଗ୍ କେୟାଆର୍ଏ ।
17 #
ମାତିଉ ୧୦:୨୬; ଲୁକ୍ ୧୨:୨. “ମେଁନେ ସାପା ବୁଃଡ଼ି ବଆର୍କେ ଆତେନ୍ ସାପାରେନେ ଡାଗ୍ରା ଡାଗ୍ଲା ମେଃନେ ସାପା ଆବାସଙ୍ଗ୍ ଣ୍ଡୁ ଦେକ୍ରକମ୍ ବିସୟ୍ ମେଃ ଣ୍ଡୁ ଣ୍ଡୁଲା ମେଃନେ ସାପା ମାଅଁଚେ ବାସଙ୍ଗ୍କ୍ନେ ଆଅବା ଣ୍ଡୁ ଦେକ୍ରକମ୍ ବୁଡ଼ିଲେଃକ୍ନେ ସାମୁଆଁ ମେଁ ଣ୍ଡୁ ।”
18 #
ମାତିଉ ୨୫:୨୯; ଲୁକ୍ ୧୯:୨୬. “ପେଇଂ ଡିରକମ୍ ଅଁପେଡିଂ ଆତେନ୍ସା ବିସୟ୍ରେ ତରକ୍ ଲାଲାପା ମେଃନ୍ସା ଡାଗ୍ଲା ଜାନେ ଲେଃକେ ଆମେକେ ଜାବର୍ ମ୍ବିଏ ଆରି ଜାନେ ଣ୍ଡୁ ମେଁ ନିଜେନେ ଲେଃକେ ଡାଗ୍ଚେ ଏତେ ଲେଃଏ ମେଁବାନ୍ ଡୁଙ୍ଗ୍ ୱେଏ ।”
ଜିସୁନେ ଇୟାଙ୍ଗ୍ଡେ ଆରି ବୟାଁଣ୍ଡେ
(ମାତିଉ ୧୨:୪୬-୫୦; ମାର୍କ ୩:୩୧-୩୫)
19ଜିସୁନେ ଇୟାଙ୍ଗ୍ଡେ ଆରି ବୟାଁଣ୍ଡେଇଂ ଆମେକେ କେନ୍ସା ପାଙ୍ଗ୍ ଆର୍କେ ମାତର୍ ରେମୁଆଁଇଂ ଜାବର୍ ଗହଲି ଲେଃଲା ମେଁ ଏତେ ଡାଗ୍ରା ୱେଏ ଆୟାକେ ଣ୍ଡୁ । 20ଜାଣ୍ଡେ ମୁଇଙ୍ଗ୍ ଜିସୁକେ ବାସଙ୍ଗ୍କେ “କେଲା ପିୟାଙ୍ଗ୍ ବାରି ପେନାଙ୍ଗ୍ ନାନେ ଏତେ ଆସୁଏ ନ୍ସା ଇକ୍ଚା ଡିଙ୍ଗ୍ଚେ ବାଏରେ ତୁଆଁ ଲେଃକେ ।”
21ମାତର୍ ଜିସୁ ଆମେଇଂକେ ଉତର୍ ବିକେ “ଜାଣ୍ଡେ ଇସ୍ପର୍ନେ ସାମୁଆଁ ଅଁଏ ଆରି ସତ୍ ମାନେଃଆର୍ଏ ମେଇଂ ନେଙ୍ଗ୍ନେ ଇୟାଙ୍ଗ୍ ବାରି ବୟାଁଇଂ ।”
ସିସ୍ଇଂ ଜିସୁନେ ବପୁ କେକେ
(ମାତିଉ ୮:୨୩-୨୭; ମାର୍କ ୪:୩୫-୪୧)
22ଆତେନ୍ ବେଲା ମେଃସୁଆ ଜିସୁ ଆରି ମେଁନେ ସିସ୍ଇଂ ମୁଇଙ୍ଗ୍ ତରାଅରିଆ କକେ ଆରି ଜିସୁ ଆମେଇଂକେ ବାସଙ୍ଗ୍କେ, “ଏଲାପା କେଣ୍ଡିଆ ଇନୁ ମେତାଃ ନେୱେପା । ଆତ୍ ଅରିଆ ସିସ୍ଇଂ ତରା ତଃ ବିଃକେ ।” 