ପ୍ରେରିତ 7
7
ସ୍ତିପାନ୍ତେ ପ୍ରଚାର୍
1ବେଡ଼୍ୟି ଜାଜକ୍ ସ୍ତିପାନ୍ତିଙ୍କ୍ ପାଚ୍ରାମାଡ଼୍ତଣ୍ଡ୍, “ଇଦ୍ ବାତ୍ ନିଜାମ୍ ?”
2ସ୍ତିପାନ୍ ଉତର୍ ହିତ୍ତଣ୍ଡ୍, “ହଁ ଦାଦାଲଡ଼୍ ନୁ ବାବାଲଡ଼୍, କେଞ୍ଜାଟ୍ ! ମାନ୍ ଆନିଦାଦି ଅବ୍ରାହାମ୍ ହାରାନତାଗ୍ ମାନ୍ଦାନ୍ ମୁନେଙ୍କ୍ ଗୌରବମୟ ଇଶ୍ୱର୍ ମେସପଟାମିୟାତାଗ୍ ଦର୍ଶନ୍ ଇସ୍, 3ମେଣ୍ଡ୍ ଅଂକିଙ୍କ୍ କେତ୍ତଣ୍ଡ୍, ନି ପରିବାର୍ ନୁ ଦେଶ୍ ୱିଡ଼୍ସି ନାନ୍ ବେନ୍ ଦେଶ୍ ହିଦ୍ତାନ୍, ଆଗେ ଅନ୍ । 4ଆଦିଙ୍କ୍ ଅଣ୍ଡ୍ ତାନ୍ ଦେଶ୍ କ୍ଲିଡିଅନ୍ ୱିଡ଼୍ସି ହାରାନତାଗ୍ ମାନ୍ଦାନଙ୍କ୍ ଆତ୍ତଣ୍ଡ୍ । ଅବ୍ରାହାମ୍ତେ ବାବାଲ୍ ଡଲ୍ତେ ପେର୍କେ ଇଶ୍ୱର୍ ଅଂକିଙ୍କ୍ ଆଦ୍ ଦେଶ୍ତାଗ୍ ତାତ୍ତଣ୍ଡ୍, ବେନ୍ ଦେଶ୍ତାଗ୍ ମିଡ଼୍ ଇଞ୍ଜେ ମାନ୍ଦୁ ତିଡ଼୍ ।” 5ଇଶ୍ୱର୍ ଆସୁଟେ ଅବ୍ରାହାମ୍ତିଙ୍କ୍ ଇଦ୍ ଦେଶ୍ତେ ବାତେମିକା ଇୱଣ୍ଡ୍, ଇଦ୍ ରକମ୍ କି ଅଣ୍ଡୟ୍ ପାଦାମ୍ ବୁମ୍ ମିକା ଇୱଣ୍ଡ୍ । ବାତେଙ୍କ୍ ଇତ୍କେ ଇଶ୍ୱର୍ ପ୍ରତିଜ୍ଞା ମାଡ଼ିମାତ୍ତଣ୍ଡ୍, ଅବ୍ରାହାମ୍ତିଙ୍କ୍ ଇଦ୍ ଦେଶ୍ ହିଦ୍ତଣ୍ଡ୍ ନୁ ଇଦ୍ ଅନ୍ୱାଦ୍ ନୁ ତାନ୍ ବଂଶଦର୍ତେ ନିଜେତାଦ୍ ଆଦ୍ତେ । ଇଶ୍ୱର୍ ଆଦ୍ ପ୍ରତିଜ୍ଞା ମାଡ଼ାନ୍ୱେଲେ ଅବ୍ରାହାମ୍ତିଙ୍କ୍ ପିଲା ଇଲ୍ୱେକଟ ମାତ୍ତ । 6ଆସୁଟେ ଇଶ୍ୱର୍ ଅଂକିଙ୍କ୍ ଇଦ୍ ଗଟ୍ କେତ୍ତଣ୍ଡ୍; “ନି ବଂଶଦର୍ କ୍ରୀତଦାସ ଲେକାମ୍ ବେନ୍ ଦେଶ୍ତାଗ୍ ମାନ୍ତ୍ତଡ଼୍ ନୁ ଚାରିଶହ୍ ହେଣ୍ଡ୍କ୍ ଯାକ ଗାଟିତିପାଲ୍ ଦର୍କିତ୍ ।” 7ମେଣ୍ଡେ ଇଶ୍ୱର୍ କେତ୍ତଣ୍ଡ୍, “ଅଡ଼୍ ବେନ୍ ଜାତିତେ ଦାସ ଆଦ୍ତଡ଼୍, ମାମ୍ମେ ଅଡ଼ାଦ୍ ବିଚାର୍ ମାଡ଼ିତମ୍; ତାନ୍ପେର୍କେ ଅଡ଼୍ ଦେଶ୍ତାଗାଙ୍କ୍ ପେଇସ୍ ୱାସ୍ ଇଦ୍ ପଡ଼୍ୟେତାଗ୍ ମାୱାଦ୍ ଉପାସନା ମାଡ଼ିତଡ଼୍ ।” 