Shiyanso 1

UNguluvi iwumba uwulanga ni nyi

1Pashiyanso, uNguluvi wáwumbile uwulanga ni nyi. 2Yoope inyi yikhandi miina yina yikhandi yigaya shiinu. Inshiisi yikhandi yigubiishe ifyogo fya malenga, uNumbula wa Nguluvi akhandi iyeleela pashaanya pa malenga.

Ilijuva lya wutasi

3Apo uNguluvi wáaja, “Wuve wuvalafu.” Baheene uwuvalafu waava. 4Wáawona kiija uwuvalafu wunofu. Wábaagula uwuvalafu ni nshiisi. 5Uwuvalafu wáwutambula “minsi,” inshiisi wáyitambula “shilo.” Shaava shaamihe, lwava lwamilaawu,#1:5 Shaava shaamihe, lwava lwamilaawu: AVahebulaniya viivasa ilijuva limo pina shaashila ishaamihe nu lwamilaawu. ili lyava lijuva lya wutasi.

Ilijuva lya wuvili

6-7Apo uNguluvi wáaja, “Imwenshe yive paakhati naakhati ya malenga, yibagulanie amalenga gina gali pashaanya na malenga gina gali pansi.” Yaava ndeeno. 8Imwenshe iyo wáyitambula “wulanga.” Shaava shaamihe, lwava lwamilaawu, ili lyava lijuva lya wuvili.

Ilijuva lya wutatu

9Apo uNguluvi wáaja, “Amalenga gina gali pansi ya wulanga gawungaane luvala lumo, baheene inyi inyuumu yiwoneshe.” Yaava ndeeno. 10Pa luvala uluumu wápatambula “nyi.” Uluvala lwa malenga gina gawungaanile wápatambula “bahali.” Wáawona kiija lunofu.

11-12Baheene uNguluvi wáaja, “Inyi yilembe ifimelo fina fiiva ni mbeyu fina fishwali na mapishi ga makhomo gina gana mbeyu shina gashwali.” Yaava ndeeno. UNguluvi wáfyaga kiija finofu. 13Shaava shaamihe, lwava lwamilaawu, ili lyava lijuva lya wutatu.

Ilijuva lya wuna

14-18Apo uNguluvi wáaja, “Kuve ni ngʼali ku wulanga, kiija sibaagule ishilo ni shiminsi. Khanji siwonense insiku, amaakha nu luhaavi ulwa fiwungo fya mwakha.” Ndeeno uNguluvi wáwumbile ingʼali sivili inkhome, lula ulungʼali ulukhome lwatema paminsi na lula ulungʼali ulunangʼana lwatema paashilo, wáwumbile nasi nondwe soope. Ingʼali iso wásiviikha ku wulanga sive singʼalikha inyi. Yaava ndeeno. UNguluvi wáfyaga kiija finofu. 19Shaava shaamihe, lwava lwamilaawu, ili lyava lijuva lya wuna.

Ilijuva lya wusaanu

20Apo uNguluvi wáaja, “Five fikwali ifiinu fyumi finshi mandu mu malenga ni nyuni sina sigulukha kushaanya ya nyi.” 21Ndeeno, uNguluvi wáwumbile inyangumi ni fiinu fina fyumi fina fiikhala mu malenga, fyamema shina fishwali na shila shiinu shina shigulukha shina sishwali. UNguluvi wáawona kiija finofu. 22UNguluvi wáfiyimiilila, wáaja, “Muyooloshe, muyenjelele, mumeme mu bahali, fyope fina figulukha fiyooloshe fiyenjelele mandu mu nyi.” 23Shaava shaamihe, lwava lwamilaawu, ili lyava lijuva lya wusaanu.

Ilijuva lya mutanda

24-25Apo uNguluvi wáaja, “Inyi yive ni fiinu fina fyumi fina fishwali, tije ifidiimwa, ifiinu fina fitambala ni nkhanu sa mu lihakha.” Yaava ndeeno. UNguluvi wáfyaga kiija finofu.

26Apo uNguluvi wáaja, “Tivawumbe avaanu kwa shihwano sheesu. Vasiteme inswi isa mu bahali ni nyuni isa kushaanya, inkhanu, ni nyi yoona, ni fiwumbwa fyona fina fitambala pashaanya ya nyi.” 27Baheene uNguluvi wámuwumba umuunu, umugoosi nu mudala, kwa shihwano shaakwe yumwene.

28UNguluvi wávayimiilila na wávajovela, “Musave, muyenjelele, muyimemye inyi, na kiyitema. Musiteme inswi sa mu bahali, inyuni sa kushaanya na shila shiwumbwa shina shijenda mu nyi.” 29Baheene uNguluvi wáajova, “Puliisi, navapeela ifimelo fyona fina fiikhoma imbeyu pa nyi apa na mapishi goona gina giikhoma amakhomo gina giiva ni mbeyu, ifyo fisiive fyakiilya fyenyu. 30Soope inkhanu soona isa mu nyi, inyuni soona isa kushaanya ni fiwumbwa fyona fina fitambala, ishakiilya shaanave shisiive masole ga fimelo.” Yaava ndeeno. 31Baheene uNguluvi wáawona kiija, shila shiinu shina wáwumba, shaava shinofu mandu. Shaava shaamihe, lwava lwamilaawu, ili lyava lijuva lya mutanda.

Currently Selected:

Shiyanso 1: Shisangu

Highlight

Copy

Want to have your highlights saved across all your devices? Sign up or sign in

Learn More About IShiyanso nu Lufingo uLupya