ଯୋହନ୍ 13
13
ଜିସୁ ଶିଷ୍ୟଡ଼ାଉ ଡେକାଙ୍କ୍ ନର୍ସିତ୍ତଣ୍ଡ୍
1ନିସ୍ତାର୍ ପାଣ୍ଡୁମ୍ ଆଦାନ୍ ମୁନେଙ୍କ୍ ଜିସୁ ଇଦ୍ ଜଗତ୍ତାଗାଙ୍କ୍ ବାବାନ୍ ଗାର୍ରେ ଆଦାନଙ୍କ୍ ଅନାଦ୍ ଦିନାମ୍ ଉପସ୍ଥିତ୍ ଆତ୍ତାଦ୍ ପୁଞ୍ଜ୍, ଜଗତ୍ ତାଗ୍ ମାନ୍ଦାନ୍ ନିଜେତ୍ ବେନ୍ ନାରୁଡ଼୍କ୍ ଅଣ୍ଡ୍ ପ୍ରେମ ମାଡ଼ି ୱାସମାତ୍ତନ୍, ଅଡ଼୍ ସାରେ ନାରୁଡ଼୍କ୍ ପ୍ରେମ ତିଆର୍ ମାଡ଼୍ତଣ୍ଡ୍ ।
2ମେଣ୍ଡେ ଜିସୁ ନାର୍କେତ୍ ବଜିତ୍ ୱେଲେ, ବେସୁଙ୍କ୍ ଶୟ୍ତାନ୍ ଶିମୋନ୍ତେ ମାର୍ ଇଷ୍କାରୀୟତିୟ ଯିହୁଦାନ୍ ଜିୱୁତେ ଜିସୁଙ୍କ୍ ଶତ୍ରୁଡ଼୍ କାଇଦେ ପସ୍ପିଦାନ୍ ସେଙ୍ଗେ ସଂକଳ୍ପ ତିଆର୍ ମାଡ଼ିମାତ୍ତଣ୍ଡ୍, 3ଆସୁଙ୍କ୍, ବାବାଲ୍ ଯେ ଅନ୍ କାଇଦେ ସାରେ କ୍ଷମତା ସମର୍ପନ୍ ମାଡ଼ି ମିନ୍ଦେନ୍ ନୁ ଅଣ୍ଡ୍ ଯେ ଇଶ୍ୱର୍ତେ କଞ୍ଜ୍ ୱାସ୍ମିନ୍ଦେନ୍, ମେଣ୍ଡେ ଇଶ୍ୱର୍ତାକେ ଆଞ୍ଜମିନ୍ଦେନ୍, ଆଦ୍ ପୁଞ୍ଜ୍ମାତ୍ତଣ୍ଡ୍ । 4ଆଦିଙ୍କ୍ ଜିସୁ ତିନ୍ଦାନ୍ ପଡ଼ିୟେ ତାଗାଙ୍କ୍ ତେଦି ତାନ୍ ସିଲାଟେଣ୍ଡି ୱେରଡ଼୍ ତୁୱାଲ୍ ଅସ୍ ଅଡ଼ାଦ୍ କଟି ବନ୍ଦନ୍ ମାଡ଼୍ତଣ୍ଡ୍ । 5ଆସୁଙ୍କ୍ ଜିସୁ କୁଣ୍ଡାନାଗ୍ ଏର୍ ତସ୍ତଣ୍ଡ୍, ମେଣ୍ଡେ ଶିଷ୍ୟଡ଼ାଉ ଡେକା ନର୍ସିସ୍ ଅନ୍ କଟି ବନ୍ଦନ୍ ମାଡ଼୍ତେ ତୁୱାଲ୍ତାଗ୍ ଉଞ୍ଜ୍ପାଙ୍କ୍ ପସ୍ପ୍ତଣ୍ଡ୍ । 6ଆସୁଙ୍କ୍ ଅଣ୍ଡ୍ ଶିମୋନ୍ ପିତର୍ତେ ପାକେ ୱାତ୍ତନ୍; ଅଣ୍ଡ୍ ଜିସୁଙ୍କ୍ କେତ୍ତାନ୍, ପ୍ରବୁ ନିମ୍ ନା ଡେକାଙ୍କ୍ ନର୍ସିତ୍ତିନ୍ ?