8ତାନ୍ପେର୍କେ ଇଶ୍ୱର୍ ଅବ୍ରାହାମ୍ତିଙ୍କ୍ ସୁନ୍ନତବିଦି ହିତ୍ତଣ୍ଡ୍, ମେଣ୍ଡେ ଅବ୍ରାହାମ୍ ଆଦ୍ ଲେକାମ୍ ଇସ୍ହାକ୍ତିଙ୍କ୍ ଜନମ୍ ମାଡ଼ି ଆଟ୍ ଦିନେତେ ଅଂକିଙ୍କ୍ ସୁନ୍ନତ୍ ମାଡ଼୍ତଣ୍ଡ୍; ଇସ୍ହାକ୍ ଯାକୁବ୍, ମେଣ୍ଡେ ଯାକୁବ ବାରଜାନ୍ ମୁନେତ୍ ଆନିଦାଦିଡ଼୍କ୍ ଜନମ୍ ଇସ୍ ଆଦ୍ ରକମ୍ ନିୟମ୍ ମାଡ଼୍ତଣ୍ଡ୍ ।
9“ଜାକୁବ୍ତେ ମାର୍କ୍ ଅଡ଼୍ ତାମୁଣ୍ଡ୍ ଯୋଷେଫ୍ତିଙ୍କ୍ ଇର୍ଷାମାଡ଼ି କ୍ରୀତଦାସ ଲେକାମ୍ ମିସର୍ ଦେଶ୍ ଆଦାନ୍ ସେଙ୍ଗେ ଅଂକିଙ୍କ୍ ୱାମ୍ତଡ଼୍; ବାତେଙ୍କ୍ ଇତ୍କେ ଇଶ୍ୱର୍ ଅନ୍ ତଡ଼୍ ମାତ୍ତଣ୍ଡ୍, 10ଅନାଦ୍ ସାରେ କଷ୍ଟତାଗାଙ୍କ୍ ଅଂକିଙ୍କ୍ ଉଦ୍ଦାର୍ ମାଡ଼୍ତଣ୍ଡ୍ ନୁ ମିସର୍ତେ ରାଜାଲ୍ ଫାରୋନ୍ ମୁନ୍ନେ ଅଂକିଙ୍କ୍ ଅନୁଗ୍ରହ ମାଡ଼ି ସାୟେତ୍ ବୁଦ୍ ନୁ ଜ୍ଞାନ୍ ହିତ୍ତଣ୍ଡ୍; ଆଗାଙ୍କ୍ ଫାରୋ ଅଂକିଙ୍କ୍ ମିସର୍ ନୁ ତାନାଦ୍ ସାରେ ଲୋକିନ୍ ଶାସନ୍ କର୍ତାଲ୍ ଲେକାମ୍ ନିଯୁକ୍ତ ମାଡ଼୍ତଣ୍ଡ୍ । 11ତାନ୍ପେର୍କେ ମିସର୍ ଦେଶ୍ ଏକାମ୍ ନୁ କିନାନ୍ତାଗ୍ ଦୁର୍ବିକ୍ୟ ଆତ୍ତାଙ୍କ୍ ନାରୁଡ଼୍ ଗାଟି କଷ୍ଟ ଦର୍କ୍ତେ । ମେଣ୍ଡେ ମାନ୍ ଆନିଦାଦିଡ଼୍କ୍ କାଦି ଦର୍କ । 12ବାତେଙ୍କ୍ ଇତ୍କେ ମିସର୍ତାଗ୍ କାଦି ମିନ୍ଦେ ଇଞ୍ଜ କେଞ୍ଜି, ଯାକୁବ୍ ତାନ୍ ମାର୍କିଡ଼୍କ୍ ନୁ ମାନ୍ ଆନିଦାଦିଡ଼୍କ୍ ମୁନ୍ନେନ୍ ଦାମ୍ ରହତଣ୍ଡ୍ । 13ରେଣ୍ଡ୍ଦାମ୍ ଆତ୍ତେ ୱେଲେ ଯୋଷେଫ୍ ତାମ୍ ଦାଦାଲଡ଼୍ ପରିଚୟ ହିତ୍ତଣ୍ଡ୍, ମେଣ୍ଡେ ଫାରୋ ଜସେଫ୍ତେ ପରିବାର୍ ବିଷୟ୍ତେ ପୁତ୍ତଣ୍ଡ୍ । 14ତାନ୍ପେର୍କେ ଯୋଷେଫ୍ ତାମ୍ ବାବାଲ୍ ଯାକୁବ୍ ନୁ ତାମ୍ ପରିବାର୍ତେ ସାରେ ସତୁରିଏଇଙ୍ଗ୍ ଜାନ୍ତିଙ୍କ୍ ମିସର୍ ୱାଦାନଙ୍କ୍ କେତ୍ତଣ୍ଡ୍ । 15ଯାକୁବ୍ ମିସର୍ ଦେଶ୍ତାଗ୍ ଆତ୍ତଣ୍ଡ୍, ଆଗେ ଅଣ୍ଡ୍ ନୁ ତାମ୍ ମାର୍କିଡ଼ାଦ୍ ଡଲ୍ନାଦ୍ ଆତ୍ତେ । 16ଅଡ଼ାଦ୍ ମଡ଼୍ତିଙ୍କ୍ ଶିକିମ୍ତାଗ୍ ଆତ୍ତଡ଼୍ ନୁ ଅବ୍ରାହାମ୍ ହାମୋର୍ ନାରୁନାଗାଙ୍କ୍ ରୁପା ଡାବ୍କ୍ ଇସ୍ ଆସିମାନ୍ଦାନ୍ କବର୍ତାଗ୍ ଅଡ଼୍କିଂଙ୍କ୍ ସମାଦି ହିତ୍ତଡ଼୍ ।”
