Nsengo sa Vanandeje 2

Avahuvililaaji vikimuposheela uNumbula uMunofu

1Ilijuva lya Pentekositi#2:1 Pentekositi: Shiwungo mu lijuva lya mashumi gasaanu kihuma mu Pasaakha. Yimba iliswi ili mu Maswi aMahensa. lyaganile kifikha, avahuvililaaji woona vakungaanile mu nanda yimonga. 2Pina vakhandi vakheele mula, baaho ishawuti yapuliisikha kihuma kushaanya yina yikhandi ngaja mepo nkhome yina yikutukha. Inanda yoona yayalalilaga ishawuti yila. 3Baaho vafyaga ifiinu fina fili ngaja ngʼali sa mooto, sapalankhana, satuula kwa shila muunu. 4Avaanu woona awo valongosewa nu Numbula uMunofu,#2:4 Numbula uMunofu: Yimba iliswi ili mu Maswi aMahensa. vayansa kilogola kwa filogolo ifinji, ngaja shina uNumbula uMunofu wávapeelaga.

5Pala pa Yelusalemu pakhandi na Vayahuudi vina vamuyinatilaga uNguluvi, vina vaali vahumile mu nyi nyinshi.#2:5 Uluhaavi ulo aVayahuudi vinshi vayalalilaga mu nyi nyinshi. 6Avaanu awo vaganile kipulikha ishawuti iyo, vayinsa kwa winshi pala. Vatinukhaga kwa kiiva shila muunu wápulikhaga ishilogolo shaakwe yumwene shilogolwa na vahuvililaaji vala. 7Baheene vaswigaga mandu, vayansa kiposania vaaja, “Puliisi! Avaanu ava vina vilogola ndeeni, vasili Vagalilaya? 8Lino! Lwava wuli ose shila muunu ipulikha gina vilogola kwa shilogolo shaakwe isha kisawa? 9Avayeesu vamonga, vakwali avaanu vina vahumile mu nyi ya Vapalitiya, Vamediya, Vaelami na mu nyi ya Mesopotamiya. Avanji va ku nyi ya Yudeya, Kapadokiya, Ponto, Asiya, 10Filigiya, Pamufiliya, Misili. Avanji viihuma imbali sa nyi ya Libiya yina yili nkholeela ni lijumbi lya Kileene, na vamonga vahensa vahumile mu lijumbi lya Luumi. 11Mu awo vakwali aVayahuudi avahensa. Vakwali avanji vina vahumile mu nyi isinji vina vihuviilila ilihuuvi lyesu ilya Shiyahuudi, vakwali aVakileete, na Vaalabu. Lino, ose woona tipulikha avaanu ava vilogola kwa filogolo fyesu, vikimusufya uNguluvi kwa nsengo saakwe inkhome!”

12Avaanu woona awo vakhandi viswiga mandu na kisugumilwa, vaposania veene vaaja, “Ndeeni uluganulo lwakwe shi?” 13Leelo avanji mu veene vayansa kivahekha avahuvililaaji, valogolaga vaaja, “Ava vagaalile idivaayi imya.”

UPetulo ikivaganulila avaanu ulwa Numbula uMunofu

14Baaho uPetulo wáyiima lumo na vanandeje avayine vala ishumi na yumo, wáyansa kivajovela avaanu vala kwa shawuti nkhome wáaja, “Omwe Vayahuudi muna mwikhala pa Yelusalemu apa, na omwe Vayahuudi muna mwikhala inyi isinji. Injowo sila sina sasenjekhaga, nisakula simanyishe kunyeenyu, lino mupulisaaje wunofu gina nilogola. 15Musikhahiivaji kiija avaanu ava vagaalile! Vasigaalile khabisa, kiiva isala isi ndeeni, lwamilaawu lisala lya wutatu shiishi. 16Leelo aga gageene gina uNguluvi wájovile kishilila kwa mukuwamalago uYoheli kiija,

17‘Mu nsiku sa wudugo

nikhavapeela uNumbula uMunofu kwa winshi avaanu woona.

Avaana veenyu ava shigoosi na va shihinja vakhakuwa amalago,

avaana veenyu avajeleelo vakhagaaga amahilu,#2:17 Vakhagaaga amahilu: Iyi yoope nsila yimonga yina uNguluvi ikimuwonensa umuunu kishilila ishiyooli shaakwe, kwa lugulumilo lumonga pina ali meeho awu pina ikimufuunya uNguluvi.

na vagosiivaha veenyu vakhaloota amalooto ga Nguluvi.

