Lukas 22
22
To panangisikat da nga mangtekkem e̍ Je̍sus
Mat. 26:1-5; Mar. 14:1-2; Juan 11:45-53
1Dandani itunin ya Padaya Tinapay nga Awan Pangpablad Na, nga maawagan pe̍ ka Padaya Nitatalib. 2Ket dito pangpangulu diya agsirsirbi iya Te̍mplu, se̍ dito manursuru iya Linteg, pinanpanunut dan nga nalaing no kumaan kuma niya panangpatey da e̍ Je̍sus. Pinanpanunut da ngarud nga nalaing, ta mansing da ngamin kadiya toltoley.
To pannakitulag ne̍ Hudas nga mangiyawat e̍ Je̍sus
Mat. 26:14-16; Mar. 14:10-11
3Ket itun, naglugan met nge̍ Satanas ito Hudas nga managan pe̍ ka Iskariyute̍, nga isa kadito sangapulu ket duwa nga adalan. 4Ket to Hudas, nawe̍ nakitulag kadito pangpangulu diya agsirsirbi iya Te̍mplu, se̍ dito pangulu diya guwardiya niya Te̍mplu, no kumaan niya panangiyawat na kuma e̍ Je̍sus igida. 5Ket naragsakan da ngarud, ket kinariyan da nga e̍cdan da kanu ka kuwarta. 6Ket e̍ Hudas, imannugut ngarud igida, ket nagsicsiim ngarudin ka mayat nga gundaway na nga mangiyawat e̍ Je̍sus igida, no awan adu nga toley nga makasingen.
To nodi nga pananggidam ne̍ Apu Je̍sus
sacbay niya pannakatey na
Mat. 26:17-25; Mar. 14:12-21; Juan 13:21-30
7Ket nadatngan ngarud itunin ya Padaya Tinapay nga Awan Pangpablad Na, nga itu pe̍ ya naibilin ito Linteg nga panagparti da ka urbun karne̍ru para iya Padaya Nitatalib.
8Itu nga nibon ne̍ Je̍sus de̍ Pe̍dru nge̍ Juan, nga kinunen na, “Mawe̍ kayu isagana ya panggidam tida nga panangilagip tida iya Nitatalib,” kunen na.
9Ket kinunen da ngarud igina, “Awac ya gabay mu nga pangisaganaan mi?” kunen da.
10Ket kinunen ne̍ Je̍sus igida, “Agten idi: No makasrec kayu nad iya siyudadin, uwed makasabet dakayu nga isa nga lalaki nga nakaagtu ka amusu nga nisacdu na. Ket suruten nu, se̍ umuneg kayu met iya baley nga pennan na. 11Ket kunen nu iya akin-baley nga, ‘Ipasaludsud ne̍ Mistru nga kunen na, “Awac ya kuwartu nga panganac se̍ diya adalan ku no deddan iya pananggidam mi nga panangilagip mi iya Nitatalib?”’ kunen nu. 12Ket uwed nad ipasingen na dakayu, nga isa nga akin-ngatu nga kuwartu nga dackel, ket uwed iyanin amin nga masapul tida. Itu yan ya pangisaganaan nun,” kunen na.
13Ket nawe̍ da ngarud, ket nadateng da diya amin nga nibaga ne̍ Je̍sus igida, ket nisagana da ngarud ya panggidam da nga panangilagip da ito Nitatalib.
To inariman ne̍ Je̍sus nga pakalaglagipan igina
Mat. 26:26-30; Mar. 14:22-26; 1 Kur. 11:23-25
14Ket ito uras pannangan, nakisangu nga nangan nge̍ Je̍sus kadito apustule̍s. 15Ket kinunen na igida, “Tinarigagayac nga unay, nga sacbay niya panagrigat ku, makisangu wac kuma pekkem dakayu idi nga pannangan nga panangilagip tida iya Nitatalib. 16Ta pudnu met nga madi yac nad makisangu manin iya Padaya Nitatalib agingga nga di pekkem matungpal ya pudnu nga kaipapennan na nad iya panangituray ne̍ Apu Diyus,” kunen na.
17Ket namet nge̍ Je̍sus ka paginuman, se̍ nagkararag nga nagyaman e̍ Apu Diyus. Kalpasan na, kinunen na, “Alac nu yani, ket uminum kayu nga tunggal isa idi. 18Ta pudnu met nga manipud ita, madic uminum manin iya basi ubas, agingga nga agparang nad ya panangituray ne̍ Apu Diyus,” kunen na.
