लुका 9
9
यीशु बारा प्रेरिताह मोकेलने
(मत्ती 10:5-15; मरकुस 6:7-13)
1ओवतो यीशु बारा चेलाह हादिन ताह आखा बुतड़ाह एने बेमारीह सेटो केरनेन ताकेत एने आदिकार आप्यो। 2एने ताह बोगवानान हेरोग राज ने पारचार केरने, एने बेमारी वालाह हुदारनेन केरता मुकल्यो। 3यीशु ताह केयो, “वाटीन केरता कायच मा लिहो, नाह डेंगो, नाह थेयलो, नाह रूटो, नाह पोयशा, एने नाह दुय दुय डेगला। 4एने जाह वोर ज्या कामाह पुरो नाह केर लेते, ताह वोर ता गेराह मा सोड़हो, तुमू तीच गेर रिज्यो। 5#प्रेरितान काम 13:51; लुका 10:4-11जो कुण तुमूह हादि नाय, ता हेयरा माय रेन निकेलने बुखेत तुमरा पायाम लेटकेल रेजड़ो जिटेक दिज्यो, काय ता पोर पुरावो रेय।”
6तेवी चेला निकेलना एने गावा गावा हाजाली खुबेर होमलाड़ते, एने माणहाह हुदारतेन फिरते रेना।
हेरोदेस राजा विचाराम पोड़नो
(मत्ती 14:1-12; मरकुस 6:14-29)
7 #
मत्ती 16:14; मरकुस 8:28; लुका 9:19 एने देसान राजा हेरोदेस ज्यो होमलीन गाबराय गीयो; काहाकाय मोकतास जाणे कियेल एता, बपतीस्मा केरनार योहान मुरेल माय रेन जीव उठेल हे। 8एने मोकतास जाणे ज्य केया, “एलिया देखायेल हे।” एने थोड़ाक ज्यो केताला, “जुनाला जाणकारा माय रेन कुण तीबी जीव उठेल हे।” 9पुण हेरोदेस केयो, “योहानान ते मी मुंड काटाड़ दियेल ईतो, एवी ज्य कुण हे, ज्यान बारामाय ओहल्यु वातु होमेलथु?” एने हेरोदेस ताह देखणेन आसा किऱ्यो।
यीशु पाच एजार माणहाह रूटो खावाड़ ने
(मत्ती 14:13-21; मरकुस 6:30-44; योहान 6:1-14)
10ओवता प्रेरित वोलीन जो काय ता किरेल एता, यीशुह केय होमलाया, एने यीशु ताह आंगे केरीन बेतसेदा नावान एक गावाम ली गीयो। 11ज्य सोमजीन बिड़ तान पासाण चाल देनी, एने यीशु ती बिड़ीन माणहाह मिलनो, एने ताह बोगवानान राज ने वातु केणे बाज गीयो; एने जा हुदेरने होदताला ताह हुदाऱ्यो।
12जेवी दिह डेल ने बाज गीयो, ते बारा चेला आवीन यीशुह केया, “माणहाह मोकली दे, काय आहने पाहने गावा माय जाईन थोबती, एने रोटान बांदाबोस केरती, काहाकाय आपु न्या हुनाला जागाम हेते।”
13यीशु चेलाह केयो, “तुमूच न्याह खाणेन आपो,” चेला केया, “आमु फाय पाच रोटा एने दुय मासाह सोड़ीन उंजु काय नाह सोतो, पुण होव, केदी आमु जाईन ज्या आखा माणहान केरता रूटो वेचातो लेहु, ते एय सिकेह।” ता माणहे एदमीच पाच एजार एता। 14तेवी यीशु तान चेलाह केयो, “माणहाह पाचाह पाचाह केरीन पोंगेत माय बोहाड़ दिवो।”
15ता इहीचकेरीन केऱ्या एने आखाह बोहाड़ देना। 16तेवी यीशु ता पाच रोटा एने दुय मासा आथाम लिदो, एने हेरगान उगे देखीन बोगवानान दन्यवाद किऱ्यो, एने मुड़ मुड़ीन चेलाह आपते गीयो काय माणहाह वाटती। 17जेवी आखा माणहे खाईन आफरी गीया, एने चेला उगरेल रोटान टुकड़ा बारा टोपला बोरीन विशा।
पतरस यीशुह मसी हे केरीन स्वीकार ने
(मत्ती 16:13-19; मरकुस 8:27-29)
18जेवी यीशु हुनाला जागाम विन्ता केरने बाजरियेल ईतो, एने चेला ता हेऱ्या एता, तेवी यीशु चेलाह फुशो, “माणहे माहु काय केतेह?”
