ପ୍ରେରିତ୍ ପାରିଚାଏ
ପାରିଚାଏ
ପ୍ରେରିତ୍ ପୁଥି ଲୁକ୍ଆଃ ହରାତେ ଅଲାକାନା, ଅକଏଚି ଲୁକ୍ ଅଲାକାନ୍ ସୁକୁକାଜିକେହଗି ଅଲାକାଦାଏ । ଇନିଃ ମିହୁଡ଼୍ ବାଇଦ୍ ତାଇକେନାଏ ଆଡଃ ବେଗାର୍ ଭୁଲ୍ତେ ଅନଲ୍ରେ ପୁରାଃଗି ଚିହୁଲ୍ନିଃ ତାନିଃ । ଇନିଃ ଲୁକ୍ ସୁକୁକାଜି ଆଡଃ ପ୍ରେରିତ୍, ନେ ବାରାନ୍ ପୁଥିରେ ଦୁଲାଡ଼୍ ଥିୟଫିଲସ୍କେ ଉଦୁବିତାନା । ଇନିଃ ମିହୁଡ଼୍ ଗ୍ରୀକ୍ ହଡ଼ ତାଇକେନାଏ । ଇନିୟାଃ ପୁଥିକ ଗ୍ରୀକ୍ ଆଡଃ ଯିହୁଦୀ ହଡ଼କ ନାଗେନ୍ତେ ଅଲାକାନ୍ ତାଇକେନା ପ୍ରେରିତ୍ ୧:୧ ।
ହବାସାକାଅଆଃ ପ୍ରେରିତ୍ ପୁଥି ୟୀଶୁ ଖ୍ରୀଷ୍ଟ୍ଆଃ ଜାନାମ୍ ତାୟମ୍ତେ ୬୦-୬୪ କରେ ଅଲାକାନ୍ ତାଇକେନା, ଚିୟାଃଚି ପାଉଲୁସ୍ଆଃ ଜେହେଲ୍ ତନଲ୍ଏତେ ରାଡ଼ାଃଅ ସିଦାରେ ପ୍ରେରିତ୍ ପୁଥିରାଃ ଅନଲ୍ ଚାବାକାନ୍ ତାଇକେନା । ଲୁକ୍ହଗି ପ୍ରେରିତ୍ ପାଉଲୁସ୍ଲଃ ହରାସେନ୍ ତାଇକେନାଏ, ଏନାତେ ନେ ପୁଥି ଆନ୍ତିୟୋଖ୍ଏତେ ଅଲାକାନ୍ଗିୟାଃ ମେନ୍ତେ ଚିମିନ୍ ହଡ଼କ କାଜିୟାଃ । ପ୍ରେରିତ୍ ପୁଥି ହବାଅଃତାନା କାଲିସିୟାରାଃ ଏନେଟେଦ୍ । ପ୍ରେରିତ୍ ପୁଥି, ଲୁକ୍ ଅଲାକାନ୍ ସୁକୁକାଜିଏତେଗି ଅଲ୍ଆଉକାନା ମେନ୍ତେ କାଜିଲେରେୟ ଠାଉକାଗିୟା, ଚିଆଃଚି ସୁକୁକାଜିରେ ଲୁକ୍ ପ୍ରାଭୁ ୟୀଶୁଆଃ କାମିକେ ଉଦୁବ୍କେଦ୍ ତାୟମ୍ତେ, ନେ ପୁଥିରେ ପ୍ରାଭୁଆଃ ଏନ୍ କାମିକେଗି ୟୀଶୁଆଃ ସିର୍ମାରାକାବ୍ ତାୟମ୍ତେ ଚେଲାକ ପାବିତାର୍ ଆତ୍ମାଲଃ ପେରେଃୟାନାକ ଆଡଃ ଚିଲ୍କା ଯୀରୁଶାଲେମ୍ଏତେ, ଯିହୁଦୀ, ଶମିରୋନ୍, ଆଡଃ ଏନାଏତେ ବାହାରି ଦିଶୁମ୍କରେ ସୁକୁକାଜି ନିତିର୍ୟାନା, ଏନା ନେ ପୁଥିରେ ଅଲାକାନା ପ୍ରେରିତ୍ ୧:୮ ।