19Ket namet pe̍ ka tinapay, se̍ nagkararag nga nagyaman manin e̍ Apu Diyus. Pinisepisey na to tinapay, se̍ na ne̍cde̍ igida nga kinunen na, “Idi ya beggic, nga mae̍cde̍ nga maipaay dakayu. [Agten idi nga pannangan ya wanglen nu kuma nga panangilagip nu iyaken,” kunen na.
20Se̍ manin, kalpasan niya pannangan da, ne̍cde̍ na igida ya paginuman, ket kinunen na, “Idi nga binasu nga mainum, itu ya pakaemmuwan nu nga uwed kabarbaru nga tulag ne̍ Apu Diyus dakayu, nga mapalagdaan gapu iya pannakaiyayus niya dagac para dakayu.]
21“Ngem ita, singen nu, ta uwed met dakayu nga kasangsanguc idi nga panganan ya mangiyawat nad iyaken kadiya kumuntra iyaken. 22Tutu met nga maiyawat nad ya Anac nga Naipatoley, ta aglak-am ngarud ka pannakatey, sigun iya sigud nga naikeddeng maipanggep igina. Ngem kackaasi nad lugud yan nga toley nga mangiyawat igina!” kunen na.
23Ket nagsisinnaludsud dito apustule̍s no nagan ngata igida ya mangiyawat nad igina.
Ya kangrunaan
24Ket itun, nagsusupadi dito adalanin no nagan igida ya maibilang nga kangrunaan. 25Itu nga kinunen ne̍ Je̍sus igida, “Diya ar-ari diya bekken nga Hudyu, ket ipapilit da ya turay da kadiya toley da. Ngarud, diya agtuturay nga bekken nga Hudyu, gabay da pe̍ ya maawagan ka managkaasi. 26Ngem bekken kayu kuma nga agten iyan, ta ya maibilang nga kangrunaan dakayu, masapul nga agten kuma iya kababaan. Ket ya maibilang nga pangulu nu, masapul nga agten kuma iya agsirsirbi dakayu. 27Ket sigun iya kunen diya toley, nagan na kanu ya maibilang nga nangatngatu: Ya sumangu nga maidasaran, winno ya agidasar nga agsirsirbi? Di ngarud ya sumangu nga maidasaran ya maibilang nga nangatngatu? Ket tutu met! Ngem no iyaken nga gennung, uwed dac met dakayu nga arig nga agsirsirbi dakayu,” kunen na.
28“Ket no dakayu, pe̍yeng nga nibulbulun kayu iyaken, nga madi dac binaybay-an, orey kadiya nakaparparigatac. 29Ket iya agten iyan, isaad nakayu ngarud nga mangituray, nga agten mettas ito panangisaad niya Amac iyaken nga mangituray. 30Itu nga mabalin nu ya makisangu nad iyaken nga mangan iya pagturayac. Ket pagtugawen nakayu nad pe̍ nga mangipangulu kadiya kapututan dito sangapulu ket duwa nga anac nito Israe̍l.”
To panangipakaemmu ne̍ Je̍sus iya panangilibac ne̍ Pe̍dru
Mat. 26:31-35; Mar. 14:27-31; Juan 13:36-38
31Ket kinunen ne̍ Je̍sus e̍ Pe̍dru, “Ay, Simon, denggem yani nga ibagac ikew: Napalubusan nge̍ Satanas nga mangriribuc dakayu, nga maiyarig iya panagisap ka beggas tasun maisibna ya nabaru iya bekken nga nabaru. 32Ngem nikararagan naka e̍ Apu Diyus, Pe̍dru, tasun madi kuma mapukaw ya panamatim. Ket no sumoli nad ikew ya nabileg nga panamatim iyaken, masapul nga ikew mettas ya mangpabileg kadiya padam nga adalan,” kunen na.
33Ket kinunen ngarud ne̍ Pe̍dru igina, “Apu, sisasagana ngac met nga maibulun ikew, orey iya pagbaludan winno iya pakatayan,” kunen na.
34Ngem kinunen ne̍ Je̍sus, “Ya kinapudnu na, Pe̍dru, ita mettas nga gabi, sacbay niya panagtataraut diya kawitan no parbangun, name̍tlu nac nad met nga nilibac kin, nga kunem nad nga madi nac em-emmu,” kunen na.
Maipanggep ito nganngani nga pakarigatan da
35Ket kinunen manin ne̍ Je̍sus kadito adalan na, “Ito nibon nakayu itun nga awan nitarey nu nga kuwarta, legpi winno re̍se̍rba nu nga palloka, uwed kad nagkurangan nu itun?” kunen na.
“Awan met,” kunen da.
