Nsengo sa Vanandeje 1

Kitahisiwa kwa Numbula uMunofu

1Mutiilwa Teofilo, mu litaafili lyangu lila ilya wutasi,#1:1 Litaafili lyangu lila ilya wutasi: Uluganulo lwakwe, litaafili lya Luuka. nayandikhaga shina uYeesu akhandi iigaha, na shina akhandi imanyisa kihuma pashiyanso, 2mbakha ilisiku lina wátolwagwa kiluta kushaanya. Pina akhandi asinatupulwe kiluta kushaanya, wávapeelaga indaji avanandeje#1:2 Avanandeje: Yimba iliswi Mwanandeje mu Maswi aMahensa. vaakwe vina akhandi avabagwile, kwa nsila ya Numbula uMunofu, ulwa nsengo sina vakhasisenga. 3Kwa luhaavi lwa nsiku mashumi gana kihuma pina wáfyukhaga mu mfwa, akhandi ikivatwiwushila avanandeje vala wiila wiila, akhandi ikiyiwonensa bahawuvalafu kiija umwene muumi, kwa nsila nyinshi sina sili paayo paayo. Khanji akhandi ikivamanyisa imola sa Wutwa wa Nguluvi.#1:3 Wutwa wa Nguluvi: Yimba iliswi ili mu Maswi aMahensa.

4Ilijuva limonga, uYeesu pina akhandi iilya lumo na vanandeje vaakwe, wávalajisaaga wáaja, “Musikhawuukhaji mu lijumbi lya Yelusalemu,#1:4 Yelusalemu: Yimba iliswi ili mu Maswi aMahensa. leelo hepelesaaji mumuno, mbakha pina mukhayanushila uNumbula uMunofu, yuna uDaada uNguluvi akhavatahisiise kiija, akhavapeela ngaja shina mwapulikhaga kunyangu. 5UYohana wávatwiniaga avaanu kwa malenga, leelo kwa luhaavi lufupi luna luyinsa, omwe mukhatwinisiwa kwa Numbula uMunofu.”#1:5 Mukhatwinisiwa kwa Numbula uMunofu: UNguluvi akhamufilikha uNumbula uMunofu kikhala mukhati yaanave na kivalongosa, tije uNumbula uMunofu akhavapeela ingufu sa kimuyinatila uNguluvi.

UYeesu itupulwa iiluta kushaanya

6Avanandeje pina vakungaanile lumo nu Yeesu, vamuposa vaaja, “Mutwa weesu,#1:6 Mutwa weesu: Yimba iliswi Mutwa mu Maswi aMahensa. wuli, uluhaavi ulu lulwene luna ukhatutinisa ose ti Vaisilaheli uwutwa weesu?” 7UYeesu wávayankha wáaja, “Ilisiku nu luhaavi ulwa kisenjekha ago, yisili nsengo yeenyu kimanya. UDaada yumwene aluviishile kwa wutawulilwa waakwe. 8Leelo mukhayanushila ingufu pina uNumbula uMunofu akhavayinsila, omwe mukhanibedela mu Yelusalemu, mu nyi yoona iya Yudeya na mu nyi ya Samaliya, mbakha kifikha kuwudugo wa nyi.”

9UYeesu wáganile kimala kivajovela ndeeno avanandeje vaakwe vala, baaho wátupulwa bahaveene kiluta kushaanya. Ilifunde lyamugubikha, vasikhamwajile khanji. 10Uluhaavi luulo pina vangʼalwile ameeho viloleela kushaanya kuna iiluta, vayiima avagoosi vavili vafwele amenda amavalafu. 11Vavajovela vaaja, “Omwe vagoosi va ku Galilaya, kwashi muyiimile apa muloleela kushaanya? UYeesu yuna wátupulwa panyeenyu kiluta kushaanya, akhatina khanji ngaja shina mwamwaga itupulwa.”

UMatiya ihaagulwa kipyanila pa Yuuda

12Baheene avanandeje vawuukha pa shidunda shina shikhandi shitambulwa shidunda sha Miseyituni. Vaawuya mu lijumbi lya Yelusalemu, lina likhandi lujendo lwa kilomiita yimo kihuma pa shidunda isho. 13Vaganile kihuluta mu lijumbi lila, vaaluta mu wudaama uwa juulu, muna vakhandi vitangaana. Avanandeje awo vaveene ava, uPetulo, uYohana, uYaakobo nu Andeleya, uFilipo nu Tomasi, uBatolomaayo nu Mataayo, uYaakobo umuswamuve wa Alufaayo, uSimoni uMulwila Nyi,#1:13 UMulwila Nyi: Kwa Shiyunaani yiyandiikhwe Museloote. Uluganulo lwakwe, uMulwila Nyi. nu Yuuda umuswamuve wa Yaakobo. 14Woona awo vakhandi vikungaana kimufuunya uNguluvi kwa lugulumilo lumo, nu Maliya umaayi wa Yeesu, avashimaayi avanji na vanangʼana va Yeesu.

