Mar. 14
14
Totukut ŋituŋa akiar Yesu
(Mat. 26:1-5; Luk. 22:1-2; Yoa. 11:45-53)
1Ani idoŋit ŋirwa ŋiarei todol akoloŋit ŋina a Paska, ŋina a ŋasuban a ŋamugati a ŋuna emam ŋakinyalet; kiwara ŋisacaradotin ŋulu apolok ka ŋiketatamak a Ŋikisila epite ŋolo kikamunet Yesu pa eyenio, toaryata iŋes. 2Temasi ikes, “Nyikikamu iŋes akoloŋit ŋina a Paska, ikotere nyebu aruruma alotuŋa.”
Kiwosakinae Yesu akimyet alo Betania
(Mat. 26:6-13; Yoa. 12:1-8)
3Ani eyai Yesu Betania kai a Simoni a ŋolo sek adyaka atapon, yaunae akimuj. Ani eriŋa iŋes imuji, bu aberu ŋina atiŋit ecupa ŋolo aoyan ŋolo etiyaunitae anamoru a ŋina anyaritae Alabasta, ŋolo ayai akimyet ŋina akukunyon, ŋina anyaritae Narido. Alal egyelit ŋolo ka akimyet a ŋin. Tobwaŋa aberu ŋin iwadio alocupa, ido tobukok akimyet nakou a Yesu.
4Toŋoa ŋituŋa ŋice ŋulu aya nen temasi, “Kaanukiro icanicanere akimyet ŋina akukunyon na? 5Anerae kerae togyelaritetei a ŋisilipae a ŋulu edeparito ŋamiae ŋauni, kekorakinitae ŋikulyak.” Kisiburata ikes aberu ŋin neni aronon.
6Tema nai Yesu, “Kimyekisi iŋes bon; nyo isiburaata iyes iŋes? Adau iŋes akitiyakin etic ŋolo ajokan neni kaŋ. 7Anerae irukito iyes ka ŋikulyak ŋirwa daadaŋ. Ipedorete akiŋarakin ikes apaki daadaŋ ŋina icamitotor. Nai nyikiruki iwon ŋirwa daadaŋ. 8Etiya iŋes ŋuna epedori; ekeos iŋes ayoŋ eriŋa nyenuka. 9Akalimokini ayoŋ iyes kire atemar, ŋinakwap daadaŋ itatamere Ŋakiro ŋuna Ajokak, elimoryo ŋakiro ŋuna etiya aberu na aŋuna ka atamunitor iŋes.”
Tocamu Yuda alukin Yesu
(Mat. 26:14-16; Luk. 22:3-6)
10Tolot Yuda Isikariot ŋolo arae epei a ŋulutomon ka ŋiarei losacaradotin ŋulu apolok, akipotokin Yesu neni kec. 11Tolakaros ikes nooi iirarete ŋakiro keŋ temasi, “Ikiinakinio iyoŋ ŋisiliŋa”. Kiwar nai Yuda apaki ŋina etemokino torikorere ŋisacaradotin neni a Yesu.
Kimuja Yesu ka ŋikasyomak keŋ akimuj ŋina a Paska
(Mat. 26:17-25; Luk. 22:7-14, 21-23; Yoa. 13:21-30)
12Akoloŋit ŋina eŋarenikini ŋina a Paska, ŋina a ŋasuban a ŋamugati a ŋuna emam ŋakinyalet ka ŋina eareneere ŋimeesekin, kiŋita ŋikasyomak Yesu temasi, “Ai icamit iyoŋ isua oloto etemokinioto neni imuja iyoŋ Paska?”
13Kiyakiya nai Yesu ikes ŋiarei tema, “Toloto lotaun, iryamasi iyes ka ekile iwuokit amot a ŋakipi; kiwuapakisi iŋes 14tari kai ŋina elomari iŋes. Tolimokis elope ka akai a ŋin atemar, ‘Ebala Eketataman, nyaani agule ŋina itemokino iŋes ka ŋikasyomak keŋ tonyamiata imesek ŋini a Paska?’ 15Ikitoodikini iŋes iyes agule ŋina eyai kidiama, ŋina itemokino ŋiboro daadaŋ ŋulu iitana. Kitemokis nen ejok aŋuna yok.”