17“ବାତେଙ୍କ୍ ଇତ୍କେ ଇଶ୍ୱର୍ ଅବ୍ରାହାମ୍ତେ ଗାର୍ରେ ବେନ୍ ପ୍ରତିଜ୍ଞା ମାଡ଼ିମାତ୍ତଣ୍ଡ୍, ଆଦ୍ ପ୍ରତିଜ୍ଞା ସାରେ ପୁରା ଆଦାନ୍ ଦିନାମ୍ ହେୱୁତାଙ୍କ୍, ମା ନାରୁଡ଼୍ ନାର୍ଗେ ମିସର୍ ଆଦାଙ୍କ୍ ପସ୍ପ୍ତ୍ତଡ଼୍ । 18ପେର୍କେ ଯୋଷେଫ୍ତେ ବିଷୟ୍ ପୁନ୍ୱେନଣ୍ଡ୍ ୱେରଣ୍ଡ୍ ରାଜାଲ୍ ମିସର୍ ଦେଶ୍ତିଙ୍କ୍ ଶାସନ୍ ମାଡ଼୍ତଣ୍ଡ୍ । 19ଅଣ୍ଡ୍ ମାନ୍ ଆନିଦାଦିଡ଼୍ ସେଙ୍ଗେ ନିଷ୍ଟୁର୍ ନୁ ଗଲକ୍ ବ୍ୟବହାର୍ ମାଡ଼୍ତଣ୍ଡ୍, ଅଡ଼ାୱୁ ପୁନେ ଜନମ୍ ଆତ୍ତେ ପିଲାକିଙ୍କ୍ ହାୱ୍କାନ୍ ସେଙ୍ଗେ ଅଡ଼୍କିଂଙ୍କ୍ ବାୟିଦେ ନେହେତାନଙ୍କ୍ ଗଟ୍ କେତ୍ତଣ୍ଡ୍ । 20ଆଦ୍ ସମୟ୍ତେ ମୋଶାଲ୍ ଜନମ୍ ଆତ୍ତଣ୍ଡ୍, ଅଣ୍ଡ୍ ଗାଟି ସୁନ୍ଦର୍ ମାତ୍ତଣ୍ଡ୍ । ଇଶ୍ୱର୍ ମୁଣ୍ଡ୍ ନେଲ୍ଞ୍ଜ୍କ୍ ତାମ୍ ଲୋନ୍ ବାଦ୍କ୍ତଣ୍ଡ୍, 21ମେଣ୍ଡେ ବେସୁଟ୍ ଅଂକିଙ୍କ୍ ବାୟିଦେ ରହ୍ସିତ୍ତ୍ତଡ଼୍, ଫାରୋନ୍ ମାୟାଡ଼୍ ଅଂକିଙ୍କ୍ ନିଜେତ୍ ମାର୍ ଲେକାମ୍ ପଡ଼୍ପ୍ତେ । 22ମୋଶାଲ୍ ମିଶର୍ତେ ସାରେ ବିଦ୍ୟାତାଗ୍ ଶିକିତ୍ ଆସ୍, ଅନ୍ୱାଦ୍ ଗଟ୍ ନୁ ପାଡ଼ିୟିଦାଗ୍ ମହାନ୍ ବ୍ୟକ୍ତି ଲେକାମ୍ ପରିଚିତ ଆତ୍ତଣ୍ଡ୍ ।”
23“ବେସୁଟ୍ ମୋଶାନ୍ ବୟସ୍ ଚାଲିଶ୍ ହେଣ୍ଡ୍କ୍ ଆତ୍ତେ, ଅଣ୍ଡ୍ ତାନ୍ ଇସ୍ରାଏଲ୍ ବିଶ୍ୱାସୀଡ଼୍ ଦାଦାଲ୍ଡ଼୍ ବେଦ୍ପୁଟୁଙ୍କ୍ ବ୍ୟବହାର୍ ମାଡ଼ୁତଡ଼୍, ଆଦ୍ ପୁନ୍ଦାନ୍ ମାଇଦିଙ୍କ୍ ଇଚ୍ଛା ମାଡ଼୍ତଣ୍ଡ୍ । 24ଅଡ଼୍ ଲୋପେଙ୍କ୍ ଅର୍ତୁଙ୍କ୍, ୱେରଣ୍ଡ୍ ମିଶର୍ତେ କାରାପ୍ ବ୍ୟବହାର୍ ମାଡ଼ାନାଦ୍ ଉଡ଼ି, ମୋଶଲ୍ ଅଂକିଙ୍କ୍ ରକ୍ଷା ମାଡ଼ାନ୍ ସେଙ୍ଗେ ମିସରୀୟ ନାରୁଙ୍କ୍ ପ୍ରତିଶଦ୍ ଆସ୍ ଅଂକିଙ୍କ୍ ହାୱ୍କ୍ତଣ୍ଡ୍ । 