Yoa. 13
13
Kilot Yesu ŋakejen a ŋikasyomak keŋ
1Ani eapuuni apaki ŋina a ŋasuban a Paska, toanyu Yesu atemar kedol apaki ŋina esikinet akwap na, toboŋo neni a Papa. Amina jwi jwi Yesu ŋulu keŋ ŋulu ayakasi nakwap, akitodol tari natwanare.
2Ani imujete ikes eboŋ, keris Satan, aŋuna ka alukinio Yesu, keloma lotau a Yuda Isikariot, a ŋolo arae lokoku a Simoni. 3Ayeni Yesu atemar abu Papa kiwuak ŋiboro daadaŋ nakan keŋ; ayeni daŋ iŋes atemar abuni aneni ka Akuj, ido eboŋori nabo nenipei keŋ. 4Tonyou nai Yesu alomesa, tolaca ekaaso, toenik ataulo nacir. 5Tobukok ŋakipi nakalaat, kisyak akilot ŋakejen a ŋikasyomak, toninaiya ka ataulo a ŋina anapit iŋes anacir. 6Ani edoluni iŋes neni a Simoni Petero, kiŋit Petero Yesu tema, “Ekapolon, iyoŋ ilotari ŋakejen kaŋ a?”
7Toboŋok Yesu iŋes tema, “Nyiyeni iyoŋ tokona ŋuna etiyae ayoŋ, nai ibuni iyoŋ ayenun ekaku.”
8Tolimok Petero Yesu tema, “Mam jik nyilotari iyoŋ ŋakaakejen!”
Toboŋok Yesu iŋes tema, “Ani pa kelota ayoŋ ŋakejen kon, nyikiruki iyoŋ ka ayoŋ nabo.”
9Tolimok Simoni Petero Yesu tema, “Ekapolon, ani kikote neni, meere ŋakaakejen bon, ŋakan ka akou daŋ!”
10Tolimu Yesu tema, “Ŋini adau akiloŋari, eseg iŋes; nyiitanit akiloŋa nabo, mati ŋakejen bon. Isegak iyes, nai meere daadaŋ.” 11(Anerae ayeni Yesu ŋini alukinon iŋes; iŋes alimunio atemar, “Isegak iyes, nai meere daadaŋ.” )
12Kedau Yesu akilotar ŋakejen kec, tonap ekaaso keŋ, toboŋo lomesa. Kiŋit ikes tema, “Iyenete iyes apolou a ŋuna adau ayoŋ akitiya neni kus a? 13Ikinyarito iyes ayoŋ Eketataman ka Ekapolon. Ee, iyookinito iyes, anerae arae kire ayoŋ. 14Ikwapei elotarya ayoŋ ŋolo arae Ekapolon ka Eketataman ŋakejen kus, itemokino iyes daŋ kilosete ŋakejen a ŋuluce. 15Adau ayoŋ ainakin iyes akitaanyikinet, ikotere kitiyata iyes daŋ ikwaŋina adaunia ayoŋ akitiya neni kus. 16Akalimokini ayoŋ iyes kire atemar, emam epito ŋolo epol akilo ekeekapolon, nabo daŋ emam ekiyakitono ŋolo epol akilo ŋolo iyakit iŋes. 17Ani kiyenete iyes nu, irereŋ iyes erae kitiyata nu. 18Nyerworo ayoŋ aŋuna kus a daadaŋ, ayeni ŋulu adau ayoŋ aseun; nai ikotere kiyookinotor ŋuna igiritae Nakigireta ebe, ‘Abu ituŋanan ŋini ikimori ka ayoŋ okoluki ayoŋ.’ 19Akalimokini ayoŋ iyes nugu eriŋa nyetakanuna, ikotere ani etakanunete, tonupyata atemar, ‘Arae Ayoŋ ŋolo Arae Ayoŋ!’ 20Akalimokini ayoŋ iyes kire atemar, ŋini ijauni ituŋanan ŋini eyakit ayoŋ, ekejauni ayoŋ, nabo ituŋanan ŋini ekejauni ayoŋ, ijauni ŋolo ekeyakuunit ayoŋ.”