16Toloto nai ŋikasyomak, tolomasi lotaun, toryamut ikwaŋina alimokinitere ikes. Kitemokis nai akimuj a Paska a nen.
17Ani enaŋi ŋisaae ŋulu ka ataboŋ, torukut Yesu ka ŋulutomon ka ŋiarei. 18Ani eriŋa ikes imujete, tolimok Yesu ikes tema, “Akalimokini ayoŋ iyes kire atemar, akalukini ayoŋ epei alokidiŋ kus; ŋol, iŋes ŋolo ikimuji ka ayoŋ.”
19Tonomosi ikes ŋakiro ŋun ŋitai nooi, kisyakis akiŋitiŋit Yesu a ŋipeipei ebasi, “Ayoŋ a?”
20Tolimok iŋes ikes tema, “Erae epei a ŋulutomon ka ŋiarei, ŋolo ikilumonokini ka ayoŋ amugati nasaani. 21Kire etwani Lokoku a Ituŋanan ikwapei igiritere Nakigireta, nai eroko nooi ŋakiro ŋuna eryamuni ekile ŋolo elukini iŋes! Kejoikinit koloŋ ekile ŋol nyidoun!”
Akimuj ŋina ke Ekapolon Yesu
(Mat. 26:26-30; Luk. 22:14-20; 1 Ŋikor. 11:23-25)
22Ani imujete ikes, tolemu Yesu amugati, kilipak, totyak, inak ikes tema, “Kijaasi, kimuja; erae na akaakuwan.”
23Tolemu nai ekopo, ani kedau akitalakar Akuj, inak ikes, tomata daadaŋ. 24Tolimok Yesu ikes tema, “Erae nu ŋaokot kaŋ, ŋuna ka Acamunet, ŋuna ebukoritae ikotere ŋikalalak. 25Akalimokini ayoŋ iyes kire atemar, nyamasi nabo ayoŋ ŋuna ke epiini akitodol akoloŋit ŋina amasya ekitetyana a Napukan ka Akuj.”
26Toeikis nai ikes eete ŋolo kitalakaret Akuj, ido tolomasi kiŋa, toloto lomoru a ŋikito a ŋulu enyaritae Olipa.
Tolimu Yesu atemar epegi Petero atemar ayeni iŋes
(Mat. 26:31-35; Luk. 22:31-34; Yoa. 13:36-38)
27Tolimok Yesu ŋikasyomak tema, “Ielarosi iyes daadaŋ; anerae igiritae Nakigireta ebe, ‘Abuni ayoŋ akibuŋa ekeyokon, kielaros nai ŋamesekin.’ 28Nai ekaku kadau ayoŋ ayarun, ekeŋarenikini ayoŋ iyes alosi Galileya.”
29Tema Petero neni a Yesu, “Tari kielarosi ŋuluce daadaŋ, nyalosi ayoŋ.”
30Toboŋok Yesu Petero tema, “Akalimokini ayoŋ iyoŋ kire atemar, takae nakwaare, eriŋa ekokoroit nyeruuno aruunet ŋina a ŋaarei, ipegi iyoŋ ŋapeget ŋauni atemar ikiyeni ayoŋ.”
31Toboŋok Petero ka agogoŋu tema, “Nyapegi ayoŋ jik, tari ketemar akaaryo ayoŋ ka iyoŋ!”
Tolimut ŋikasyomak ŋuluce daadaŋ ikwaŋinapei.
Kilip Yesu alo Getesemani
(Mat. 26:36-46; Luk. 22:39-46)
32Ani edolunete Yesu ka ŋikeekasyomak neni anyaritae Getesemani, tolimok Yesu ikes tema, “Kiboikinos nege eriŋa ayoŋ alosi akilip.” 33Torukosi Yesu ka Petero, Yakobo ta Yoana. Togeu iŋes akiil ka kiyaloloŋ, 34tolimok ŋikasyomak tema, “Iyaloloŋi ekaatau nooi esibit eapi atwanare. Kiboikinos nege, tokienyete.”
