ମାତିଉ 20
20
ଅଙ୍ଗୁର୍ ବାଡ଼୍ନି କୁଲିୟା
1“ସାର୍ଗେ ରାଜି ଇନେସ୍, ଇଦାଂ ଆରେ ର ଉତର୍ମୁଡ଼୍ ୱେନାଟ୍ । ର ମାନାୟ୍ ଦିନେକ୍ ନାଣାଙ୍ଗେ ତା ଅଙ୍ଗୁର୍ ବାଡ଼୍ଦ କାମାୟ୍ କିଦେଙ୍ଗ୍ କୁଲିୟାରିଂ ଡେକ୍ତେଂ ହତାନ୍ । 2ଆରେ ହେୱାନ୍ କୁଲିୟାର୍ ହୁକେ ଦିନେକ୍ତିଂ ର ଦିନ୍ନି ରୁଣ୍ ନାଟ୍ଚି ହେୱାରିଂ ଜାର୍ ଅଙ୍ଗୁର୍ ବାଡ଼୍ଦ ପକ୍ତାନ୍ । 3ତା ପାଚେ ଦିନ୍ ନଅ ଗଣ୍ଟା ୱେଡ଼ାଲିଂ ବାଜାର୍ତ ହାଲ୍ଜି ହୁଡ଼୍ତାନ୍, ର କୁଦା ଲକୁ ପଲ୍ୟା ଆଜ଼ି ନିଲ୍ତାର୍ଣ୍ଣା ।” 4ହେୱାରିଂ ହେୱାନ୍ ଇଚାନ୍, ଏପେଙ୍ଗ୍ ପା ନା ଅଙ୍ଗୁର୍ ବାଡ଼୍ଦ ହାଲ୍ଜି କାମାୟ୍ କିୟାଟ୍, ମିଙ୍ଗ୍ ସମାନ୍ କୁଲି ହିଦ୍ନାଂ । 5ହେୱାର୍ ହାଲ୍ଜି କାମାୟ୍ତ ଲାଗାତାର୍ । ଦିନ୍ ବାର୍ଟା ଆରି ତିନ୍ଟା ୱେଡ଼ାଲିଂ ସମାନ୍ ହେ ଲାକେ ଆରେ କେତେକ୍ କୁଲିୟାରିଂ ତାହିୱାଜ଼ି କାମାୟ୍ତ ଲାଗାୟ୍ କିତାନ୍ । 6ମିଡ଼୍କାହାରେସ୍ ପାଞ୍ଚ୍ଟା ୱେଡ଼ାଲିଂ ଆରେ ରଗ ବାଜାର୍ତ ହାଲ୍ଜି ହୁଡ଼୍ତାନ୍, ଆରେ କେତେକ୍ ଜାଣ୍ ନିଲ୍ତାର୍ଣ୍ଣା । ହେୱାରିଂ ୱେନ୍ବାତାନ୍, “ୱେଡ଼ାବୁଡି କାମାୟ୍ କିୱାଦାଂ ଇନେକିଦେଂ ପଲ୍ୟା ସମୁ ନସ୍ଟ କିନାଦେରା ?” 7ହେୱାର୍ ଉତର୍ ହିତାର୍, ଇନେର୍ ତ ମାଂ କାମାୟ୍ତ କିୟ୍କିଦ୍ୱାତାର୍ଣ୍ଣା । ହେୱାନ୍ ହେୱାରିଂ ଇଚାନ୍, ଆୟେତ୍, ବାଟିଙ୍ଗ୍ ଏପେଙ୍ଗ୍ ୱିଜ଼ାକାଦେର୍ ନା ଅଙ୍ଗୁର୍ ବାଡ଼୍ଦ ହାଲ୍ଜି କାମାୟ୍ କିୟାଟ୍ ।
