Nsengo sa Vanandeje 4

UPetulo nu Yohana pa livansa lya Vayahuudi

1UPetulo nu Yohana pina vikilikhoma iliswi ku vaanu vala, baaho vayinsa avatambule,#4:1 Avatambule: Yimba iliswi Vatambule mu Maswi aMahensa. aVasadukaayo,#4:1 AVasadukaayo: Yimba iliswi Vasadukaayo mu Maswi aMahensa. lumo nu mukhome wa vayangalilaaji va nanda imbaagule iya kifuunyila. 2Avakhome awo vayinsaga vakhaleele mandu kwa kiiva uPetulo nu Yohana vakhandi vimanyisa avaanu na kikhoma viija, kifyukha kwa Yeesu kiwonensa kiija, vina vafwile vakhafyukha. 3Ago gapinsaaga avakhome awo vavakhate uPetulo nu Yohana, vavadindila mu shifungo. Kiiva kukhandi shaamihe, vahepelesa kushe ulwamilaawu njine. 4Hata ndeeno, ago gina uPetulo nu Yohana vavajovelaga avaanu vinshi vagahuvililaga. Uwinshi wa vagoosi veene duguli vina vamuhuvililaga uYeesu, vafishile vaanu magana mashumi gasaanu (5,000).

5Kwaganile kiisha, avatambule avakhome, avakhome va Vayahuudi, na vamanyisaaji va ndaji sa Musa#4:5 Avatambule avakhome, avakhome va Vayahuudi, na vamanyisaaji va ndaji sa Musa: Avaanu awo vakhandi vakhome va livansa lya Vayahuudi. Yimba iliswi Livansa lya Vayahuudi mu Maswi aMahensa. vakungaanile apo pa Yelusalemu. 6Mu livansa, kukhandi nu mutambule umukhome#4:6 Mutambule umukhome: Yimba iliswi Vatambule mu Maswi aMahensa. uAnasi, lumo nu Kayafa, uYohana uyunji, uAlekisanda, na vanyalukholo avanji va Anasi. 7Avakhome woona awo vavaleeta uPetulo nu Yohana, vavayiimya kumwandi yaanave, vayansa kivaposa kiija, “Ago gina mwagasenga, mwagasenga kwa ngufu nshi, na kwa wutawulilwa wa naani?”

8UPetulo wálongosewa nu Numbula uMunofu, wávayankha wáaja, “Omwe vayimililaaji na vakhome va Vayahuudi! 9Iminsiyaano mukituposa ose ulwa nsengo inofu yina yasengwagwa kwa muunu uyu, yuna akhandi mulema, na shina wáponaga. 10Ndeeno omwe woona lumo na Vaisilaheli avanji woona, mumanye wunofu kiija, umuunu uyu yuna ayiimile kumwandi yeenyu, wáapona. Wáava muumi kwa wutawulilwa wa litaawa lya Yeesu Kilisito uwa ku Nasaleti. Uyo yumwene omwe mwamukhomelelaga pa musalaaba, leelo uNguluvi wámufyusaaga kihuma kwa vina vafwile. 11UYeesu uyo, yumwene yuna aMayandikhwa aManofu gayandiishe kiija,

‘Ilingʼanga lina mwalikhaanaga omwe vasengaaji va nanda,

ilyo lilyene liveele lingʼanga likhome ilya ku mbogonyo ya luutu lwa nanda.’#4:11 Lingʼanga likhome ilya ku mbogonyo ya luutu lwa nanda: AVayahuudi vasengaga inanda kwa kiviikha ilingʼanga ku mbogonyo ya luutu lina likhatiliile inanda yoona. Ilingʼanga ilyo likhandi likhome lina likheete inyengo sivili. Yimba mu litaafili lya Sabuli 118:22.

12“Kusiina umuunu uyunji yoyoona yuna akwiliile kitukulusa, leelo yu Yeesu mwene duguli. Kusiina ilitaawa ilinji lyolyona mu nyi muno, lina likwiliile kitukulusa kihuma mu wunansi.”

13Avakhome vala vaganaga kiwona kiija, uPetulo nu Yohana vikivayankha kwa wukhangafu, khanji vakhandi vaanu vina vasikhayimbiile ishuule, vaswigaga mandu. Vamanyaga kiija, uPetulo nu Yohana vakhandi lumo nu Yeesu. 14Leelo avakhome awo vaganile kimwaga umugoosi yula wáapona ayiimile apo lumo nu Petulo nu Yohana, vagombolaga amaswi aga kilogola. 15Vavalajisaaga uPetulo nu Yohana kiija, vapoole mu livansa lyanave lila. Aveene vasigala visimilana, 16viija, “Tisiigahe wuli na vaanu ava? Loleela, avaanu woona vina viikhala apa pa Yelusalemu vaamanya kiija, vagahile ilibikha likhome, tisikwiliile kilikhaana. 17Lino tivakhaane kwa nsila ya kivakhakhafya, valeshe kitambula ilitaawa ilyo kwa vaanu, baheene imola iyi yisikhayalalilaga mandu kwa vaanu.”