Todwar Yesu ŋuna ka alukino keŋ
(Mat. 26:20-25; Mar. 14:17-21; Luk. 22:21-23)
21Kedau Yesu alimun ŋun, kiyaloloŋ nooi alotau keŋ, kiteyenu ŋakiro nu pa imunonit tema, “Akalimokini ayoŋ iyes kire atemar, ebuni ipei alokidiŋ kus alukin ayoŋ.” 22Kiŋolyanakinos ŋikeekasyomak make eumokinito, pa ayenete ŋolo erworor Yesu. 23Eboi epeikasyoman, ŋolo amina iŋes, alodiyete keŋ. 24Aŋun, toketu Simoni Petero ekasyoman ŋol tema, “Kiŋit iŋes ŋini irworor iŋes?”
25Tosodi ekasyoman ŋol kiyoto diyete Yesu, kiŋit iŋes tema, “Ekapolon, ŋae ŋini irworor iyoŋ?”
26Tolimok Yesu iŋes tema, “Ekile ŋol, iŋes ŋolo ainakini ayoŋ amugati kelumok loboka.” Kedau Yesu akilumokin, inak Yuda, lokoku a Simoni Isikariot. 27Ani kedau Yuda akinyam amugati, toloma Satan lotau keŋ. Tolimok Yesu Yuda tema, “Kiburuburak akitiya ibore ŋini ilosi akitiya!” 28Amam alokidiŋ ŋituŋa ŋulu eboiyete alomesa ŋini ayeni apolou a ŋakiro a ŋuna erworo iŋes. 29Atamete ŋice atemar kori aŋina eŋadaa Yuda ecwee ŋolo a ŋisiliŋa, alimokinit Yesu iŋes alosit agyelun ŋiboro ŋulu eitanitae aŋuna a ŋasuban. Abasi ŋice kori kelimokini Yesu iŋes ainar ŋikulyak idiobore. 30Kedau Yuda akijaar amugati, toloma kiŋa atipei. Arae akuwar akwap.
Akiciket ŋina kitete
31Keloma Yuda kiŋa, tema Yesu, “Tokona, etopoloor Lokoku a Ituŋanan, ka etopoloor Akuj aŋuna keŋ. 32Ani nai kitopoloor Akuj aŋuna keŋ, itopoloori Akuj daŋ Lokoku a Ituŋanan ka apolou keŋ ka alope, kitopoloo iŋes atipei. 33Ŋikaadwe, eriŋa ayoŋ ikirukit ka iyes adiouriyen. Ipote iyes akiwar ayoŋ, nai ikwapei abunio ayoŋ olimokinia Ŋiyudayan, akalimokini iyes daŋ tokona atemar, ‘Nyipedorete iyes aponare neni alosi ayoŋ.’ 34Akainakini tokona akiciket ŋina kitete: tominin make; ikwaŋina akaminar ayoŋ iyes, iyes daŋ tominin make. 35Ani kitiyata iyes ikoŋina, eyenunete ŋituŋa atemar irae iyes ŋikasyomak kaŋ, erae kiminin iyes make.”
Tolimu Yesu atemar epegi Petero atemar ayeni iŋes
(Mat. 26:31-35; Mar. 14:27-31; Luk. 22:31-34)
36Kiŋit Simoni Petero Yesu tema, “Ekapolon, ai ilosi iyoŋ?” Toboŋok Yesu iŋes tema, “Nyikitupakini iyoŋ ayoŋ neni alosi tokona, nai ikitupuni iyoŋ ayoŋ ekaku.” 37Kiŋit nabo Petero Yesu tema, “Ekapolon, kaanukiro nyakatupakinia ayoŋ iyoŋ tokona? Ajali ayoŋ akiyar kaŋ aŋuna kon.”
38Toboŋok Yesu iŋes tema, “Ijali kire iyoŋ akiyar kon aŋuna kaŋ a? Akalimokini ayoŋ iyoŋ kire atemar, eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.”