8“ହେ ଦିନ୍ ମିଡ଼୍କାହାରେସ୍ ଅଙ୍ଗୁର୍ ବାଡ଼୍ନି ହାଉକାର୍ ଗୁମୁସ୍ତାଙ୍ଗ୍ ଇଚାନ୍, କୁଲିୟାରିଂ କୁକା । ଇମ୍ଣାକାର୍ ୱିଜ଼ାର୍ତାଂ ପାଚେ କାମାୟ୍ ହାଙ୍ଗ୍ତାର୍ଣ୍ଣା, ଆଗେ ହେୱାରିଂ ହାଜ୍ରି ହିଆ । 9ହେବେଣ୍ଡାଂ ଇମ୍ଣାକାର୍ ପାଞ୍ଚ୍ଟା ୱେଡ଼ାଲିଂ କୁଲି କିଜ଼ି ମାଚାର୍, ହେୱାର୍ ୱାଜ଼ି ରଞ୍ଜାଙ୍ଗ୍ ରଞ୍ଜାଙ୍ଗ୍ ରୁପା ଟାକାଂ ଗାଟାତାର୍ ।” 10ଆରେ, ପର୍ତୁମ୍ ୱାଜ଼ି କିଜ଼ିମାଚି କୁଲିୟାର୍ ୱାଜ଼ି ଆଦିକ୍ ଗାଟାନାପ୍ ଇଞ୍ଜି ବାବିକିତାର୍, “ମତର୍ ହେୱାର୍ ପା ରଞ୍ଜାଙ୍ଗ୍ ରଞ୍ଜାଙ୍ଗ୍ ରୁପା ଟାକାଂ ଗାଟାତାର୍ । 11ହେୱାର୍ ହେୱାଙ୍ଗ୍ ଅଜ଼ି ହାଉକାର୍ ବିରୁଦ୍ତ ମାନ୍ଦୁକ୍ କିଜ଼ି ଇଚାର୍, 12ମ୍ଡିକାହାରେସ୍ ପାଞ୍ଚ୍ଟାତ କାମାୟ୍ ହାଙ୍ଗ୍ଜି ମାନି କୁଲିୟାର୍ ମତର୍ ରଗଣ୍ଟା କାମାୟ୍ କିତାର୍ଣ୍ଣା । ଆସେଙ୍ଗ୍ ଇ କାରାତ ୱେଡ଼ାବୁଡି କିତାପ୍, ଇ ହାଜ୍ରି ହିନି ୱେଡ଼ାଂ ହେୱାରିଂ ମାହୁଦାଂ ସମାନ୍ କିତ୍ତାନ୍ ।” 13ହାଉକାର୍ ହେୱାର୍ ବିତ୍ରେ ରକାନିଂ ଉତର୍ ହିଜ଼ି ଇଚାନ୍, “ଟଣ୍ଡେନ୍ ! ଆନ୍ ନିଂ ଅନ୍ୟାୟ୍ କିଦ୍ୱାତାଂନା; ଏନ୍ ଇନାକା ନା ହୁଦାଂ ର ଟାକାଂ କାଜିଂ ରାଜି ଆୱାଦାଂ ମାଚାୟ୍ ? 14ନିନ୍ଦାଂ ଇମ୍ଣାକା, ହେଦାଂ ଅଜ଼ି ହାଲା, ମାତର୍ ଇ ହାରିହାରା ଲକାଂ ପାନି ଲାକେ ହିଦେଂ କାଜିଂ ନା ମାନ୍ । 15ନା ଜାର୍ ଦନ୍ ଇନେସ୍ ହାର୍ ହେ ଏଲେଙ୍ଗ୍ କର୍ଚ କିଦେଙ୍ଗ୍ ଇନାକା ନା ଆଦିକାର୍ ହିଲୁତ୍ ? କି ଆନ୍ ଅଲପ୍ ଉଦାର୍ ଆତିଲେ ଏପେଙ୍ଗ୍ ୱିଜ଼ାଦେର୍ ନାଙ୍ଗ୍ ଆକର୍ ଆଦ୍ନାଦେର୍ ?”