18Baheene avakhome vala vavashemeela uPetulo nu Yohana, vavakhaana kwa ngufu vaaja, “Musikhalogolaga lyolyona wala kimanyisa kwa litaawa lya Yeesu!” 19Leelo uPetulo nu Yohana vaaja, “Omwe yuumwe mulamule, nda yifwaya pa Nguluvi kiija, tivatiile omwe awu timutiile uNguluvi. 20Kiiva, ago goona gina ose tagaagaga na kigapulikha, tisikwiliile kilekha kigalogola.”

21Avakhome vala, vayitenekhaga kivakhanyansa uPetulo nu Yohana kwa wukhali mandu. Leelo vagombolaga kivahiga, kwa kiiva avaanu woona vakhandi vikimusufya mandu uNguluvi, kwa libikha lina lyasenjekhaga. Baheene vavatawula vayilutilaje. 22Umuunu uyo yuna wáponisiwaagwa kwa libikha, akhandi ashisiise maakha mashumi gana.

Avahuvililaaji vikimufuunya uNguluvi kwa wujimfu

23UPetulo nu Yohana vaganile kidindulilwa, vaawuya kuna vakhandi avayaanave. Vavajovela amaswi ago goona gina vajoveelwe na vatambule avakhome, lumo na vakhome va Vayahuudi. 24Avayaanave vala vaganile kipulikha ulwa maswi ago, vamufuunya uNguluvi kwa numbula yimo vaaja, “Wee Mutwa Munya Ngufu Soona, yuuwe wawumbaga uwulanga, inyi, ibahali na fyona fina fikwali umo. 25Yuuwe wajovaga kwa nsila ya mbuyeesu uDawudi umuvanda waakho, ngaja shina wálongosewaagwa nu Numbula uMunofu kiija,

‘Kwashi avaanu va mu nyi iyi vikhalala,

khanji ifikholo fya Isilaheli fikwiliile kilamula wuvi?

26Avatwa va nyi vayipinyile,

khanji avakhome vakungaanile lumo,

kiija vamukhaane uMutwa uNguluvi nu Mukulusaaji#4:26 Mukulusaaji: Kwa Shiyunaani yiyandiikhwe Kilisito. Yimba iliswi Kilisito mu Maswi aMahensa. waakwe.’#4:25-26 Yimba mu litaafili lya Sabuli 2:1-2.

27“Yiwonekha bahawuvalafu kiija, umutwa uHelode#4:27 Umutwa uHelode: Yimba iliswi Helode mu Maswi aMahensa. nu Pontiyo Pilaato#4:27 Pontiyo Pilaato: Uyo munjaajila wa Shiluumi. Akhandi atemile inyi ya Yudeya na ya Samaliya. Umukhome waakwe akhandi yu Kayisaali, umutwa wa Valuumi. woope vakungaanile mu lijumbi ili ilya Yelusalemu, lumo na Vaisilaheli na vaanu va nyi isinji kiija, vamukhaane uYeesu umuvanda waakho uMunofu. Umwene wamubagulaga kiija, ave Mukulusaaji.#4:27 Mukulusaaji: Kwa Shiyunaani yiyandiikhwe Kilisito. 28Ago gina vasengaga awo gageene gina owe wagulumilaga kihuma pawukuulu kiija, gasenjeshe kwa ngufu yaakho na kwa wugani waakho. 29Lino Mutwa Nguluvi, loleela shina vatukhakhafya! Ututanje ose tili vavanda vaakho, baheene tilikhome iliswi lyakho kwa kijimba mandu. 30Tikikulomba ugolose iliwokho lyakho ilya kivaponia avaanu. Ututanje baheene tive tiigaha amiitu na mabikha minshi, kwa litaawa lya Yeesu umuvanda waakho umunofu.”

31Avaanu awo vaganile kimala kifuunya kwa Nguluvi, pala pina vakungaanile vaweene baaho pidegenkha. Woona valongosewa nu Numbula uMunofu, vayansa kikhoma iLiswi lya Nguluvi kwa wujimfu.

Avahuvililaaji vihansania ifiinu fyanave

32Avahuvililaaji woona vaava ni numbula yimo, amahiiva gaanave gakhandi gagaamo. Kusikhandi nu muunu yuna akhandi ilogola kiija, ifiinu fina anafyo fyakwe mwene duguli, kwa kiiva ifiinu fyanave fyona vakhandi vihansania. 33Avanandeje vakhandi vilunjikha kwa ngufu mandu kiija, uMutwa uYeesu wáfyukha kihuma kwa vina vafwile. UNguluvi akhandi ikivayimiilila mandu woona. 34Kusikhandi nu muunu mu shipuga shaanave yuna wáshepushilwagwa shiinu, kwa kiiva vala vina vakhandi na magunda awu nanda, vakhandi viigusa. 35Ihela sina vaposheelaga, vakhandi vikivapeela avanandeje. Ihela iso vasigavaga na kimupeela shila muunu yuna agayile.

36Kukhandi nu Mulaawi yumonga ilitaawa lyakwe akhandi yu Yusufu, akhandi mukhaaya wa shigunguli#4:36 Shigunguli: Uluganulo lwakwe nyi nyuumu yina yipiliimwe na malenga. sha Kipulo. Avanandeje vamupeelaga ilitaawa lya Balinaaba (uluganulo lwakwe, “Muunu wa kivatamya inumbula”). 37UBalinaaba woope wáagusa umugunda gwakwe, ihela sina wápataga, wátwala kwa vanandeje.

Currently Selected:

Nsengo sa Vanandeje 4: Shisangu

Highlight

Copy