Yoa. 4
4
Yesu ka aberu ŋina alo Samaria
1Kiirasi Ŋiparisayon atemar eryamununui ka ibatisae Yesu ŋikasyomak ŋulu alalak akilo Yoana. 2(Nyibatisa Yesu idiotuŋanan, nai ŋikasyomak keŋ bon ebatisaete). 3Ani nai iirari Yesu ŋuna erworoe, torotok iŋes alo Yudeya, toboŋo Galileya. 4Aŋun, etemokino Yesu kitor Samaria.
5Kitor iŋes lotaun ŋolo alo Samaria ŋolo anyaritae Sikar, diyete emanikor ŋolo koloŋ ainakini Yakobo lokoku keŋ Yosepu. 6Ayai nen akare a Yakobo, kiboikin Yesu diyete akare aŋuna aupitor iŋes analosit keŋ. Aapiyarit ŋisaae ŋikanikapei ŋulu ka apaaran.
7Bu aberu ŋina arae Asamaritanoit aokun ŋakipi. Tema Yesu iŋes, “Kitamatae.” 8Apaki ŋin, alosito ŋikasyomak a Yesu lotaun akigyel akimuj.
9Kiŋit Asamaritanoit ŋin Yesu tema, “Kaanukiro iŋitar iyoŋ ŋolo irae Eyudayat ŋakipi aneni kaŋ orae ayoŋ Asamaritanoit?” (Alimuni iŋes ikoŋina, anerae pa acamanara Ŋiyudayan ka Ŋisamaritayon.)
10Toboŋok Yesu tema, “Kerae toyeni iyoŋ ainakinet ŋina ecamit Akuj ainakin iyoŋ ka ŋolo ebala iyoŋ ‘Kitamatae,’ kiŋisit iyoŋ iŋes ka kikiinakinit ŋakipi ŋuna eteyarak.”
11Tolimok aberu iŋes tema, “Ekapolon, imamukar iyoŋ ibore ŋini okunet ŋakipi, nabo daŋ eoya akare. Ai nai ilemunia iyoŋ ŋakipi ŋuna eteyarak ŋun? 12Ipol mono iyoŋ akilo tari papaa kosi Yakobo ŋolo awaduni akare na, ŋina apotu iŋes tomata ka ŋikeedwe ta ŋikeebaren a?”
13Toboŋok Yesu aberu ŋin tema, “Ŋini emasi ŋakipi nu, enyami akure nabo; 14nai ŋini emasi ŋakipi ŋuna ainakini ayoŋ iŋes, nyenyami akure nabo jik. Ŋakipi ŋuna abuni ayoŋ ainakin iŋes, eruworosi aneni keŋ eitanit ŋolo a ŋakipi a ŋuna eyaunete akiyar ŋina nyedaun.”
15Tema aberu ŋin iŋes, “Okoe Ekapolon! Inakinae ayoŋ ŋakipi ŋun, ikotere nyakanyam akure nabo jik ka ojoŋo aboŋunun ne, akiok.”
16Tolimok Yesu iŋes tema, “Ape, tonyarau lokile kon, ido toboŋu ne.”
17Toboŋok aberu ŋin iŋes tema, “Amamukar ayoŋ ekile.”
Tolimok Yesu iŋes tema, “Iyookinit iyoŋ ilimunit atemar imamukar ekile; 18anerae idau iyoŋ akiruk ka ŋikilyok ŋikan; ka ŋolo tokona irukitotor iyoŋ, meere lokile kon. Aŋun, ilimu iyoŋ ŋuna a kire.”
19Tolimok aberu iŋes tema, “Ekapolon, aanyu ayoŋ atemar irae iyoŋ ekadwaran. 20Apotu atapapaa kosi kilipa neni ka Akuj alomoru a lo, nai ibasi iyes Ŋiyudayan ebe Yerusalem bon ejokya akilipya neni ka Akuj.”