Currently Selected:
Yoa. 13: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
Yoa. 13
13
Kilot Yesu ŋakejen a ŋikasyomak keŋ
1Ani eapuuni apaki ŋina a ŋasuban a Paska, toanyu Yesu atemar kedol apaki ŋina esikinet akwap na, toboŋo neni a Papa. Amina jwi jwi Yesu ŋulu keŋ ŋulu ayakasi nakwap, akitodol tari natwanare.
2Ani imujete ikes eboŋ, keris Satan, aŋuna ka alukinio Yesu, keloma lotau a Yuda Isikariot, a ŋolo arae lokoku a Simoni. 3Ayeni Yesu atemar abu Papa kiwuak ŋiboro daadaŋ nakan keŋ; ayeni daŋ iŋes atemar abuni aneni ka Akuj, ido eboŋori nabo nenipei keŋ. 4Tonyou nai Yesu alomesa, tolaca ekaaso, toenik ataulo nacir. 5Tobukok ŋakipi nakalaat, kisyak akilot ŋakejen a ŋikasyomak, toninaiya ka ataulo a ŋina anapit iŋes anacir. 6Ani edoluni iŋes neni a Simoni Petero, kiŋit Petero Yesu tema, “Ekapolon, iyoŋ ilotari ŋakejen kaŋ a?”
7Toboŋok Yesu iŋes tema, “Nyiyeni iyoŋ tokona ŋuna etiyae ayoŋ, nai ibuni iyoŋ ayenun ekaku.”
8Tolimok Petero Yesu tema, “Mam jik nyilotari iyoŋ ŋakaakejen!”
Toboŋok Yesu iŋes tema, “Ani pa kelota ayoŋ ŋakejen kon, nyikiruki iyoŋ ka ayoŋ nabo.”
9Tolimok Simoni Petero Yesu tema, “Ekapolon, ani kikote neni, meere ŋakaakejen bon, ŋakan ka akou daŋ!”
10Tolimu Yesu tema, “Ŋini adau akiloŋari, eseg iŋes; nyiitanit akiloŋa nabo, mati ŋakejen bon. Isegak iyes, nai meere daadaŋ.” 11(Anerae ayeni Yesu ŋini alukinon iŋes; iŋes alimunio atemar, “Isegak iyes, nai meere daadaŋ.” )
12Kedau Yesu akilotar ŋakejen kec, tonap ekaaso keŋ, toboŋo lomesa. Kiŋit ikes tema, “Iyenete iyes apolou a ŋuna adau ayoŋ akitiya neni kus a? 13Ikinyarito iyes ayoŋ Eketataman ka Ekapolon. Ee, iyookinito iyes, anerae arae kire ayoŋ. 14Ikwapei elotarya ayoŋ ŋolo arae Ekapolon ka Eketataman ŋakejen kus, itemokino iyes daŋ kilosete ŋakejen a ŋuluce. 15Adau ayoŋ ainakin iyes akitaanyikinet, ikotere kitiyata iyes daŋ ikwaŋina adaunia ayoŋ akitiya neni kus. 16Akalimokini ayoŋ iyes kire atemar, emam epito ŋolo epol akilo ekeekapolon, nabo daŋ emam ekiyakitono ŋolo epol akilo ŋolo iyakit iŋes. 17Ani kiyenete iyes nu, irereŋ iyes erae kitiyata nu. 18Nyerworo ayoŋ aŋuna kus a daadaŋ, ayeni ŋulu adau ayoŋ aseun; nai ikotere kiyookinotor ŋuna igiritae Nakigireta ebe, ‘Abu ituŋanan ŋini ikimori ka ayoŋ okoluki ayoŋ.’ 19Akalimokini ayoŋ iyes nugu eriŋa nyetakanuna, ikotere ani etakanunete, tonupyata atemar, ‘Arae Ayoŋ ŋolo Arae Ayoŋ!’ 20Akalimokini ayoŋ iyes kire atemar, ŋini ijauni ituŋanan ŋini eyakit ayoŋ, ekejauni ayoŋ, nabo ituŋanan ŋini ekejauni ayoŋ, ijauni ŋolo ekeyakuunit ayoŋ.”