23ମାତର୍ ମେଇଂ ତରା ୱେନେ ବେଲା ଜିସୁ ଡୁଲେଗ୍ ଲେଃଗେ । ଆତେନ୍ ବେଲା କେଣ୍ଡିଆନ୍ନିଆ ୱେଡ଼ିଆ ଗୁରିୟା ପାଙ୍କେ ଆରି ମେଁଇଂନେ ତରାନିଆ ଣ୍ଡିଆ ଗିଃଗାଃନେ ମୁଲେକେ । 24ଅଃତେନ୍ ବେଲା ସିସ୍ଇଂ ଡାଗ୍ରା ପାଙ୍ଗ୍ଚେ ଆମେକେ ଆତଡ଼ିଆଚେ ବାସଙ୍ଗ୍କେ “ଏ ଗୁରୁ ଏ ଗୁରୁ ନେ ନେଗୁଏଃଗେ ।” ଅଃତେନ୍ ବେଲା ଜିସୁ ତଡ଼ିଆଚେ ୱେଡ଼ିଆ ଗୁରିୟାକେ ଦମ୍କା ବିକେ ଆରି ଆତେନ୍ ସାପା ୱେଡ଼ିଆ ଗୁରିୟା ବନ୍ଦ୍ ଆଡିଙ୍ଗ୍ ବିଃକେ । 25ଆରି ଜିସୁ ଆମେଇଂକେ ବାସଙ୍ଗ୍କେ “ପେଇଂନେ ସତ୍ ମାନେକ୍ନେ ଆଣ୍ଡିକା ? ମାତର୍ ମେଇଂ ବୁଟ ଡିଙ୍ଗ୍ ଆର୍ଗେ ଆରି ଇରିଆଃତୁଗ୍ ଲେଃଆର୍ଗେ ମେଁ ଆମେଇଂକେ ଆଃ ବାଲିର୍ବାତା ଆର୍କେ ।” ଆକେନ୍ ରେମୁଆଁ ଜାଣ୍ଡେ ଚେଃ ମେଁ ୱେଡ଼ିୟା ଆରି ଣ୍ଡିଆକେ ଡିଗ୍ ଆଦେସ୍ ବିଏ ମେଇଂ ମେଁନେ ସାମୁଆଁ ସାଃଆର୍ଏ ।
ଜିସୁ ମୁଇଂ ବୁତ୍ ସାଲେକ୍ନେ ରେମୁଆଁ ନିମାଣ୍ତା ଆଡିଙ୍ଗ୍କେ
(ମାତିଉ ୮:୨୮-୩୪; ମାର୍କ ୫:୧-୨୦)
26ଇଡ଼ିଙ୍ଗ୍ ଜିସୁ ଆରି ମେଁନେ ସିସ୍ଇଂ ଗାଲିଲୀନେ କେଣ୍ଡିଆ ଇନୁ ମେତାଃ ୱେଗେ । ମେଇଂ ଗରାଶୀୟ ଏରିଆ ନ୍ନିଆ ୱେଆର୍କେ । 27ଜିସୁ ତରାବାନ୍ ତାର୍ଚେ କେଣ୍ଡିଆ ଆଡ଼ା ଜାର୍ନେ ବେଲା ଆତେନ୍ ଇନିନେ ମୁଇଙ୍ଗ୍ ଗଲିଆ ସାଲେଃକ୍ନେ ରେମୁଆଁ ଆମେକେ ଅବାକେ; ମେଁ ଅସେବାନ୍ ପାଟାଇ ମାସଚେ ଆରି ଡୁଆ ମାଲେଚେ ରାଃଚ୍ୟା ଲେଃଡିଂଗେ । 28ମେଁ ଜିସୁକେ କେଚେ କିରଚେ ମେଁନେ ଞ୍ଚ ବୁନ୍ଦେ ଲଃଚେ ଜବର୍ ସାରଚେ ବାସଙ୍ଗ୍କେ “ଏ ଇସ୍ପର୍ନେ ଉଙ୍ଗ୍ଡେ ଜିସୁ ନା ଏତେ ନେଙ୍ଗ୍ନେ ମେଁନେ ଲେଃକେ ? ନେଙ୍ଗ୍ ଆନାକେ ସାର୍ଲଣ୍ଡିଂକେ । ଆନିଂକେ କଷ୍ଟ ଆବିଗେ ନାମଃ ।” 