21Tolimok nai Yesu iŋes tema, “Aberu, tonup ŋuna kaŋ, ebunit apaki ŋina nyilipyata iyes neni ka Akuj a Papa alomoru a lo kori alo Yerusalem. 22Iyes Ŋisamaritayon, nyiyenete iŋes kire ŋini ilipete neni keŋ; isua Ŋiyudayan, ikiyeni ŋini ikilipi neni keŋ, anerae ebunit aiuno aneni a Ŋiyudayan. 23Nai ebunit apaki ka iŋes napei na, ŋina ilipyata ŋikelipak ŋulu a kire neni a Papa alotooma Etau ka alorot a ŋolo a kire, anerae ikes ŋikelipak ŋulu iitanit Papa. 24Erae Akuj Etau; ŋulu ilipete neni keŋ, itemokino kilipa alotooma Etau ka alorot a ŋolo a kire.”
25Tolimok aberu ŋin Yesu tema, “Ayeni ayoŋ atemar ebuni Messia, ŋolo enyaritae Kristo. Ŋina ebunio iŋes, ikilimokini iŋes isua ŋakiro daadaŋ.”
26Tolimok Yesu iŋes tema, “Ayoŋ lopei lo, ŋolo erworo neni kon.”
27Ŋinapeipaki, todolut ŋikasyomak keŋ, toumokis eryamunete Yesu irworosi ka aberu. Nai emam idio daŋ ŋini abu kiŋit tema, “Nyo iitanit iyoŋ?” kori “Nyo irworotor iyoŋ ka aberu na?” 28Kimyek aberu amot keŋ, kikumukumak toloma lotaun, tolimok ŋituŋa tema, 29“Potu kiŋolikisi ekile ŋolo abu okolimok ayoŋ daadaŋ ŋuna adau ayoŋ akitiya. Meere ba ca iŋes Kristo?” 30Tolomut ikes kiŋa etaun, toloto neni ayai Yesu. 31Ani eriŋa ikes eponito, kimaimaa ŋikasyomak Yesu temasi, “Eketataman, kimuj kare ca!”
32Tolimok Yesu ikes tema, “Ayakar ayoŋ akimuj ŋina nyiyenete iyes!”
33Kirworikinos ŋikasyomak make temasi, “Keinu idiotuŋanan iŋes akimuj a?”
34Tolimok Yesu ikes tema, “Akaakimuj iŋes akitiya ŋuna ecamit Akuj ŋina ekeyakuunit ayoŋ ka akirikakin ekeetic. 35Meere eminae atemar idoŋit ŋilapyo ŋiomwon tolemikinae a? Nai akalimokini ayoŋ iyes atemar, kireosi lomanikorin; akoko ikes etemokin akilem! 36Eryamuni ŋolo elemi eropit ŋolo ka akilem--ŋaraito ŋuna ka akiyar a ŋina nyedaun, ikotere elelyanete ŋolo etan ka ŋolo aleman kaapei. 37Erae nugu ŋakiro ŋuna a kire: ‘Eekini ipeituŋanan, tosodi tolem ŋinice!’ 38Abu ayoŋ ekeyakia iyes akilem aneni pa iekinito. Etiyata ŋuluce ka ilema iyes anakinyinyir kec.”
39Apotu Ŋisamaritayon ŋulu alalak ŋulu alotaun a ŋol, tonupa Yesu aŋuna a ŋakiro a ŋuna abu aberu ŋin kiteyenik ikes tema, “Abu iŋes okolimok ayoŋ daadaŋ ŋuna adau ayoŋ akitiya.” 40Ani epote Ŋisamaritayon neni keŋ, kiŋitakis iŋes akiriya ka ikes; kiriya iŋes a nen ŋirwa ŋiarei.
41Aŋuna ka akitatam keŋ, apotu nabo ŋice ŋulu alalak tonupa iŋes. 42Tolimokis ŋituŋa ŋul aberu ŋin temasi, “Meere ŋakiro kon bon tokona ikinupitor isua iŋes, nai ikiira isua ŋilopeyek atemar, erae lo kire Ekaiunan ŋolo ka akwap.”
Kitaŋaleu Yesu lokoku ke ekarikon
43Kelunyar ŋirwa ŋiarei, tolot Yesu Galileya. 44Aberakin sek iŋes elope akiteyenun atemar, “Nyitopolooritae ekadwaran anakwap keŋ.” 45Nai ani edoluni iŋes Galileya, kijaut ŋituŋa ŋulu ka akwap a ŋin iŋes, anerae keris ikes keanyut ŋuna daadaŋ etiyae iŋes alo Yerusalem akoloŋit ŋina a Paska, aŋuna kelositotor inaa.
