Lukas 19

To Sakiyu nga agsingsingir ka buis

1Dimateng nge̍ Je̍sus ka He̍riku, ket lumaslasat antuni nin. 2Ket uwed met antuni ya isa nga pangulu diya agsingsingir ka buis, nga agnagan ka Sakiyu. Ket nabacnang yan. 3Ket to Sakiyu, gabay na nga masingen nge̍ Je̍sus, ngem madi na met masingen gapu iya kaadu diya toley, ta pandec ngamin to Sakiyu. 4Itu nga nanagtag nga limiwan kadito adu nga toltoley, nga nawe̍ imune̍c iya isa nga kayu nga sikumuru, tasun masingen na nge̍ Je̍sus, ta tumalib iyan.

5Ket ito maibatug nge̍ Je̍sus iyan, linangad na met nge̍ Sakiyu, se̍ na kinunen igina, “Sakiyu, alistuwam ya umulug! Ta masapul met nga ya baley mu ya pagdagusac ita nga algew,” kunen na.

6Ket inalistuwan ngarud ne̍ Sakiyu to imulug, ket siraragsac ngarud met nga nangsangaili e̍ Je̍sus.

7Ket diya toltoley nga nakasingen iyan, nagtantanabotob da nga amin, nga kinunen da maipanggep e̍ Je̍sus, “Ahah! Nawe̍ met yan nga toley nga nagpasangaili ka managbasul!” kunen da.

8Ket enna baley ne̍ Sakiyu, ginumnukat nge̍ Sakiyu nga kinunen na iya Apu, “Agten idi nin ya wanglec kun, Apu: E̍cde̍c ya kagudduwa niya sansanicwac kadiya napanglaw. Ket ya orey nagan na nga sinikapac, ket mame̍npat met ya kaadu niya isolic igida,” kunen na.

9Ket e̍ Je̍sus, nagkagi maipanggep e̍ Sakiyu win, nga kinunen na, “Ita nga algew, nadatngan ngarudin ya pakaisalakanan didi nga sangabaley, ta anac met pe̍ nito Abraham yani nga toley. 10Tutu met yan, ta ya Anac nga Naipatoley, inumbe̍t met tasun sapulen se̍ isalakan na diya napukaw,” kunen na.

To pangngarig maipanggep kadito natalec nga mangikem ka kuwarta

Mat. 25:14-30

11Ket to ili nga He̍riku, bekken nga deyyu ka He̍rusale̍m nga pennan ne̍ Je̍sus. Ket dito toltoley iyan nga naggigicna e̍ Je̍sus, nipagarup da no iyanin ya panagparang niya panangituray ne̍ Apu Diyus igida. Itu nga nagpangngarig nge̍ Je̍sus nga kinunen na, 12“Uwed isa nga mabigbig nga toley nga nawe̍ ka deyyu nga nasyun, tasun mae̍cdan ka saad nga kinaari, se̍ nad mettas sumoli nga agari yin. 13Ngem sacbay nito nipeppen na, uwed da pinalbe̍t na nga sangapulu nga tagabu na, ket ne̍cdan na da ka sangapulu nga diplata nga balituc, nga sinagge̍sa na da. Ket nibaga na igida, ‘Pagnigusiyu nu didi nga italec ku dakayu bayat niya kinaawan ku,’ kunen na.

14“Ket nawe̍ ngarud to mabigbig nga toley ito deyyu nga nasyun. Ngem gapu ta ginura diya kailiyan na, nangibon da met kadiya sumarunu nga mawe̍ ito napennan na. Ket nagkagi da ito nangisaad igina, nga kinunen da, ‘Madi kami gabay nga agari yan nga toley dakami,’ kunen da.

15“Ngem naisaad nga tutu to mabigbig nga toley iya kinaari na. Ket kalpasan na, simoli ngarud ito pagiliyan na. Ket pinalbe̍t na dito tagabu na nga ne̍cdan na ka kuwarta, tasun emmuwen na no piga ya naganansiya da. 16Ket to nona nga simangu igina, kinunen na, ‘Apu, nakaganansiya ka sangapulu to kuwartam nga ne̍cde̍m iyaken,’ kunen na.