35Tolot nai iŋes kiŋaren iwadio toramakin kwap, kilip, tema, “Ani kepedor, tolunyar apaki ŋina aronon na aneni kaŋ”. 36Kilip nabo iŋes tema, “Papa, apa kaŋ! Ipedori iyoŋ alemar ŋican daadaŋ, tolema ekopo ŋolo a ŋican lo aneni kaŋ; meere ka acamit kaŋ, nai ikwaŋina icamitor iyoŋ.”
37Toboŋo nabo Yesu neni kec, toryamu ikes ejotoete, tema neni a Petero, “Simoni, ijotoe iyoŋ a? Nyipedori iyoŋ akikieny tari epeisaa daŋ a? 38Tokienyete ka kilipete, ikotere nyilomasi nakitemyet. Ecamit etau, nai epalag akuwan.”
39Toboŋo nabo Yesu akilip, kirwor ŋakiro ŋunapei ŋun. 40Ani eboŋuni nabo, toryamu ikes ejotoete, anerae abu tokuruwo ikes akikieny, pa ayenete ikes tari ŋakiro ŋuna boŋokino Yesu.
41Ani eboŋori Yesu aboŋoret ŋina a ŋauni, tolimok ikes tema, “Eriŋa iyes ijotoete ka ieŋunito a? Etemokin, adol esaa! Eapi Lokoku a Ituŋanan akipotokin nakan a ŋikasecak. 42Tonyoutu, oloto! Kiŋolikisi, adolu ekalukinon kaŋ.”
Akikamuno a Yesu alo Getesemani
(Mat. 26:47-56; Luk. 22:47-53; Yoa. 18:3-12)
43Ani eriŋa Yesu irworo, todolu Yuda Isikariot, ŋolo sek arae epei a ŋikasyomak a ŋulutomon ka ŋiarei, erukito ka ŋituŋa ŋulu alalak, ŋulu atiŋito ŋatumio ka ŋabiroi. Kiyakuunito ikes ŋisacaradotin ŋulu apolok ka ŋiketatamak a Ŋikisila ta ŋikatukok. 44Aris sek Yuda kelimoki ŋikekamunak a Yesu atemar, “Ŋolo anui ayoŋ, iŋes ŋolo. Kikamutu iŋes torikosi, totiŋito kojokan.”
45Ŋinapei adolunio Yuda, tolot neni a Yesu tema, “Eketataman!” Tosodi tonu iŋes. 46Kikamut ikes Yesu ka agogoŋu. 47Tosodi epei aneni a ŋulu awuasi alodiye, tolemu atum anakuraro, kitel eketiyan ŋolo ke Esacaradoti a ŋolo Apolon nooi, totubo akit. 48Kiŋit Yesu ikes tema, “Kan nyo iponitotor iyes akikamun ayoŋ itiŋito ŋatumio ka ŋabiroi esibit arae ayoŋ ekokolan? 49Ikirukit ayoŋ ka iyes ŋirwa daadaŋ alo Kai ka Akuj etatami, ipotu iyes nyikikamut ayoŋ. Nai itemokino kiyookinos Ŋakigireta.”
50Toesikis ŋikasyomak daadaŋ iŋes, kielaros.
51Ayai esorokit epei ŋolo atupit Yesu tonapite elou. Acamito ŋituŋa akikamun iŋes, 52nai abu iŋes kipiiri eleri, toesik elou.
Yesu alokiŋaren Atukot a Ŋiyudayan
(Mat. 26:57-68; Luk. 22:54-55, 63-71; Yoa. 18:13-14, 19-24)
53Torikosi ikes Yesu neni ke Esacaradoti a ŋolo Apolon nooi; totukokinos ŋisacaradotin ŋulu apolok daadaŋ ka ŋikatukok kaapei ka ŋiketatamak a Ŋikisila.