46Toboŋo nabo Yesu lotaun ŋolo a Kana, nakwap a Galileya, neni etuluworya iŋes ŋakipi toruwor epiini. Ayai nai lotaun a Kaperenaum ekarikon ece ŋolo adyaka lokoku keŋ. 47Ani kedau ekile ŋol akiirar atemar aboŋu Yesu Galileya anakwap a ŋina a Yudeya, tonyou iŋes alo Kaperenaum, tolot neni a Yesu, todyek iŋes abunore akitaŋaleun lokoku keŋ ŋolo aapi atwanare. 48Tolimok Yesu iŋes tema, “Ani pa kiŋolikis iyes ŋakujuwuanisya ka ŋaumonokineta, nyinupete.”
49Tema nai ekarikon neni keŋ, “Ekapolon, bua kare ca apena eriŋa lokoku kaŋ nyetwana.” 50Tolimok Yesu iŋes tema, “Ape tolot, eyari lokoku kon.” Tonup ekile ŋol ŋuna alimokini Yesu, ido kionyak lore keŋ. 51Ani eriŋa iŋes elosi alorot, kiryama ka ŋiketiyak keŋ, tolimokis iŋes atemar aŋaleu lokoku keŋ.
52Kiŋit nai ekarikon ikes esaa ŋolo ageunia lokoku keŋ aŋaleun. Tolimokis ikes iŋes temasi, “Bien ŋisaae ŋikanikaarei emyekinia elekes iŋes.” 53Totamu nai papa ke edya atemar kerae esaa ŋolopei kelimokinia Yesu iŋes atemar, “Eyari lokoku kon.” Apotu nai iŋes ka ŋituŋa keŋ tonupa.
54Arae ŋin akujuwuanut ŋina a ŋaarei ŋina abu Yesu kitiya akitoodikin apolou keŋ, keboŋu alo Yudaya tari Galileya.
Currently Selected:
Yoa. 4: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
Yoa. 4
4
Yesu ka aberu ŋina alo Samaria
1Kiirasi Ŋiparisayon atemar eryamununui ka ibatisae Yesu ŋikasyomak ŋulu alalak akilo Yoana. 2(Nyibatisa Yesu idiotuŋanan, nai ŋikasyomak keŋ bon ebatisaete). 3Ani nai iirari Yesu ŋuna erworoe, torotok iŋes alo Yudeya, toboŋo Galileya. 4Aŋun, etemokino Yesu kitor Samaria.
5Kitor iŋes lotaun ŋolo alo Samaria ŋolo anyaritae Sikar, diyete emanikor ŋolo koloŋ ainakini Yakobo lokoku keŋ Yosepu. 6Ayai nen akare a Yakobo, kiboikin Yesu diyete akare aŋuna aupitor iŋes analosit keŋ. Aapiyarit ŋisaae ŋikanikapei ŋulu ka apaaran.
7Bu aberu ŋina arae Asamaritanoit aokun ŋakipi. Tema Yesu iŋes, “Kitamatae.” 8Apaki ŋin, alosito ŋikasyomak a Yesu lotaun akigyel akimuj.
9Kiŋit Asamaritanoit ŋin Yesu tema, “Kaanukiro iŋitar iyoŋ ŋolo irae Eyudayat ŋakipi aneni kaŋ orae ayoŋ Asamaritanoit?” (Alimuni iŋes ikoŋina, anerae pa acamanara Ŋiyudayan ka Ŋisamaritayon.)
10Toboŋok Yesu tema, “Kerae toyeni iyoŋ ainakinet ŋina ecamit Akuj ainakin iyoŋ ka ŋolo ebala iyoŋ ‘Kitamatae,’ kiŋisit iyoŋ iŋes ka kikiinakinit ŋakipi ŋuna eteyarak.”