7ଜିସୁ ଅଂକିଙ୍କ୍ ଉତ୍ତର୍ ହିତ୍ତଣ୍ଡ୍, ନାନ୍ ବାତେଏ ମାଡ଼ୁତାନ୍, ଆଦ୍ ଇଞ୍ଜେ ମିଡ଼୍ ପୁନ୍ୱିଡ଼୍, ବାତେଙ୍କ୍ ଇତ୍କେ ପେର୍କେ ପୁନ୍ତିଡ଼୍ ।
8ପିତର୍ ଅଂକିଙ୍କ୍ କେତ୍ତଣ୍ଡ୍, ନିମ୍ ତ ବେସୁଙ୍କ୍ବା ନା ଡେକା ନର୍ସିୱିନ୍ । ଜିସୁ ଅଂକିଙ୍କ୍ ଉତ୍ତର୍ ହିତ୍ତନ୍, ଯଦି ନାନ୍ ନିକିଂଙ୍କ୍ ନର୍ୱନ୍, ଆଲେକେ ନାତଡ଼୍ ନିୱାଦ୍ ବାତେବା କାଇଲେ ଇଲେ ।
9ଶିମୋନ୍ ପିତର୍ ଅଂକିଙ୍କ୍ କେତ୍ତଣ୍ଡ୍, ପ୍ରବୁ, ମାତର୍ ନାୱାଦ୍ ଡେକା ଆୟ୍ୟ ନାୟାଉ କାଇକ୍ ନୁ ତାଲ୍ ମିକା ନର୍ସିମ୍ ।
10ଜିସୁ ଅଡ଼୍କିଂଙ୍କ୍ କେତ୍ତଣ୍ଡ୍, ବେନ ଏର୍ ମିଚ୍ ମିନ୍ଦେନ୍, ଅନାହୁ ଡେକା ନର୍ଦାନାଦ୍ ୱିଡ଼୍ସି ମେଣ୍ଡେ ବାତେଏ ଦର୍କାର୍ ଆୟ୍ୟ । ମିଡ଼୍ ସାରେତଡ଼୍ ଶୁଚି ବାତେଙ୍କ୍ ଇତ୍କେ ୱେରଣ୍ଡ୍ ଆୟ୍ୟ । 11ବାତେଙ୍କ୍ ଇତ୍କେ ବେନ ଅଂକିଙ୍କ୍ ଶତ୍ରୁଡ଼୍ କାଇଦେ ପସ୍ପିତନ୍, ଅଣ୍ଡ୍ ଅଂକିଙ୍କ୍ ପୁଞ୍ଜ୍ ମାତ୍ତନ୍, ଅଣ୍ଡ୍ କେତ୍ତଣ୍ଡ୍, ଅର୍ତୁଙ୍କ୍ ୱିଡ଼୍ସିତ୍କେ, ମିଡ଼୍ ସାରେତଡ଼ି ଶୁଚି ।
12 #
ଲୁକ ୨୨:୨୭. ତାନ୍ପେର୍କେ ଜିସୁ ଅଡ଼ାୱୁ ଡେକା ନର୍ସି ଅନ୍ ସିଲେ କେର୍ସ୍ ମେଣ୍ଡନ୍ ଦାମ୍ କୁଦ୍ତେୱେଲେ ଅଡ଼୍କିଂଙ୍କ୍ ପାଚ୍ରାମାଡ଼୍ତଣ୍ଡ୍, ନାନ୍ ମିଇ ମାଇଦିଙ୍କ୍ ବାତେଏ ମାଡ଼୍ତାନ୍, ଆଦ୍ ବାତେଏ ମିଡ଼୍ ବୁଜେମ୍ ଆତ୍ତିଡ଼୍ ? 