54Atupit Petero Yesu aneni alwana, tari tooma ere ke Esacaradoti a ŋolo Apolon nooi. Kiboikinos ka ŋisigarya kiwuaŋas anakim. 55Kiwara ŋisacaradotin ŋulu apolok ka Atukot daadaŋ ŋakiro ŋunakisitakinet Yesu, ikotere earere; nai toŋopikis. 56Anerae apotu ŋikesitakinak ŋulu alalak ŋul, kirworo ŋuna pa eyookino, nabo pa acamuna ŋikecesuudae.
57Tonyout ŋice, kisudokis temasi, 58“Ikipotu isua eirasi iŋes ebala, ‘Etuwori Akai ka Akuj na ŋina adukete ŋituŋa a ŋakan, ido alotooma ŋirwa ŋiuni, odukok ace ŋina nyepedorete ŋakan a ŋituŋa akiduk’ ”. 59Ŋakiro a ŋul daŋ, pa acamuna.
60Tonyou Esacaradoti ŋolo Apolon nooi, towo alokiŋaren ŋituŋa, kiŋit Yesu tema, “Emam iyoŋ akirot ŋina iboŋokini a? Anukiro ikisitakinitotor iyoŋ ŋituŋa lu?”
61Kililiŋ Yesu cek, nyeboŋok adiokirot. Kiŋit nabo Esacaradoti ŋolo Apolon nooi iŋes tema, “Irae iyoŋ Kristo Lokoku ka Akuj a ŋina ipuroe a?”
62Toboŋok Yesu tema, “Arae; nabo iŋolikinete iyes Lokoku a Ituŋanan iboi aloteten Akuj ŋina alokidiama nooi ka ebuni alodowuon a ŋulu anakuj!”
63Tocilicili Esacaradoti ŋolo Apolon nooi ŋikeelowi tema, “Nyo nabo eriŋa ikiwaritor ŋisuudae ŋice! 64Idaut iyes daŋ akiirar ŋiyiany keŋ. Nyo itamete tokona iyes?”
Temasi daadaŋ, “Itemokino iŋes totwan.”
65Kisyakis ŋice akimwaanakin iŋes, akirap ŋakonyen keŋ ka akibapabap iŋes ebasi, “Totedo ŋini ikibap iyoŋ?” Kibapabapata ŋisigarya daŋ iŋes.
Topeg Petero atemar ayeni Yesu
(Mat. 26:69-75; Luk. 22:56-62; Yoa. 18:15-18, 25-27)
66Ani eriŋa Petero eyai lore ŋol, kitoru aketiyan apei ŋina ke Esacaradoti a ŋolo Apolon nooi diye keŋ. 67Ani iŋolikini iŋes Petero iwuaŋa anakim, kitek iŋes, tolimu tema, “Iyoŋ daŋ irukito ka Yesu ŋolo a Nasaret!”
68Topeg Petero ŋun tema, “Nyayeni ayoŋ iŋes, nabo nyiyeni iyoŋ ŋuna irworo.” Torotok Petero a nen, tolot kiŋa diye epuke. [Apaki ŋinapei ŋin, toruuni ekokoroit.]
69Toanyuwa nabo aketiyan ŋin iŋes, tolimok ŋituŋa ŋulu awuasi alodiye tema, “Erae lo epei alokidiŋ kec!” 70Topeg nabo Petero ŋun.
Kelunyar apaki ŋinauriyen, temasi ŋituŋa ŋulu awuasi alodiye Petero, “Kire jik irae iyoŋ daŋ epei alokidiŋ kec, anerae irae iyoŋ Egalilayat.”
71Nai togeu Petero akilama ka akikoŋ tema, “Nyayeni ayoŋ ekile ŋolo ilimito iyes.”
72Esaa ŋolopei, toru ekokoroit aruunet ŋina a ŋaarei. Totamu Petero ŋakiro ŋuna alimokinit Yesu iŋes ebe, “Takae nakwaare, eriŋa ekokoroit nyeruuno aruunet ŋina a ŋaarei, ipegi iyoŋ ŋapeget ŋauni atemar ikiyeni ayoŋ.” Ani etamuni Petero ŋun, kisyak akigworo nooi.
Currently Selected:
Mar. 14: NIB2008
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.