ଇନିଃ ଥିୟଫିଲସ୍କେ ଆଡଃ ବିଶ୍ୱାସ୍ରେ ହାରା ଇଦିୟଃତାନ୍ ଖ୍ରୀଷ୍ଟିୟାନ୍ ହାଗାକକେ ଚିହୁଲଃ ନାଗେନ୍ତେ ଉସ୍କୁର୍କତାନା । ୟୀଶୁ ଖ୍ରୀଷ୍ଟ୍ଆଃ ଜୀଦାନ୍ ବିଷାଏରେ ଆଡଃ ପାସ୍ରାଅ ଇଦିୟଃତାନ୍ ଖ୍ରୀଷ୍ଟ୍ ବିଶ୍ୱାସୀକଆଃ ଜୀଦାନ୍ ବିଷାଏରେ କାଜିକାଦା । ପ୍ରେରିତ୍ ଚିଟାଉରେ ଏନେଟେଦ୍ରେନ୍ କାଲିସିୟାକ ଖ୍ରୀଷ୍ଟ୍ତାଃରେ ଚିଲ୍କା ବିଶ୍ୱାସ୍ ତାଇକେନାକ, ଏନାରେୟାଃ ନାମୁନା ଆବୁକେ ଉଦୁବେତାନା । ପ୍ରେରିତ୍କଆଃ ନାମୁନା ହରାତେ ଆବୁ ଆଟ୍କାର୍ ଦାଡ଼ିୟାଃବୁ ଯେ, ଚିଲ୍କା ପାବିତାର୍ ଆତ୍ମାତାଃରେ ଆସ୍ରାକେଦ୍ତେ ଏଟାଃକତାଃରେ ସୁକୁକାଜି ନିତିର୍ ଦାଡ଼ିୟଃଆ ।
ପୁଥି ଭିତାର୍ରେ ଅଲାକାନ୍ କାଜି
୧. ପାବିତାର୍ ଆତ୍ମାରାଃ ହିନିଜୁଃ ଆଡଃ କାଲିସିୟାରାଃ ପସାଇଦିୟଃ । ୧:୧–୮:୧
୨. କାଲିସିୟାରାଃ ସିଗିଦ୍ ଆଡଃ ସୁକୁକାଜିରାଃ ପସାଇଦିୟଃ । ୮:୨–୧୨:୨୩
୩. ପାଉଲୁସ୍ଆଃ ପାହିଲା ସେୱାକାମିରେ ହରାସେନ୍ । ୧୨:୨୪–୧୪:୨୮
୪. ଯୀରୁଶାଲେମ୍ରେ ମାରାଙ୍ଗ୍ ପାଞ୍ଚେଟ୍ । ୧୫:୧-୩୫
୫. ପାଉଲୁସ୍ଆଃ ବାର୍ସାତେ ସେୱାକାମି ନାଙ୍ଗ୍ ହରାସେନ୍ । ୧୫:୩୬–୧୮:୨୨
୬. ପାଉଲୁସ୍ଆଃ ଆପିସାତେ ସେୱାକାମି ନାଙ୍ଗ୍ ହରାସେନ୍ । ୧୮:୨୩–୨୦:୩୮
୭. ଯୀରୁଶାଲେମ୍ରେ ପାଉଲୁସ୍ଆଃ ତନଲ୍ । ୨୧:୧–୨୬:୧-୩୨
୮. ପାଉଲୁସ୍ଆଃ ରୋମ୍ତେ ହରାସେନ୍ । ୨୭:୧–୨୮:୧-୩୧
Currently Selected:
ପ୍ରେରିତ୍ ପାରିଚାଏ: NTRuu20
Highlight
Share
Copy
Want to have your highlights saved across all your devices? Sign up or sign in
The New Testament in Munda Language © The Word for the World International and Munda Believers Assembly, SDCU, Sambalpur, Odisha. 2020