13ମିଡ଼୍ ନାକ୍ ଗୁରୁ ନୁ ପ୍ରବୁ ଇଞ୍ଜ କାର୍ଙ୍ଗୁତିଡ଼୍, ଆଦ୍ ଲେକେତ୍, ବାତେଙ୍କ୍ ଇତ୍କେ ଅଣ୍ଡେ ତ ନାନ୍ । 14ମିଇ ଗୁରୁ ନୁ ପ୍ରବୁ ଆସ୍ ନାନ୍ ଯଦି ମିୟାୱୁ ଡେକା ନର୍ତାନ୍, ଆଲେକେ ମିଡ଼୍ ଆନ୍ତେ ନିଜେ ନିଜେ ଡେକା ନର୍ଦାନାଦ୍ ସାୟେ । 15ମିଡ଼୍ ନାକିଂଙ୍କ୍ ଏର୍କାମାଡ଼ାଙ୍କ୍ ଇଞ୍ଜ ନାନ୍ ଇଦ୍ଲେକାମ୍ ମାଡ଼୍ତାନ୍ । 16#ମାତିଉ ୧୦:୨୪; ଲୁକ ୬:୪୦; ଯୋହନ୍ ୧୫:୨୦.ନାନ୍ ସତ୍ କେତୁତାନ୍, ବେନବା ଦାସ ଅନ୍ ମାଲିକ୍ ତାଗାଙ୍କ୍ ବେଡ଼୍ୟନ୍ ଆୟନ୍; ପ୍ରେରିତନଡ଼୍ ତାନ୍ ପ୍ରେରନାକର୍ତା ନାଗାଙ୍କ୍ ବେନ ବେଡ଼୍ୟନ୍ ଆୟ୍ୟ । 17ଯଦି ମିଡ଼୍ ଆଦ୍ ସାରେ ପୁଞ୍ଜ୍, ଆଲେକେ ଆଦେଲେକାମ୍ ମାତ୍କେ ମିଡ଼୍ ଦନ୍ୟ ।
18ନାନ୍ ମିଇ ସାରେତଡ଼୍କ୍ ଇଦ୍ ଗଟ୍ କେଲନ୍; ବେନ୍ ଲେକାମ୍ ନାରୁଡ଼୍କ୍ ନାନ୍ ହେଞ୍ଚି ମିନ୍ଦେନ୍, ଆଦ୍ ନାନ୍ ପୁତ୍ତାନ୍; ବାତେଙ୍କ୍ ଇତ୍କେ ଦର୍ମଶାସ୍ତ୍ରତାଗ୍ ଇଦ୍ ବାକ୍ୟ ବେଦ୍ଲେକାମ୍ ସାରେ ଆଦ୍ତେ, ଆଦିଙ୍କ୍ ଇଦ୍ଲେକାମ୍ ଗଟେମ୍ ଆଦୁତ୍, ବେନ ନାୟାଦ୍ ଅନ୍ନ ତିନ୍ଦ୍ତନ୍, ଅଣ୍ଡ୍ ନା ବିରୁଦ୍ତେ ଲାତ୍ ତେହେତ୍ତଣ୍ଡ୍ । 19ଆଦ୍ ଗଟେମ୍ ଆଦାନ୍ ମୁନେଙ୍କ୍ ନାନ୍ ମିକିଂଙ୍କ୍ କେତୁତାନ୍ । ବେସୁଙ୍କ୍ ଆଦ୍ ଗଟେମ୍ ଆଦ୍ତେ, ମିଡ଼୍ ବିଶ୍ୱାସ୍ ମାଡ଼ିତିଡ଼୍ ଯେ, ନାନ୍ ବେନ ଅଣ୍ଡେ ନାନ୍ । 