Juan 5

Ito nangpalaing nge̍ Je̍sus ka isa nga lalaki iya Algew Ngilin

1Ket kalpasan niyan, uwed isa nga padaya diya Hudyu. Ket nanang-at nge̍ Je̍sus nga nawe̍ enna He̍rusale̍m nga nakipadaya.

2Ket enna He̍rusale̍m, uwed isa nga naptut nga pagdigusan da nga nale̍cbut ka lima nga ruwangan nga naatpan. Maawagan yan nga pagdigusan ka Be̍tsata no ya kagi He̍briyu, ket denni iya isa nga ruwangan niya siyudad nga maawagan ka Ruwangan Para Karne̍ru. 3Iya lidum dito lima nga ruwangan, adu diya uwed dipe̍re̍nsiya niya beggi da nga agiida antuni, nga agten kadiya kulap, piley, se̍ dito nacpe̍t ya duduma nga parte̍ niya beggi da. [It-iton da ya arinewnew niya danum. 4Ta pasaray kanu sumegged ya isa nga anghe̍l niya Apu ito pagdigusan, ket arinewnewwan na ya danum. Ket ya mona nga pumisuc iya danum kalpasan niya pannakaarinewnew na, malaingan kanu met ya orey nagan na nga dipe̍re̍nsiya na.]

5Ket ito pagdigusan itun, uwed isa nga lalaki nga tellu nga pulu ket walu nga dagun ya panagsagaba na iya dipe̍re̍nsiya nan. 6Ket nasingen ne̍ Je̍sus to lalaki nga nakaida antuni, se̍ naemmuwan na nga nabayagin nga agsagsagaba. Itu nga kinunen na ito lalaki, “Gabay mu ya malaingan?” kunen na.

7Ket to lalaki nga uwed dipe̍re̍nsiya na, kinunen na ngarud, “Awan met mangipisuc iyaken iya pagdigusan, apu, apaman nga maarinewnewwan ya danum. Ta no gaygay-atec pekkem ya mawe̍, ket uwed met man mon-ona ngem iyaken nga pumisuc kin,” kunen na.

8Ket e̍ Je̍sus, kinunen na ito lalaki, “Bumangun ka ngarudin! Bacrunem ya idam, se̍ manalan kan,” kunen na. 9Ket sigida met nga nalaingan to lalaki. Dikad binacrun na ngarud to ida na, ket nanalanin.

Ket Algew Ngilin met ito napasamac yan. 10Itu nga kinunen dito pangpangulu diya Hudyu ito lalaki nga nalaingan, “Algew Ngilin met. Ket sigun iya Linteg tida, maiparit met nga agtuwem ya idam ita,” kunen da.

11Ket to lalaki, kinunen na, “Ya toley nga nangpalaing iyaken, kinunen na met iyaken nga, ‘Bacrunem ya idam, se̍ manalan kan,’ kunen na met,” kunen na.

12Ket nagsaludsud dito Hudyu igina nga kinunen da, “Nagan ngarud niyan nga toley nga nagkunen nga bacrunem ya idam se̍ manalan ka?” kunen da. 13Ngem to lalaki nga nalaingan, madi na met emmu no nagan to nangpalaing igina. Ta adu diya toley iyan nga lugar, ket nagliguligud nge̍ Je̍susin.

14Ket iya di nabayag, naaskuran ne̍ Je̍sus to lalaki enna Te̍mplu. Ket kinunen na ito lalaki, “Singem ket nalaingan kan! Ala! Isardeng mu ya panagbasbasul mu, tasun awan kuma dacdake̍c nga mapasamac nad ikew,” kunen na.

15Ket to lalaki, nawe̍ na nipakaemmu kadito pangpangulu diya Hudyu nga e̍ Je̍sus gayam ya nangpalaing igina.

Ya turay niya Anac ne̍ Apu Diyus

16Dikad pe̍ dito pangpangulu diya Hudyu, nawe̍ da kinuntra nge̍ Je̍susin, ta nangpalaing iya Algew Ngilin. 17Ngem kinunen met ne̍ Je̍sus igida, “Kanayun ya panagwangel ne̍ Amac nga awan sardeng na, ket agten nac pe̍ iyan nga agwangwangel,” kunen na.

