ଲୁକ 16
16
ସାଲାକିଦି ଗୋତିମୁରୁଲିଦି କାତା
1ଜିସୁ ସିସୁରିଙ୍ଗ୍ ବା ଇର୍ହାନ୍, ଅରେନ୍ ମାଜନ୍ ଲୋକୁ ମାର୍ହାନ୍, ୱାରି ମାନୁ ଅରେନ୍ ଗୋତିମୁରୁଲି ମାର୍ହାନ୍, ମାରି ୱାନ୍ ୱାରି ସମ୍ପତ୍ତି ବୁଡ଼ା କିଜିନାନ୍ ଇଜି ଆୟା ବିସୟ୍ତାନ୍ ୱେନ୍ଜି ୱାନ୍ ୱାନିଙ୍ଗ୍ କୁକ୍ତାନ୍ନୋ ଇର୍ହାନ୍, 2ନାନ୍ ନି ବିସୟ୍ତାନ୍ ଇକା ଇନି ମାଟା ୱେନ୍ଜିନା ? ନି ପାଣିଦି ଇସାବ୍ ସିଦା, ମାତର୍ ନିନ୍ ମାରି ଗୋତିମୁରୁଲି ଆଜି ମାଣ୍ତ୍ରେଙ୍ଗ୍ ଆଟ୍ଇ । 3ଆବେନ୍ ଆୟା ଗୋତିମୁରୁଲି ମୋନ୍ତୁ ମୋନ୍ତୁ ଇର୍ହାନ୍, ଇନିକା କିନା ? ନା ମାଲିକ୍ ତୋ ନାମାଣ୍କୁ ଗୋତିମୁରୁଲିଦି ନା ସାକିରି ଅସି ସୋଲ୍ସିନାନ୍ । ସିକ୍ଲା କାର୍ଦେଙ୍ଗ୍ ନା ସାକ୍ତି ସିଲେତ୍, ଭିକିୟା ଲସ୍ତେଙ୍ଗ୍ ନାଙ୍ଗିଁ ସେମାର୍ ୱାଜିନାତ୍ । 4ନାନ୍ ଗୋତିମୁରୁଲିଦାନ୍ ଡ଼ିସ୍ତି ୱେନ୍କା ଲୋକୁ ଏଣ୍ତେସ୍ ନାଙ୍ଗିଁ ନିଜେ ନିଜେଦି ଇଲ୍କାଙ୍ଗ୍ କୁକ୍ନାର୍, ଇୟାଉଣ୍ତିଙ୍ଗ୍ ଇନିକା କିନା, ଆକା ନେସ୍ତାନି ।
5ମାରି, ୱାନ୍ ନିଜେଦି ମାଲିକ୍ଦି ୱିଜେରିଙ୍ଗ୍ ରୁଣୁ ଅତିମାନି ଲୋକାଙ୍ଗ୍ ଲାକ୍ତୁ କୁକ୍ସି ଆଗ୍ଡ଼ିରି ଅରେନ୍ୱାନିଙ୍ଗ୍ ଇର୍ହାନ୍, ନି ମୁସ୍କୁ ନା ପ୍ରବୁଦି ମାନୁ ଏସ ଟାକା ସିଦେଙ୍ଗ୍ ମାନାତ୍ ? ୱାନ୍ ଇର୍ହାନ୍, ସଏ ଡାବା ନିୟୁ । 6ୱାନ୍ ୱାନିଙ୍ଗ୍ ଇର୍ହାନ୍, ନି ଇସାବ୍ କିନି ଆକୁ ବେଗିତାସ୍ ବାସ୍ସ ପସାସ୍ ଡାବା ନିୟୁ ଇଜି ରାସ୍ଆଁ । 7ତାନେ ୱେନ୍କା ୱାନ୍ ମାରି ଅରେନ୍ୱାନିଙ୍ଗ୍ ଇର୍ହାନ୍, ନି ମୁସ୍କୁ ଏସ ଡାବୁଙ୍ଗୁଁ ସିଦେଙ୍ଗ୍ ମାନାତ୍ ? ୱାନ୍ ଇର୍ହାନ୍, ସଏ ବାସ୍ତା ଗଦ୍ମୁ । ୱାନ୍ ୱାନିଙ୍ଗ୍ ଇର୍ହାନ୍, ନି ଇସାବ୍ କିନି ଆକୁ ବେଗିତାସ ଅସେ ବାସ୍ତା ଇଜି ରାସ୍ଆଁ ।
8ଆୟା ଅବିସ୍ବାସ୍କିତି ଗୋତିମୁରୁଲି ବୁଦିଦି ୱାଲେ ପାଣି କିତିମାନିଙ୍ଗ୍ ୱାନି ମାଲିକ୍ ୱାନିଙ୍ଗ୍ ପ୍ରସଂସା କିତାନ୍; ଇୟା ଦୁନିଆ କଡ଼ର୍ ୱାରି ପାଣି କିଦେଙ୍ଗ୍ ଜାୟ୍ତି କଡ଼ରି ବାଦୁଲୁ ନାଣ୍ତ ବୁଦି ।