Mar. 14
14
Totukut ŋituŋa akiar Yesu
(Mat. 26:1-5; Luk. 22:1-2; Yoa. 11:45-53)
1Ani idoŋit ŋirwa ŋiarei todol akoloŋit ŋina a Paska, ŋina a ŋasuban a ŋamugati a ŋuna emam ŋakinyalet; kiwara ŋisacaradotin ŋulu apolok ka ŋiketatamak a Ŋikisila epite ŋolo kikamunet Yesu pa eyenio, toaryata iŋes. 2Temasi ikes, “Nyikikamu iŋes akoloŋit ŋina a Paska, ikotere nyebu aruruma alotuŋa.”
Kiwosakinae Yesu akimyet alo Betania
(Mat. 26:6-13; Yoa. 12:1-8)
3Ani eyai Yesu Betania kai a Simoni a ŋolo sek adyaka atapon, yaunae akimuj. Ani eriŋa iŋes imuji, bu aberu ŋina atiŋit ecupa ŋolo aoyan ŋolo etiyaunitae anamoru a ŋina anyaritae Alabasta, ŋolo ayai akimyet ŋina akukunyon, ŋina anyaritae Narido. Alal egyelit ŋolo ka akimyet a ŋin. Tobwaŋa aberu ŋin iwadio alocupa, ido tobukok akimyet nakou a Yesu.
4Toŋoa ŋituŋa ŋice ŋulu aya nen temasi, “Kaanukiro icanicanere akimyet ŋina akukunyon na? 5Anerae kerae togyelaritetei a ŋisilipae a ŋulu edeparito ŋamiae ŋauni, kekorakinitae ŋikulyak.” Kisiburata ikes aberu ŋin neni aronon.
6Tema nai Yesu, “Kimyekisi iŋes bon; nyo isiburaata iyes iŋes? Adau iŋes akitiyakin etic ŋolo ajokan neni kaŋ. 7Anerae irukito iyes ka ŋikulyak ŋirwa daadaŋ. Ipedorete akiŋarakin ikes apaki daadaŋ ŋina icamitotor. Nai nyikiruki iwon ŋirwa daadaŋ. 8Etiya iŋes ŋuna epedori; ekeos iŋes ayoŋ eriŋa nyenuka. 9Akalimokini ayoŋ iyes kire atemar, ŋinakwap daadaŋ itatamere Ŋakiro ŋuna Ajokak, elimoryo ŋakiro ŋuna etiya aberu na aŋuna ka atamunitor iŋes.”
Tocamu Yuda alukin Yesu
(Mat. 26:14-16; Luk. 22:3-6)
10Tolot Yuda Isikariot ŋolo arae epei a ŋulutomon ka ŋiarei losacaradotin ŋulu apolok, akipotokin Yesu neni kec. 11Tolakaros ikes nooi iirarete ŋakiro keŋ temasi, “Ikiinakinio iyoŋ ŋisiliŋa”. Kiwar nai Yuda apaki ŋina etemokino torikorere ŋisacaradotin neni a Yesu.
Kimuja Yesu ka ŋikasyomak keŋ akimuj ŋina a Paska
(Mat. 26:17-25; Luk. 22:7-14, 21-23; Yoa. 13:21-30)
12Akoloŋit ŋina eŋarenikini ŋina a Paska, ŋina a ŋasuban a ŋamugati a ŋuna emam ŋakinyalet ka ŋina eareneere ŋimeesekin, kiŋita ŋikasyomak Yesu temasi, “Ai icamit iyoŋ isua oloto etemokinioto neni imuja iyoŋ Paska?”
13Kiyakiya nai Yesu ikes ŋiarei tema, “Toloto lotaun, iryamasi iyes ka ekile iwuokit amot a ŋakipi; kiwuapakisi iŋes 14tari kai ŋina elomari iŋes. Tolimokis elope ka akai a ŋin atemar, ‘Ebala Eketataman, nyaani agule ŋina itemokino iŋes ka ŋikasyomak keŋ tonyamiata imesek ŋini a Paska?’ 15Ikitoodikini iŋes iyes agule ŋina eyai kidiama, ŋina itemokino ŋiboro daadaŋ ŋulu iitana. Kitemokis nen ejok aŋuna yok.”