29ଡାଗ୍ଲା ଜିସୁ ଆତେନ୍ ଗଲିଆକେ ଆତେନ୍ ରେମୁଆଁ ବାନ୍ ତାର୍ ୱେନ୍ସା ଆଦେସ୍ ବିବଗେ । ଆତେନ୍ ଗଲିଆ ଉଡ଼ିତର୍ ଆମେକେ ସାଲେଗେ ଆରି ରେମୁଆଁ ଆମେକେ ନ୍ତିନିଆ ଞ୍ଚନିଆ ଗାଗ୍ଚେ ବଆର୍ଗେ ମାତର୍ ମେଁ ଗାଗ୍କ୍ନେ ଚିକ୍ଲି ଆଃତେଗ୍ଚିଚେ ରେମୁଆଁ ଆଲେଃକ୍ନେ ଟାନ୍ନିଆ ସେଆଁରେ ଆମେକେ ଆଃଅଲେଙ୍ଗ୍ ଡୁଙ୍ଗ୍ ୱେଡିଂକେ ।
30ଜିସୁ ଆମେକେ ସାଲିଆକୁକେ, “ନାନେ ମ୍ନି ମେଃନେ ?” ମେଁ ବାସଙ୍ଗ୍କେ, “ନିଂନେ ମ୍ନି ‘ବାହିନୀ,’” ଡାଗ୍ଲା ମେଁ ଡାଗ୍ରା ଗୁଲେ ସେଆଁରେ ଗାଲେଃଗେ । 31ଆରି ମେଁ ଡିରକମ୍ ଆମେଇଂକେ ପାତାଲ୍ପୁର୍ ୱେନ୍ସା ଆବିଲେ ଆତେନ୍ସା ମେଇଂ ଆମେକେ ଜବର୍ଜସ୍ତି ଡିଙ୍ଗ୍କେ ।
32ଆତେନ୍ କଣ୍ଡା ଡାଗ୍ରା ମୁଇଙ୍ଗ୍ ମ୍ନା ଗୁବୁଗ୍ଇଂ ତୁର୍ତ୍ୟା ଡିଙ୍ଗେ ଆରି ମେଁ ଡିରକମ୍ ଆମେଇଂକେ ଆତେନ୍ ଗୁବୁଗ୍ନେ ଗାଗ୍ଡେ ଗାନ୍ସା ଆଦେସ୍ ବିକେ ଆକେନ୍ସା ମେଇଂ ଆମେକେ ଜବର୍ଜସ୍ତି ଡିଙ୍ଗ୍ଆର୍କେ । 33ଜିସୁ ଆମେକେ ଆଦେସ୍ ବିଲା ସେଆଁରେ ଆତେନ୍ ରେମୁଆଁ ବାନ୍ ତାର୍ଚେ ଗୁବୁଗ୍ନେ ଗାଗ୍ଡ଼େ ଗାକେ; ଆତ୍ ଅରିଆ ଗୁବୁଗ୍ ଆତେନ୍ କଣ୍ଡା ବାନ୍ ୱିର୍ ଡୁଂୱେଚେ କେଣ୍ଡିଆନ୍ନିଆ ତେଗ୍ଡ୍ୟା ଗୁଏଗେ ।
34ତୁର୍ତ୍ୟା ଡିଙ୍ଗ୍କ୍ନେ ରେମୁଆଁ ଆତେନ୍ ଗଟେକ୍ନେ କେଚେ ୱିର୍ ଡୁଂୱେଚେ ଇନି ଆରି ବାଏରେ ଲେଃକ୍ନେ ରେମୁଆଁଇଂକେ ଆୱାକେ । 35ଆତେନ୍ ଅରିଆ ରେମୁଆଁଇଂ ଆତେନ୍ ଗଟେକ୍ନେ କେନ୍ସା ପାଙ୍ଗ୍ ଆର୍କେ ଆରି ମେଇଂ ଜିସୁନେ ଡାଗ୍ରା ପାଙ୍ଗ୍ଚେ ମୁଡ଼ି ରେମୁଆଁ ବାନ୍ ଗଲିଆଇଂ ତାର୍ ଲେଃଗେ ଆମେକେ ପାଟାଇ ସଚେ ନିମାଣ୍ଡା ଆଡିଙ୍ଗ୍ଚେ ଜିସୁନେ ଞ୍ଚ ବୁନ୍ଦେ କଲେଃକ୍ନେ କେଚେ ବୁଟ ଆର୍ଗେ । 