18Itu nga ad-adda lugud manin ya pinget dito pangpangulu diya Hudyu nga mangpapatey e̍ Je̍sus, bekken nas nga gapu iya panangsalungasing na kanu iya paglinteggan niya Algew Ngilin, no di lugud pe̍ gapu ta kinunen na nga Ama na mettas nge̍ Apu Diyus. Ket iya agten iyan, nipada na met ya beggi na e̍ Apu Diyus.

19Itu nga kinunen ne̍ Je̍sus kadito pangpangulu diya Hudyu, “Pudnu met yani nga ibagac dakayu: Awan mawangel niya Anac nga bucbukud na. Ya masingen na nga wangwanglen niya Ama na, itu ngas ya mawangel na. Ta ya orey nagan na nga wanglen niya Ama, itu met ya tuladen niya Anac. 20Ta ya Ama, ayaten na ya Anac, ket ipakaemmu na igina ya amin nga wangwanglen na. Ket ipawangel na nad iya Anac diya daddadackel pekkem ngem kadidi nga nasingen nun, tasun masdaaw kayu. 21Ta no ya Ama, pagungaren na diya natey ket biyagen na da met. Ket agten met pe̍ ya Anac, ta mange̍cde̍ pe̍ ka biyag kadiya gabay na nga e̍cdan.

22“Ket no ya panangukum ka toley, bekken nin nga ya Ama ya mangukum, ta ne̍cde̍ nan iya Anac ya amin nga turay nga mangukum. 23Agten iyan ngarud ya winangel niya Ama, tasun diya amin nga toley, maiparis kuma ya panagdayaw da iya Anac iya panagdayaw da iya Ama. Ket iya agten iyan, ya madi mangdayaw iya Anac, madi na met pe̍ padayawan ya Ama nga nangibon igina.

24“Tutu met yani nga kunec dakayu: Ya mangipangag kadiya kagic se̍ mamati iya nangibon iyaken, uwed iginan ya biyag nga agnanayun. Ket madi nad maukum, no di lugud nailisi yin iya pannakaukum na, ket naiyalisin iya turay niya biyag, manipud iya turay niya patey.

25“Tutu met nga uwed nad timpu nga diya toley nga naibilang nga natey iya imatang ne̍ Apu Diyus, ket magicna da ya bilin niya Anac ne̍ Apu Diyus igida. Ket diya mangipangag iya Anac, mae̍cdan da ngarud ka agnanayun nga biyag. Ket kinapudnu na, nadatngan ngarudin yan nga timpu. 26Tutu met nga agten iyan, ta ya Ama mettas ya pagtaudan niya biyag, ket itu nga ne̍cde̍ na met pe̍ iya Anac na ya turay nga mange̍cde̍ ka biyag. 27Ket se̍ ne̍cde̍ na pe̍ iya Anac ya turay nga mangukum, gapu ta igina ngarud met ya Anac nga Naipatoley.

28“Bekken nu kuma nga pakasdaawan yan nga kunec. Ta uwed nad met sumarunu nga timpu nga diya amin nga natey nga uwed kadiya tamtamen da, magicna da nad ya bilin niya Anac ne̍ Apu Diyus igida, 29ket rumwar da nad met kadiya tamtamen da. Ket diya nangtungpal kadiya nabaru ito kauwed da nga biyag, mapagungar da nad nga agbiyag manin. Ngem diya nagwangel kadiya dake̍c, mapagungar da nad tasun maukum da.

30“Ket iyaken, awan mawangel ku nga kabucbukudac, no di lugud sigun nas iya ibaga niya Ama iyaken ya panangukum ku. Ket itu nga nalinteg ngas ya panangukum ku, ta bekken nga ya tarigagay ku ya wanglec, no di ngas ya gabay niya nangibon iyaken,” kunen ne̍ Je̍sus.