36Ket kinunen ne̍ Je̍sus igida, “Ngem ya kunec itan, ket ya uwed kuwarta na dakayu, alac na kuma, se̍ alac nu met pe̍ ya legpi nu no uwed. Ket ya awan ispada na, ilaku na kuma ngin ya ke̍bal na, se̍ mawe̍ ngumina. 37Ta pudnu met nga ya mapasamac nad iyaken, itu nad ya pakatungpalan nito naisurat iya Bibliya nga masapul nga matungpal nga kunen na, ‘Ket naibilang met nga isa kadiya managdacdake̍c.’ Ta matungtungpal nga tutu win to naisurat maipanggep iyaken,” kunen na.
38Ket kinunen dito adalan na, “Kad ya duwa nga ispada idi, Apu,” kunen da.
Ket kinunen ne̍ Je̍sus igida, “Kustun,” kunen na.
To panagkararag ne̍ Je̍sus enna Tageytey Ulibu
Mat. 26:36-46; Mar. 14:32-42
39Ket itun, sigun ito pe̍yeng nga winangel ne̍ Je̍sus, pimanaw iya siyudad nga nawe̍ enna Tageytey Ulibu. Ket simurut pe̍ igina dito adalan na. 40Ket ito nakadateng iya lugar nga pennan na, kinunen na kadito adalan na, “Agkararag kayu ngarudin, tasun madi kayu kuma nga masulisug,” kunen na.
41Ket binay-atan na da ka e̍teng, se̍ nagparintumeng nga nagkarkararagin. 42Ket kinunen na iya panagkararag na, “Ama, no tarigagay mu nga maipac yani nga panagsagaba nga lak-amec, nga rigat nga arig nga inumec, ket ipac mu kuma ngarud. Ngem bekken kuma ngarud nga ya tarigagay ku ya matungpal, no di lugud ya tarigagay mu,” kunen na.
43[Ket itun, uwed nagparang e̍ Je̍sus nga isa nga anghe̍l nga gayat ka langit, nga nangpabileg igina. 44Ket nipaspasnec pekkem ne̍ Je̍sus ya panagkararag na, ta nadagsen nga unayin ya ricna na, ket naglinget met ka agten iya daga nga agtedted iya ginet tin.]
45Ket kalpasan nito panagkararag ne̍ Je̍susin, nagsikad nga simoli ito edyan dito adalan na. Ket nadateng na da nga agtudtudugin, ta agdodongyot da itun gapu iya leddaang da. 46Ket kinunen ne̍ Je̍sus igida, “Ape̍ nga mat-atudug kayu? Bumangun kayun, ket agkararag kayu ngarud, tasun madi kayu kuma nga masulisug,” kunen na.
To pannakatkem ne̍ Je̍sus
Mat. 26:47-56; Mar. 14:43-50; Juan 18:3-11
47Ket ito agkagkagi pekkem nge̍ Je̍sus, uwed da inumbe̍t ennan nga adu nga toley. Ket ya nangibagnus igida, itu met to Hudas, nga isa ngarud kadito sangapulu ket duwa nga adalan. Ket to Hudas, imadenni ngarud e̍ Je̍sus, tasun agkan na nge̍ Je̍sus.
48Ngem kinunen ne̍ Je̍sus igina, “Hudas, ya agec mu kadi ya pangiyawat mu iya Anac nga Naipatoley?” kunen na.
49Ket dito adalan ne̍ Je̍sus, nalasin da ya mapasamac, itu nga kinunen da, “Apu, kumteb kamin?” kunen da. 50Ket kinteb ngarud mettin nito isa igida ya tagabu nito kangatuwan nga agsirsirbi iya Te̍mplu, ket nape̍ngas met to diwanan nga tinga nito tagabu win.
51Ngem kinunen ne̍ Je̍sus, “Bay-an tida ya agten iyan!” kunen na. Ket sine̍cde̍ng na ya natalingu nga tinga nito tagabu, ket pinalaing nan.
52Ket se̍ nagkagi nge̍ Je̍sus kadito inumbe̍t nga mangtekkem igina nga pangulu diya agsirsirbi iya Te̍mplu, se̍ kadito pangulu dito guwardiya niya Te̍mplu, se̍ dito panglakayen diya Hudyu, nga kinunen na, “Ape̍ kad nga agtagiispada se̍ agtagipang-ur kayu nga inumbe̍t mangtekkem iyaken, nga arig nga isa ngac nga tulisan? 53Inalgew nga uwed dac met iya imatang nu enna Te̍mplu, ngem madi dac met nga tinkem. Ngem ita mettas, itu ya gundaway nu, ket itu pe̍ yin ya gundaway ne̍ Satanas nga paggayatan niya pannakabalin niya gicbet,” kunen na.