17“Ket kinunen nito ari igina, ‘Mayat met! Nabaru ka nga tagabu. Ket gapu ta mapagtalkan ka kadiyan nga e̍teng ngas nga banbanag, pagturayen naka ka sangapulu nga ili,’ kunen na.

18“Ket to maikadduwa nga tagabu nga simangu ito ari, kinunen na, ‘Apu, nakaganansiya ka lima to kuwartam nga ne̍cde̍m iyaken,’ kunen na.

19“Ket kinunen nito ari igina, ‘Ket ikew, pagturayen naka ka lima nga ili,’ kunen na.

20“Ket simangu met manin ya sabali nga tagabu, nga kinunen na, ‘Apu, uwed idi to kuwartam. Binungun ku nga nitalipen ka pangyu, 21ta mansing ngac ngamin ikew. Nansing ngac ngarud, ta emmuc nga naistre̍ktu ka. Emmuc ngarud nga alac mu met ya bekken mu nga kuwa, se̍ ganiyem ya bekken mu nga niraep,’ kunen na.

22“Ket kinunen met nito ari igina, ‘Diya mismu nga kagim mettas ya pangukum ku ikew! Dake̍c ka met nga tagabu! Ta no tutu nga naemmuwam nga naistre̍ktu wac, se̍ alac ku ya bekken ku nga kuwa se̍ ganiyec pe̍ ya bekken ku nga niraep, 23ape̍ nga di ka lugud nibangku to kuwartac, tasun iya isosolic, ket maalac ku kuma manin, agraman ya anac na?’ kunen na.

24“Ket binilin ngarud nito ari diya gasisikad iyan, nga kinunen na, ‘Ala, alaken nu igina yan nga diplata nga balituc, ket e̍cde̍ nu nga gennung ito uwed sangapulu nga naganansiya na nga diplata,’ kunen na.

25“Ket kinunen da ito ari, ‘Ngem apu, uwed met sangapulu nga diplata niyanin,’ kunen da.

26“Ket kinunen nito ari, ‘Kinapudnu na, ya toley nga adu ya uwed iginan, mae̍cdan nad pekkem. Ngem ya toley nga e̍teng ya uwed igina, maipac nad pekkem mas igina ya orey e̍teng ngas nga uwed iginan.

27“‘Ket no maipanggep kadito kumuntra iyaken, nga madi da kanu gabay ya panagaric igida, e̍lbe̍t nu da ngarud idi, ket patayen nu da iya sanguc ki,’ kunen nito ari,” kunen ne̍ Je̍sus.

To nadayaw nga isusungad ne̍ Je̍sus ka He̍rusale̍m

Mat. 21:1-11; Mar. 11:1-11; Juan 12:12-19

28Ket ito nalpas ne̍ Je̍sus nga kinagi yan nga pangngarig, pimanaw antuni. Ket igina ya nangipangulu kadito kabulun na nga nanang-at nga agpa-He̍rusale̍m.

29Ket ito nakaadenni da ka Be̍tpage̍ se̍ Be̍tanya, ka isa nga tageytey nga maawagan ka Tageytey Ulibu, nangibon nge̍ Je̍sus ka duwa nga adalan na, 30nga kinunen na igida, “Mawe̍ kayu iyan nga masungad nga baryu, ket apaman nga makasrec kayu iyan, uwed maaskuran nu nga nakabaud nga urbun asnu, nga di pekkem sinacsakayan toley. Ukasan nu, ket e̍lbe̍t nu idi. 31Ket no uwed agsaludsud dakayu no ape̍ nga ukasan nu ya urbun, agten idi ya ibaga nu: ‘Masapul niya Apu,’ kunen nu,” kinunen ne̍ Je̍sus.

32Ket nawe̍ ngarudin dito nibon na, ket nadateng da met amin dito nibaga ne̍ Je̍sus igida. 33Ket ito uk-ukasan da to nakabaud nga urbun asnu, kinunen dito akin-kuwa, “Ape̍ nga ukasan nu ya urbun?” kunen da.