9ନାନ୍ ବା ମିଙ୍ଗିଁ ଇଜିନା, “ଦୁନିଆଦି ଦନ୍ତୁ ନିଜେ ନିଜେଦି ଉଣ୍ତିଙ୍ଗ୍ ସଙ୍ଗ୍ ପଇଦୁ, ଏଣ୍ତେସ୍ ଆକା ୱିଜ୍ତିଙ୍ଗ୍ ମିଙ୍ଗିଁ ୱିଜୁଦିନ୍ତି ଡର୍ନିବାଡିଦୁ କୁକ୍ନାନ୍ । 10ଏନ୍ ଉଣା ବିସୟ୍ତାନ୍ ବିସ୍ବାସ୍ କିନାନ୍, ୱାନ୍ ନାଣ୍ତ ବିସୟତୁ ବା ବିସ୍ବାସ୍ ମାନାନ୍, ମାରି ଏନ୍ ଉଣା ବିସୟ୍ତାନ୍ ଅବିସ୍ବାସ୍ ୱାନ୍ ନାଣ୍ତ ବିସୟତୁ ବା ଅବିସ୍ବାସ୍ କିନାନ୍ । 11ମାରି, ମିର୍ ଜଦି ଦୁନିଆଦି ଦନ୍ତୁ ବିସ୍ବାସ୍ କିଇଦେର୍, ଆଦେଙ୍ଗ୍ ଏନ୍ ମିଙ୍ଗିଁ ବିସ୍ବାସ୍ କିଜି ସତ୍ ଦନ୍ ମି କିୟୁଦୁ ସପ୍ରେ କିନାନ୍ ? 12ମାରି, ଜଦି ମିର୍ ଆଇୱାନି ଦନ୍ ବିସୟତାନ୍ ବିସ୍ବାସ୍ କିଇଦେର୍, ମାରି ଏନ୍ ମିଙ୍ଗିଁ ମି ନିଜେଦି ବିସୟ ସିନାନ୍ ?
13 #
ମାତିଉ ୬:୨୪. “ଅରେନ୍ ସାକର୍ ରିଏରି ମାଲିକ୍କା ସାକର୍ ଆଦେଙ୍ଗ୍ ଆଟ୍ଏନ୍; ମାତର୍ ୱାନ୍ ଅରେନ୍ୱାନିଙ୍ଗ୍ କାଡ଼୍ନାନ୍ ମାରି ଆଇୱାନିଙ୍ଗ୍ ଜିବନ୍ନୋନା, ମାରି ଅରେନ୍ୱାନି ଉଣ୍ତିଙ୍ଗ୍ ଲାକ୍ତୁ କିନାନ୍ ମାରି ଆଇୱାନିଙ୍ଗ୍ ଡ଼ିସ୍ନାନ୍ । ମିର୍ ମାପୁରୁ ମାରି ଦନ ରିଏରି ସାକର୍ ଆଦେଙ୍ଗ୍ ଆଟ୍ଇଦେର୍ ।”
ଏସ ଜିସୁ ଇନି ମାଟା
(ମାତିଉ ୧୧:୧୨-୧୩; ୫:୩୧-୩୨; ମାର୍କ ୧୦:୧୧-୧୨)
14ଇୟାୱିଜୁ ମାଟା ୱେନ୍ଜି ଦନ୍ଆସାନି ପାରୁସିର୍ ଜିସୁଙ୍ଗୁଁ ନିଦା କିଦେଙ୍ଗ୍ ଆସ୍ତାର୍ । 15ଆବେନ୍ ୱାନ୍ ୱାରିଙ୍ଗ୍ ଇର୍ହାନ୍, ଏର୍ ନିଜେ ନିଜେଦିଙ୍ଗ୍ ଲୋକାରି ଆଗ୍ଡ଼ି ଦାର୍ମୁ ଇଜି ତର୍ନାର୍, ମିର୍ ଆୟାୱାଜାଦି ଲୋକୁ, ମାତର୍ ମାପୁରୁ ମି ଜିବନ୍ତିଙ୍ଗ୍ ନେସ୍ନା; ମାତର୍ ଏମେକା ଲୋକାରି ମାନୁ ପେରିକା, ଆୟାକା ମାପୁରୁଦି ଆଗ୍ଡ଼ି କାଡ଼୍ନିକା ।
16 #