20#ମାତିଉ ୧୦:୪୦; ମାର୍କ ୯:3୭; ଲୁକ ୯:୪୮; ୧୦:୧୬.ସତ୍ ନାନ୍ ମିକିଂଙ୍କ୍ କେତୁତାନ୍, ଯେ ନା ପ୍ରେରିତ୍ ନାରୁଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍ ନାକିଂଙ୍କ୍ ଗ୍ରହନ୍ ମାଡ଼ିତନ୍ ନୁ ବେନ ନାକିଂଙ୍କ୍ ଗ୍ରହନ୍ ମାଡ଼ିତନ୍, ଅଣ୍ଡ୍ ନା ତ୍ରାଣକର୍ତ୍ତାଙ୍କ୍ ଗ୍ରହନ୍ ମାଡ଼ିତନ୍ ।
ବିଶ୍ୱାସ୍ ଗାତକ ବିଷୟ୍ତେ ଜିସୁନ୍ ଗଟ୍
(ମାତିଉ ୨୬:୨୦-୨୫; ମାର୍କ ୧୪:୧୭-୨୧; ଲୁକ ୨୨:୨୧-୨୩)
21ଜିସୁ ଇଦ୍ସାରେ ଗଟିକେତ୍ତେ ପେର୍କେ ଆତ୍ମାତାଗ୍ ଉଦ୍ବିଗ୍ନ ଆତ୍ତନ୍ ନୁ ବେନ୍ଲେକାମ୍ ସାକ୍ଷ୍ୟ ଇସ୍ କେତ୍ତନ୍, ସତ୍ ନାନ୍ ମିକିଂଙ୍କ୍ କେତୁତାନ୍, ମିୟାଗାଙ୍କ୍ ୱେରନ୍ ନାକିଂଙ୍କ୍ ଶତ୍ରୁଡ଼୍ କାଇଦେ ପସ୍ପିଦ୍ତନ୍ ।
22ଜିସୁ ବେନଙ୍କ୍ ଲକ୍ଷ ମାଡ଼ି କେତ୍ତଣ୍ଡ୍, ଆଦ୍ ବିଷୟ୍ତେ ଅତବୁଦି ଆସ୍ ଶିଷ୍ୟନଡ଼୍ ତାମ୍ତାମ୍ ଉଡାଙ୍କ୍ ପସ୍ପ୍ତ୍ତଡ଼୍, 23ଅଡ଼୍ ଆଗାଙ୍କ୍ ବେନ୍ ଶିଷ୍ୟଙ୍କ୍ ଜିସୁ ଗାଟି ପ୍ରେମ ମାଡ଼ମାତ୍ତନ୍, ଅନ୍ ଜିସୁନ୍ ଗାର୍ରେ କୁଦିମାତ୍ତଣ୍ଡ୍ । 24ଶିମୋନ୍ ପିତର୍ ଅଂକିଙ୍କ୍ ଶଙ୍କେତ ମାଡ଼ି କେତ୍ତଣ୍ଡ୍, ଅଣ୍ଡ୍ ବେନ ବିଷୟ୍ତେ କେତୁତନ୍, ଆଦ୍ କେଲ୍ମୁଟ୍ ।
25ଅଣ୍ଡ୍ ଆଦେଲେକାମ୍ କୁଦିମାଞ୍ଜ୍ ଜିସୁନ୍ ଗାର୍ରେୱାସ୍ ଆଡ଼୍ଗି ମାଡ଼୍କି କେତ୍ନ୍, ଅଣ୍ଡ୍ ବେନ ପ୍ରବୁ ?