36ଆରି ଜାଣ୍ଡେଇଂ ଏନ୍ ଗଟ୍ନା କେଲେଗେ ମେଇଂ ଆତେନ୍ ଗଲିଆ ସାଲେଃକ୍ନେ ରେମୁଆଁ ଡିରକମ୍ ନିମାଣ୍ଡା ଡିଙ୍ଗ୍କେ ଆତେନ୍ ସାପା ଆମେଇଂକେ ଆମ୍ୟାଆର୍କେ । 37ଆତ୍ ଅରିଆ ଗରାଶୀୟଇଂ ଇନିନେ ସାପା ରେମୁଆଁ ମେଇଂବାନ୍ ଆଣ୍ଡେ ୱିଗ୍ନ୍ସା ଆମେକେ ଜବର୍ଜସ୍ତି ଡିଙ୍ଗ୍ଆର୍କେ ଡାଗ୍ଲା ମେଇଂ ଜାବର୍ ବୁଟ ୱେଲେଗେ ଆରି ମୁଇଙ୍ଗ୍ ତରାନ୍ନିଆ ଡେଃଚେ ଜିସୁ ଆଣ୍ଡେ ୱିଗ୍ଗେ । 38ମାତର୍ ମୁଡ଼ି ରେମୁଆଁ ବାନ୍ ଗଲିଆ ନୁଆଁ ଆନ୍ତାର୍ ବଗେ ମେଁ ଜିସୁ ଏତେ ଲେନେସା ଜବର୍ଜସ୍ତି ଡିଙ୍ଗ୍କେ 39ମାତର୍ ଜିସୁ ଆମେକେ ବେବିଚେ ବାସଙ୍ଗ୍କେ, “ନାନେ ଡୁଆ ଆଣ୍ଡେ ୱିଗ୍ଲା ଆରି ଇସ୍ପର୍ ନାଁ ନ୍ସା ମେଁନେ ଡିଙ୍ଗ୍ ବକେ ଆତେନ୍ ସାପା ବାସଙ୍ଗ୍ ଅଲେଙ୍ଗ୍ ।” ତେଲା ମେଁ ୱେଚେ ଜିସୁ ମେଃନ୍ସା ମେଃନେ ଡିଙ୍ଗ୍ ବଗେ ଆତେନ୍ ସାପା ଇନି ଜାକ ବାସଙ୍ଗ୍ ଅଲେଙ୍ଗ୍କେ ।
ଜାଇରସ୍ନେ ଉଙ୍ଗ୍ଡେ ଆରି ଆବୁଲେଃକ୍ନେ ସେଲାମ୍ବୁଏ ନିମାଣ୍ଡା ଡିଙ୍ଗ୍
(ମାତିଉ ୯:୧୮-୨୬; ମାର୍କ ୫:୨୭-୪୩)
40ଉଡ଼ିବେଲା ଜିସୁ ଇନୁମେତା ପାଙ୍ଗ୍କେ ରେମୁଆଁଇଂ ଆମେକେ ସାର୍ଦା ଡିଙ୍ଗ୍ଚେ ସାଃଆର୍କେ ଡାଗ୍ଲା ଆମେକେ ସାପାରେ ଉର୍ଲେଃଗେ । 41ଆରି କେଲା ଜାଇରସ୍ ମ୍ନିକ୍ନେ ମୁଇଙ୍ଗ୍ ରେମୁଆଁ ପାଙ୍ଗ୍କେ ମେଁ ପାର୍ତନା ଡୁଆନେ ନେତା ଲେଃଗେ । ମେଁ ଜିସୁନେ ଞ୍ଚ ବୁନ୍ଦେ ଲଃଚେ ମେଁନେ ଡୁଆ ୱେନେସା ଆମେକେ ଜବର୍ଜସ୍ତି ଡିଙ୍ଗ୍କେ । 42ଡାଗ୍ଲା ଗମ୍ବାର୍ ବୟସ୍ନେ ମୁଇଙ୍ଗ୍ ମାତର୍ ସେଲା ଲେଃଗେ ଆରି ମେଁ ତେଗୁଏନେ ରକମ୍ ଡିଙ୍ଗ୍ଲେଃଗେ । ମାତର୍ ଜିସୁ ୱେଡିଙ୍ଗ୍ନେ ବେଲା ରେମୁଆଁଇଂ ମେଁ ଆଡ଼ାତ୍ରା ଟେଚା ଡୁଂପାଙ୍ଗ୍କେ ।