19 #
मत्ती 14:1,2; मरकुस 6:14,15; लुका 9:7,8 तान चेला जापाप आप्या, “योहान बपतीस्मा केरनार, एने कुण ते एलिया, एने थोड़ाक केतेह जाणकार माय रेन ईखेह जीव उठेल हे।”
20 #
योहान 6:68,69 यीशु ताह फुशो, “पुण तुमू माहु काय केतेह?”
पतरस जापाप आप्यो, “तु बोगवान मुकलेल मसी हे।”
यीशु तान मोतीन बाराम जाणाव केरने
(मत्ती 16:20-28; मरकुस 8:30–9:1)
21तेवी यीशु ताह केठीण उकुम आप्यो, “ज्य कुणीह मा किहो।” 22एने यीशु केयो, “माणहान बेटाख ने केरता जोरेवरी हे काय तो जुलूम दुख उखील लेय, एने डायडाया एने मुखी चाकऱ्या एने देरेमगुरू ताह नेचो सोमजीन मार देती, एने तो तीसरे दिह पुशो जीव उठी।”
23 #
मत्ती 10:38; लुका 14:27 उवतो यीशु आखाह केयो, जो कुण मार पासाण आवण्यो एय ते सोताह नाकारी, एने मार केरता मोरनेन तियार हे तो मार पासाण चाल देय। 24#मत्ती 10:39; लुका 17:33; योहान 12:25काहाकाय जो कुण तान जीव वोचाड़ने हुदेह, तो ताह गोमावी, पुण जो कुण मार केरता तान जीव गोमावी, तोच ताह वोचाड़ी। 25केदी माणुह आखी देरतीह तान ताबाम केर लेय, एने तान जीव गोमाव देय, नाहते दुख उखल्यो एय, ते ताह काय फायदो एय। 26जो कुण माहु एने मारी वातीह लाजवाय, माणहान बिटोख बी जेवी तान एने तान आबाख ने, एने चोखाला हेरोगदुतान बोड़ाय हिऱ्यो आवी, तेवी ताह बी लाजवाय। 27मी तुमूह खेरीच केथु, “जा न्या उब रेनाह, ता माय रेन काल्ला काल्ला ओहला हेते काय जाह वोर बोगवानान राज नाय देख लेती, ताह वोर मोतीन होवाद नाय चाखती।”
यीशुन वेह बोदेलने
(मत्ती 17:1-8; मरकुस 9:2-8)
28ज्यी वातुन आठ दिह्यान पासाण यीशु पतरस एने याकुब एने योहानाह आरही लेन विन्ता केरनेन केरता बोयड़ा पोर गीयो। 29जुलबुखे यीशु विन्ता केरनेच बाजरियेल ईतो, तेवी तान मुयान वेह बोदलाय गीयो, एने तान फाड़का दोवल्या एन पिपेलने बाज गीया। 30एने उचकाहुच मुसा एने एलिया, ज्या दुय एदमी यीशु हेऱ्या वातु केरने बाजरियेल एता। 31ज्या हेरगान बोड़ाय हेऱ्याच देखाना, एने यीशुन मोरनेन होमच्यो केरने बाजरियेल एता, जो बोगवानान योजना यरूशलेम माय पुरो एण्यो एतो। 32पतरस एने तान हाती निंद माय बोराय रियेल एता, एने जेवी ता जागना, तेवी तान बोड़ाय एने ता दुय एदम्याह, जा यीशु हेऱ्या उबरियेल एता, देख्या। 33जेवी ता यीशुन आहने रेन जाणे बाज गीया, ते पतरस यीशुह केयो, “एय मालीक, आपणो न्या रेणेन हाजो हे! ते आमु तीन तोम्बु बाणावहु, एक तार केरता, एक मुसान केरता, एने एक एलियान केरता।” पतरस नाह जाणतालो काय, काय केणे बाजरिनोह।