26ଆସୁଙ୍କ୍ ଜିସୁ ଉତ୍ତର୍ କେତ୍ତଣ୍ଡ୍, ବେନ ସେଙ୍ଗେ ନାନ୍ ଇଦ୍ରୁଟିତିଙ୍କ୍ ମୁହୁସ୍ ନୁ ବେନଙ୍କ୍ ଆଦ୍ ଇଦ୍ତାନ୍, ଅଣ୍ଡ୍ । ଆଗାଙ୍କ୍ ଅଣ୍ଡ୍ ରଟିତିଙ୍କ୍ ମୁହୁସ୍ ଆଦ୍ଅସ୍ ଇଷ୍କାରୀୟତିୟ ଶିମୋନ୍ତେ ମାର୍ ଯିହୁଦାଙ୍କ୍ ହିତ୍ତନ୍ । 27ଅଣ୍ଡ୍ ରୂଟି ଇତ୍ତେ ୱେଲେ ଶୟ୍ତାନ୍ ଅନାଗ୍ ନେଙ୍ଗ୍ତେ । ଆଗାଙ୍କ୍ ଜିସୁ ଅଂକିଙ୍କ୍ କେତ୍ତଣ୍ଡ୍, ବାତେଏ ମାଡ଼ୁତିନ୍, ଆଦ୍ ଜାପେ ମାଡ଼େ । 28ବାତେଙ୍କ୍ ଇତ୍କେ ଅଣ୍ଡ୍ ବେନ୍ ଗଟ୍ତେ ଅଂକିଙ୍କ୍ ଇଦ୍ ଗଟ୍ କେତ୍ତଣ୍ଡ୍, ଆଗେ ବଜିତାଗ୍ କୁଦିମାନ୍ଦାନ୍ ନାରୁଡ଼ାଗାଙ୍କ୍ ବେନ ପୁନଡ଼୍ । 29ବାତେଙ୍କ୍ ଇତ୍କେ ଯିହୁଦାତାଗ୍ ଡାବ୍ ମୁନେ ମାନ୍ନାଙ୍କ୍, ପାଣ୍ଡୁମ୍ ସେଙ୍ଗେ ବାତେଏ ଆଦାନାଦ୍, ଆଦ୍ ଆସାନଙ୍କ୍ ବା ଦରିଦ୍ର ନାରୁଡ଼୍କ୍ ବାତେଏ ଦାନ ମାଡ଼ାଙ୍କ୍ ଜିସୁ ଅଂକିଙ୍କ୍ କେତ୍ତଣ୍ଡ୍ ଇଞ୍ଜ ବେନ ଏର୍କା ମାଡ଼୍ତଡ଼୍ ।
30ରୂଟିସୁଦୁଟ୍ ଆସ୍ମିକା ଅଣ୍ଡ୍ ଆସୁଙ୍କ୍ ଯାପେ ପେଇସ୍ ଆତ୍ତଣ୍ଡ୍, ଆସୁଙ୍କ୍ ଇକାଡ଼୍ ମାତ୍ତେ ।
ଜିସୁନ୍ ପୁନାଦ୍ ଗଟ୍
31ଅଣ୍ଡ୍ ପେଇସ୍ ଆତ୍ତେ ୱେଲେ ଜିସୁ କେତ୍ତଣ୍ଡ୍, ଇଞ୍ଜେ ନାରୁନ୍ ପିଲା ମହିମାନିତ ପ୍ରକାଶ୍ ଆତ୍ତେ ନୁ ଅନ୍ ତଡ଼୍ ଇଶ୍ୱର୍ ମାହିମାନିତ ଆତ୍ତେ । 32ଯଦି ଇଶ୍ୱର୍ ଅନାଗେ ମହିମାନିତ ଆତ୍ତଣ୍ଡ୍, ଆଲେକେ ଇଶ୍ୱର୍ ମିକା ନାରୁନ୍ପିଲ୍ ଅନାଗ୍ ମହିମାନିତ ମାଡ଼ିତନ୍, ମେଣ୍ଡେ ଯାପେ ଅଂକିଙ୍କ୍ ମହିମାନିତ ମାଡ଼ିତନ୍ । 33#ଯୋହନ୍ ୭:3୪.ଜିସୁ କେତ୍ତଣ୍ଡ୍ ପିଲାନଡ଼ି ନାନ୍ ମିତଡ଼୍ ମେଣ୍ଡେ ନାର୍ଗେ ଦିନାମ୍ ମାନନ୍ । ମିଡ଼୍ ନାକିଂଙ୍କ୍ ମେହେକିତିଡ଼୍, ମେଣ୍ଡେ ନାନ୍ ବେନ୍ ପଡ଼ିୟେତାଗ୍ ଆଦୁତାନ୍, ମିଡ଼୍ ଆଦ୍ପଡ଼ିୟେତାଗ୍ ଆଦ୍ ପାର୍ୱିଡ଼୍, ଇଦ୍ ନାନ୍ ବେଲା ଇହୁଦିନଡ଼କ୍ କେତ୍ତାନ୍, ଆଦେଲେକାମ୍ ନାନ୍ ମିକିଂଙ୍କ୍ କେତୁତାନ୍ । 