18Khanji mu nsiku iso nikhavapeela uNumbula uMunofu, avavanda vangu, avagoosi na vashimaayi,

baheene woope vakhakuwa amalago.

19Nikhagaha amabikha kushaanya ku wulanga,

na miitu mu nyi muno.

Ukho kukhava danda, mooto,

ni lyosi likhasinkha kwa winshi.

20Ilijuva likhaseetukha kiiva nshiisi,

umwesi gukhava muduuhu ngaja danda.

Ago goona gakhasenjekha

pina lishaanali kiwonekha ilisiku ilya Mutwa uNguluvi lina likhome na linofu mandu.

21Shila muunu yuna ikilishemeela ilitaawa lya Mutwa,

kiija akulusiwe kihuma mu wunansi, akhakulusiwa.’#2:17-21 Yimba mu litaafili lya Yoheli 2:28-32.”

22UPetulo wáyitenekha kilogola wáaja, “Omwe Vaisilaheli vayangu, mupulisaaje amaswi aga wunofu! UNguluvi wámufilikhaga uYeesu uwa ku Nasaleti kunyeenyu. Wávawonensaaga ndeeno kishilila mu fimanyilo, amiitu na mabikha minshi gina uYeesu wágahaga kunyeenyu, ngaja omwe shina mumeenye. 23Kuunyuma, uNguluvi wámutawulaga uYeesu kunyeenyu, ngaja shina akhandi agulumiile kigaha. Omwe mwamubuda kwa nsila ya vaanu vina vasili Vayahuudi, vamukhomeelela pa musalaaba. 24Leelo uNguluvi wámukulusa uYeesu mu wuvafi wa mfwa, wámufyusaaga kihuma kwa vina vafwile, kwa kiiva imfwa yakunyaga kiija, yiyiteneshe kimukhata uYeesu ku wusimu. 25Umutwa uDawudi woope wálogolaga ulwa Yeesu ndeeni,

‘One naloleelaga kiija,

uMutwa uNguluvi akhayitenekha kiiva lumo noone nsiku soona.

One nisikhadegenkha khabisa,

umwene ali lubali lwangu ulwa kundiilo.

26Ndeeno, inumbula yangu yishendeeva,

ulumili lwangu lululuutila.

Goope umuvili gwangu gusiikhale mu lihuviililo,

27kwa kiiva, owe usikhanilekha kwa vina vafwile,

na usikhayiitikha kiija, umuvili gwangu guwole kukula,

one nili Munofu waakho.

28Waniwonensa insila sa wuumi.

Usinipeele uwushendeefu mandu pina nili lumo noowe.’#2:25-28 Yimba mu litaafili lya Sabuli 16:8-11.”

29UPetulo wáyitenekha kilogola wáaja, “Valukholo lwangu, nikwiliile kivajovela bahawuvalafu kiija, umbuyeesu uDawudi uyo wáfwile, vamusiila, ilijooja lyakwe mbakha iminsiyaano lili baaha. 30Leelo hata ndeeno, uDawudi akhandi mukuwamalago, wámanyaga kiija, uNguluvi wáfingaga kwa kiyiyiiga kiija, akhamuviikha umuunu yumo uwa shikholo shaakwe ateme mu wutwa waakwe. 31UDawudi wágaagaga gina gakhayinsa, na gina gamugahaga kiija, ajove ulwa kifyukha kwa Kilisito#2:31 Kilisito: Liswi lya Shiyunaani. Kwa Shihebulaniya viija Mesiya. Yimba iliswi Kilisito mu Maswi aMahensa. kiija, uNguluvi asikhamuleshile kwa vina vafwile, umuvili gwakwe gusikhawolile.

32“Uyu uYeesu, uNguluvi wámufyusa kihuma kwa vina vafwile. Ose woona tili valunjikhaaji va liswi ili. 33Lino uNguluvi wámutupikha uYeesu kwa kimuviikha ulubali lwakwe ulwa kundiilo kiija, ateme lumo nu mwene. UYeesu wátuleetela uNumbula uMunofu yuna uDaada wátahisaaga, ago gageene gina mukigaaga na kigapulikha. 34UDawudi asikhandi ikiyitambula yumwene, kwa kiiva umwene asikhalutile kushaanya. Hata ndeeno, umwene wájovile ndeeni,

‘UMutwa uNguluvi wámujeele uMutwa wangu wáaja,

“Khala ku liwokho lyangu ilya kundiilo,

35mbakha pina nikhava nakutanga

uvamene avalugu vaakho na kivatema.”’#2:34-35 Yimba mu litaafili lya Sabuli 110:1.”