ମାତିଉ ୧୧:୧୨,୧୩. ମୋସାଦି ନିୟମ୍ତାନ୍ ମାରି ବାବବାଦିର୍ ଦାର୍ମୁସାସ୍ତ୍ର ଡୁବନ୍ସିନି ଜୋହନତି ସାନ୍ଧି ୱେଙ୍ଗିଁତା ମାର୍ହାତ୍; ଆୟା ୱାଲେରାନ୍ ମାପୁରୁଦି ରାଜିଦୁ ସୁସମାଚାର୍ ପ୍ରଚାର୍ କିଜିନାର୍, ମାରି ୱିଜେରେ ଲୋକୁ ଡାଟ୍ତାନ୍ ଆବେନୁ ସଲ୍ସିନାର୍ । 17#ମାତିଉ ୫:୧୮.ମାତର୍ ନିୟମ୍ତି ଉଣ୍ତ୍ରି ଇସ୍ରି ଠିକା ମାର୍ଗିନି ବାଦ୍ଲୁ ବାଦଡ଼ ନି ଦୁନିଆ ମାର୍ଗିନିକା ଉସାସ୍ ।
18 #
ମାତିଉ ୫:୩୨; ୧ କରିନ୍ତିୟ ୭:୧୦,୧୧. ଏନ୍ଆପିନ୍ ନିଜେଦି ଆଡ଼୍ସିଙ୍ଗ୍ ଡ଼ିସ୍ନାନ୍ ନୋ ଆଇତାନିଙ୍ଗ୍ ପେଡ଼ି ଆନାନ୍, ୱାନ୍ ଦାରିପାଣି କିନାନ୍; ମାରି, ଏନ୍ କୋନ୍ଲି ମାଣ୍କୁ ଡ଼ିସ୍ତି ଆଇମାଦିଙ୍ଗ୍ ପେଡ଼ିଆନାନ୍, ୱାନ୍ ବା ଦାରିପାଣି କିନାନ୍ ।
ଅରେନ୍ ମାଜନ୍ ଲୋକୁ ନି ଲାଜାର୍
19ଅରେନ୍ ଦନି ଲୋକୁ ମାର୍ହାନ୍, ୱାନ୍ ନାଣ୍ତ ଦାରାଦି ଆଙ୍ଗିଁ ଆରାଜି ୱିଜୁଦିନ୍ ନାଣ୍ତ ୱେଡ଼ିକାଦାନ୍ ଉଣୁଜିତିନ୍ଜି ମାର୍ହାନ୍; 20ମାତର୍ ୱାନି ଦୁଆର୍ ଲାକ୍ତୁ ଲାଜାର୍ ଇଜି ଅରେନ୍ ବିକାରି ବାସ୍ତା ମାର୍ହାନ୍, ୱାନି ମେନ୍ଦଲ୍ୱିଜୁ ଗାଉକୁ ବର୍ତି ଆତେମାରେଏ; 21ୱାନ୍ ଆୟା ଦନି ଲୋକୁଦି ଟେବୁଲ୍ତାନ୍ ଆର୍ନି ସକ୍ଡ଼ିଦାନ୍ ଏସ ଉଣୁଜି ପଟାପାଜିସ୍ କିଦେଙ୍ଗ୍ ଆସା କିଜିମାର୍ହାନ୍; ମାରି, ନୁକୁଡ଼ିଙ୍ଗ୍ ୱାଜି ୱାନି ଗାଉକୁ ୱିଜୁ ନାକ୍ସି ମାର୍ଏ ।
22ତାନେ ୱେନ୍କା ଆୟା ବିକାରି ସାତାନ୍ ମାରି ଦୁତ୍କା ମାଣ୍କୁ ଅବ୍ରାହାମତି ଗାତୁ ଅତେ; ୱେନ୍କା ଆୟା ଦନି ଲୋକୁ ବା ସାତାନ୍ ମାରି ମୁସ୍ତାର୍ । 23ମାରି, ୱାନ୍ ନର୍କଦି କାସ୍ଟୁଦୁ କଲ୍ବଲ୍ ଆଜି ମୁସ୍କୁ ସୁଡ଼ୁଜି ଆକ୍ରାନ୍ ଅବ୍ରାହାମ ମାରି ୱାନି ଗାତୁଦୁ ଲାଜାର୍ତିଙ୍ଗ୍ ସୁଡ଼ୁତାନ୍ । 24ଆବେଟ୍ ୱାନ୍ କୁକ୍ସି ଇର୍ହାନ୍, ଏ ବୁବା ଅବ୍ରାହାମ, ନାଙ୍ଗିଁ ଦୟା କିଜ ଲାଜାର୍ତିଙ୍ଗ୍ ପୋକ୍ତାଆ, ଏଣ୍ତେସ୍ ୱାନ୍ ଏର୍ତୁ ନିଜେଦି ଡ଼ାସ୍କା ମୁଡ଼ୁକ୍ସ ନା ୱେତ୍ଲତିଙ୍ଗ୍ ସିତ୍ଡ଼ି କିଦେଙ୍ଗ୍, ମାତର୍ ନାନ୍ ଇୟା ସିସୁଦୁ କଲ୍ବଲ୍ ଆଜିନା ।