34“Masapul niya Apu,” kunen da met.

35Ket nipen da ngarud to urbun ito edyan ne̍ Je̍sus. Niyap-ap da diya ke̍bal da iya eddeg nito urbun, se̍ da pinasakey nge̍ Je̍sus ito urbunin. 36Ket ito manmanalan to urbun nga nagsakayan ne̍ Je̍sus, nagiyaplag met dito toltoley kadiya ke̍bal da iya dalanen na, nga panangipasingen da iya panagdayaw da igina. 37Ket ito nakadateng nge̍ Je̍sus ito dalan nga dadagusan iya Tageytey Ulibu, nga umad-adenni yin enna He̍rusale̍m, nagdaydayaw dito amin nga pasurut na nga siraragsac e̍ Apu Diyus. Nip-ipkaw da to panagdayaw da gapu kadito adu nga nakaskasdaaw nga banbanag nga nasingen da, 38nga kinunen da, “Madaydayaw ya Ari nga agparang gapu iya turay niya Apu! Talna kuma ngas ya uwed ka langit, ket mapadayawan kuma ngarud ya uwed iya kangatuwan nga edyan!” kunen da.

39Ket uwed da Parisiyu nga nailauc kadito adu nga toltoley itun. Ket diya duduma kadito Parisiyu, kinunen da e̍ Je̍sus, “Mistru, patalnaem man diya pasurut mu wi!” kunen da.

40Ket kinunen ne̍ Je̍sus, “Kinapudnu na, no agulimec didi maipanggep iyaken, di pe̍ diya batbatu met nga gennung ya pumpumkawin nga agdayaw,” kunen na.

To panangberrit ne̍ Je̍sus kadito iHe̍rusale̍m

41Ket ito umad-adenni nge̍ Je̍sus ka He̍rusale̍min, nasingen nan ya siyudad, ket binritan na met, 42nga kinunen na, “Ay, dakayu nga iHe̍rusale̍m! Maawatan nu kuma pe̍ ita nga algew no nagan diya mange̍cde̍ ka talna, ngem madi kayu met malasinin. 43Kackaasi kayu nad iya umbe̍t nga timpu, gapu ta umbe̍t nad diya manggura dakayu, ket lakuben da nad met ya siyudad nu. Ket agariman da nad ka bakud iya le̍cbut na, ket pulus nad nga madi kayu makatalew win. 44Rauten da nad met ya siyudad nu nga pirdiyen da ya amin na, agraman diya umili. Ket pulus nad nga awan naisimpa nga batu nga di da lasangen. Dumateng ngarud nad amin didi dakayu, gapu ta di kayu nailasin ya panangsacwar ne̍ Apu Diyus dakayu,” kunen na.

To panangpatalew ne̍ Je̍sus kadito aglaclaku ka Te̍mplu

Mat. 21:12-17; Mar. 11:15-19; Juan 2:13-22

45Ket nawe̍ nge̍ Je̍sus enna Te̍mplu. Ket ito uwed iya emwagin, pinagtalew na met diya aglaclaku nga uwed iyan, 46nga kinunen na igida, “Naisurat met iya Bibliya nga agten idi: ‘Ya baley ku, ket baley nad nga pagkararagan,’ kunen na met. Ngem dakayu, pinagbalin nu lugudin nga paguurnungan diya tulisan!” kunen na.

47Ket inalgew nge̍ Je̍sus itun nga nagisursuru enna Te̍mplu. Ket dito pangpangulu diya agsirsirbi iya Te̍mplu, se̍ dito manursuru iya Linteg, se̍ dito duduma nga pangpangulu diya Hudyu, gabay da nga patayen kuma. 48Ngem madi da nakasmac ka pamaayen da e̍ Je̍sus, ta amin diya toltoley, ket nipatpateg da ngarud diya kagkagiyen na.

Currently Selected:

Lukas 19: YBT

Highlight

Copy