34तो ज्य केणेच बाजरियेल ईतो, ते एक वादेल आवीन ताह साव लेदो, एने जेवी वादलो चेलाह कोंडणे बाज गीया, ते बिय गीयो। 35#मत्ती 3:17; 12:18; मरकुस 1:11; लुका 3:22; 2 पतरस 1:17,18तेवी ता वादला माय रेन ज्यो बोल निकेलनो काय, “ज्यो मारो बिटोख एने मारो निवाड़ेल हे, ज्यान हुमलो।”
36ज्यो बोल एतास यीशु एखालोच देखानो, एने ता ठावकाच रेय गीया, एने जो काय दिखेल एता, तान काल्लीस वात ता दिह्या माय कुणीस नाह केया।
यीशु एक सोरा माय रेन बुतड़ाह निकालने
(मत्ती 17:14-18; मरकुस 9:14-27)
37एने दिहरे दिह जेवी यीशु तान तीन चेला हिऱ्यो बोयड़ा पोर रेन उतेरनो, ते एक मोटली बिड़ यीशुह आव मीलनी। 38एने दिखो, गेरदी माय रेन एक माणुह आयड़ीन केयो, “एय गुरू, मी तुवाह विन्ता केरथु, काय मार बेटाख पोर गीण केर, काहाकाय तो मारो एकुच बिटोख हे। 39एने होमेल, एक बुतड़ो ताह दिरेह, एने तो उचकाहुच आयड़ी उठेह: एने तो ताह ओहलो मोहदेलेह काय तो मुयाम रेन फेचे बोर लावेह; एने ताह केठीण देशा माय सोड़ेह। 40एने मी तारा चेलाह विन्ता किरेल काय बुतड़ाह निकाले, पुण ता नाह निकाल सेक्या।”
41यीशु ताह जापाप आप्यो, “एय अविश्वासी, एने पिटारा माणहे, मी केवीह वोर तुमू हिऱ्यो रेह, एने तुमरी वेठुह? तारा सोराह न्या लेन आव।”
42तो सोरो आवणेच बाजरियेल ईतो काय बुतड़ो ताह आसटीन मोहदेल्यो, पुण यीशु बुतड़ाह दोपकाड्यो एने सोराह हुदारीन तान आबाख होप दिनो। 43तेवी आखा माणहे बोगवानान मोटली ताकेत देखीन बोंगलाय गीया।
यीशु तान मोतीन दुसरी वार जाणाव केरने
(मत्ती 17:22-23; मरकुस 9:30-32)
पुण जेवी आखा माणहे यीशु किरेल ता कामाह देखीन बोंगलाय रियेल एता, तेवी तान चेलाह यीशु केयो, 44“तुमू आखा ज्यी वातीह हास केरीन हुमलो, काहाकाय मी माणहान बिटोख माणहान आथाम होपाय जाय।” 45पुण ज्यी वात तान सोमेज माय नाह आवी, एने ती ताह सोमेज माय नाय आवणे जुवे, तानकेरीन ता हेऱ्यी रेन आठावे रेनी, एने चेला ज्यी वातीन बाराम यीशुह फुसणेन बिताला।
आखाम रेन मोठो कुण?