25ମାତର୍ ଅବ୍ରାହାମ ଇର୍ହାନ୍, ମାରିନ୍, ନିନ୍ ଜେ ଜିବନ୍ମାର୍ଇ ୱାଲେ ନିଜେଦି ନେଗି ବିସୟୱିଜୁ ପଇତି, ମାରି ଲାଜାର୍ ଆୟାୱାଜା ତାଗ୍ଇ ବିସୟୱିଜୁ ପଇତାନ୍, ଇକା ଅଡ଼୍ବିଆ; ମାତର୍ ଇଲେ ୱାନ୍ ଇୟା ବାଡ଼ିଦୁ ୱେଡ଼ିକା ପଇଜିନାନ୍, ମାରି ନିନୁ କଲ୍ବଲ୍ ଆଜିନି । 26ଆକା ଡ଼ିସ୍ତିଙ୍ଗ୍ ନିଦି ମାନ୍ଦି ମାଣ୍କୁ ନାଣ୍ତ ଗାଡ଼୍ଦି ମାନାତ୍, ଏଣ୍ତେସ୍ ଏମେ ଲୋକୁ ଇୟା ବାଡିଦାନ୍ ମି ଲାକ୍ତୁ ସଣ୍ଡ୍ରେଙ୍ଗ୍ ଇଜି ବଦା କିନାର୍, ୱାର୍ ସଣ୍ଡ୍ରେଙ୍ଗ୍ ଆଟ୍ଏର୍, ମାରି ଆୟାବାଡିଦାନ୍ ଏନ୍ବା ମା ଲାକ୍ତୁ ନାସ ୱାଦେଙ୍ଗ୍ ଆଟ୍ଏର୍ । 27ଆବେନ୍ ମାଜନ୍ଲୋକ୍ ଇର୍ହାନ୍, ଏ ବୁବା, ଆତିଙ୍ଗ୍ ନାନ୍ ନିଙ୍ଗିଁ ମାଡ଼ିସ୍ କିଜିନା, ୱାନିଙ୍ଗ୍ ନା ବୁବାଦି ଇଲ୍ଦୁ ପୋକ୍ଆ, 28ମାତର୍ ନା ପାସ୍ଲୋକ୍ ତଡ଼ାନ୍କୁ ମାନାର୍; ୱାର୍ବା ଏଣ୍ତେସ୍ ଇୟା କାସ୍ଟୁଦି ବାଡିଦୁ ରାମାକିର୍, ଆୟାଉଣ୍ତିଙ୍ଗ୍ ୱାନ୍ ୱାରି ଲାକ୍ତୁ ସାକି ସିନି ।
29ମାତର୍ ଅବ୍ରାହାମ ଇର୍ହାନ୍, ୱାରି ଲାକ୍ତୁ ମୋସା ମାରି ବାବବାଦିରି ଦାର୍ମୁସାସ୍ତ୍ର ମାନାତ୍, ୱାର୍ ୱାରି ମାଟା ୱେନ୍ରି । 30ଆବେନ୍ ୱାନ୍ ଇର୍ହାନ୍, ଏ ବୁବା ଅବ୍ରାହାମ, ଆକା ନାଣ୍ତ ଆଏତ୍; ମାତର୍ ଜଦି ସାତିମାନିଲୋକା ଲାକ୍ତୁରାନ୍ ଅରେନ୍ ୱାରି ଲାକ୍ତୁ ସନାର୍, ଆତିଙ୍ଗ୍ ୱାର୍ ମନ୍ତିଙ୍ଗ୍ ଡ଼େପ୍ନାର୍ । 31ମାତର୍ ୱାନ୍ ୱାନିଙ୍ଗ୍ ଇର୍ହାନ୍, ଜଦି ୱାର୍ ମୋସା ନି ବାବବାଦିରି ମାଟା ୱେନ୍ଏର୍, ଆତିଙ୍ଗ୍ ସାତିମାନି ଲୋକାମାଣ୍କୁ ଅରେନ୍ ମାରିଡ଼େସି ଜିବନ୍ଆଜିନିଙ୍ଗିଁଜି ସରିଙ୍ଗ୍ ବା ୱାର୍ ନେଗିମାଟା ୱେର୍ତିଙ୍ଗ୍ ୱେନ୍ଏର୍ ।
Currently Selected:
ଲୁକ 16: NTKoo20
Highlight
Share
Copy
Want to have your highlights saved across all your devices? Sign up or sign in
The New Testament in Konda Porja Language © The Word for the World International and Konda Porja Translation Samithi, Dasamanthpur, Odisha 2020