16Toloto nai ŋikasyomak, tolomasi lotaun, toryamut ikwaŋina alimokinitere ikes. Kitemokis nai akimuj a Paska a nen.
17Ani enaŋi ŋisaae ŋulu ka ataboŋ, torukut Yesu ka ŋulutomon ka ŋiarei. 18Ani eriŋa ikes imujete, tolimok Yesu ikes tema, “Akalimokini ayoŋ iyes kire atemar, akalukini ayoŋ epei alokidiŋ kus; ŋol, iŋes ŋolo ikimuji ka ayoŋ.”
19Tonomosi ikes ŋakiro ŋun ŋitai nooi, kisyakis akiŋitiŋit Yesu a ŋipeipei ebasi, “Ayoŋ a?”
20Tolimok iŋes ikes tema, “Erae epei a ŋulutomon ka ŋiarei, ŋolo ikilumonokini ka ayoŋ amugati nasaani. 21Kire etwani Lokoku a Ituŋanan ikwapei igiritere Nakigireta, nai eroko nooi ŋakiro ŋuna eryamuni ekile ŋolo elukini iŋes! Kejoikinit koloŋ ekile ŋol nyidoun!”
Akimuj ŋina ke Ekapolon Yesu
(Mat. 26:26-30; Luk. 22:14-20; 1 Ŋikor. 11:23-25)
22Ani imujete ikes, tolemu Yesu amugati, kilipak, totyak, inak ikes tema, “Kijaasi, kimuja; erae na akaakuwan.”
23Tolemu nai ekopo, ani kedau akitalakar Akuj, inak ikes, tomata daadaŋ. 24Tolimok Yesu ikes tema, “Erae nu ŋaokot kaŋ, ŋuna ka Acamunet, ŋuna ebukoritae ikotere ŋikalalak. 25Akalimokini ayoŋ iyes kire atemar, nyamasi nabo ayoŋ ŋuna ke epiini akitodol akoloŋit ŋina amasya ekitetyana a Napukan ka Akuj.”
26Toeikis nai ikes eete ŋolo kitalakaret Akuj, ido tolomasi kiŋa, toloto lomoru a ŋikito a ŋulu enyaritae Olipa.
Tolimu Yesu atemar epegi Petero atemar ayeni iŋes
(Mat. 26:31-35; Luk. 22:31-34; Yoa. 13:36-38)
27Tolimok Yesu ŋikasyomak tema, “Ielarosi iyes daadaŋ; anerae igiritae Nakigireta ebe, ‘Abuni ayoŋ akibuŋa ekeyokon, kielaros nai ŋamesekin.’ 28Nai ekaku kadau ayoŋ ayarun, ekeŋarenikini ayoŋ iyes alosi Galileya.”
29Tema Petero neni a Yesu, “Tari kielarosi ŋuluce daadaŋ, nyalosi ayoŋ.”
30Toboŋok Yesu Petero tema, “Akalimokini ayoŋ iyoŋ kire atemar, takae nakwaare, eriŋa ekokoroit nyeruuno aruunet ŋina a ŋaarei, ipegi iyoŋ ŋapeget ŋauni atemar ikiyeni ayoŋ.”
31Toboŋok Petero ka agogoŋu tema, “Nyapegi ayoŋ jik, tari ketemar akaaryo ayoŋ ka iyoŋ!”
Tolimut ŋikasyomak ŋuluce daadaŋ ikwaŋinapei.
Kilip Yesu alo Getesemani
(Mat. 26:36-46; Luk. 22:39-46)
32Ani edolunete Yesu ka ŋikeekasyomak neni anyaritae Getesemani, tolimok Yesu ikes tema, “Kiboikinos nege eriŋa ayoŋ alosi akilip.” 33Torukosi Yesu ka Petero, Yakobo ta Yoana. Togeu iŋes akiil ka kiyaloloŋ, 34tolimok ŋikasyomak tema, “Iyaloloŋi ekaatau nooi esibit eapi atwanare. Kiboikinos nege, tokienyete.”