11Tolimok aberu iŋes tema, “Ekapolon, imamukar iyoŋ ibore ŋini okunet ŋakipi, nabo daŋ eoya akare. Ai nai ilemunia iyoŋ ŋakipi ŋuna eteyarak ŋun? 12Ipol mono iyoŋ akilo tari papaa kosi Yakobo ŋolo awaduni akare na, ŋina apotu iŋes tomata ka ŋikeedwe ta ŋikeebaren a?”
13Toboŋok Yesu aberu ŋin tema, “Ŋini emasi ŋakipi nu, enyami akure nabo; 14nai ŋini emasi ŋakipi ŋuna ainakini ayoŋ iŋes, nyenyami akure nabo jik. Ŋakipi ŋuna abuni ayoŋ ainakin iŋes, eruworosi aneni keŋ eitanit ŋolo a ŋakipi a ŋuna eyaunete akiyar ŋina nyedaun.”
15Tema aberu ŋin iŋes, “Okoe Ekapolon! Inakinae ayoŋ ŋakipi ŋun, ikotere nyakanyam akure nabo jik ka ojoŋo aboŋunun ne, akiok.”
16Tolimok Yesu iŋes tema, “Ape, tonyarau lokile kon, ido toboŋu ne.”
17Toboŋok aberu ŋin iŋes tema, “Amamukar ayoŋ ekile.”
Tolimok Yesu iŋes tema, “Iyookinit iyoŋ ilimunit atemar imamukar ekile; 18anerae idau iyoŋ akiruk ka ŋikilyok ŋikan; ka ŋolo tokona irukitotor iyoŋ, meere lokile kon. Aŋun, ilimu iyoŋ ŋuna a kire.”
19Tolimok aberu iŋes tema, “Ekapolon, aanyu ayoŋ atemar irae iyoŋ ekadwaran. 20Apotu atapapaa kosi kilipa neni ka Akuj alomoru a lo, nai ibasi iyes Ŋiyudayan ebe Yerusalem bon ejokya akilipya neni ka Akuj.”
21Tolimok nai Yesu iŋes tema, “Aberu, tonup ŋuna kaŋ, ebunit apaki ŋina nyilipyata iyes neni ka Akuj a Papa alomoru a lo kori alo Yerusalem. 22Iyes Ŋisamaritayon, nyiyenete iŋes kire ŋini ilipete neni keŋ; isua Ŋiyudayan, ikiyeni ŋini ikilipi neni keŋ, anerae ebunit aiuno aneni a Ŋiyudayan. 23Nai ebunit apaki ka iŋes napei na, ŋina ilipyata ŋikelipak ŋulu a kire neni a Papa alotooma Etau ka alorot a ŋolo a kire, anerae ikes ŋikelipak ŋulu iitanit Papa. 24Erae Akuj Etau; ŋulu ilipete neni keŋ, itemokino kilipa alotooma Etau ka alorot a ŋolo a kire.”
25Tolimok aberu ŋin Yesu tema, “Ayeni ayoŋ atemar ebuni Messia, ŋolo enyaritae Kristo. Ŋina ebunio iŋes, ikilimokini iŋes isua ŋakiro daadaŋ.”
26Tolimok Yesu iŋes tema, “Ayoŋ lopei lo, ŋolo erworo neni kon.”
27Ŋinapeipaki, todolut ŋikasyomak keŋ, toumokis eryamunete Yesu irworosi ka aberu. Nai emam idio daŋ ŋini abu kiŋit tema, “Nyo iitanit iyoŋ?” kori “Nyo irworotor iyoŋ ka aberu na?” 28Kimyek aberu amot keŋ, kikumukumak toloma lotaun, tolimok ŋituŋa tema, 29“Potu kiŋolikisi ekile ŋolo abu okolimok ayoŋ daadaŋ ŋuna adau ayoŋ akitiya. Meere ba ca iŋes Kristo?” 30Tolomut ikes kiŋa etaun, toloto neni ayai Yesu. 31Ani eriŋa ikes eponito, kimaimaa ŋikasyomak Yesu temasi, “Eketataman, kimuj kare ca!”
32Tolimok Yesu ikes tema, “Ayakar ayoŋ akimuj ŋina nyiyenete iyes!”
33Kirworikinos ŋikasyomak make temasi, “Keinu idiotuŋanan iŋes akimuj a?”