36UPetulo wáamala kwa kilogola wáaja, “Lino, aVaisilaheli woona visakulwa vamanye wunofu kiija, uyo uYeesu yuna omwe mwamukhomelelaga pa musalaaba, uNguluvi wámuviikha kiiva Mutwa, khanji yu Mukulusaaji yuna uNguluvi wátahisaaga kimufilikha.”#2:36 Mukulusaaji yuna uNguluvi wátahisaaga kimufilikha: Kwa Shiyunaani yiyandiikhwe Kilisito. Kwa Shihebulaniya viija Mesiya. AVayahuudi vatambulaga ilitaawa lya Mesiya kiija, yu muunu yuna wábagulwagwa nu Nguluvi. Khanji wátahisiwaagwa kifilikhwa kiiva Mukulusaaji kwa vaanu. Yimba iliswi Kilisito mu Maswi aMahensa.

37AVayahuudi vala, vaganile kipulikha amaswi ago, gavanyaanyaga mandu mu numbula saanave. Vavaposa uPetulo lumo na vanandeje avayine vaaja, “Valukholo lwesu, lino tigahe shi?” 38UPetulo wávayankha wáaja, “Shila muunu alambiisile uwunansi waakwe, na kitwinisiwa kwa litaawa lya Yeesu Kilisito, baheene, asaajilwe na kiposheela ishipeelwa sha Numbula uMunofu. 39Kiiva ulutaahiso ulo luna uNguluvi wátahisaaga pawukuulu, lino ikivagahila omwe, avaana veenyu na vanji woona vina vali kutali, lulwene kiija woona vina uMutwa uNguluvi weesu akhavashemeela.”

40UPetulo wáyitenekha kivajovela avaanu vala amaswi ganji minshi aga kivapavila. Wávakuviilisa wáaja, “Mukulusiwe nu Nguluvi musikhahigwagwa lumo na vaanu va shisafi ishi, vina vavi mandu.” 41Avaanu vinshi vagahuviilila amaswi gaakwe, vatwinisiiwe ilisiku lila. Avaanu vayonjelela mu shipuga sha vahuvililaaji, vafishile magana mashumi gatatu (3,000) ndeeni.

Ishipuga sha vahuvililaaji va Yeesu

42Avahuvililaaji awo vakhalaga papaamo kwa numbula yimo mu mamanyiso ga vanandeje, vakhandi viilya iShakiilya sha Mutwa uYeesu#2:42 Vakhandi viilya iShakiilya sha Mutwa uYeesu: Uluganulo lwakwe, vamenyulanaga umukhaate kwa kiiva ya Shakiilya sha Mutwa. lumo na kifuunya kwa Nguluvi. 43Avaanu woona vakhandi viswiga mandu na kimutiila uNguluvi, kwa kiiva ya miitu na mabikha minshi gina gasenjekhaga na vanandeje. 44Avahuvililaaji woona vakhandi shipuga shimo, vakhandi vihanga shila shiinu na kipeelana ifiinu fyanave. 45Vakhandi viigusa ifiinu fyanave, ihela sina vapataga vakhandi vikisigava na kimupeela shila muunu yuna agayile. 46Vakhandi vikungaana nsiku soona mu lukeeke lwa nanda imbaagule iya kifuunyila.#2:46 Nanda imbaagule iya kifuunyila: Yimba iliswi ili mu Maswi aMahensa. Vaalya lumo iShakiilya sha Mutwa uYeesu, mukhaaya saanave. Vakhandi vihanga kiilya ifyakiilya lumo kwa numbula nofu na kwa wushendeefu. 47Vakhandi vikimusufya uNguluvi na kidobokhwa na vaanu woona. Nsiku soona uMutwa uYeesu akhandi ikivakulusa avaanu avanji, vina vakhandi vihuviilila, vahanga na vayaanave mu shipuga sha vahuvililaaji.

Currently Selected:

Nsengo sa Vanandeje 2: Shisangu

Highlight

Copy