Todwar Yesu ŋuna ka alukino keŋ
(Mat. 26:20-25; Mar. 14:17-21; Luk. 22:21-23)
21Kedau Yesu alimun ŋun, kiyaloloŋ nooi alotau keŋ, kiteyenu ŋakiro nu pa imunonit tema, “Akalimokini ayoŋ iyes kire atemar, ebuni ipei alokidiŋ kus alukin ayoŋ.” 22Kiŋolyanakinos ŋikeekasyomak make eumokinito, pa ayenete ŋolo erworor Yesu. 23Eboi epeikasyoman, ŋolo amina iŋes, alodiyete keŋ. 24Aŋun, toketu Simoni Petero ekasyoman ŋol tema, “Kiŋit iŋes ŋini irworor iŋes?”
25Tosodi ekasyoman ŋol kiyoto diyete Yesu, kiŋit iŋes tema, “Ekapolon, ŋae ŋini irworor iyoŋ?”
26Tolimok Yesu iŋes tema, “Ekile ŋol, iŋes ŋolo ainakini ayoŋ amugati kelumok loboka.” Kedau Yesu akilumokin, inak Yuda, lokoku a Simoni Isikariot. 27Ani kedau Yuda akinyam amugati, toloma Satan lotau keŋ. Tolimok Yesu Yuda tema, “Kiburuburak akitiya ibore ŋini ilosi akitiya!” 28Amam alokidiŋ ŋituŋa ŋulu eboiyete alomesa ŋini ayeni apolou a ŋakiro a ŋuna erworo iŋes. 29Atamete ŋice atemar kori aŋina eŋadaa Yuda ecwee ŋolo a ŋisiliŋa, alimokinit Yesu iŋes alosit agyelun ŋiboro ŋulu eitanitae aŋuna a ŋasuban. Abasi ŋice kori kelimokini Yesu iŋes ainar ŋikulyak idiobore. 30Kedau Yuda akijaar amugati, toloma kiŋa atipei. Arae akuwar akwap.
Akiciket ŋina kitete
31Keloma Yuda kiŋa, tema Yesu, “Tokona, etopoloor Lokoku a Ituŋanan, ka etopoloor Akuj aŋuna keŋ. 32Ani nai kitopoloor Akuj aŋuna keŋ, itopoloori Akuj daŋ Lokoku a Ituŋanan ka apolou keŋ ka alope, kitopoloo iŋes atipei. 33Ŋikaadwe, eriŋa ayoŋ ikirukit ka iyes adiouriyen. Ipote iyes akiwar ayoŋ, nai ikwapei abunio ayoŋ olimokinia Ŋiyudayan, akalimokini iyes daŋ tokona atemar, ‘Nyipedorete iyes aponare neni alosi ayoŋ.’ 34Akainakini tokona akiciket ŋina kitete: tominin make; ikwaŋina akaminar ayoŋ iyes, iyes daŋ tominin make. 35Ani kitiyata iyes ikoŋina, eyenunete ŋituŋa atemar irae iyes ŋikasyomak kaŋ, erae kiminin iyes make.”
Tolimu Yesu atemar epegi Petero atemar ayeni iŋes
(Mat. 26:31-35; Mar. 14:27-31; Luk. 22:31-34)
36Kiŋit Simoni Petero Yesu tema, “Ekapolon, ai ilosi iyoŋ?” Toboŋok Yesu iŋes tema, “Nyikitupakini iyoŋ ayoŋ neni alosi tokona, nai ikitupuni iyoŋ ayoŋ ekaku.” 37Kiŋit nabo Petero Yesu tema, “Ekapolon, kaanukiro nyakatupakinia ayoŋ iyoŋ tokona? Ajali ayoŋ akiyar kaŋ aŋuna kon.”
38Toboŋok Yesu iŋes tema, “Ijali kire iyoŋ akiyar kon aŋuna kaŋ a? Akalimokini ayoŋ iyoŋ kire atemar, eriŋa ekokoroit nyeruuno, ipegi iyoŋ ŋapeget ŋauni atemar ikiyeni ayoŋ.”
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.