34Tolimok Yesu ikes tema, “Akaakimuj iŋes akitiya ŋuna ecamit Akuj ŋina ekeyakuunit ayoŋ ka akirikakin ekeetic. 35Meere eminae atemar idoŋit ŋilapyo ŋiomwon tolemikinae a? Nai akalimokini ayoŋ iyes atemar, kireosi lomanikorin; akoko ikes etemokin akilem! 36Eryamuni ŋolo elemi eropit ŋolo ka akilem--ŋaraito ŋuna ka akiyar a ŋina nyedaun, ikotere elelyanete ŋolo etan ka ŋolo aleman kaapei. 37Erae nugu ŋakiro ŋuna a kire: ‘Eekini ipeituŋanan, tosodi tolem ŋinice!’ 38Abu ayoŋ ekeyakia iyes akilem aneni pa iekinito. Etiyata ŋuluce ka ilema iyes anakinyinyir kec.”
39Apotu Ŋisamaritayon ŋulu alalak ŋulu alotaun a ŋol, tonupa Yesu aŋuna a ŋakiro a ŋuna abu aberu ŋin kiteyenik ikes tema, “Abu iŋes okolimok ayoŋ daadaŋ ŋuna adau ayoŋ akitiya.” 40Ani epote Ŋisamaritayon neni keŋ, kiŋitakis iŋes akiriya ka ikes; kiriya iŋes a nen ŋirwa ŋiarei.
41Aŋuna ka akitatam keŋ, apotu nabo ŋice ŋulu alalak tonupa iŋes. 42Tolimokis ŋituŋa ŋul aberu ŋin temasi, “Meere ŋakiro kon bon tokona ikinupitor isua iŋes, nai ikiira isua ŋilopeyek atemar, erae lo kire Ekaiunan ŋolo ka akwap.”
Kitaŋaleu Yesu lokoku ke ekarikon
43Kelunyar ŋirwa ŋiarei, tolot Yesu Galileya. 44Aberakin sek iŋes elope akiteyenun atemar, “Nyitopolooritae ekadwaran anakwap keŋ.” 45Nai ani edoluni iŋes Galileya, kijaut ŋituŋa ŋulu ka akwap a ŋin iŋes, anerae keris ikes keanyut ŋuna daadaŋ etiyae iŋes alo Yerusalem akoloŋit ŋina a Paska, aŋuna kelositotor inaa.
46Toboŋo nabo Yesu lotaun ŋolo a Kana, nakwap a Galileya, neni etuluworya iŋes ŋakipi toruwor epiini. Ayai nai lotaun a Kaperenaum ekarikon ece ŋolo adyaka lokoku keŋ. 47Ani kedau ekile ŋol akiirar atemar aboŋu Yesu Galileya anakwap a ŋina a Yudeya, tonyou iŋes alo Kaperenaum, tolot neni a Yesu, todyek iŋes abunore akitaŋaleun lokoku keŋ ŋolo aapi atwanare. 48Tolimok Yesu iŋes tema, “Ani pa kiŋolikis iyes ŋakujuwuanisya ka ŋaumonokineta, nyinupete.”
49Tema nai ekarikon neni keŋ, “Ekapolon, bua kare ca apena eriŋa lokoku kaŋ nyetwana.” 50Tolimok Yesu iŋes tema, “Ape tolot, eyari lokoku kon.” Tonup ekile ŋol ŋuna alimokini Yesu, ido kionyak lore keŋ. 51Ani eriŋa iŋes elosi alorot, kiryama ka ŋiketiyak keŋ, tolimokis iŋes atemar aŋaleu lokoku keŋ.
52Kiŋit nai ekarikon ikes esaa ŋolo ageunia lokoku keŋ aŋaleun. Tolimokis ikes iŋes temasi, “Bien ŋisaae ŋikanikaarei emyekinia elekes iŋes.” 53Totamu nai papa ke edya atemar kerae esaa ŋolopei kelimokinia Yesu iŋes atemar, “Eyari lokoku kon.” Apotu nai iŋes ka ŋituŋa keŋ tonupa.
54Arae ŋin akujuwuanut ŋina a ŋaarei ŋina abu Yesu kitiya akitoodikin apolou keŋ, keboŋu alo Yudaya tari Galileya.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.