43ଆତେନ୍ ଗମ୍ବାର୍ ମୁଆଁ ଜାକ ଆବୁଲେ ଡିଙ୍ଗ୍ ଲେଃକ୍ନେ ସେଲାମ୍ବୁଏ ଲେଃଗେ । ଜାଣ୍ଡେ କି ନିଜର୍ ଡାବୁ ଆଃଡାଚେ ଡିଗ୍ #୮:୪୩ ଉଡ଼ି ନ୍ତିବାନ୍ ଗୁଆର୍ ବକ୍ନେ ଆକେନ୍ ସାମୁଆଁ ଣ୍ଡୁନିମାଣ୍ଡା ଆଡିଙ୍ଗ୍ ଆୟାକେ ଣ୍ଡୁ । 44ମେଁ ପ୍ଲା ପାକା ପାଙ୍ଗ୍ଚେ ଜିସୁନେ ପାଟାଇ ଜାଲିପୁଆଃକେ ଲିଗ୍କେ ଆରି ମେଁ ଆବୁଲେଃ ଡିଙ୍ଗ୍କ୍ନେ ମ୍ୟା ବନ୍ଦ୍ ଡିଙ୍ଗ୍ୱେଗେ । 45ଆତେନ୍ ବେଲା ଜିସୁ ସାଲିଆକୁକେ ଜାଣ୍ଡେ ଆନେଙ୍ଗ୍କେ ଲିଗ୍କେ ? ମାତର୍ ସାପାରେ ବାସଙ୍ଗ୍କେ ଜେ ମେଇଂ ଆମେକେ ଆଲିଗ୍କେ ଣ୍ଡୁ ପିତର୍ ବାସଙ୍ଗ୍କେ “ଅଁ ଗୁରୁ ସାପା ରେମୁଆଁ ଟେଚା ଟେଣ୍ଡୁର୍ ଡିଙ୍ଗ୍ ପାଙ୍ଗ୍ ଆର୍କେ ।”
46ଜିସୁ ଆମେଇଂକେ ବାସଙ୍ଗ୍କେ, “ଜାଣ୍ଡେ ମୁଇଂଜା ଆନେଙ୍ଗ୍କେ ଲିଗ୍କେ ଡାଗ୍ଲା ନେଙ୍ଗ୍ ବାନ୍ ସକତ୍ ତାର୍ ୱେଗେ ଡାଗ୍ଚେ ନେଙ୍ଗ୍ ମ୍ୟାକେ ।” 47ଉଡ଼ି ବେଲା ସେଲାମ୍ବୟ୍ ରେମୁଆଁ କେକେ ଜେ ମେଁ ବୁଡ଼ି ଲେଃଆୟାକେ ଣ୍ଡୁ ଆତେନ୍ ବେଲା ମେଁ ଜୁର୍ ଜୁର୍ ପାଙ୍ଗ୍ଚେ ମେଁନେ ଞ୍ଚ ବୁନ୍ଦେ ଲଃଚେ ଜାଣ୍ଡେ ନାଁ ଆମେକେ ନାଲିଗ୍କେ ଆରି ଡିରକମ୍ ପ୍ରେକ୍ ଆଃ ନିମାଣ୍ଡା ନାଡିଙ୍ଗ୍ ଆତେନ୍ ସାପାରେନେ ସାର୍ମୁଆଁ ବାସଙ୍ଗ୍ ବିଃକେ । 48ଆତ୍ ଅରିଆ ଜିସୁ ଆମେକେ ବାସଙ୍ଗ୍କେ “ଅ ସେଲାମ୍ବଃଅ ନାନେ ବିସ୍ବାସ୍ ଆନାକେ ନିମାଣ୍ତା ଆଡିଙ୍ଗ୍ ବକେ, ସାନ୍ତିରେ ୱିଗ୍ଲା ।”
49ମେଁ ଆକେନ୍ ସାମୁଆଁ ବାସଙ୍ଗ୍ନେ ବେଲା ପାର୍ତନା ଡୁଆନେ ନେତା ଜାଇରସ୍ ଡୁଆବାନ୍ ମୁଇଂଜା ପାଙ୍ଗ୍ଚେ ବାସଙ୍ଗ୍କେ “ନାଁଉଙ୍ଗ୍ ଗୁଏଃ ୱେଗେ ଗୁରୁକେ ଆରି କଷ୍ଟ ଆବିଗେ ନାମଃ ।”