16“ହେ ଲାକେ ପାଚେ ମାନି ମାନାୟ୍ ପର୍ତୁମ୍ ଆନାର୍ ଆରି ପର୍ତୁମ୍ ମାନି ମାନାୟ୍ ପାଚେ ଆନାର୍ ।”
ଜିସୁ ତା ହାକି ବିସ୍ରେ ତିନି ହଟ୍ କାଜିଂ ୱେଚ୍ଚାନ୍
(ମାର୍କ ୧୦:୩୨-୩୪; ଲୁକ ୧୮:୩୧-୩୪)
17ଜିସୁ ଜିରୁସାଲମ୍ତ ହାନି ହାସ୍ଦ ବାର ଚେଲାରିଂ ର ଲାଗେ କୁକ୍ଚି ଅଜ଼ି ବିନେ କିଜ଼ି ହେୱାରିଂ ଇଚାନ୍, 18“ହୁଡ଼ାଟ୍ ଆସେଙ୍ଗ୍ ଜିରୁସାଲମ୍ତ ହାନାସା । ହେବେ ମାନାୟ୍ ମାଜ଼ି ମୁଡ଼୍ ମାପ୍ରୁହେବାକିନାକାନ୍ ଆରି ଦରମ୍ ଗୁରୁର୍ କେଇଦ ହେଲାୟ୍ ଆନାନ୍ ହେୱାର୍ ହେୱାନିଂ ହାକି ଡାଣ୍ଡ୍ ହିନାର୍ । 19ତା ପାଚେ ପାର୍ତିକିୱି ଜିହୁଦିର୍ କେଇଦ ପିସ୍ତି ହିନାର୍ । ପାର୍ତିକିୱି ଜିହୁଦି ତାଙ୍ଗ୍ ଗ୍ଡାଇନାର୍, କରଡା ଇଡ଼୍ନାର୍ ଆରି କ୍ରୁସ୍ତ ଦୁପ୍ନାର୍ । ମାତର୍ ତିନି ଦିନ୍ ପାଚେ ହେୱାନ୍ ଆରେ ନିଙ୍ଗ୍ନାନ୍ ।”
ର ଆୟାତି ଗୱାରି
(ମାର୍କ ୧୦:୩୫-୪୫)
20ଇ ୱେଡ଼ାଲିଂ ଜେବ୍ଦିତି ଡକ୍ରୁହି ତା ରି ମେହିର୍ ହୁକେ ଜିସୁ ତାକେ ୱାଜ଼ି । ଜିସୁଙ୍ଗ୍ ଜୱାର୍ କିଜ଼ି ତାଙ୍ଗ୍ ଅଲପ୍ ଏନ୍ତାତ୍ ।
21ଜିସୁ ହେଦେଲିଂ ୱେନ୍ବାତାନ୍, “ଇନାକା ମାନ୍ କିନାୟା ?” ହେଦେଲ୍ ଇଚାତ୍, “ଏନ୍ ଏଚେକାଡ଼୍ଦ ମି ରାଜିତ ରାଜା ଆନାୟ୍, ନା ଇ ରି ହିମ୍ଣାକାଂ ନି ବୁଜ୍ଣି ଆରି ଡେବ୍ରି ପାଡ଼୍କା କୁଚିକିନାୟ୍ ଇଞ୍ଜି ବଲ୍ ହିଦା ।”
22ଜିସୁ ଜେବ୍ଦି ରିୟାର୍ ମାଜ଼ିରିଂ ଉତର୍ ହିତାନ୍, “ଏପେଙ୍ଗ୍ ଇନାକା ଏନ୍ନାଦେରା, ହେଦାଂ ପୁନୁଦେରା । ଆନ୍ ଦୁକ୍ ବଗ୍ନି ବାହାତ ଉଣ୍ଡେଙ୍ଗ୍ ହାନାଙ୍ଗା ? ହେବେ କି ଏପେଙ୍ଗ୍ ଉଣ୍ଡେଙ୍ଗ୍ ଆଡ୍ନାଦେର୍ ?”
ହେୱାର୍ ତାଙ୍ଗ୍ ଇଚାର୍, “ଆଡ୍ନାପ୍ ।”
23ଜିସୁ ହେୱାରିଂ ଇଚାନ୍, “ଏପେଙ୍ଗ୍ ନା ଦୁକ୍ ବଗ୍ନି ବାହାତ ଉଣାକା ସତ୍, ମାତର୍ ନା ତିନାବାଗାଙ୍ଗ୍ ଆରି ଡେବ୍ରି ବାଗାଙ୍ଗ୍ କୁଚ୍ଚେଂ ହିନାକା ନା ଆଦିକାର୍ ବିସ୍ରେ ଆକାୟ୍, ଇଚିସ୍ ଇମ୍ଣାକାର୍ କାଜିଂ ନା ଆବା କାଜିଂ ବାହା ଜାଲ୍ଦି କିୟା ଆତାତ୍ନ୍ନା, ହେୱାର୍ କୁଚ୍ନାର୍ ।”
24ବିନ୍ ଦାସ୍ ଜାଣ୍ ଇଦାଂ ୱେନ୍ଞ୍ଜି ହେ ଟଣ୍ଡ୍ରିୟାର୍ ଜପି ରିସା ଆତାର୍ ।
25 #