25ଅନ୍ ତଡ଼୍ ଇଶ୍ୱର୍ ଜେ ତାମ୍ ନାରୁଡ଼୍କିଂଙ୍କ୍ ମୁକ୍ତି ମାଡ଼ୁତଣ୍ଡ୍, ଇଦ୍ ଆ ବିଶ୍ୱାସୀଡ଼୍ ଦାଦାଲଡ଼୍ ବୁଜେମ୍ଆତ୍ତଡ଼୍ ଇଞ୍ଜ ଅଣ୍ଡ୍ ହାଲ୍ସି ମାତ୍ତଣ୍ଡ୍, ବାତେଙ୍କ୍ ଇତ୍କେ ଅଡ଼୍ ବୁଜେମ୍ ଆୟ୍ୟଡ଼୍ । 26ମେଣ୍ଡନ୍ଦିନେ ଅଣ୍ଡ୍ ଇର୍ୱୁଡ଼୍ ଇସ୍ରାଏଲୀୟ ଦାଦାଲଡ଼୍ ଗଲ୍କ୍ ଆଦାନାଦ୍ ଉଡ଼୍ତଣ୍ଡ୍ ନୁ ଅଡ଼୍କିଂଙ୍କ୍ ଶାନ୍ତି ମାଡ଼ାନଙ୍କ୍ କେତ୍ତନ୍ । ଅଣ୍ଡ୍ କେତ୍ତଣ୍ଡ୍, ‘କେଞ୍ଜାଟ୍, ମିଡ଼୍ ଇର୍ୱୁଡ଼୍ ତ ଇସ୍ରାଏଲୀୟ ନାରୁଡ଼ି । ବାତେଙ୍କ୍ ଇଦ୍ ରକମ୍ ପ୍ରତିଶଦ୍ ମାଡ଼ୁତିଡ଼୍ ?’ 27ବାତେଙ୍କ୍ ଇତ୍କେ ବେନ୍ ନାରୁଡ଼୍ ମେଣ୍ଡ୍ଅଡ଼୍ତିଙ୍କ୍ କାରାପ୍ ବ୍ୟବହାର୍ ମାଡ଼ମାତ୍ତଣ୍ଡ୍, ଅଣ୍ଡ୍ ମୋଶାଙ୍କ୍ ତୁର୍ସି କେତ୍ତଣ୍ଡ୍, ‘ମା ପର୍ର ନିକିଂଙ୍କ୍ ବେନ ଶାସନ୍ କର୍ତାଲ୍ ନୁ ବିଚାର୍ପତି ମାଡ଼୍ତଣ୍ଡ୍ ? 28ନିନେ ବେଲା ମିଶର୍ତେ ନାରୁଙ୍କ୍ ହାୱ୍କ୍ତି, ନାକିଂଙ୍କ୍ ବାତେ ଆଦେରକମ୍ ହାୱ୍କାଙ୍କ୍ ଇଚ୍ଛା ମାଡ଼ୁତି ?’ 29ମୋଶାଲ୍ ଇଦ୍ କେଞ୍ଜି ମିସର୍ ଦେଶ୍ ମିର୍ତଣ୍ଡ୍ ନୁ ମିଦିୟୋନ୍ ଦେଶ୍ତାଗ୍ ମାତ୍ତଣ୍ଡ୍ । ଆଗେ ଅନାୱୁ ଇର୍ୱୁଡ଼୍ ମାର୍କ୍ ଜନମ୍ ଆତ୍ତଡ଼୍ ।”
30“ଚାଲିଶ୍ ହେଣ୍ଡ୍କ୍ ଆତ୍ତେ ପେର୍କେ ସୀନୟ ମେଟେତ୍ ଗାରେ ଉସ୍କ ନେଲ୍ତାଗ୍ ନିଡ଼୍ତାନ୍ ପଦ୍ଲେତ୍ ତାଗ୍ ନିଡ଼୍ତାନାଦ୍ କିସ୍ ଲୋପେ ଇଶ୍ୱର୍ତେ ୱେରଡ୍ ଦୂତ୍ ମୋଶାଙ୍କ୍ ଦର୍ଶନ୍ ଇତ୍ତେ । 31ମୋଶାଲ୍ ଆଦ୍ ଦୃଶ୍ୟ ଉଡ଼ି କାବା ଆତ୍ତଣ୍ଡ୍, ମେଣ୍ଡେକେନ୍ ସାୟେ ଉଡ଼ାନଙ୍କ୍ ବକେତ୍ ଆଦାନ୍ ୱେଲେ ଅଣ୍ଡ୍ ପ୍ରବୁନାଦ୍ ବାକ୍ୟ କେଞ୍ଜ୍ତଣ୍ଡ୍, 32‘ନାନ୍ ମିଇ ଆନିଦାଦି ଅବ୍ରାହାମ୍, ଇସ୍ହାକ୍ ନୁ ଯାକୁବ୍ତେ ଇଶ୍ୱର୍ ।’ ମୋଶାଲ୍ ୱେର୍ରେସ୍ ୱାଡ଼୍କ୍ତଣ୍ଡ୍ ମେଣ୍ଡେ ଉଡ଼ାନଙ୍କ୍ ସାହାସ୍ ମାଡ଼ଣ୍ଡ୍ ।” 