35Tolot nai iŋes kiŋaren iwadio toramakin kwap, kilip, tema, “Ani kepedor, tolunyar apaki ŋina aronon na aneni kaŋ”. 36Kilip nabo iŋes tema, “Papa, apa kaŋ! Ipedori iyoŋ alemar ŋican daadaŋ, tolema ekopo ŋolo a ŋican lo aneni kaŋ; meere ka acamit kaŋ, nai ikwaŋina icamitor iyoŋ.”
37Toboŋo nabo Yesu neni kec, toryamu ikes ejotoete, tema neni a Petero, “Simoni, ijotoe iyoŋ a? Nyipedori iyoŋ akikieny tari epeisaa daŋ a? 38Tokienyete ka kilipete, ikotere nyilomasi nakitemyet. Ecamit etau, nai epalag akuwan.”
39Toboŋo nabo Yesu akilip, kirwor ŋakiro ŋunapei ŋun. 40Ani eboŋuni nabo, toryamu ikes ejotoete, anerae abu tokuruwo ikes akikieny, pa ayenete ikes tari ŋakiro ŋuna boŋokino Yesu.
41Ani eboŋori Yesu aboŋoret ŋina a ŋauni, tolimok ikes tema, “Eriŋa iyes ijotoete ka ieŋunito a? Etemokin, adol esaa! Eapi Lokoku a Ituŋanan akipotokin nakan a ŋikasecak. 42Tonyoutu, oloto! Kiŋolikisi, adolu ekalukinon kaŋ.”
Akikamuno a Yesu alo Getesemani
(Mat. 26:47-56; Luk. 22:47-53; Yoa. 18:3-12)
43Ani eriŋa Yesu irworo, todolu Yuda Isikariot, ŋolo sek arae epei a ŋikasyomak a ŋulutomon ka ŋiarei, erukito ka ŋituŋa ŋulu alalak, ŋulu atiŋito ŋatumio ka ŋabiroi. Kiyakuunito ikes ŋisacaradotin ŋulu apolok ka ŋiketatamak a Ŋikisila ta ŋikatukok. 44Aris sek Yuda kelimoki ŋikekamunak a Yesu atemar, “Ŋolo anui ayoŋ, iŋes ŋolo. Kikamutu iŋes torikosi, totiŋito kojokan.”
45Ŋinapei adolunio Yuda, tolot neni a Yesu tema, “Eketataman!” Tosodi tonu iŋes. 46Kikamut ikes Yesu ka agogoŋu. 47Tosodi epei aneni a ŋulu awuasi alodiye, tolemu atum anakuraro, kitel eketiyan ŋolo ke Esacaradoti a ŋolo Apolon nooi, totubo akit. 48Kiŋit Yesu ikes tema, “Kan nyo iponitotor iyes akikamun ayoŋ itiŋito ŋatumio ka ŋabiroi esibit arae ayoŋ ekokolan? 49Ikirukit ayoŋ ka iyes ŋirwa daadaŋ alo Kai ka Akuj etatami, ipotu iyes nyikikamut ayoŋ. Nai itemokino kiyookinos Ŋakigireta.”
50Toesikis ŋikasyomak daadaŋ iŋes, kielaros.
51Ayai esorokit epei ŋolo atupit Yesu tonapite elou. Acamito ŋituŋa akikamun iŋes, 52nai abu iŋes kipiiri eleri, toesik elou.
Yesu alokiŋaren Atukot a Ŋiyudayan
(Mat. 26:57-68; Luk. 22:54-55, 63-71; Yoa. 18:13-14, 19-24)
53Torikosi ikes Yesu neni ke Esacaradoti a ŋolo Apolon nooi; totukokinos ŋisacaradotin ŋulu apolok daadaŋ ka ŋikatukok kaapei ka ŋiketatamak a Ŋikisila.
54Atupit Petero Yesu aneni alwana, tari tooma ere ke Esacaradoti a ŋolo Apolon nooi. Kiboikinos ka ŋisigarya kiwuaŋas anakim. 55Kiwara ŋisacaradotin ŋulu apolok ka Atukot daadaŋ ŋakiro ŋunakisitakinet Yesu, ikotere earere; nai toŋopikis. 56Anerae apotu ŋikesitakinak ŋulu alalak ŋul, kirworo ŋuna pa eyookino, nabo pa acamuna ŋikecesuudae.