ଲୁକ ୨୨:୨୫,୨୬. ମାତର୍ ଜିସୁ ଚେଲାରିଂ ଲାଗେ କୁକ୍ଚି ଇଚାନ୍, “ପାର୍ତିକିୱି ଜିହୁଦିର୍ ସାସନ୍ କାରିୟାର୍ ହେୱାର୍ ଜପି ରାଜ୍କିନାର୍ ଆରି ଗାଜା ମୁଣିକାର୍ ହେୱାର୍ ଜପି ୱିଜ଼ୁ ରାଜ୍କିନାର୍, ଇଦାଂ ଏପେଙ୍ଗ୍ ପୁନାଟ୍ ।” 26#ମାତିଉ ୨୩:୧୧; ମାର୍କ ୯:୩୫; ଲୁକ ୨୨:୨୬.“ମି ବିତ୍ରେ ହେ ଲାକେ ଆକାୟ୍, ମାତର୍ ମି ବିତ୍ରେ ଜେ ଇନେର୍ ଗାଜା ଆଦେଂ ମାନ୍ କିନାନ୍, ହେୱେନ୍ ମି ହେବା କିନାକାନ୍ ଆୟେନ୍, 27ଆରେ ଇନେର୍କି ମୁଡ଼୍ ଆଦେଂ ଇଚା କିନାନ୍, ହେୱେନ୍ ମି ହଲ୍ୟା ଆୟେନ୍, 28ଇନେସ୍ ମାନାୟ୍ ମାଜ଼ି ହେବା ପାୟା ଆଦେଂ ୱାୱାତାନ୍ନା, ମତର୍ ହେବା କିଦେଙ୍ଗ୍ ଆରି ହେନି କାଜିଂ ମୁକ୍ଡ଼ାୟ୍ କିନି ମୁଲ୍ଲାକେ ଜିବୁନ୍ ହିଦେଂ ୱାତାନ୍ନା ।”
ଜିସୁ ରିୟାର୍ କାଣାରିଂ ଉଜ୍ କିତାନ୍
(ମାର୍କ ୧୦:୪୬-୫୨; ଲୁକ ୧୮:୩୫-୪୩)
29ହେୱାର୍ ଜିରିହ ବସ୍ତିତ ହସି ହାନି ୱେଡ଼ାଲିଂ ବେସିହେନି ମାନାୟାର୍ ତା ପାଚେ ପାଚେ ହାଚାର୍ । 30ଆରେ ହୁଡ଼ାଟ୍, ହାଜ଼ି କଚଣ୍ ରିୟାର୍ କାଣାର୍ ଜିସୁ ହେ ହାଜ଼ି ହାନାନା ଇଞ୍ଜି ୱେନ୍ଞ୍ଜି ଗାଜା କାଟ୍ କିଜ଼ି ଇଚାର୍, “ଏ ମାପ୍ରୁ, ଦାଉଦ୍ ମେହି, ମାଙ୍ଗେଙ୍ଗ୍ ଦୟା କିଦା ।”
31ଲକୁ ମୁମ୍ଦ ହେୱାରିଂ ଦାକା କିଜ଼ି ଚିମ୍ରା ଆଦେଂ ଇଚାର୍ । ମାତର୍ ହେୱାର୍ ଆରି ଚେରା ଆଜ଼ି ଇଚାର୍, “ଏ ମାପ୍ରୁ ଦାଉଦ୍ ମେହି, ମାଙ୍ଗ୍ ଦୟା କିଦା ।”
32ହେବେତାଂ ଜିସୁ ନିଲ୍ଚି ହେୱାରିଂ ହିର୍ବିସ୍ ୱେନ୍ବାତାନ୍, “ଆନ୍ ମି କାଜିଂ ଇନାକା କିନାଙ୍ଗ୍ ଇଞ୍ଜି ଏପେଙ୍ଗ୍ ଇଚା କିନାଦେରା ?”
33ହେୱାର୍ ତାଙ୍ଗ୍ ଇଚାର୍, “ଏ ମାପ୍ରୁ, ଇନେସ୍ ମା କାଣ୍ଙ୍ଗା ଜେୟା ଆନାତ୍ ।”
34ଆରେ, ଜିସୁ ଦୟା କିଜ଼ି ହେୱାର୍ କାଣ୍ଙ୍ଗା ଡୁତାନ୍ ଆରି ହେ ଦାପ୍ରେ ହେୱାର୍ କାଣ୍ଙ୍ଗା ହୁଡ଼୍ଜି ଜିସୁ ପାଚେ ପାଚେ ତାଙ୍ଗ୍ଦେଂ ଲାଗାତାର୍ ।
Currently Selected:
ମାତିଉ 20: NTNoo20
Highlight
Share
Copy
Want to have your highlights saved across all your devices? Sign up or sign in
The New Testament in Pengo Language © The Word for the World International and Pengo Translation Samithi, Dasamanthpur, Koraput, Odisha 2020