15Ilijuva limonga, avahuvililaaji vakungaanile lumo, pamonga vafishile avaanu ngaja ligana limo na mashumi gavili ndeeni (120). Baheene uPetulo wáyiima paakhati naakhati yaanave, wávajovela wáaja, 16“Omwe vahuvililaaji vayangu, injowo sina sayandikhwagwa mu Mayandikhwa aManofu sina sitaviilila ulwa Yuuda uIsikaliyoote, sisakulwa mbakha sisenjeshe. Iso salogolwagwa nu Numbula uMunofu kishilila kwa mutwa uDawudi#1:16 Mutwa uDawudi: Yimba iliswi Dawudi mu Maswi aMahensa. ulwa Yuuda, yuna wávalongosaaga avaanu kimukhata uYeesu, lino sakwilana. 17UYuuda akhandi muyeesu noose ti vanandeje, tasengaga lumo insengo iyi.”

18UYuuda yuna uPetulo ikimulogola apa, wáposheelaga ihela sila isa wunansi waakwe uwa kidoolela. Ihela iso wágulila umugunda.#1:18 Yimba mu litaafili lya Mataayo 27:3-10. Mu mugunda ugo, mumwene wágwisaga agubeeme, wálandukha umuvili, uwutumbu woona waveyukha pansi. 19Ulujowo ulo lwamanyikhaga mu vaanu woona vina viikhala ku Yelusalemu. Umugunda gula vagutambulilaga ilitaawa lya Akelidama. Kwa shilogolo shaanave#1:19 Shilogolo shaanave: Uluganulo lwakwe, shilogolo sha Shialaamu. uluganulo lwakwe, Mugunda gwa Danda. 20UPetulo wáyitenekha kilogola kiija, “Ago gageene gayandiikhwe mu litaafili lya Sabuli kiija,

‘Inanda yaakwe yikhava yigaya shiinu,

khanji asikhasigala muunu yoyoona mukhati yaakwe.’#1:20 Yimba mu litaafili lya Sabuli 69:25.

“Khanji yiyandiikhwe kiija,

‘Insengo yaakwe iya kilongosa, apyanile umuunu yunji.’#1:20 Yimba mu litaafili lya Sabuli 109:8.

21“Kwa kiiva ya ilyo, yisakulwa timuhaagule umugoosi uyunji mu awo vina vakhandi lumo noose, mu luhaavi loona luna uMutwa uYeesu akhandi lumo noose. 22Uyo ave akhandi akwali kihuma uluhaavi uYeesu itwinisiwa nu Yohana, mbakha ilijuva lila uYeesu pina wátupulwagwa panyeesu kiluta kushaanya. Uyo ave mulunjikhaaji lumo noose kiija, uMutwa uYeesu wáfyukhaga kihuma kwa vina vafwile.”

23Baheene avahuvililaaji vagabaagula amataawa ga vagoosi vavili. Yumonga akhandi yu Yusufu yuna akhandi itambulwa Balisaba, awu Yusito, nu wa wuvili akhandi yu Matiya. 24Apo baheene, vafuunya kwa Nguluvi vaaja, “Wee Mutwa Nguluvi, ugameenye gina gali mu numbula sa vaanu woona. Lino, utusoonele yuna umubagwile mu vavili ava, 25kiija apyanile pa nsengo ya mwanandeje uYuuda, yina wáyilekhaga. Pina wáganaga kiifwa, wáaluta pina pikimufwaya umwene kwa gala gina wágasengaga.” 26Baheene vamuhaagula yumo mu vaanu vavili#1:26 Vamuhaagula yumo mu vaanu vavili: AVayahuudi vakhandi viyandikha amataawa ga vaanu mu mangʼanga amadoodo, na kigaviikha goona mu likhopo. Vadegensaaga mbakha ilingʼanga limo lihume na kiigwa pansi. Umuunu yuna ilingʼanga lina liyandiikhwe ilitaawa lyakwe nda litale kihuma, uyo iiva wáhaagulwa. vala. Uluhaagulo ulo lwamugwila uMatiya, yumwene wáava lumo na vanandeje avanji ishumi na yumo.

Currently Selected:

Nsengo sa Vanandeje 1: Shisangu

Highlight

Copy