Nsengo sa Vanandeje 10

UKolineliyo ikimushemeela uPetulo

1Mu lijumbi lya Kayisaliya, kukhandi nu Muluumi yumonga, akhandi itambulwa Kolineliyo. Akhandi umuyimililaaji wa vasulukhali. Akhandi ilongosa avasulukhali ligana, kihuma mu shipuga ishikhome sha vasulukhali, shina shatambulwagwa shipuga sha Vaitaliya. 2Khanji akhandi muunu munofu yuna akhandi ikimuyinatila uNguluvi, lumo na vaanu woona va mukhaaya yaakwe. Akhandi ikimufuunya uNguluvi luhaavi loona na kivatanga mandu avapiina.

3Ilisiku limonga, yikhandi mu masala ga gonja paminsi, uKolineliyo wámwagaga umalayikha wa Nguluvi mu mahilu. Umalayikha wámujovela wáaja, “Wee Kolineliyo!” 4UKolineliyo wámungʼalulila ameeho umalayikha yula kwa kitungumala, wámuposa wáaja, “Wee mutwa, kuli shi?” Umalayikha wámujovela wáaja, “UNguluvi wápulikha amafuunyo gaakho, wákwaga shina ukivatanjilisa avapiina. Ago goona ikigaaga kushaanya ukho ngaja sadaakha ya kimushendeefya. 5Lino, uvafilishe avaanu ku lijumbi lya Yopa, vamushemeele umuunu yuna itambulwa Simoni, ilitaawa ilinji itambulwa Petulo. 6Iikhala kwa muunu yuna itambulwa Simoni, yuna iinosa inkwembe. Inanda yaakwe yili kulubali lwa bahali.”

7Umalayikha wáganile kimala kimujovela uKolineliyo, wáwuukha. Baheene uKolineliyo wávashemeela vavili mu vavanda vaakwe, lumo nu musulukhali yumo mu vatanjilisaaji vaakwe, yuna akhandi ikimuyinatila uNguluvi. 8UKolineliyo wáganile kimala kivataviilila goona gina umalayikha wámulajisaaga, wávafilikha ku Yopa.

UPetulo ikigaaga amahilu

9Pamulaawu njine ilisala lya mutanda paminsi, avaanu vina uKolineliyo wávafilikhaga vavejeela ku Yopa. Uluhaavi ulo uPetulo wátaana kushaanya ya nanda,#10:9 Kushaanya ya nanda: AVayahuudi vakhandi vitiima inanda saanave, kwa kiyansalania amasole kushaanya, na vapinyaga ulusito, na kihiliva ni lilongo. Apo baheene vakhandi vituuya. kiija amufuunye uNguluvi. 10Injala yamuluma, wádobokha kiilya. Pina vitelekha ishakiilya shina asiilye, wágaaga amahilu. 11Mu mahilu ago, wákwaga kushaanya kudindule, ishiinu shina shili ngaja mutote mukhome guna gukhandi gukhatiilwe imbali saakwe sina, gwayiikha pansi. 12Mukhati yaakwe mukhandi ni nkhanu sa fihwano fyona. Mukhandi ni nkhanu inya magulu gana, inkhanu sina sitambala ni nyuni sina sigulukha ku wulanga.

13Baheene, uPetulo wápulikha ishawuti yikimujova kiija, “Wee Petulo, yiima! Ushinje, ulye!” 14UPetulo wámugomosesa wáaja, “Ndaali mutwa! Loleela, nisinajelaje kiilya shoshoona shina indaji sa Musa sikishijova sha mwikho!”#10:14 Mwikho: Kukhandi kuna nkhanu sina aVayahuudi vakhanwagwa kiilya mu ndaji sa Musa, kwa kiiva sikhandi nyaafu. Yimba mu litaafili lya Njowo sa Valaawi 11. 15Baheene ishawuti yamujovela uPetulo mala khavili kiija, “Ishiinu shoshoona shina uNguluvi ashivaleese, owe usikhashijovaga mwikho.” 16Ago gasenjekhaga mala khatatu yoona, baaho umutote gula gwatinisiwa kushaanya.

17UPetulo pina ihiviilila kiija amahilu ago uluganulo lwakwe shi, avaanu vina uKolineliyo wávafilikhaga, pina vayimanyaga inanda ya Simoni, vayiima pa mulyango. 18Vahoodesa, vaaposa vaaja, “Wuli, apa papeene iikhala kwa luhaavi uSimoni yuna itambulwa Petulo?” 19Pina uPetulo ihiviilila ulwa mahilu ago, uNumbula uMunofu wámujovela wáaja, “Pansi vakwali avaanu vatatu vina vikikusakula. 20Lino yiima, yiikha, ulute lumo nawo. Usikhaveesaga nu muninu khabisa, kwa kiiva yuune navafilikha.”

21UPetulo wáganile kiyiikha pansi, wávajovela avaanu vala wáaja, “One yuune yuna mukinisakula. Lino! Kwashi mwayinsa?” 22Vamugomosesa vaaja, “Umuyimililaaji yumonga wa vasulukhali wátufilikha, ilitaawa lyakwe yu Kolineliyo, mugolofu, ikimuyinatila uNguluvi, khanji aVayahuudi woona vikimusufya. Lino umalayikha wa Nguluvi wámujovela kiija, akusaajise kunyaakwe, apuliise amaswi gina usimujovele.” 23Baheene uPetulo wávasaajisa avaanu vala mukhati, vaava vahensa vaakwe.

UPetulo mu nanda ya Kolineliyo

Kwaganile kiisha, uPetulo na vaanu va Kolineliyo vaaluta na vahuvililaaji avanji ava ku Yopa. 24Ilijuva lya wuvili, vaafikha ku lijumbi lya Kayisaliya. Vamwaga uKolineliyo avakunganiise avalukholo lwakwe, lumo na vamanyi vaakwe, avaheepile.