33ତାନ୍ପେର୍କେ ପ୍ରବୁ ଅଂକିଙ୍କ୍ କେତ୍ତଣ୍ଡ୍, “ନିୟାୱୁ ହେର୍ପୁକ୍ ଟେଣ୍ଡେ, ବାତେଙ୍କ୍ ଇତ୍କେ ନିମ୍ ବେଗେ ନିତ୍ତିନ୍, ଆଦ୍ ବୂମ୍ ପବିତ୍ର ପଡ଼୍ୟେ । 34ମିସର୍ତାଗ୍ ନାନ୍ ନାୱଡ଼୍ ନାରୁଡ଼୍କ୍ କଷ୍ଟ ପାଏମ୍ଆଦାନାଦ୍ ଉଡ଼୍ତାନ୍ । ନାନ୍ ଅଡ଼ାଦ୍ କେୟାନାଦ୍ କେଞ୍ଜ୍ତାନ୍ ମେଣ୍ଡେ ଅଡ଼୍କିଂଙ୍କ୍ ଉଦ୍ଦାର୍ ମାଡ଼ାନଙ୍କ୍ ମଦଲ୍ ୱାତ୍ତାନ୍ । ଇଞ୍ଜେ ୱାଡ଼େ, ନାନ୍ ନିକିଂଙ୍କ୍ ମିସର୍ ଦେଶ୍ ରହତିତାନ୍ ।”
35“ବେନ୍ ମୋଶାଲ୍ ଇସ୍ରାଏଲୀୟଡ଼୍ ପରିହାସ୍ ମାଡ଼ିମାତ୍ତଡ଼୍ ଅଂକିଙ୍କ୍ ଅଡ଼୍ ପାଚ୍ରାମାଡ଼୍ତଡ଼୍, ‘ମା ପର୍ର ନିକିଂଙ୍କ୍ ବେନ ଶାସନ୍ କର୍ତାଲ୍ ନୁ ବିଚାର୍ପତି ମାଡ଼୍ତଣ୍ଡ୍ ?’ ବାତେଙ୍କ୍ ଇତ୍କେ ଇଶ୍ୱର୍ ଅଂକିଙ୍କ୍ ନିଡ଼୍ତାନାଦ୍ ପଦ୍ଲେତ୍ ବକେତ୍ ଦର୍ଶନ୍ ଇସ୍ମାନ୍ଦାନ୍ ଦୂତନ୍ ସାହାଯ୍ୟତେ ନାରୁଡ଼୍କିଂଙ୍କ୍ ଶାସନ୍ ମାଡ଼ାନଙ୍କ୍ ନୁ ଅଡ଼୍କିଂଙ୍କ୍ ଉଦ୍ଦାର୍ ମାଡ଼ାନଙ୍କ୍ ରହତଣ୍ଡ୍ ।” 36ଅଣ୍ଡ୍ ମିସର୍ ଦେଶ୍ତାଗ୍ ନୁ ଏର୍ରେରଙ୍ଗ୍ ସାୱ୍ଡ଼େତାଗ୍ ନାର୍ଗେ ଅଦ୍ବୁତ୍ ନୁ ଆଶର୍ଯ୍ୟ ପାଡ଼୍ୟି ତଅସ୍ ନାରୁଡ଼୍କିଂଙ୍କ୍ ମିସର୍ତାଗାଙ୍କ୍ ବାୟିଦେ ପେସ୍ପି ତାତ୍ତଣ୍ଡ୍, ଚାଲିଶ୍ ହେଣ୍ଡ୍କ୍ ଯାକ ମରୁବୁମ୍ତାଗ୍ ଅଡ଼୍କିଂଙ୍କ୍ ହାର୍ ତଅତଣ୍ଡ୍ । 37ମୋଶାଲ୍ ନିଜେ ଇସ୍ରାଏଲ୍ତେ ବାବବାଦୀ ନାରୁଡ଼୍କିଂଙ୍କ୍ କେସ୍ମାତ୍ତଣ୍ଡ୍, “ଇଶ୍ୱର୍ ନାକିଂଙ୍କ୍ ବେଲା ରହତଣ୍ଡ୍, ଆଦେ ରକମ୍ ମିଇ ବକେତ୍ ୱେରଣ୍ଡ୍ ଦାଦାଲଡ଼୍ ରହତିତଣ୍ଡ୍, ଅଣ୍ଡ୍ ମିଇ ନାରୁଡ଼୍ ଲୋପେଙ୍କ୍ ୱେରଣ୍ଡ୍ ତାମୁସ୍ ଆଦ୍ତନ୍ ।” 38ଆଦ୍ନାଣ୍ଡ୍ ଆ ମୋଶାଲ୍ ଉସ୍କ ନେଲ୍ତାଗ୍ ଗୁଡ଼ିମାନ୍ଦାନ୍ ଇସ୍ରାଏଲୀୟ ନାରୁଡ଼୍ ତଡ଼୍ ମାତ୍ତଣ୍ଡ୍, ଅଣ୍ଡ୍ ସୀନୟ୍ ମେଟେତାଗ୍ ମାନ୍ ଆନିଦାଦିଡ଼୍ ତଡ଼୍ ନୁ ଅନ୍ତଡ଼୍ ଗଟ୍ ତିର୍ୟମାନ୍ଦାନ୍ ଦୂତ ମାତ୍ତଣ୍ଡ୍ ନୁ ମା ଗାର୍ରେ ତୁହୁସାନ୍ ମାଇଦିଙ୍କ୍ ଅଣ୍ଡ୍ ଇଶ୍ୱର୍ତାଗାଙ୍କ୍ ଜିୱେତ୍ ବାକ୍ୟ ଗ୍ରହନ୍ ମାଡ଼୍ତଣ୍ଡ୍ ।