34#ଯୋହନ୍ ୧୫:୧୨,୧୭; ୧ ଯୋହନ୍ 3:୨3; ୨ ଯୋହନ୍ ୧:୫.ମିଡ଼୍ ସାରେ ତଡ଼କିଙ୍କ୍ ପ୍ରେମ ମାଡ଼ାଟ୍, ଇଦ୍ ପୁଃନେ ଗଟ୍ ନାନ୍ ମିକିଂଙ୍କ୍ ଇସମିନ୍ଦେନ୍; ନାନ୍ ବେଦ୍ଲେକାମ୍ ମିକିଂଙ୍କ୍ ପ୍ରେମ ମାଡ଼୍ତାନ୍, ମିଡ଼୍ଆନ୍ନ୍ତେ ଆଦେଲେକାମ୍ ନିଜେ ନିଜେ ପ୍ରେମ ମାଡ଼ାନ୍ ଲେକାମ୍ । 35ଯଦି ମିୱାଦ୍ ମିଇ ମିଇ ଲୋପେ ପ୍ରେମ ମାତ୍କେ, ଆଲେକେ ମିଡ଼୍ ଯେ ନା ଶିଷ୍ୟ, ଇଦ୍ ସାରେତଡ଼୍ ଇଦିନ୍ ତଡ଼୍ ଗ୍ୟାତ ଆଦ୍ତିଡ଼୍ ।
ପିତର୍ତେ ଅସ୍ୱୀକାର୍ତେ ସୁଚନା
(ମାତିଉ ୨୬:୩୧-୩୫; ମାର୍କ ୧୪:୨୭-୩୧; ଲୁକ ୨୨:୩୧-୩୪)
36ଶିମୋନ୍ ପିତର୍ ଜିସୁଙ୍କ୍ ପାଚ୍ରା ମାଡ଼୍ତଣ୍ଡ୍, ପ୍ରବୁ, ନିମ୍ ବେଗା ଅଦୁତିନ୍ ? ଜିସୁ ଉତ୍ତର୍ ହିତ୍ତନ୍, ନାନ୍ ବେଗା ଆଦୁତାନ୍, ମିଡ଼୍ ଇଞ୍ଜେ ନା ପେର୍କେ ପେର୍କେ ଆଗେ ଆଦ୍ ପାର୍ୱିଡ଼୍, ବାତେଙ୍କ୍ ଇତ୍କେ ପାୟେ ଆଦ୍ତିଡ଼୍ ।
37ପିତର୍ ଅଂକିଙ୍କ୍ କେତ୍ତଣ୍ଡ୍, ପ୍ରବୁ, ନାନ୍ ଇଞ୍ଜେ ବାତ୍ତିଙ୍କ୍ ନି ପେର୍କେ ଆତ୍ତାଙ୍କ୍ ପାର୍ୱନ୍ ? ନାନ୍ ନି ସେଙ୍ଗେ ନିଜେତ୍ ଜିୱୁଣ୍ଡ୍ ହିଦାଙ୍କ୍ ତିଆର୍ ମିନ୍ଦେନ୍ ।
38ଜିସୁ କେତ୍ତଣ୍ଡ୍, ନିମ୍ ବାତେଏ ନା ସେଙ୍ଗେ ନିଜେତ୍ ଜିୱୁଣ୍ଡ୍ ହିଦ୍ତିନ୍ ? ସତ୍ ନାନ୍ ନିକିଂଙ୍କ୍ କେସ୍ମିନ୍ଦେନ୍, କର୍କ୍ କୁସ୍ୱେ ମୁନେଙ୍କ୍ ନିମ୍ ନାକିଂଙ୍କ୍ ମୁଣ୍ଡୁ ଦାମ୍ ଅସ୍ୱୀକାର୍ ମାଡ଼ିତିନ୍ ।
Currently Selected:
ଯୋହନ୍ 13: NTKaa20
Highlight
Share
Copy
Want to have your highlights saved across all your devices? Sign up or sign in
The New Testament in Koya Language © The Word for the World International and Koya Translation Samithi, Malkangiri, Odisha 2020