25UPetulo wáganile kifikha, uKolineliyo wámusaajisa, wáfugama pansi pa magulu gaakwe kimupeela ulugoto. 26Leelo uPetulo wámunyenyula, wámujovela wáaja, “Yiima! Loleela, na yuune nili muunu ngaja yuuwe!” 27Baheene uPetulo nu Kolineliyo vahuluta mukhati yaakwe kuno vilogola, vavaaga avaanu vinshi vakungaanile mula. 28UPetulo wávajovela wáaja, “Omwe mwimanya wunofu kiija, ose tili Vayahuudi, ingʼoma seesu sikitukhaana kihansinkhana na vaanu vina vasili Vayahuudi, hata kijendelana na woope. Leelo uNguluvi wániwonensa kiija, nisikhamujovaga umuunu yoyoona kiija mwikho awu mwafu. 29Mwagana kinishemeela, nayinsa, lulwene nisakhaana. Lino, mwanishemeelela shi?”

30UKolineliyo wámugomosesa wáaja, “Sishilile nsiku sitatu kihuma uluhaavi luna nikhandi nikimufuunya uNguluvi mu nanda yangu iyi, uluhaavi ngaja ulu ulwa lisala lya gonja lya paminsi. Baaho namwaga umuunu ayiimile kumwandi yangu afwalile amenda gina gingʼaala ngʼaala. 31Wánijovela wáaja, ‘Wee Kolineliyo, uNguluvi wápulikha amafuunyo gaakho, ishendeeva na shina ukivatanjilisa avapiina. 32Baheene lino, uvafilishe avaanu valute ku Yopa, vamushemeele uSimoni yuna itambulwa Petulo. Iikhala kwa muunu yuna itambulwa Simoni, yuna iinosa inkwembe. Inanda yaakwe yili kulubali lwa bahali.’ 33Ago gageene ganigaha kiija, nivafilishe nyangu avaanu vakushemeele, na yuuwe waagaha wunofu kiyinsa. Lino woona tili pa Nguluvi, tipuliise amaswi goona gina uMutwa uNguluvi wákulajisa kiija, utujovele.”

34Baheene uPetulo wávajovela avaanu vala wáaja, “Lino naamanya kiija, shiyooli uNguluvi asikivabaniilila avaanu! 35Leelo, ikivayiitikha avaanu va nyi soona vina vikimuyinatila na kisenga gina ikigadobokha umwene. 36Omwe mwimanya kiija, uNguluvi wávafilikhaga avaanu vaakwe kivakhoma aVaisilaheli vayeesu iMola iNofu, kiija vapate uwulindamafu kwa nsila ya Yeesu Kilisito, uMutwa wa vaanu woona. 37Mwimanya gina gasenjeeshe mu nyi yoona iya Yudeya, gayansaga mu nyi ya Galilaya. Wáyansaaga kivakhoma avaanu pina uYohana ikivakhoma, kiija vatwinisiwe. 38Mwimanya kiija, uNguluvi wámubagulaga uYeesu uwa ku Nasaleti wámupeela uNumbula uMunofu ni ngufu. UYeesu wálutaga mbali soona, iigaha amanofu na kiponia avaanu woona vina vilafisiwa nu Shetaani, kwa kiiva uNguluvi akhandi lumo na woope.

39“Goona ago gina uYeesu wágahaga mu nyi ya Vayahuudi na mu lijumbi lya ku Yelusalemu, ose tili valunjikhaaji. Baheene vamubuda kwa kimukhomeelela pa musalaaba. 40Leelo ilisiku lya wutatu, uNguluvi wámufyusa, wámuwonensa kwa vaanu. 41Vasili vaanu woona vina vamwagaga, leelo ose tamwagaga, ose uNguluvi wátubagulaga kiija, tisiive tili valunjikhaaji va ago. Uluhaavi ulo luna uYeesu wáfyukhaga kihuma kwa vina vafwile, ose tikhaliile na kiingʼwa lumo. 42Wátulajisaaga kiija, tikhome ku vaanu iMola iNofu na kihumya uwulunjikhaaji kiija, yumwene yuna uNguluvi amubagwile. Khanji uNguluvi amubagwile umwene kiija, avahije avaanu awuumi na vina vafwile. 43UYeesu uyo yumwene yuna avakuwamalago woona vajovaga kiija, umuunu yoyoona yuna ikimuhuviilila, akhasaajilwa uwunansi waakwe kwa litaawa lyakwe.”

Vina vasili Vayahuudi vamuyanushila uNumbula uMunofu

44UPetulo pina ilogola amaswi ago, uNumbula uMunofu wávayiishila woona vina vagapulikhaga. 45AVayahuudi vina vikimuhuviilila uYeesu vina vamusindihisaaga uPetulo, vaganile kiwona kiija, avaanu vina vasili Vayahuudi woope uNumbula uMunofu wávayiishila, vaswiga mandu. 46Vaswigaga kwa kiiva vavapulikhaga vilogola kwa filogolo ifinji vikimusufya uNguluvi.

Baheene uPetulo wáaja, 47“Avaanu ava woope vamuyanushila uNumbula uMunofu ngaja ose. Kusiina umuunu yuna angavakhaana ava kiija, vasikhatwinisiwaagwa kwa malenga!” 48Baheene uPetulo wálajisa kiija, uKolineliyo na vayine vatwinisiwe kwa litaawa lya Yeesu Kilisito. Kuunyuma, uKolineliyo na vayine vamulomba uPetulo kiija, asigale lumo na woope kwa nsiku ndoodo.

Currently Selected:

Nsengo sa Vanandeje 10: Shisangu

Highlight

Copy