To panangilibac ne̍ Pe̍dru e̍ Je̍sus
Mat. 26:57-58, 26:69-75; Mar. 14:53-54, 14:66-72; Juan 18:12-18, 18:25-27
54Ket tinkem da ngarud nge̍ Je̍susin, nga nipen da iya baley nito kangatuwan nga agsirsirbi iya Te̍mplu. Ket e̍ Pe̍dru, tinumtumneb met igina. 55Ket dito uwed iya emwag nito baley, nagapuy da ka paginuduwan da iya tengnga nito emwag, ket nagtugtugew da ngarud iyanin. Ket e̍ Pe̍dru, nawe̍ pe̍ nakitugew igida. 56Ket ito nadarangan nge̍ Pe̍dru nga makiin-inudu, nasingen niya isa nga babey nga katulung. Ket binetbettaan nito babey, nga kinunen na, “Nih, idi met pe̍ ya isa kadito nakibulubulun e̍ Je̍sus!” kunen na.
57Ngem naglibac met nge̍ Pe̍dru nga kinunen na ito babey, “Siyac, madic met em-emmu yan nga toley,” kunen na.
58Ket iya di mabayag, uwed manin lalaki nga nakasingen pe̍ e̍ Pe̍dru, ket kinunen na, “Ikew met pe̍ ya isa kadito kabulun na!” kunen na.
Ngem kinunen ne̍ Pe̍dru ito lalaki, “Ahah, bekken met!” kunen na.
59Ket ito napalabes ngata ya isa nga uras, uwed manin lalaki nga nangipapilit nga kinunen na, “Siguradu met nga nakibulubulun pe̍ yani e̍ Je̍sus, ta iGalilya met,” kunen na.
60Ngem kinunen ne̍ Pe̍dru ito lalaki, “Ahah! Madi yac met emmu yan nga ibagbagam!” kunen na met. Ket ito agkagkagi pekkem nge̍ Pe̍dru, pag-isu met nga uwed nagtaraut nga kawitanin. 61Ket limaw-ing mettin ya Apu nga sinisingen na nge̍ Pe̍dru win. Ket nalagip ngarudin ne̍ Pe̍dru to nibaga niya Apu igina itun nga kinunen na, “Idi mettas nga gabi, sacbay niya panagtataraut diya kawitan no parbangun, name̍tlu nac nad met nga nilibac kin.” 62Ket rinumwar ngarud nge̍ Pe̍dru iyan, ket nagberrit ka napalausin.
To pananguyaw dito nangbantay e̍ Je̍sus
Mat. 26:67-68; Mar. 14:65
63Ket dito nangbanbantay e̍ Je̍sus, inuy-uyaw da met nga kinabkabil. 64Inamitngan da se̍ da kinunen igina, “Ala kay, padtuwam man no nagan dakami ya nangtungpa ikew!” kunen da. 65Ket adu pekkem diya kinagkagi da nga pananguy-uyaw da e̍ Je̍sus.
To pannakasumarya ne̍ Je̍sus kadito pangpangulu diya Hudyu
Mat. 26:59-66; Mar. 14:55-64; Juan 18:19-24
66Ket ito agwada ngin, naguurnung dito kunse̍hale̍sin, nga itu dito panglakayen diya Hudyu, se̍ dito pangpangulu diya agsirsirbi iya Te̍mplu, se̍ dito manursuru iya Linteg. Ket didi nga kunse̍hale̍s, nipasangu da nge̍ Je̍sus igida iya paguurnungan da. 67Ket kinunen da e̍ Je̍sus, “Ibagam man dakami no tutu nga ikew ya naipadtu nga Kristu,” kunen da.
Ket kinunen ne̍ Je̍sus igida, “Orey no ibagac dakayu, ket madi dac mettas patiyen. 68Se̍ no agsaludsud dac dakayu, madi kayu mettas sumungbat. 69Ngem agten idi ya ibagac: Manipud ita, maipatugew ya Anac nga Naipatoley iya madiwanan ne̍ Apu Diyus nga Mannakabalin,” kunen na.
70Ket amin da, kinunen da ngarud igina, “Dikad kayat mu kad nga kagiyen nga ikew ya Anac ne̍ Apu Diyus?” kunen da.
Ket kinunen ne̍ Je̍sus igida, “Nakagi nu mettin,” kunen na.
71Ket kinunen da, “Ke̍h! Awan pakasapulan tidan ka sabali nga sacsi yin, ta nagicna tidan ya mismu mettas nga kagi na,” kunen da.
Currently Selected:
Lukas 22: YBT
Highlight
Share
Copy
Want to have your highlights saved across all your devices? Sign up or sign in
© 1990 New Tribes Mission, Sanford, FL 32771-1487, USA.
Printed in the Philippines.