(मत्ती 18:1-5; मरकुस 9:33-37)
46 #
लुका 22:24
ओवतो ता माय ज्यो बोलचाल एणे बाज गीयो, काय आपणे माय रेन मोठो कुण हे। 47पुण यीशु तान मोनान विचार जाण लिदो, एने एक सोराह लेन तान आहने उबो किऱ्यो, 48#मत्ती 10:40; लुका 10:16; योहान 13:20एने ताह केयो, “जो कुण मार नावाम ज्या सोराह स्वीकार किरेह, तो माहु स्वीकार किरेह; एने जो माहु स्वीकार किरेह, तो माहु मोकेलनाराह स्वीकार किरेह, काहाकाय जो तुमरे माय आखाम रेन आत्याम रेन आत्यो हे, तोच मोटलो हे।”
तो तुमरे विरोद माय नाह, पुण तुमरे उगे हे
(मरकुस 9:38-40)
49तेवी योहान केयो, “एय मालीक, आमु एक माणहाह तारो नाव लेन बुतड़ाह काड़तालो दिखेल, एने आमु ताह इहकेरीन मा किरहे केरीन रोक्या, काहाकाय तो आमरी हेऱ्यो मिलीन तार पासाण नाह आवीत।”
50यीशु योहानाह एने दिहरा चेलाह केयो, “ताह मा रूको, काहाकाय तो तुमरे विरोद माय नाह, पुण तुमरे उगे हे।”
सामरीयान माणहे यीशुन विरोद केरनु
51जेवी यीशुन हेरगाम उपेर जाणेन दिह पुरा एण्या एता, तेवी यीशु यरूशलेम माय जाणेन विचार पाको किऱ्यो। 52तेवी यीशु तान खोबर्याह ओंगाण मुकल्यो, एने ता सामरीयान एक गावाम गीया, काय तान केरता जागो तियार केरती। 53पुण तावाला माणहे ताह स्वीकार नाह केऱ्या, काहाकाय यीशु यरूशलेम माय जाणे बाजरियेल ईतो। 54#9:54 थोड़ाक लेख माय एलिया किरेल जुड़ेल हे।ज्य देखीन तान चेला याकुब एने योहान केया, “एय मालीक, जुगाम रेन आक्ठो पाड़ीन न्यान खेतेम एय, तानकेरीन आमु उकुम आबज्यो, ओहली तारी मोरजी हे काय?”
55पुण यीशु ताह दोपकाड्यो। एने केयो, तुमू नाह जाणते काय तुमू कोहला जीवान हेते।#9:55 थोड़ाक लेख माय आखरीन बाग जुड़ेल हे। काहाकाय मी माणहान बिटोख माणहान जीवाह खेतेम केरने नाह, पुण वोचाड़नेन केरता आयेल हे। 56एने यीशु एने तान चेला दिहरा गावाम जात रेना।
यीशुन अनुयायी
(मत्ती 8:19-22)
57जेवी यीशु तान चेला हेऱ्यो वाटे जाणे बाजरियेल ईतो, तेवी एक माणुह यीशुह केयो, “जा जा तु जाहे मी तार पासाण चाल देह।”
58यीशु ताह केयो, “कोल्यान देरे एने चीड़ान पांजरा रेतेह, पुण माणहान बेटाख ने केरता मुंड लीकाड़ ने बी जागो नाह सुतो।”
59एने यीशु दिहराह बी केयो, “मार पासाण आव।” पुण तो केयो, “एय मालीक, माहु पेल मार आबाख बुजणेन जाणे दे।”
60यीशु ताह केयो, “मुरेलाह तान मुरदाह बुजणे दे, पुण तु जाईन बोगवानान राज ने बाराम हाजाली खोबरीन पारचार केर।”
61उंजु एक केयो, “एय मालीक, मी तार पासाण आवुह, पुण पेल माहु मार गेरल्याह खुबेर आपणे दे।”
62यीशु ताह केयो, “जो कुण एला पोर आथ मेलीन पासाण फिरीन दिखेह, तो बोगवानान राज ने लायकीन नाह सोतो।”
Currently Selected:
लुका 9: NTNii2020
Highlight
Share
Copy
Want to have your highlights saved across all your devices? Sign up or sign in
The New Testament in Nahali Language © The Word for the World International and Nahali Vishwaseen Mandli, Toranmal, Dhadgaon, Nandurbar, Maharashtra 2020