57Tonyout ŋice, kisudokis temasi, 58“Ikipotu isua eirasi iŋes ebala, ‘Etuwori Akai ka Akuj na ŋina adukete ŋituŋa a ŋakan, ido alotooma ŋirwa ŋiuni, odukok ace ŋina nyepedorete ŋakan a ŋituŋa akiduk’ ”. 59Ŋakiro a ŋul daŋ, pa acamuna.
60Tonyou Esacaradoti ŋolo Apolon nooi, towo alokiŋaren ŋituŋa, kiŋit Yesu tema, “Emam iyoŋ akirot ŋina iboŋokini a? Anukiro ikisitakinitotor iyoŋ ŋituŋa lu?”
61Kililiŋ Yesu cek, nyeboŋok adiokirot. Kiŋit nabo Esacaradoti ŋolo Apolon nooi iŋes tema, “Irae iyoŋ Kristo Lokoku ka Akuj a ŋina ipuroe a?”
62Toboŋok Yesu tema, “Arae; nabo iŋolikinete iyes Lokoku a Ituŋanan iboi aloteten Akuj ŋina alokidiama nooi ka ebuni alodowuon a ŋulu anakuj!”
63Tocilicili Esacaradoti ŋolo Apolon nooi ŋikeelowi tema, “Nyo nabo eriŋa ikiwaritor ŋisuudae ŋice! 64Idaut iyes daŋ akiirar ŋiyiany keŋ. Nyo itamete tokona iyes?”
Temasi daadaŋ, “Itemokino iŋes totwan.”
65Kisyakis ŋice akimwaanakin iŋes, akirap ŋakonyen keŋ ka akibapabap iŋes ebasi, “Totedo ŋini ikibap iyoŋ?” Kibapabapata ŋisigarya daŋ iŋes.
Topeg Petero atemar ayeni Yesu
(Mat. 26:69-75; Luk. 22:56-62; Yoa. 18:15-18, 25-27)
66Ani eriŋa Petero eyai lore ŋol, kitoru aketiyan apei ŋina ke Esacaradoti a ŋolo Apolon nooi diye keŋ. 67Ani iŋolikini iŋes Petero iwuaŋa anakim, kitek iŋes, tolimu tema, “Iyoŋ daŋ irukito ka Yesu ŋolo a Nasaret!”
68Topeg Petero ŋun tema, “Nyayeni ayoŋ iŋes, nabo nyiyeni iyoŋ ŋuna irworo.” Torotok Petero a nen, tolot kiŋa diye epuke. [Apaki ŋinapei ŋin, toruuni ekokoroit.]
69Toanyuwa nabo aketiyan ŋin iŋes, tolimok ŋituŋa ŋulu awuasi alodiye tema, “Erae lo epei alokidiŋ kec!” 70Topeg nabo Petero ŋun.
Kelunyar apaki ŋinauriyen, temasi ŋituŋa ŋulu awuasi alodiye Petero, “Kire jik irae iyoŋ daŋ epei alokidiŋ kec, anerae irae iyoŋ Egalilayat.”
71Nai togeu Petero akilama ka akikoŋ tema, “Nyayeni ayoŋ ekile ŋolo ilimito iyes.”
72Esaa ŋolopei, toru ekokoroit aruunet ŋina a ŋaarei. Totamu Petero ŋakiro ŋuna alimokinit Yesu iŋes ebe, “Takae nakwaare, eriŋa ekokoroit nyeruuno aruunet ŋina a ŋaarei, ipegi iyoŋ ŋapeget ŋauni atemar ikiyeni ayoŋ.” Ani etamuni Petero ŋun, kisyak akigworo nooi.
Currently Selected:
:
Highlight
Share
Copy
Want to have your highlights saved across all your devices? Sign up or sign in
Ngakarimojong Interconfessional Bible © Bible Society of Uganda, 2008.