39“ବାତେଙ୍କ୍ ଇତ୍କେ ମାୱଡ଼୍ ଆନିଦାଦିଡ଼୍ ଅନ୍ ଗଟି କେଞ୍ଜଡ଼୍, ଅଡ଼୍ ଅଂକିଙ୍କ୍ ପାସ୍କି ମିସର୍ତାଗ୍ ମାଲ୍ସ୍ ଆଦାନଙ୍କ୍ ଇଚ୍ଛା ମାଡ଼୍ତଡ଼୍ । 40ଆଦିଙ୍କ୍ ଅଡ଼୍ ହାରୋଣତିଙ୍କ୍ କେତ୍ତଡ଼୍, ‘ବେସ୍କ୍ ଦେୟାକ୍ ପୁତ୍ଲାମ୍ ତିଆର୍ ମାଡ଼ିମ୍ । ମାକିଂଙ୍କ୍ ମିସର୍ ଦେଶ୍ତାଗାଙ୍କ୍ ପେସ୍ପି ତାତ୍ତେ ମୋଶାଲ୍ ବେକେ ଆତ୍ତଣ୍ଡ୍, ଆଦ୍ ମାମ୍ମେ ପୁନମ୍ ।’ 41ଆସୁଟେ ଆଗେ ଅଡ଼୍ ଅଣ୍ଡୟ୍ ଗଡ୍ପିଲେ ପୁତ୍ଲାମ୍ ତିଆର୍ ମାଡ଼୍ତଡ଼୍ ନୁ ତାନ୍ ଲେକାମ୍ତେ ପୁଜେ ମାଡ଼୍ତଡ଼୍ । ମେଣ୍ଡେ ନିଜେ ତିଆର୍ ମାଡ଼୍ତେ ପୁତ୍ଲାମ୍ତେ ସମ୍ମାନ୍ ସେଙ୍ଗେ ଅଣ୍ଡୟ୍ ବଜି ମାଡ଼୍ତଡ଼୍ । 42ଆଦିଙ୍କ୍ ଇଶ୍ୱର୍ ଅଡ଼୍ ସେଙ୍ଗେ କପାମ୍ ଆତ୍ତଣ୍ଡ୍ ନୁ ଅଡ଼୍କିଂଙ୍କ୍ ସ୍ୱର୍ଗତାଗ୍ ମାନ୍ଦାନ୍ ଉକାକିଙ୍କ୍ ଉପାସନା ମାଡ଼ାନଙ୍କ୍ ୱିଡ଼୍ସିତ୍ତଣ୍ଡ୍ । ଇଦ୍ ବିଷୟ୍ତେ ବାବବାଦୀଡ଼ାଦ୍ ବଇତାଗ୍ ଲେକାମିନ୍ଦେ, ‘ହୋ ଇସ୍ରାଏଲ୍ ବଂଶତଡ଼୍ ! ଉସ୍କ ନେଲ୍ତାଗ୍ ଚାଲିଶ୍ ହେଣ୍ଡ୍କ୍ ଯାକ ମିଡ଼୍ ନା’ ସେଙ୍ଗେ ପଶୁ ବଲି ନୁ ହୋମବଲି ହିୱକଟ୍ ମାତ୍ତିଡ଼୍ । 43ବାତେଙ୍କ୍ ଇତ୍କେ ମିଡ଼୍ ପୁଜା ମାଡ଼ାନଙ୍କ୍ ବେନ୍ ପୁତ୍ଲାକିଙ୍କ୍ ତିଆର୍ ମାଡ଼ିମାତ୍ତିଡ଼୍, ଆଦ୍ ମାଲିକ୍ତେ ତମ୍ବୁ ନୁ ଉକାମ୍ ଦେୟାମ୍ ରମ୍ପା ପୁତ୍ଲାତିଙ୍କ୍ କାଞ୍ଜୀ ହତ୍ତିଡ଼୍ । ଆଦିଙ୍କ୍ ନାନ୍ ମିକିଂଙ୍କ୍ ବାବିଲୋନ୍ ଦେଶ୍ତେ ମେଣ୍ଡନ୍ପାକ୍ ରହତିତାନ୍ ।”
44ଉସ୍କ ନେଲ୍ତାଗ୍ ମାନ୍ ଆନିଦାଦିଡ଼୍ ତଡ଼୍ ଇଶ୍ୱର୍ତେ ପବିତ୍ର ତମ୍ବୁ ସାକ୍ଷ୍ୟ । ଇଶ୍ୱର୍ ମୋଶାଲ୍ ବେଲା ତିଆର୍ ମାଡ଼ାଙ୍କ୍ କେସ୍ମାତ୍ତଣ୍ଡ୍ ନୁ ମୋଶାଙ୍କ୍ ବେଦ୍ ନକ୍ସା ତଅସ୍ମାତ୍ତଣ୍ଡ୍, ଇଦ୍ ଆଦେରକମ୍ ତିଆର୍ ଆସ୍ ମାତ୍ତେ । 