Diya mangipanecnec maipanggep e̍ Je̍sus

31Nituluy ne̍ Je̍sus nga kinunen na, “No iyaken mettas ya mangipanecnec iya beggic, bekken nga nakapapati ya pammanecnec ku. 32Ngem uwed met sabali nga mangipanecnec maipanggep iyaken, ket itu ya Ama. Ket emmuc nga pudnu met ya ibaga na nga mangipanecnec maipanggep iyaken.

33“Ket orey to Juan nga Mammautisar, uwed dito nibon nu igina itun nga nangdamag igina iya maipanggep iyaken. Ket pudnu pe̍ ya nipakaemmu na maipanggep iyaken. 34Ibagac ngarud yan, ngem bekken nga gapu ta masapul ku ya pammanecnec niya isa nga toley, no di lugud tasun mamati kayu kuma ito nipakaemmu na. Ket no agten iyan, maisalakan kayu.

35“Ta to Juan, naiyarig iya masibsibtan nga dilag nga nagdardarang. Ket dakayu, nagustuwan nu met ito damu nito panangipawada na. 36Ngem ya pammanecnec nga uwed iyaken, nabacbaked pekkem ngem ito panangipanecnec nito Juan. Ta diya ipawpawangel niya Ama iyaken, itu pe̍ diya mangpanecnec iya maipanggep iyaken. Ket itu ngarud didi diya wangwanglec ita. Ket didi met diya mangipasingen nga nibon nac nga tutu ya Ama. 37Ket ya Ama nga nangibon iyaken, igina mettas pe̍ ya nangipanecnec iya maipanggep iyaken. Ngem dakayu, pulus nga madi nu nipangag ya kagi na, se̍ madi nu pe̍ nasingen ya langa na. 38Ket bekken ngarud nga ya kagi na ya laglagipen nu, ta madi kayu patpatiyen ya nibon na.

39“Dakayu, ad-adalen nu met diya naisurat iya Bibliya, gapu ta pagarupen nu nga itu ya pakaaskuran nu iya makae̍cde̍ ka biyag nga agnanayun. Ket ya kinapudnu na, diya naisurat iya Bibliya, itu mettas diya mangipanecnec maipanggep iyaken. 40Ngem orey agten iyan, madi kayu met gabay ya umadenni nga sumurut iyaken, tasun mae̍cdan kayu kuma iyan nga biyag.

41“Ket iyaken, bekken nga ya panangpadayaw niya toley ya sapsapulec. 42Ngem no dakayu, bekken nga agten iyan. Emmuc met ya uwed kadiya nakem nu, ket emmuc nga bekken met nga e̍ Apu Diyus ya ay-ayaten nu. 43Tutu met yan, ta orey inumbe̍t tac gapu mettas iya kinaturay niya Amac, ket pulus met nga madi dac inawat. Ngem no uwed kuma sabali nga agparang nga gennung, se̍ orey no ya mismu nga kinaturay na ngas ya mangipanecnec iya beggi na, ket nalaka nu was met nga awaten nin.

44“Madi nu ngarud mabalin ya mamati iyaken, ta ya kalikaguman nu, bekken nga ya panangannamung niya is-isa nga Diyus dakayu, no di lugud ya pammadayaw niya pada nu nga toley.

45“Ngem orey agten iyan ya kagkagiyec, madi kayu kuma ipagarup nga iyaken ya mangipilit dakayu nad iya Ama. Ta to Muyse̍s nga nangitalkan nu iya namnama nu, igina mettas ya arig nga mangipilit dakayu iya Ama. 46Tutu met nga agten iyan, ta no tutu nga namati kayu kuma kadiya nisursurat nito Muyse̍s, pinati dac ngarud met pe̍ yin. Ta maipanggep ngarud iyaken to nisurat na. 47Ngem madi kayu ngarud pinati diya nisursurat nito Muyse̍s. Itu nga siguradu nga madi kayu pe̍ mamati iya kagic,” kunen ne̍ Je̍sus.

Currently Selected:

Juan 5: YBT

Highlight

Copy