50ମାତର୍ ଜିସୁ ଆକେନ୍ ଅଁଚେ ଜାଇରସ୍କେ ବାସଙ୍ଗ୍କେ ଆବ୍ଟଗେ ନାମଃ ମାତର୍ ବିସ୍ବାସ୍ ଡିଂପା ମେଁ ଜିବନ୍ ବାଏ ।
51ଆରି ଜିସୁ ଆତ୍ ଅରିଆ ୱେଗେ ପିତର୍ ଯହନ୍ ଆରି ଜାକୁବ୍ ଆରି ଗଡ଼େଅନେ ଇୟାଙ୍ଗ୍ଡେ ଆବାଡ଼େ ଆନ୍ତାର୍ଚେ ଆରି ଆଜାଡିଗ୍ ମେଇଂ ଏତେ ବିତ୍ରେ ୱେନେସା ଆବିକେ ଣ୍ଡୁ । 52ମାତର୍ ସାପାରେ ମେଃନ୍ସା ଡାଗ୍ଚେ ଅଁ ଅଁଚେ ଗ୍ରିନିଆ ବଗ୍ ଡିଙ୍ଗ୍ ଆର୍ଗେ । ଆତ୍ ଅରିଆ ଜିସୁ ବାସଙ୍ଗ୍କେ “ଆଅଃଗେପା; ଗଡ଼େଅ ଆଗୁଏକେ ଣ୍ତୁ ମାତର୍ ଡୁଲେଗ୍ ଲେଃଗେ ।
53ମେଁନେ ସାମୁଆଁକେ ମେଇଂ ସାପା ରେମୁଆଁ ଏଃଲ୍ୟା ଆର୍କେ । ଡାଗ୍ଲା ଗଡ଼େଅ ଗୁଏଲେକେ ଡାଗ୍ଚେ ମେଇଂ ମ୍ୟାଃ ଲେଃଗେ । 54ମାତର୍ ଜିସୁ ସେଲାମ୍ବୁଏଃକେ ନ୍ତି ସାଚେ ବାସଙ୍ଗ୍କେ ଅଁ ଗଡ଼େଅ ତଡ଼ିଆ ।” 55ତେଲା ମେଁନେ ଜିବନ୍ ଆଣ୍ଡେ ପାଙ୍ଗ୍କେ ବାରି ଉଲୁସ୍ତେ ତଡ଼ିଆଗେ ଆରି ମେଁ ଆମେକେ ମେଃଣ୍ଡିଗ୍ ଚଙ୍ଗ୍ନ୍ସା ଆଦେସ୍ ବିଃକେ । 56ଆତ୍ ଅରିଆ ମେଁନେ ଇୟାଙ୍ଗ୍ଡେ ଆବାଡ଼େ ବକୁଆ ଡିଙ୍ଗ୍ୱେଗେ ମାତର୍ ଏନ୍ ଗଟେକ୍ନେ ସାମୁଆଁ ଆଜା ଡିଗ୍ ଆବାସଙ୍ଗ୍ ନ୍ସା ଆମେଇଂକେ ଆଦେସ୍ ବିକେ ।
Currently Selected:
ଲୁକ୍ 8: NTDaa20
Highlight
Share
Copy
Want to have your highlights saved across all your devices? Sign up or sign in
The Gata Didayi Testament in Language © The Word for the World International and Didayi Believers Assembly, Kudumulugumma, Malkangiri, Odisha. 2020