45ପେର୍କେ ମାନ୍ ଆନିଦାଦିଡ଼୍ ଅଡ଼୍ ବାବାଲଡ଼ାଗାଙ୍କ୍ ଦର୍କି ମାନ୍ଦାନ୍ ଆଦ୍ ତମ୍ବୁତିଙ୍କ୍ ଜିହୋଶୁୟନ୍ ତଡ଼୍ କାଞ୍ଜୀ ମୁନ୍ନେ ଆଦ୍ତଡ଼୍ ନୁ ଇଶ୍ୱର୍ ତଲିମାନ୍ଦାନ୍ ବାଗାତ୍ ଅଣଯିହୁଦିଡ଼୍ଡ଼ାଦ୍ ଦେଶ୍ ଅଦିକାର୍ ମାଡ଼୍ତଡ଼୍ । ଦାଉଦନ୍ ଦିନାମ୍ ଯାକ ଆଦ୍ ଆଗେ ମାତ୍ତେ । 46ଅଣ୍ଡ୍ ଇଶ୍ୱର୍ତେ ଅନୁଗ୍ରହ ନାରୁଣ୍ଡ୍ ହାସ୍ ମାତ୍ତଣ୍ଡ୍, ଅଣ୍ଡ୍ ପରମେଶ୍ୱର୍ତିଙ୍କ୍ ଯାକୁବ୍ ଇଶ୍ୱର୍ତେ ମାଇଦିଙ୍କ୍ ଅଣ୍ଡୟ୍ ମନ୍ଦିର୍ ତିଆର୍ ମାଡ଼ାନଙ୍କ୍ ଗଟ୍ ମାଡ଼୍ତଣ୍ଡ୍ । 47ଇତ୍କେ ପେର୍କେ ଆ ମନ୍ଦିର୍ ଶଲୋମନ୍ ତିଆର୍ ମାଡ଼୍ତଣ୍ଡ୍ । 48“ଆଗେକ୍ବା ସାରେତିଙ୍କ୍ ବେଡ଼୍ୟେ ଇଶ୍ୱର୍ ନାରୁଡ଼୍ ମାଡ଼୍ତେ ଲୋକିନାଗ୍ ମାନଣ୍ଡ୍ । ଇଦ୍ ବିଷୟ୍ ବାବବାଦୀଡ଼୍ ଲେକିମିନ୍ଦେଡ଼୍; 49‘ପ୍ରବୁ କେତ୍ତଣ୍ଡ୍, ସ୍ୱର୍ଗ ନା’ ସିଂହାସନ୍ ନୁ ପୃତିବି ନାୱାଦ୍ ଡେକେତ୍ କୁତୁଲ୍ । ମିଡ଼୍ ନା ମାଇଦିଙ୍କ୍ ବେସତ୍ ଲୋନ୍ ତିଆର୍ ମାଡ଼ିତିଡ଼୍ ? ନାନ୍ ରହମାନ୍ ସେଙ୍ଗେ ପଡ଼୍ୟେ ବେଗେ ? 50ଇୱୁ ସାରେ ବିଷୟ୍ ବାତ୍ ନାନ୍ ନିଜେ ତିଆର୍ ମାଡ଼ନ୍ ?”
51ସ୍ତିଫାନ୍ ମେଣ୍ଡେ କେତ୍ତଣ୍ଡ୍, “ମିଡ଼୍ ବେସର୍ ଜିଦ୍ତଡ଼ି ! ମିୱାଦ୍ ହୃଦୟ୍ ବେସର୍ ଅସୁନ୍ନତ, ଇଶ୍ୱର୍ତେ ବାକ୍ୟ ସେଙ୍ଗେ ମିଡ଼୍ ବେସର୍ ବାୟିରାଲଡ଼ି ! ମିଡ଼୍ ଟିକ୍ ମିୱଡ଼୍ ଆନିଦାଦିଡ଼୍ ଲେକାମ୍, ମିଡ଼୍ ସାରେଦାମ୍ ପବିତ୍ର ଆତ୍ମାତିଙ୍କ୍ ବିରୋଦ୍ ମାଡ଼ିତିଡ଼୍ । 52ବାବବାଦୀଡ଼୍ ଲୋପେଙ୍କ୍ ବେନଙ୍କ୍ ମିୱଡ଼୍ ଆନିଦାଦିଡ଼୍ ତାଡ଼ନା ମାଡ଼୍ୱେ ମାତ୍ତଡ଼୍ କି ? ବେନଡ଼୍ ଆଦ୍ ଦାର୍ମିକ୍ ନାରୁଣ୍ଡ୍ ୱାଦାନ୍ ବିଷୟ୍ ମୁନେଙ୍କ୍ କେସ୍ମାତ୍ତଡ଼୍, ଅଡ଼୍କିଂଙ୍କ୍ ଅଡ଼୍ ହାୱ୍କ୍ତଡ଼୍; ଇଞ୍ଜେ ମିଡ଼୍ ଅଂକିଙ୍କ୍ ଶତ୍ରୁଡ଼୍ କାୟିଦେ ସମର୍ପନ୍ ମାଡ଼ି ହାୱ୍କ୍ତିଡ଼୍ । 53ମିଡ଼୍ ଦୂତଡ଼୍ ହିତ୍ତାଦ୍ ଇଶ୍ୱର୍ତେ ନିତିନିୟମ୍ ସାରେ ପାଏମ୍ଆତ୍ତିଡ଼୍, ଆଗେକ୍ବା ଆଦିଙ୍କ୍ ମୋଶାନ୍ ନିୟମ୍ ପାଲନ୍ ମାଡ଼୍ୱିଡ଼୍ ।”
ସ୍ତିଫାନ୍ତିଙ୍କ୍ କାଲ୍କିନ୍ତଡ଼୍ ରେହ୍ସ୍ ଆୱ୍କ୍ତଡ଼୍
54ବେଡ଼ିୟ୍ମିଟିଙ୍କ୍ତେ ସଦସ୍ୟଡ଼୍ ସ୍ତିଫାନ୍ତେ ବାଷନ୍ କେଞ୍ଜି ଗାଟି କପାମ୍ ଆତ୍ତଡ଼୍, ମେଣ୍ଡେ ଅଡ଼୍ ଅନ୍ ସେଙ୍ଗେ ପାଲ୍କ୍ କର୍କ୍ତଡ଼୍ । 55ବାତେଙ୍କ୍ ଇତ୍କେ ସ୍ତିଫାନ୍ ପବିତ୍ର ଆତ୍ମାତେ ଗୌରବମୟ ଆସ୍ ସ୍ୱର୍ଗତା ଉଡ଼୍ତଣ୍ଡ୍ ନୁ ଇଶ୍ୱର୍ତେ ମହିମା ନୁ ଜିସୁଙ୍କ୍ ତିନ୍ଦେପାକ୍ ନିଶ୍ମାନ୍ଦାନାଦ୍ ଉଡ଼୍ତଣ୍ଡ୍ । 56ଅଣ୍ଡ୍ କେତ୍ତଣ୍ଡ୍, “ଉଡ଼ାଟ୍, ନାନ୍ ସ୍ୱର୍ଗତିଙ୍କ୍ କୁଲା ଆତ୍ତାଦ୍ ନୁ ନାରୁଣ୍ଡ୍ ପିଲେ ଇଶ୍ୱର୍ତେ ତିନ୍ଦେପାକ୍ ନିଶ୍ମାନ୍ଦାନାଦ୍ ଉଡ଼ୁତାନ୍ ।”
57ଗାଟି ଲେଙ୍ଗ୍ଦେ ମିଟିଙ୍ଗ୍ତେ ବେଡ଼୍ୟେ ନାରୁଡ଼୍ ଇଦ୍ ଗଟ୍ କେଞ୍ଜମ୍ ଇଞ୍ଜ କେୱ୍କିଙ୍କ୍ କାୟିକିନ୍ତଡ଼୍ ବନ୍ଦ୍ ମାଡ଼୍ତଡ଼୍ । ତାନ୍ପେର୍କେ ଅଡ଼୍ ଅଣ୍ଡୟ୍ତଡ଼୍ ଅନ୍ ବକେତ୍ ୱାତ୍ତଡ଼୍ । 58ସହରତେ ବାୟିଦେ ଅଂକିଙ୍କ୍ ଲାଗି ଅସ୍, ଅନ୍ ପର୍ କାଲ୍କ୍ ହେସି ହାୱକ୍ତଡ଼୍ । ମିଚ୍ ସାକ୍ଷୀଡ଼୍ ଶାଉଲ୍ ପେଦେର୍ତଣ୍ଡ୍ ୱେରଣ୍ଡ୍ ଲେୟଣ୍ଡ୍ତେ ଡେକେତ୍ ବକେତ୍ ଅଡ଼ାୱୁ ସାରେ ଚକା ୱିଡ଼୍ସି ଆଞ୍ଜ୍ମାତ୍ତଡ଼୍ । 59ଅଡ଼୍ ସ୍ତିଫାନ୍ତେ ପର୍ କାଲ୍କ୍ ହେସାନ୍ ୱେଲେ ଅଣ୍ଡ୍ ପ୍ରବୁଙ୍କ୍ ପ୍ରାର୍ତନା ମାଡ଼ି କେତ୍ତଣ୍ଡ୍, “ପ୍ରବୁ ଜିସୁ, ନାୱାଦ୍ ଆତ୍ମାତିଙ୍କ୍ ଗ୍ରହନ୍ ମାଡ଼େ ।” 60ଅଣ୍ଡ୍ ମର୍ମିଣ୍ଡା ଉୱୁସ୍ ଗାଟି ଲେଙ୍ଗ୍ଦେ କେତ୍ତଣ୍ଡ୍, “ପ୍ରବୁ ! ଇଡ଼୍ ବିରୁଦ୍ତେ ଇଦ୍ ପାପ୍ ଏର୍କା ମାଡ଼୍ମାଟ୍ ।” ଇଦ୍ କେସ୍ ଅଣ୍ଡ୍ ଡଲ୍ତଣ୍ଡ୍ ।
Currently Selected:
ପ୍ରେରିତ 7: NTKaa20
Highlight
Share
Copy
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
